लूका 8
8
यीशु री चेलिया
1एता बाद यीशु नगरे-नगरे होर ग्राएं-ग्राएं प्रचार करदअ होर परमेश्वरा रे राज्य रे सुसमाचार शुणऊदअ लागअ होर बारह चेले तेऊ संघे थी। 2होर एखा बेटड़ी भी जोह दुष्टात्मा होर बीमारी का ठीक करी दी थी, होर त्याह याह साहा मरियम जासु वै मगदलेनी भी बोला, जासु का सात दुष्टात्मा काहडी दी थी। 3होर हेरोदेसा रे भण्डारी खुजा री बेटड़ी योअन्ना, होर सूसन्नाह होर भी बहू बेटड़ी। या आपणी कामाई का तेऊरी सेवा करदा थी।
वेजे शोटणे आले रा दृष्टान्त
(मत्ती 13.1-9; मरकुस 4.1-9)
4जेबा बखे बहू लोका कठे होई, होर नगरा-नगरा रे लोका तेऊ सेटा वै इछा थी, तेबा तेऊये दृष्टान्ता रे सावै खोजू। 5एक बउंण आल़अ वैजे बउंदअ निखदअ। बउंदे-बउंदे एखा वाता रै किनारे पडू सह फिंजी पाऊ, होर एखा सरगा रे चेलू चुंगु। 6धख शाफ्ड़े पडू, होर नांई लागा नमी नांई भेटण का सह शुका। 7एखा झाख्ड़े पडू, होर झाख्ड़े पडू होर झाख्ड़े सह बढ़ी करे जिहारु। 8धख बेजा रांबडी जमीना पैंदे पडू, होर लागी करे रांबडअ फल आणू यह बोली करे जोरे संघे बोलू, जासके कणेट हो त्या शुणा।
दृष्टांता रा मतलब
(मत्ती 13.10-17; मरकुस 4.10-12)
9तेऊरे चेले तेऊका ऐसा दृष्टान्ता रा मतलब पुछु की ऐसा दृष्टान्ता रा मतलब क़ैह साहा दा? 10तेऊ बोलू, तमावै परमेश्वरा रे राज्य रे भेदा री समझ दिनी दी साहा, पर होरी बे दृष्टान्ता रै जरीय शुणउदा, तेबा कि त्याह हेरदे भी नांई हेरना, होर शुणदे होए भी नांई समझी ।
बेजे शोटणे आले दृष्टान्त रा मतलब
(मत्ती 13.18-23; मरकुस 4.13-20)
11दृष्टान्ता रा मतलव यह साहा वैजा परमेश्वरा रा वचन साहा। 12बाता रे किनारे त्याह साहा, जासुये शुणू; होर तेभरी शैतान इछी करे त्याह रे मना कअ वचन निंदा कही ऐडा नांई होए कि बुशाह करी करे उद्धार पाये । तेबा शैतान इच्छी करे तयारे मना का वचन निन्दा। 13शाफ्डे पड़ी दे त्याह लोका साहा, जोह वचन शुणदे ही त्याह खुशी संघे त्या वचना मना, पर त्यामें जड़ा नांई साहा, त्या थोड़ी देरी तणी त्याह वचन शुणी करे बुशाह डाहदा; होर जेबा परीक्षा रे वक्ते त्याह भटकता। 14जोह वैज़ा कांडे में पडू, यह सह साहा बचन शुणा, होर ज़ेह नाशी करे पर फिक्र, होर ढब्वै, होर जिन्दगी आपणे खुशी संघे बिताऊणे रे चक्रा में तेऊ वैज रअ फलअ नांई पाकदअ। 15रांमडी जमीना में पडू दा बेजा त्याह लोका साहा, जोह बचन शुणी करे भले होर रामड़े में आपणे मना संभली डाहनदा होर मजे संघे फला आन्दा।
सजीये रा दृष्टान्त
(मरकुस 4.21-25)
16तेऊये त्याह वै बोलू, सजीये जाल़ी करे कोहे भी भाडे थाई नांई ढोपदे होर नाह तेयु मांजे थंई नाई डाहदे? तेऊ तेबा दीवटा पैंद डाहंदा कि मितर ईहण आले बे प्रियाश होए? 17किवकी कोहे भी चीज़ एड़ी नांई आंदी जोह गुप्ता में साहा; जासू नाई जाणा सह तेबा साहा की प्रकट नांई होए। 18एतकी तणी साबधान रहा की तमे कासु ढगे सगे शूणा; किबेकी जासु सेटा साहदा तेऊ बे होर भी दीणा; होर जासु सेटा नांई आंदा तेऊका सह भी बापस मगणा; जासु सह आपणे समझा।
यीशु री आम्मा होर भाई
(मत्ती 12.46-50; मरकुस 3.31-35)
19तेऊरी आम्मा होर तेऊरअ भाई तेऊ सेटा वै आऊय थी, पर बहू लोका हुणे री बजह का तेऊका मिली नांई सके। 20तेऊका बोलू, तेरी आम्मा होर भाई बागे खड़ीदे साहा त्या तह्का मिलणा चाहन्दा। 21ऐतके उतरा में तेऊ बोलू, मेरी आमा होर भाई याह साहा, जोह परमेश्वरा री गला शुणा होर मना।
ड़ीश बागर शांत करणी
(मत्ती 8.23-27; मरकुस 4.35-41)
22तेऊकी एकसा धयाडी यीशु आपणे चेले संघे किस्ती में बेठे होर चेले बे बोलू ईछा, हामा एसा नई पार नाहणा। होर त्या नाठे। 23जेबरे किश्ती चलदी लागी, तेबा यीशु सूतअ होर झीला में डीश बागर आई, होर त्याह हेरी किश्ती पांणी संघे भरदी लगी होर त्याह डूबणे रा खतारा होऊ। 24चेले यीशु सेटा नाठे होर सह सूतदअ बीझाऊ होर बोलू, हे गुरु, हामे डूबी चाली, तेबा यीशु ये उठी करे बागर होर पांणी री छाली ड़ांटी होर बागर रुकी। होर सारा शांत होउ। 25तेबा तेऊये आपणे चेले वे बोलू, “थारा बुशाह कही साहा” त्याह बखे डरी होर आपू मे बोलदे लागे यह कुण साहा बागर होर पांणी भी ऐउरी गल्ला शुणा होर मना।
एकी मणशा कअ दुष्टात्मा काहड़णी
(मत्ती 8.28-34; मरकुस 5.1-20)
26तेऊकी त्याह गिरासनियों रे देशे पूजै, जोह झीला रे पार गलीला रे सामने साहा। 27जेबा सह किश्ती मेंज़ा का निकतअ तेऊ तेवरी तखले प्रदेशा रअ एक मणश भेटअ जासु में दुष्टात्मा थी, सह आपणे सारे झिकड़े खोला थी होर नेगअ रहदा थी, होर घरा वै नांई रहंदा थी, सह कब्ररा में रहंदा थी। 28सह यीशु भाल़ी करे तेऊ ज़ेह पड़ी करे जोरे सगे बोलू, हे यीशु, महान परमप्रधान परमेश्वरा रे शोहरू ताहका महा कैह काम? हाऊं ताहका बिनती करा की महा वै दुःख नांई दे। 29किवकी सह तेसा दुष्टात्मा वै तेऊ मणश का पौहरी निखलण री आज्ञा दीनदअ लागदअ थी, किवकी सह तेऊवै भी-भी ईन्दा थी, तेऊ लोका शांगली संघे होर हथकड़ी संघे बाना थी, तेऊकी भी सह त्याह बंधन चोड़ी पाऊदा थी, होर दुष्टात्मा तेऊ बूणे भगाउदा थी, 30यीशु तेऊका का यह पूछू, “तेरा ना कैह साहा?” तेऊ बोलू, “मेरा ना सैना साहा”, किवेकी हामे खासी दुष्टात्मा साहा दी। 31त्याहे तेऊका अर्ज करी की हामा कही कुंडा में नांई पाये। 32तखे ज़ोता पैंदे एक सूरा रअ बड़अ छूंऊड चरदअ लागदअ थी, तेबा त्याहे तेऊका बिनती करी की हामा इऊ जुड़ा में नाहणे दे यीशु त्या नाहणे दीना। 33तेबा दुष्टात्मा तेऊ मणशा का निखली करे सूरा मीतरा बे नाठी होर सह झुण्ड झिला रे किनारे ठुरदे -ठुरदे सारे झीला पैंदे पड़ी होर त्याह डूबी करे सारे मूए। 34त्यारे गुआले जोह होऊ थी, तेता हेरी करी ठुरी, होर आपणे शहरा होर ग्रांए यह खबर खोजी। 35जोह होऊ, लोका तेता भालदे आउये। यीशु सेटा वै इछी करे त्याहे जासु मे दुष्टात्मा थी, तेऊये झिकड़े बानी करे होर रांमड़ बेठदअ हेरी करे डरी। 36होर भालण आले तेऊरा पूरा हाल चाल त्याह वै शुणाऊ की सह दुष्टात्मा रअ सातउदअ मणश केहडे सावे ठीक होऊ। 37तेबा गिरसनियो रे ओरी पोरी रे लोका यीशु का बिनती करी की महारे अखा का ठुर किबेकी, त्याह बखे डरी थी। यीशु किस्ती पैंदे चढ़ी करे ठुरु। 38जासु मन्शा का दुष्टात्मा काहडी थी होर सह तेऊका अर्ज करदअ लागअ की महा आपु संघे रहणे दे होर यीशु सह बिदा करु 39होर तेऊका बोलू, आपणे घरा बे नाशी करे, आपणे लोका वै खोज़ की परमेश्वरे तेरी तणी कैहडी सेवा दया करी करे बड़े-बड़े काम करी होर सह सारे नगरा में प्रचारा करदअ लागअ की यीशु ये मेरी तणी बड़े-बड़े चमत्कार करी।
याईर री मुईदी शोहरी होर एक बीमार बेटड़ी
(मत्ती 9.18-26; मरकुस 5.21-43)
40जेबरे यीशु आउअ तेबा लोका तेऊ कअ खुशी संघे मिली, किबेकि त्याह सभी तेऊ निहालद लागे दे थी। 41एतरे में याईरा ना रअ एक प्रार्थना घरा रअ सरदार थी, आउअ होर यीशु भाल़ी करे तेऊरी जाघा पड़ू, होर बिनती करी की मेरे घरा वै चालअ। 42किबेकि तेऊरी बारह साला री शोहरी, जोह मरने आली थी, जेबरे सह नाठअ तेबा लोका तेऊ प्रंदे पड़दे लागे। 43एक बेटड़ी, तेसा बारहा साला का लोहू बहूणे री बीमारी थी। सह बहू बईदा सेटा लाज करी-करी दुखी होई थी, होर आपणी सारी जिन्दगी री सारे ढबै खर्च करी करे भी ठीक हुणे लायक नांई थी। 44पीछा का इच्छी करे तेऊरे झिकड़े रअ पूंझ छूंऊ, होर तेवरी तेसका लोहू बहणा बंद होऊ होर तेसा आपणे शरीरा में जाणु की हाऊं एसा बीमारी का ठीक होई। 45पर यीशु ये बोलू, मेंरे झिकड़े कूणी छूंई? सभी बोलू हामे नांही छूई तेवा पतरसे बोलू, तहा प्रंदे भीड़ पड़दी लागी दी, होर बोला हाऊं कूणी छूंऊ? 46पर यीशु ये बोलू, कासुये हाऊं छुउ किबेकि माई जाणु साहा कि महा कअ सामर्थ्य निखदी साहा। 47तेऊकी तेसा जाणु कि हाऊं गोजी नांई सकदी, तेबा होर कामदे-कामदे आई, होर तेऊरे पईरे पड़ी करे सभी लोका रे सामने कासु बजाह का तूह छुहू होर सह तेवरी ठीक होई। 48तेऊये तेसा वै बोलू, हे शोहरीए, तेरे बुशाहे तूह ठीक करी, कुशल होई करे नाश, 49सह एड़ बोलदअदअ, लागअ थी की प्रार्थना घरा रे मुखया रे घरा का लोका इच्छी करे बोलू, तेरी शोहरी मुंईं, एवा गुरु वै दुःख नांई दे? 50यीशु एता शुणी करे तेऊवै उतर दीना, “नांई डरे, सीधी बुशाह डाह, सह बचणी।” 51घरे इच्छी करे तेऊये पतरस होर यूहन्ना होर याकूब होर छाड़ी करे, होर शोहरी रे आम्मा बापू छाडी करे कोहे भी आपु संघे कासी मीतरा वै इहणे नांई दीना। 52सबे तेसा वै लेरदे चिखदे लागदे थी, तेऊकी तेऊय मीतर नाशी करे त्याह का बोलू, तमे किवै लेरा पाउदे होर लेरदे लागे दे? यह शोहरी मुंई नांई, पर सूतिदी साहा। 53त्याह यह जाणी करे कि यह मुईदी साहा होर सह हासणे वै करू। 54पर तेऊ तेसकअ हाथ डाकी करे होर जोरे संघे तेसा वै बोलू, हे शोहरीये उठ। 55तेबा तेसके प्राण बापस आये होर सह तेवरी उठी। तेऊकी तेऊ आज्ञा दिनी कि एसा वै कुछ खाणे वै देया। 56तेसके आमा बापू हैरान होई, पर तेऊ त्याह का बोलू कि जोह होऊ तेता कासी वै नांई खोजे।
Nu geselecteerd:
लूका 8: ISJNT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.