मरकुस 12
12
माडे किसाना रा दृष्टान्त
(मत्ती 21.33-46; लूका 20.9-19)
1तेऊकी यीशु महापुरोहितों, शास्त्रियों होर बजुर्गा संघे दृष्टान्ता रे सावै गला खोज्दअ लागअ, एकी मणशे दाखा री बारी लाई, तेऊ बगिचे रे च़ौऊ तरफा गुम्मट लाऊ होर रसा वै एक कुण्ड कोतू होर एक पहरणे री तणी एक छान बणाई होर किसाना वै तेत्का ठेका देई करे आपु सह परदेसा वै नाठअ। 2तेऊकी तेऊये फला रे मौसमा रे वक्ते आपण एक नोकर भेजू की किसाना का दाखा री बारी का फला रा हिस्सा लअ। 3पर त्याहे सह ढाकु होर चि़कू होर खाली हाथे बापस भेजू। 4तेऊकी तेऊए त्याह सेटा वै एक होर नोकर भेजू, त्याहये तेऊरअ भी मूड फाल़ी पाऊ होर तेऊरी वैइजती करी। 5तेऊकी तेऊए एक होर भेजू त्याहे सह मारी पाऊ। तेबा तेऊए खासे नोकर भेजी त्याहे त्याह में एखा मारी होर एखा च़ीकी 6ऐवा एक रहू, जोह तेऊरअ प्यार रअ शोहरू थी, तेऊए सह एडा सोची करे भेजू की त्या एउरी इजत करले। 7त्याहे किसाने आपु में गला करी कि यह ऐउ बगीच रअ हूणे आल़अ मालक साहा, इच्छा हामा यह मारण तेबा यह बगीचा हमारा हूणा। 8त्याहे सह ढाकु होर मारी पाऊ होर दाखा री बारी बागे शोटू।
9तेबा दाखा री बारी रे मालके त्याह रा कैह करण? तेऊ ईछी करे त्याह कैह मारणे होर सह बगीचा होरी वै दिणा। 10तमे पवित्र शास्त्र मेंज़ा का यह वचन नांई पढू, जोह पाथर राज मिस्त्रीये माडअ खोजू सह कुणे रअ पात्थर बणू। 11यह परमेश्वरा री तरफा का होऊ, होर हमारी नज़रा में हेरानी रा काम साहा!
12तेबा त्याहे सह ढाकण चाहू त्याहे यह समाझु की ऐउये यह दृष्टान्त हामा वै खोजु पर त्याह लोका का डरी होर तेऊ छाडी करे नाठे।
केसरा वै कर दिणा
(मत्ती 22.15-22; लूका 20.9-19)
13तेबा त्याहे यीशु पसाउणे वै कई फरीसी होर हेरोदिया तेऊ जेह भेजी। 14होर त्याहे तेऊ सेटा ईछी करे बोलू, हे गुरु हामे जाणा, की तूह सचअ साहा, होर कासी री प्ररवाह नांई करदअ, किबेकी तूह मणशा रे मूंहा हेरी करे गला नांई करदअ, पर परमेश्वरा री बाता सचाई संघे खोजा। तेबा कानूना रे सावे कैह कैसरा वै कर दिणा, ठीक साहा या नांई? 15हामे दे या नांई दे? यीशु ये त्याह रा कपट जाणी करे बोलू; महा किवै परेखा? एक दीनार महा जेह आंणा, की हाऊं हेरू। 16त्याहे सिकअ आणू, होर तेऊए त्याहबे बोलू यह मूर्ति एता में कासकी साहा? त्याहे बोलू कैसरा राजे री। 17यीशु त्याहबे बोलू जोह कैसरा रा साहा तेऊ कैसरा वै देया होर जोह परमेश्वरा रा साहा तेऊ परमेश्वरा वै देया, तेबा त्याह तेऊरी गला शुणी करे हेरान होई।
पुनरुत्थान होर ब्याह
(मत्ती 22.23-33; लूका 20.27-40)
18तेऊकी जोह सदूकिय भी जोह एडा बोला, की जोह मूएदे रा पुनरुत्थान हूणा साहा ही नांई तेऊ सेटा ईछी करे तेऊका पूछते लागे 19हे गुरु मूसा हामावै लिखुदा की, ज़ेबा कासकअ भाई बिना शोहरू रे मरे होर तेऊरी बेटड़ी रहे, तो तेऊरअ भाई तेसा संघे ब्याह करे होर आपणे भाई रे बंश पैदा करे। 20सात भाई पहिले भाई बिना शोहरू रे मुंए 21तेबा दूजे भाई तेऊरी बेटड़ी संघे ब्याह करू होर बिना शोहरू रे मुंअ होर तेड़ह चिउण भाई भी मुंअ 22होर साता भाई रे शोहरू नांई होई सभी भाई पीछे सह बेटड़ी भी मूंई 23जेबरे त्याह सवै पुनरुत्थान में जिऊंदे हुणे सह कासकी बेटड़ी हुणी किबेकी सह साता भाई री बेटड़ी रही दी थी। 24यीशु त्याहवै बोलू, कैह तमे एउ कारणा का बिसरा में नांई पड़ी कि ना तमे पवित्र शास्त्रा जाणदे, होर ना ही तमे परमेश्वरा री सामर्थ्य जाणदे 25किबेकी जेबरे त्याह मरी करे जिऊंदे हुणे तेबा त्याह रा ना ब्याह हुणा होर ना ही त्याह ब्याह वै भेजणे, पर त्याह स्वर्गदूते संघे हुणे। 26मुएदे रे जिऊंदे हुणे रे बारे में तमे मूसा री कताबा में झाड़ी री कथा में नांई पढू, परमेश्वरे तेऊवै बोलू, कि हाऊं अब्राहमा रअ परमेश्वर होर इसहाका रअ परमेश्वर होर याकूबा रअ परमेश्वर साहदअ? 27परमेश्वर मूएदे रअ नांई पर जिऊंदे रअ परमेश्वर साहा, तेबा तमे बड़ी भुला में पड़ीदे साहा।
सबिका बड़ी आज्ञा
(मत्ती 22.34-40; लूका 10.25-28)
28होर शास्त्री मेंजा का एकीये सह गला करदअ शुणू होर यह सोची करे की तेऊए रामबडे ढंगा संघे उतर दीना तेबा तेऊए तेऊका पुछू सबिका बड़़ी आज्ञा कुण जेडी साहा? 29यीशु तेऊवै उतर दीना सभी का बड़ी आज्ञा हे इस्राएल शुण प्रभु हमारअ परमेश्वर एक साहा 30होर तूह प्रभु आपणे परमेश्वरा संघे आपणे सारे मन होर आपणी सारी बुद्धी होर सारी आपणी शक्ति का प्रेम डाहे। 31होर दूजी यह साहा तूह आपणे ग्राई संघे आपु जेहड़ा प्रेम डाह एतका बड़ी आज्ञा कोहे नांई साहा। 32शास्त्री तेऊबै बोलू, हे गुरु, बखे बडिया! ताईऐ सच बोलू परमेश्वर एक साहा तेऊ छाडी होर कोहे नांई आन्ध। 33होर तेऊका सारे मन सारी बुद्धी होर सारे प्राण होर सारी शक्ति संघे प्रेम डाहणा होर आपणे ग्राई संघे आपु जेहड़ा प्रेम डाहणा यह सारे बलिदाना का बढी करे साहा। 34जेबा यीशु हेरू की एऊए समाझा संघे उतर दीना, तेबा तेऊबै बोलू तूह परमेश्वरा रे राज्य का दूर नांई आन्धा, तेता बाद कासी भी तेऊका पूछण रा सहास नांई होऊ।
मसीह कासरअ शोहरू साहा
(मत्ती 22.41-46; लूका 20.41-44)
35तेऊकी यीशु देहुरे उपदेशा दिन्दे वक्ते यह बोलू, शास्त्री कैहडे बोला की मसीह दाऊदा रअ शोहरू साहा? 36दाऊदे आपे ही पवित्र आत्मा का बोलू प्रभु मेरे प्रभु का बोलू, तेवरे तणी तमे मेरी धुरा फेरे बैशे, जेवरे तणी मांई थारअ दुश्मन थारी ज़ाघा थाई नांई पाउले । 37दाऊद आपे ही तेऊवै परमेश्वर बोल़दा, तेऊकी सह तेऊरअ शोहरू कैहड़ होई सकदा? होर सभे ठिंग्गा तेऊरी गला खुशी संघे शुणदे लागे थी।
शास्त्री का बच़ी करे रहणा
(मत्ती 23.1-36; लूका 20.45-47)
38तेऊ आपणे उपदेशा में ऐडा भी बोलू, शास्त्री का सावधान रहा, जोह लामे-लामे चोगे बानी करे हाडदा होर बाज़ारे लोडी त्याह वै ठिगे नमस्ते करू, 39होर प्रार्थना घरे बड़ी-बड़ी ज़ागहा चाहदा होर धामा मेंजे भी बड़ी-बड़ी ज़ागहा बेशणा चाहदा। 40त्याह विधवा रै घरा लुटी करे, होर रीहाऊंणे री तणी बड़ी-बड़ी प्रार्थना करा। त्याह बहु दण्ड भेटण।
बिधबा दिना दान
(लूका 21.1-4)
41सह देऊरे री स्दुकडी सेटा वैशी करे हेरदअ लागअ, कि लोका देहुरे दान कैहडे फेरे पाऊदा; होर सेठे बऊ ढवै पाई। 42तेतरे में एक गरीब बिधबा बेटड़ी आई होर तेसा दुई धेले (होछे चाबे रे सिक्के ), जोह एकी सीके बराबर हुंदा, पाई। 43तेबा तेऊए आपणे चेले आपु सेटा वै शादी करे त्याह वै बोलू, हाऊं तमा का सची बोलदा ऐउ भण्डारा में पाऊणे आले मेंज़ा का सभी का ज्यादा ऐसा गरीब बेटड़ी दिना; 44किबेकी सभी आपणे हिस्से का दिना, पर ऐसा आपणी पूरी उम्रा री कमाई दिनी।
Nu geselecteerd:
मरकुस 12: ISJNT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.