Mattĕo 18

Adogudŭ ḿî Bò̄bwè?

(Mărko 9.33-37; Lŭka 9.46-48)

1B́ĕnu akhî bōhmubicè tòcò lehtî Jezŭ kî cò d́ò lōwa gōjo, “D́ŏ Mò̄kho Ahtĭage abu adogudŭ ḿî bò̄bwè?”

2Kîd́ò̆ Jezŭ jole abĭsèpho dèbwè cò ò, kî Za hna ò lōwa d́ŏ cè tòcò athaklăḿè̆bŭ nu. 3Kî cò d́ò, “Jò d́ò thĭ adî̄ahma, Thĭ gā ta b́ăkhlè thĭ tha ńò, thĭ gi dî phî̆hta acab́ô̆ abĭsèpho tòcò nu ńò d́ō, thĭ de lenīb́è Mò̄kho Ahtĭage abu ńò. 4Mègōnu d́ō, bija dèbwèbwè gè bè̄b́ôla ane acab́ô̆ abĭsèpho ajo dèbwè nu d́ō, zi kî̄ ḿî adogudŭ d́ŏ Mò̄kho Ahtĭage abu nu. 5Kîd́ò̆ bija htè ajoakè abĭsèpho acab́ô̆ ajo d́ŏ Ji mi abu dèbwè, jo kè tèpwè Jè.

Dèsèkô̆ni Dèd́è̆lî̄ klè Atè è ńò Ale

(Mărko 9.42-48; Lŭka 17.1,2)

6“Barasă bija htè ad́è̆lî̄ abĭsèpho ab́u Jè tòcò aklè̆ dèbwèbwè, htè dè atè è ńò dèbwè nu, akè è d́okhlŏ ḿî dè gā gāwè̄ zò gò̄lò scisolo kî gî̄ htîladēnī cè d́ŏ pèllèhtĭ alajò̄ abu nu. 7Dèd́è̆lî̄ klè atè è ńò akhoacè̆, Lākho b́è hôkî̆kkè. Manè̄ kòd́òdo dō, dèd́è̆lî̄ klè atè è ńò kò ò kô̆thòŕò̆, barasă bija htè zo kho zè cè̆ dèd́è̆lî̄ klè atè è ńò òhta dèbwè nu kè̄ b́èhôkî̆kèkò̆.

8“Kîd́ò̆ nu cukhò ḿîwî, na khakhò ḿîwî kè d́è̆lî̄ ni ma klè atè è ńò d́ō, d́ahtè̆dūkè̆ kî hwĕphlòḿĭ cè. Nu cudū khadū nòthò̆, ne lenīb́è dèò abu d́ō, ni nikhĭ è d́olĭ kîd́ò̆ nu cu na kha ò hwă gīkhò̆ lōlō, nè b́è htîladēnī d́ŏ hmî alahtŭlablo aklè̆ nu. 9Kîd́ò̆ na gādŭ kè̄ d́è̆lî̄ nè klè atè è ńò d́ō, cîẃî̆phlòladē kî hwĕphlòḿĭ cè. Ne lenī dèò abu kî na gādŭ dophlo lò ḿî ni nikhĭ è d́olĭ kîd́ò̆ na gādŭ ò hwă gīphlo lōlō, nè b́è dè htîladēnī Larrā ahmîklè̆ nu.

Thŏ Ahlè̆mè̄ Agèlè

(Lŭka 15.3-7)

10“Sòibò̄ thĭ ne cab́ô̆htè thĭ gè̄ dèhtèkè̆ abĭsèpho ajo tòcò aklè̆ dèbwèbwè ńò nu, manè̄, Jò d́ò̆sa thĭ, d́ŏ Mò̄kho nu zè Mò̄khobwèzo tòcò tcawè̄htî thèj́ô̆ Ja Pa aò Mò̄kho dèbwè amūkă.

11“Manè̄ kòd́òdo dō, Bija Apho la ḿî cab́ô̆htè Zè gè̄ mèhlô̆htage dè htè ahlè̆mè̄gè nu.

12“Thĭ gomo cadè̄? Bija dèbwè athŏ kò ò dègèjè, kîd́ò̆ thŏ tòcò aklè̆ tod́ŏ gè hèphrò ma d́ō, zè dè lè̄lakè̆ lwīthôdiscĭ lwīthôtod́ŏ d́ŏ khòlò̆kho nu ńò, kî ze de le wāhlège ahèphrò tod́ŏ ńò ā? 13Kid́ò̆ za ka tcahtîge ma cè è̆ d́ō, Jò d́ò̆sa thĭ adî̄ahma, anu to d́ŏ acè̆ ca ka thaganāi d́olĭkò̆ adèhèphrò ńò lwīthôdiscĭ lwīthôtod́ŏ akho nu. 14Gōnu akhò̆pha, thĭ Pa aò d́ŏ Mò̄kho dèbwè nu da thaèni abĭsèpho ajo tòcò gè̄ kè̆ gè̄ hlè̆mè̄ dèbwè̆ ńò nu.

Dèprage Thè̆buthè̆we Tòcò

15“B́èkhè̆ nè thè̆buwe dèbwè gè̄ mèkèḿè nè d́ō, le hò̆bò̄ cè, nè kî cè lò. Zò gò̄ sòkhĕńe ne lē d́ō, nè mènigekò̆ nè thè̆buwe. 16Ḿî zò gò̄ dò sòkhĕńe ne lē ńò d́ō, jobò̄ ńò khò̆ dèbwè gībwè be, cab́ô̆htè thè̆thî gībwè thŏbwè alòmò bu dèjî̄b́è gē hme gō globò̄ gô̆ ahmô̆ nu. 17Kîd́ò̆ zò gò̄ dò sòkhĕńe lōwa alē ńò d́ō, d́òsabò̄ Dèòplo; kîd́ò̆ zò gò̄ dò sòkhĕńe Dèòplo alē ńò d́ō, zi mi d́ò̆è ni nikhĭ acab́ô̆ bwèthŭkupho kî bwèdadèhmŭ dèbwè nu.

Dèmèd́îd́ă kî Dèihlô̆ila

18“Jò d́ò̆sa we thĭ ahlò̆mò̄, dè arră thĭ cŏglo d́ŏ Lākho nu, kèb́è cŏglokò̆ d́ŏ Mò̄kho, kîdò̆ dè arră thĭ b́ăplè d́ŏ Lākho akho nu kè̄ b́è b́ăplèkò̆ d́ŏ Mò̄kho nu nu.

19“Jò d́ò̆sa thĭ tapla be, htè thĭ klè̆ gībwè, thŏbwè atha ka d́wă hwă lōwa, za gā dadè dimimi d́ŏ Lākho akho jo d́ō, Ja Pa aò Mò̄kho dèbwè ki ila tèpwè cè. 20Manè̄ kòd́òdo dō, b́ĕ bija gībwè, thŏbwè òplo lōwa Ji mi abu alle nu, Jò ò tèpwè cè klè̆ b́ĕnu.”

Zôpho Ata b́ăplè Akhò̆ ńò Dèbwè

21B́ĕnu, Petru lehtî Cè kî cò d́ò, “B́ĭcè, jè thè̆buwe gè̄ mèkèḿè jè d́ō, ja b́ăplè b́è cè bwīpla? Htô̆ ab́ahta thăthôtapla ā?”

22Jezŭ d́òge cè, “Htô̆ ab́ahta thăthôtapla, Jò tò d́ò nè ńò; ḿî htô̆ ab́ahta thăthôtapla apla thăthôdiscĭ dòkhò̆. 23Mègōnu d́ō, Mò̄kho Ahtĭage mè acab́ô̆ Saphra abè̄hta atha agî̄ phî azôpho akho cèrè̆ dèbwè nu. 24Kîd́ò̆ b́ĕ zô htôtcad́è̆tca akăhtî nu, bija htè acwĕ b́è Saphra hô̆ talè̆nta dòthò̆ dèbwè b́ècwilegè Saphra ahlò̆mò̄. 25Ḿî cè nu, dèplegei acwĕ tò ò dimĭ ńò d́ō, ci B́ĭcè hmèlagè bija gè̄ sè̆ cè, kî zè hmè̆ kî zo pho tòcò, kî zè dèlŏcăcè kîd́ò̆ za pleibò̄ cwĕ gōnu. 26Barasă zôpho anu dèbwè gò̄la zò hlò̆mò̄ kî za dakhòwè lōwa gōjo, ‘Khòthad́ò̆bò̄ jè tîkî, kîd́ò̆ ja gē plege lŏ d́ò̆è nè è̆.’ 27Kîd́ò̆ zôpho ab́icè khòwè cè d́ō, ca b́ahlô̆ lŏ tèpwè lōwa acwĕ.

28“Barasă zôpho anu dèbwè hèhta d́ō, zè htèglè̄ni zò khò̆ zôpho htè acwĕ b́è cè hô̆ dègèjè dèbwè nu; kîd́ò̆ cô pôglo lōwa; cî cî̆cîgò̄ lōwa kî cò d́ò, ‘Plege ne cwĕ.’ 29Kîd́ò̆ zò khò̆ zôpho gò̄la zò hlò̆mò̄, za da thakhòwè lōwa gōjo, ‘Khòthad́ò̆bò̄ jè tîkî, kîd́ò̆ je gē plege lŏ d́ò̆è nè è̆.’ 30Barasă cè tè è ńò; Ze le htîladē lōwa dèkî̆dî̄ abu htô̆ ze gē plegeni hwă ze cwĕ nu. 31Ḿî zò khò̆ zôpho alewe tòcò kèhtî dè mè ane gōnu d́ō, ca thadòmògè tîkî̆ ńò, kî ze le d́ò̆sa lŏ ci b́icè dèwîdèkè̆ aphî̆htagè tòcò nu. 32B́ĕnu ci b́icè jo cè kî cò d́ò lōwa gōjo, ‘Zôpho akî̆kkè, na dakhòwè jè d́ō ja b́ăplè lŏ thè̆ne cwĕ nī. 33Mègōnu d́ō, acab́ô̆ jò khòwègè nè nu, ńò dò khòwèb́è ńò khò̆ zôpho ńò ā?’ 34Kîd́ò̆ ci b́icè thèhtè d́ō, ci ila lōwa d́ŏ amèssègnè̆ bija tòcò acukhòbu nu, htô̆ ze gē plege lŏ cwĕ nu.”

35“Acab́ô̆ gōnu, thĭ gô̆ abwè gā ta b́ăplè lŏtholŏtha athè̆buwe ńò d́ō, Apa aò Mò̄kho dèbwè gè̄ mèkò̆ thĭ gōnu lò lò.”

Nu geselecteerd:

Mattĕo 18: GRNT21

Markering

Deel

Kopiëren

Wil je jouw markerkingen op al je apparaten opslaan? Meld je aan of log in

Meer informatie over Geba Roman New Testament

Mattĕo 18

Populaire Bijbelverzen uit
Mattĕo 18

Bijbel:

Karen, Geba

Vertaling: Geba Roman New Testament - GRNT21

Mattĕo 18

Mattĕo 18

Populaire Bijbelverzen uit Mattĕo 18

Bijbel:

Karen, Geba

Vertaling: Geba Roman New Testament - GRNT21

Mattĕo 18

Populaire Bijbelverzen uit
Mattĕo 18