Mattĕo 9

Acuthĭkhathĭ d́ŏ Kapèrnaum U Dèbwè

(Mărko 2.1-12; Lŭka 5.17-26)

1Jezŭ khè̆htanī khlĭ tèb́è abu, Za hwădū pèllè kî Ze gegè d́ŏ Cu u nu. 2Kîd́ò̆ tcabò̄, bija lèi cò ò acuthĭkhathĭ agò̄laò leḿĭkho dèbwè. Jezŭ tcahtî cè tòcò adèb́u d́ō, cò d́ògè acuthĭkhathĭ dèbwè, “Aphokhŏ, bè̄sôbò̄ na tha, nè dèkhòwè tòcò hlô̆ tèpwè.”

3Kîd́ò̆ tcabò̄, Skrĭbāpho tòcò aklè̆, tòcò cò d́ògè d́ŏ athaobu gōjo, “Bija dèbwè jo, cò d́òkè̆d́òôgè Kib́ĭcè.”

4Jezŭ thîhè̆ zè dègomo tòcò d́ō Cò d́ò, “Thĭ gomo ma dè atè è ńò thĭ thaobu nè̄? 5Dèjî̄b́è htè ‘Nè dèkhòwè hlô̆ tèpwè,’ ahjŏ d́okhlŏ ā? Ḿî̆dîḿî ńò, ‘Wè̄hto kî hèbò̄,’ ḿî ahjŏ d́okhlŏ ā? 6Barasă cab́ô̆htè thĭ gi thîhè̆bò̄ Bija Apho dèbwè acô̆thèlè̆ ò ab́ăplè bija adèkhòwè dŏ lākho akho jo nu,” b́ĕnu Cò d́ò acuthĭkhathĭ dèbwè, “Wè̄hto, phî ne leḿĭ kî gebò̄ ni hi.”

7Kîd́ò̆ zè wè̄hto kî ge tèpwègè zi hi. 8Bija aboahò kèhtî dè ajo d́ō, zi scisăgè, kî htăigè Kib́ĭcè adòathe, htè aila bija dècô̆dèthèlè̆ ado pwĕ gōnu dèbwè nu.

Mattĕo Adèb́èjo

(Mărko 2.13-17; Lŭka 5.27-32)

9Jezŭ hèhta hwă b́ĕnu d́ō, Ca tcawè̄htî bija dèbwè sańăò dèhmŭ adadākho, zi mi ḿî Mattĕo; kîd́ò̆ cò d́ò lōwa, “Lekô Je le,” kîd́ò̆ ze wè̄hto lôkô tèpwè lōwa ale.

10B́ĕ Jezŭ sańăò aò̆ d́ŏ hi dawa abu akhî nu, tcabò̄, adadèhmŭ tòcò kî dèkhòwèpho òè̆bwè le sańăkôgè Jezŭ kî zo bōhmubicè tòcò akă. 11Kîd́ò̆ Pharizè̆pho tòcò tcahtî ajo d́ō, cò d́ò lōwa abōhmubicè tòcò, “Thĭ sara a ò̆ plo ma adadèhmŭ kî dèkhòwèpho tòcò nè̄?”

12Jezŭ thîhè̆b́è dèjî̄b́è ajo d́ō, Cò d́ò, “Bija amô̄ahma tòcò anikhĭ dihwi sarado loba ńò, aloba ḿî bija ascwiasè̆ tòcò nu dòkhò̆. 13Mègōnu d́ō, le mèhlô̆bò̄ dèjî̄b́è jo ahtabohtab́ă. ‘Ja thaèni dèkhòwèhmòb́è, tè b́è dèhluhtai ńò.’ Manè̄ kò̄ d́òdo dō, Ja da la joge bija adî̄ahma tòcò ńò, ḿî dèkhòwèpho tòcò dòkhò̆.”

Dèd́u Dèadèò̆

(Mărko 2.18-22; Lŭka 5.33-39)

14B́ĕ nu, Zowănnī abōhmubicè tòcò lehtî Cè kî cò d́ò, “Mè cadè̄, wa kî Pharizè̆pho tòcò d́u dèadèò̆ tod́o lò, tod́o lò, ḿî No bōhmubicè tòcò tu d́u ma ńò nè̄?”

15Kîd́ò̆ Jezŭ d́ò cè tòcò, “Amikhŏ aphîcu dèbwè akhò̆athò òkôwe ca kă athŭtherĕ zō othootha zabò̄ ā? Barasă aniathè̆ gō dokò̆ htè dè tòcò gī phîthĭwīkò̆ cè amikhŏ aphîcu nu; kîd́ò̆ b́ĕnu zu gū d́ukò̆ dèadèò̆.

16“Kîd́ò̆ bija dò bòd́èi tîkî̆jā kò̆lā athè̆ scid́ŏjā alò dèbwè̆ ńò. Manè̄ kòd́òdo dō, aphehtèllè tîkî̆jā scid́ŏ alò, kîd́ò̆ ahtèĺè khò̆hta d́okhlŏ. 17Bija tè b́è̆nī thobiscihtĭ athè̆ akŏdèphe ali abu ńò ńò; bija gè̄ mè ma do d́ō, dèphe bopha, kî thobiscihtĭ lahlò, kî akŏdèphe kè̆lō tèpwè. Ḿî bija b́è̆nī thobiscihtĭ athè̆ akŏdèphe thè̆ abu; kîd́ò̆, gīdè̆lō òô̆do kò̆.”

Mādo Aphohmu kî Amihmu Athwiphlò Dèbwè

(Mărko 5.21-43; Lŭka 8.40-56)

18B́ĕ Cò d́òŭd́ò̆sa phătha dè ajo tòcò nu, tcabò̄, bija akhoane dèbwè le gò̄la thèb́è̆hta Cè kî cò d́ò, “B́ĭcè, jo phohmu thĭ kăkòlò̆, barasă le tad́ăhtabò̄ Nu cukhò zo kho tîkî, cò kò̄ òthômô̆ge tèpwè.”

19Jezŭ wè̄hto lekôgè ca kă, Zo bōhmubicè tòcò le kôkô.

20Kîd́ò̆, tcabò̄, amihmu athwiphlò adèsè̆ b́ahtŏ scigīd́e dèbwè leb́ôhtî Zo khlŏ kî cò tòwè̄ lōwa ascid́ŏ kăbèzwè alò. 21Manè̄ kòd́òdo dō, cò d́ò ca thaobu gōjo, “Jo gō bōwè̄ b́è Zi scid́ŏkăwī alò lò hnò̆nu, ja gā hmage tèpwè.”

22Ḿî Jezŭ d́odîrî ane, Za tcahtî lōwa d́ō cò d́ò, “Aphohmu, ò mòthomòthabò̄, nè dèb́udènè mèhmage htŏ nè.” Kîd́ò̆ za hmage tèpwè taplakhă lò.

23Kîd́ò̆ b́ĕ Jezŭ dole akhoane dèbwè ahibu nu, Cè kèhtî au htwè̆ tòcò, kî bija òèòò bogalā d́o. 24Cò d́ò, “Hè dòbò, manè̄ kò̄ d́òdo dō, amihmupho di thĭ ńò, ḿî zò sòḿĭ lò.” Kîd́ò̆ bija jè̄igè Cè. 25Kîd́ò̆ b́ĕ bija aboahò b́èhnahèhta hwă nu, Jezŭ lenī hibu, kî Zî phî amihmupho acukhò, kîd́ò̆ amihmupho wè̄htogegè. 26Dèwîdèkè̆ ajo hŏhtathèlagè thèd́è̆htĭthèd́è̆ge.

Bija Agādŭkhi Gībwè

27Jezŭ hèhta d́ŏnu d́ō, bija agādŭkhi gībwè lôkô Ze le, cè kèo kî cò d́ò, “Ŏ Dăvid aphokhŏ, khòwèbò̄ wa tîkî.”

28Kîd́ò̆ b́ĕ Zo donī hibu nu, agādŭkhi gībwè lehtî Cè kî Jezŭ d́ò cè tòcò, “Jè mèkèhta ni thĭ dè ajo nu thĭ b́ubò̄ ā?”

Cò d́òscĭgege lōwa, “Wu b́u hŏ, B́ĭcè.”

29B́ĕnu Zo bōwè̄ lōwa tòcò agādŭ lò kî Cò d́ò, “Acab́ô̆ thĭ dèb́u ò adĕ, dè gī phî̆htani d́ò̆è thĭ.” 30Kîd́ò̆ za gādŭ hlî̆htagegè tòcò. Jezŭ hmèla dîgrînî cè tòcò gōjo, “Sòibò̄ thĭ ne acab́ô̆ bija gī di thîhè̆kôbò̄ dèbwè̆ ńò nu.”

31Barasă zè hèhta tòcò d́ō, zè mèhŏhtathèla tèpwè lōwa awîakè̆ thèd́è̆htĭthèd́è̆ge.

Dèhnè Phîb́è Ablîglo Dèbwè

32Kîd́ò̆ b́ĕ zè hèhta hwă tòcò nu, tcabò̄, bija lei Cè bija ablîglo htè dèhnè òwè̄ alò dèbwè. 33Kîd́ò̆ b́ĕ Za hna hèhta hwă dèhnè nu, ablîglo dèbwè jî̄b́ègè. Kîd́ò̆ bija aboahò htèdômô̄dahmă kî d́ògè, “D́ŏ Israè̆lpho aklè̆ nu bija da tcahtîgè dè acab́ô̆ gōjo taplă ńò.”

34Barasă Pharizè̆pho tòcò d́ò, “Dèhnè asaphra acô̆thèlè̆ abu Za hna hèhta dèhnè lò.”

Bōhmubicè tòcò Adèb́èthodŏ

35Jezŭ lehtî u kî d́ŏphă lŏcăcè, Cò d́òŭsaŭ dè d́ŏ lōwa asinagŏgā tòcò abu, kî Cò d́ò̆htô Mò̄kho Htĭge aVanzĕlo, kî Zè mèhlè̆mè̄ dèdî̄dèsè̆ amŏamo kî mèhmage bija ada hma ńò ò arră nu. 36Kîdò̆ Za tcahtî bija aboahò tòcò d́ō, Zò khòwègè lōwa, manè̄ kòd́òdo dō, cò òbaòsè̆, òhtĭòdagè acab́ô̆ thŏ htè bija atcai tò ò dèbwè̆ ńò tòcò akhò̆pha nu. 37B́ĕnu Cò d́ò Zo bōhmubicè tòcò, “B́u hmî̆ òèòò htŏ bò̄d́ò̆, ḿî akèb́u tò ò ńò. 38Mègōnu d́ō, dabò̄ huklè̆ ab́icè, cab́ô̆htè Za gā hna le bija akèb́u d́ŏ Zu huklè̆bu nu.”

Nu geselecteerd:

Mattĕo 9: GRNT21

Markering

Deel

Kopiëren

Wil je jouw markerkingen op al je apparaten opslaan? Meld je aan of log in

Geba Roman New Testament © Bible Society of Myanmar, 2021.

Meer informatie over Geba Roman New Testament