創世記 2
2
1天地及萬象已經創造完成。 2佇第七日，上帝完成伊的工作，就佇彼日歇睏。 3上帝賜福第七日，定此日做聖日；因為佇此日，上帝停伊一切創造的工#2.3 「因為佇此日，上帝停伊一切創造的工」嘛通譯做「佇彼日以前，上帝完成伊創造的工」。，就安歇。 4這就是天及地創造的過程。
創造的另外一個記載
主上帝造天及地的時， 5大地猶未有草木，田野猶未生菜蔬；因為主上帝無落雨，嘛猶未有人通種作。 6總是有水對地淐出來，潤澤地面。
7主上帝用地上的土粉捏造人，對伊的鼻孔歕性命的氣；人就成做有性命的人#2.7 佇希伯來文，「人」及「地」的字根像款。。
8主上帝佇東方的伊甸開墾一個園，將所造的人下佇彼內面。 9主上帝互地發逐種好看的樹仔，及好食的果子；佇園的中間嘛有活命樹，及會互人分別善惡#2.9 「會互人分別善惡」嘛通譯做「會互人得著一切知識」。的樹。
10有一條河對伊甸流出來，灌沃彼個園；對遐分做四條。 11頭一條叫做比遜河，踅哈腓拉全地；遐出產金， 12是上好的金；閣出產珍貴的芳料及紅瑪瑙。 13第二條叫做基訓河，踅古實#2.13 「古實」嘛通譯做「蘇丹」。全地。 14第三條叫做底格里斯河，流對亞述的東旁。第四條就是幼發拉底河。
15主上帝將彼個人安頓佇伊甸園，互伊種作，顧守彼個園。 16主上帝吩咐彼個人講：「園內逐種樹的果子，你攏通食。 17毋拘彼欉會互人分別善惡的樹，伊的果子你𣍐用得食；你若食，彼日你一定會死。」
18主上帝講：「彼個人家己一個住毋好；我欲給伊造一個幫贊者來匹配伊。」 19主上帝用土做野地逐款的走獸，以及空中逐款的飛鳥。主上帝給許個動物導來彼個人的面前，互伊給𪜶號名；彼個人給逐款動物號的名，就成做彼個動物的名。 20彼個人就給所有的牲生、空中的飛鳥，及野地一切的走獸號名，毋拘尋無一個通做伊的幫贊者來匹配伊。
21主上帝互彼個人睏重眠，伊就睏。主上帝對彼個人提一支脇骨，閣互彼位的肉合起來。 22主上帝就用彼支脇骨造一個查某人，導伊來到彼個人遐。 23彼個人講：
「此個才是我骨內的骨，
肉內的肉；
通稱伊做查某人，
因為伊是對查甫人#2.23 佇希伯來文，「查某人」及「查甫人」的字根像款。提出的。」
24按呢，人欲離開伊的父母，及伊的某結連，兩人成做一體。
25翁某兩人赤身露體，無感覺見笑。
Nu geselecteerd:
創世記 2: TTVH
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The Bible Society in Taiwan, 2021