ÂTHAONA 1
1
Khizaw paysana nata chyhsapa taona
1Âthaona liata Khazohpa ta alei nata avâ tao ta.#1.1 He liata “tao” tahpa he Hebrai reih ta Bârâ tahpa châ ta, a y leipa tawhta paysapa, Khazohpa deita ta a tao theipa reina a châ. 2Alei cha pizie hnei leipa ta aruapa ta y thlâh ha ta. Ti athupa#1.2 Reih thabypa Hebrai Biehrai siezie mopa ta, ti a thu ngaitapa ta alei chô zydua a vao khai awpa hawhta pachâpa a châ. chô cha zoh kaluh ha ta, Khazohpa Thlahpa ta ti chô zydua cha a vao thlâh ha ta.
3 #
2 Kaw 4.6
Khazohpa ta, “Khaihna y mawh sy,” tah ta, khaihna vaw y ta. 4Khazohpa ta khaihna cha moh ta, a pha tah kaw ta. Khazohpa ta khaihna cha zohna tawhta pachhaih ta. 5Khazohpa ta khaihna cha “chhô” bi ta, zohna cha “zâ” a bi. Zâlâ y ta, my y ta, cha cha a noh khana a châ.
6 #
2 Pit 3.5
Chatawhcha Khazohpa ta, “Tizy likawh liata aruapa y sala, cha chata ti nata tizy pachhaih mawh sy” tah ta. 7Khazohpa ta aruapa cha tao ta, aruapa ry lâta ti a ypazy nata aruapa chô lâta ti a ypazy cha pachhaih ta, cha hawhna chata vaw châ ha ta. 8Khazohpa ta aruapa cha “avâ” bi ta, zâlâ y ta, my y ta, cha cha a noh nona a châ.
9Khazohpa ta, “Avâ ry liata tizy he su kha liata a pahmaoh sala, liahpahlô a lâ mawh sy” tah ta. Cha hawhna chata vaw châ ta. 10Khazohpa ta liahpahlô cha “alei” bi ta, ti âpahmaohpazy cha “tilaipi” a bi. Khazohpa ta cha cha moh ta, a pha tah kaw ta. 11Khazohpa ta, “Alei ta sibiepazy, chi a hneipa chicheipazy, alei chô liata theilâpa kô âmo chi hawhta a patheipa, a theilâpa chhôh liata chi a ypazy papua mawh sy” tah ta. Cha hawhna chata vaw châ ta. 12Alei ta sibiepazy, chicheipa âmo chi hawhta chi a hneipazy, tho âmo chi hawhta a patheipa, a theilâpa chhôh liata chi a ypazy cha papua ta. Khazohpa ta cha cha moh ta a pha tah kaw ta. 13Zâlâ y ta, my y ta, cha cha a noh thôhna a châ.
14Khazohpa ta, “Chhô nata zâ pachhaih nawpa ta, avâ ruapa liata khaihpazy vaw y sala, chazy cha ngianazy, daihtizy, nohzy, kôzy pahno nawpa châ ei sala, 15alei chô khaih awpa ta avâ ruapa liata khaihpazy y mawh sy” tah ta, cha hawhna chata vaw châ ta. 16Khazohpa ta khaihpa lai ngaitapa miano tao ta. Khaihpa lai viapa cha chhô ryureih awpa ta tao ta, khaihpa chyh viapa cha, zâ ryureih awpa ta a tao. Awhsizy chhao a tao hra. 17Khazohpa ta chazy cha alei chô liata khaih awpa nata 18chhô nata zâ chô liata ryureih awpa nata khaihna nata zohna pachhaih nawpa ta, avâ ruapa liata ta soh ta. 19Khazohpa ta cha cha moh ta a pha tah kaw ta, zâlâ y ta, my y ta, cha cha a noh palihna a châ.
20Khazohpa ta, “Tizy liata hmohrohneipa to pahrâ ei sala, alei chô lâ avâ ruapa liata pavawzy a zaw mawh ei sy” tah ta. 21Khazohpa ta tilaipi liata a pahrâpa hmohrohneipa lai ngaitapazy nata ti liata a pahrâpa hmohrohneipa chi to, âmo chi yzie lymâ hawhta tao ta. Mathlaw hneipa pavaw chi to chhao âmo chi yzie lymâ hawhta a tao hra. Khazohpa ta cha cha moh ta a pha tah kaw ta. 22Khazohpa ta âmo cha, “Chi hluhpi pathlapa ta pôh u la, tilaipi pabie muh vy. Pavawzy chhao alei liata pôh mawh ei sy,” tahpa ta byhnâ awpa ta. 23Zâlâ y ta, my y ta, cha cha a noh pangawhna a châ.
24Khazohpa ta, “Alei ta sa chi to papua sala, osa chi to, alyhpasa chi to nata râhsa chi to papua mawh sy,” tah ta. Cha hawhna chata vaw châ ta. 25Khazohpa ta râhsazy, osazy nata âlyhpasazy cha âmo chi yzie lymâ hawhta a tao ei. Khazohpa ta cha cha moh ta a pha tah kaw ta.
26 #
1 Kaw 11.7
Khazohpa ta, “Keimo kakuapa ta, keimo hawh tlai ta chyhsapa tao ei sih la, âmo cha tilaipi nga chô liata zy, avâ pavaw chô liata zy, osa chô liata zy, alei chô zydua liata zy, alei chô liata alyhpasa zydua chô liata zy bie pahneisa ei suh u,” tah ta.
27 #
Âtn 5.1,2; Mat 19.4; Mka 10.6 Khazohpa ta ano kakuapa ta chyhsapa tao ta,
Khazohpa kakuapa tlai ta ano cha tao ta;
Chapaw nata chanô ta a tao ei.
28Khazohpa ta âmo cha byhnâ awpa ta, ama hnohta, “Chi hluhpi pathlapa ta pôh u la, alei he biepa ta, nama rei sai ta paysa u la, tilaipi ngazy chô liata nata avâ pavawzy chô liata nata alei chô liata a pie thaipa hmohrohneipa to chô liata biehnei muh vy,” tah ta. 29Khazohpa ta, “Moh teh u, alei chô zydua liata chi a hneipa chicheipa to nata chi a hneipa theilâpa tho to ei cha pie ei, nama nie awpa châta a châ aw. 30Alei liata sa to, avâ pavaw to, alei liata alyhpasa to, husona a hneipa to châta chhao, ama nie awpa sibie hrohpa to ei pie ei,” tah ta. Cha hawhna chata vaw châ ta. 31Khazohpa ta a hmotaopa zydua cha moh ta, a pha tah ngaita ta. Chatanachata zâlâ y ta, my y ta, cha cha a noh charuna a châ.
Nu geselecteerd:
ÂTHAONA 1: MARVBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The Bible Society of India
© 2023, Used by permission. All rights reserved.