Matfei 15
15
Jumalan käskyt da tuattoloin opastukset
(Mark. 7:1-13)
1Sit Iisusan luo tuldih Jerusalimaspäi fariseit da zakonanopastajat. 2«Mindäh sinun opastujat rikotah tuattoloin opastuksii?» hyö kyzyttih. «Hyöhäi ei pestä käzii syömäh ruvetes.» 3Iisus vastai heile: «Mindäh työ iče menettö Jumalan käskyy vastah tuattoloin opastuksien täh? 4Jumal on sanonuh: ‘Pie hyvänny tuattua da muamua’ da vie on sanonuh: ‘Ken ku kironnou tuattua libo muamua, surmu sen syögäh.’ 5No työ sanotto: ‘Ken ku sanonou tuatalleh libo muamalleh: se, min sinä voizit suaja minus, on jiäksitty Jumalale, 6se voibi olla počitoimattah tuattuadah.’ Nenga työ tuattolois jiännyzil opastandoil luajitto tyhjäkse Jumalan sanan. 7Työ heittelettökseh! Hyvin ennusti teih näh Isaija, konzu sanoi nämä Jumalan sanat:
8– Tämä rahvas pidäy Minuu hyvänny vai kielel,
a heijän syväin on loitton Minus.
9Tyhjiä hyö kumardellahes Minule,
ku opastetah rahvahien luajittuloi käskylöi,
buitegu net oldas Minun.»
Mi pahendau ristikanzan
(Mark. 7:14-23)
10Iisus kučui rahvasjoukon iččeh luo da sanoi: «Kuulkua da ellendäkkiä. 11Ei ristikanzua pahenda se, mi menöy suuh. Pahendau ristikanzan se, mi tulou suuspäi.» 12Sit opastujat tuldih Hänen luo da sanottih: «Tiijätgo, fariseit pannah Sinuu pahakse nämien paginoin täh?» 13Häi vastai: «Joga kazvos, kudai ei ole minun taivahallizen Tuatan istutettu, n՚yhtätäh juurineh. 14Älgiä kačokkua heih, hyö ollah sogiet sogieloin viettelijät. Ku sogei viettelöy tostu sogiedu, mollei pakutah haudah.» 15Pedri sanoi Hänele: «Pagizet arbaituksil. Sellitä meile, midä tahtoit sanuo.» 16Iisus vastai: «Olettogo työ viegi moizet tolkuttomat? 17Ettogo ellendä, se, mi menöy suuspäi sydämeh, menöy ielleh vaččah i sit se ullostetah. 18A se, mi lähtöy suuspäi, on lähtenyh sydämespäi, i se pahendau ristikanzan. 19Juuri sydämespäihäi lähtietäh pahat duumat, tapandat, vierahien akoinke maguandat, karguandat, varrastukset, kielahat viäritändät da pahat paginat toizih näh. 20Kai tämä rikkou ristikanzan, a ei se, ku häi syöy pezemättömil käzil.»
Hananalazen naizen usko
(Mark. 7:24-30)
21Siepäi lähtiettyy Iisus meni Tiiran da Sidonan rannoile. 22Sie tuli Hänen luo yksi hananalaine naine, sen lohkon eläi, da kirgai Hänele: «Ižändy, Davidan poigu, žiälöiče minuu! Karu ylen äijäl muokkuau minun tytärdy!» 23No Häi ei vastannuh naizele nimidä. Opastujat tuldih Iisusan luo da pokoroittihes: «Käske hänele mennä iäre, häi kävelöy meile jälles da iändäy.» 24Iisus sanoi: «En minä ole työtty toizien luo, vai Izrail՚an kavonnuzien lambahien luo.» 25Naine yksikai tuli lähembäkse, langei muah Iisusan edeh da sanoi: «Ižändy, avvuta minule!» 26No Iisus sanoi hänele: «Ei ole hyvä ottua lapsil leiby da lykätä se koirile.» 27«Muga se on, ižändy», vastai naine, «ga syvvähhäi koiratgi niilöi palazii, kudamat pakutah heijän ižändän stolas.» 28Sit Iisus sanoi hänele: «Suuri on sinun usko, naine! Roikkah sinule muga, kui sinä tahtot.» Hänen tytär kerras rodih tervehekse.
Iisus piästäy voimattomii mäil
29Iisus lähti siepäi da astui Galileinjärven randua myöte. Sit Häi nouzi mäile da istuihes. 30Hänen luo tuli äijy rahvastu, hyö tuodih sinne ramboi, sogieloi, niistielöi, kielettömii da äijii muidu. Heidy heitettih Hänen edeh i Häi piästi heidy. 31Rahvas diivuittihes, ku nähtih, kui kielettömät ruvettih pagizemah, niistiet kohenemah, rammat kävelemäh, sogiet nägemäh. Kaikin suuril sanoil ylendettih Izrail՚an Jumalua.
Iisus syöttäy n՚ellituhattu miesty
(Mark. 8:1-10)
32Iisus kučui opastujii iččeh luo da sanoi: «Minul on žiäli nämii rahvahii. Hyö ollah minun luo jo kolme päiviä, i heil ei ole midä syvvä. Ei himoittas työndiä heidy dorogah n՚älläs, eiga hyö väzytäh matkal.» 33Opastujat sanottih Hänele: «Kusbo myö otammo tiä elämättömäs muas muga äijän leibiä ku syöttiä nengoine suuri rahvasjoukko?» 34«Äijygo leibiä teil on?» Iisus kyzyi. «Seiččie», hyö vastattih, «da kaksi-kolme kalastu.» 35Iisus käski rahvahale istuokseh muale. 36Sit Häi otti net seiččie leibiä da kalat, kiitti Jumalua, lohkai leivät da kalat i andoi palat opastujile. Opastujat juattih net rahvahale. 37Kaikin syödih kylläl, i jiännytty palua kerättih vie seiččie täytty viršii. 38Syömäs oli n՚ellituhattu miesty da ližäkse naizet da lapset. 39Sit Iisus piästi rahvasjoukon lähtemäh, iče astui veneheh da meni Magadanan lohkole.
Nu geselecteerd:
Matfei 15: LIVVI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
(c) Biblienkiännändyinstituuttu, Helsinki 2003