Mateo 11
11
Juan inajiejnawo takajlunie ka intaj tiniayeje'ni pa Jesús
(Lc 7.18-35)
1Ti Jesús itime ti 'yiyasane japo itijwa'm niwa sikioye times tom'niji siupa janwoyisi, sekyi'i ti yam'ne ti ijioyits'i jawa isi'il yiji jlajak ajnat, ti ijwi'il kiwa Sinia' jlamtis ti isis, ti ijwijla'm japo i'nio'.
2'Yina pa Juan inajiejnawo, ti yi' insat jiweje, t'ijieyi'ne siukiwa iyo ja Sijwajieti ti i'mieniti'n papo. Sekyi'i ijliu'ne japo t'eyasajnas pet, 3kan'yasisi kanwonisi 'ate:
—¿Mi amt'e siupa tinijijwiyijenk'iye ti ja'nes? ¿Ent'a japoye'eje siupi jikiecha ti ja'nes?
4Jesús isiujlie japo ti iyo'ate:
—Maye'ni. Apilieyi ja Juan. Jwelajia'm siunie iyo ni jipe'yayeyik'i'ni napo, siu'neje ni iyo ti ji'wena'. 5Ti siunapo je t'ojni'n 'esieyiji ti t'iskiunk'iji'n; jlampet siunapo jiwatis jitio' po', kia'iyojliyi ka jwejlikie ti isis. Siunapo je tipechijyi'n, jik'iot tiojwa'l 'ajlak'iji'n 'nakayi;#Is 35.5-6 jlampet siunapo 'yajle'n, yapits'i pijia'm, 'wasajne'n. Siunapo i'nio' ti p'ijliusis tikiniejeje pet niwa Sinia' jlamtis ti isis ti tamtiki k'iye.#Is 61.1
6“'Esiji ni i'nio' ti je yisit ilia'm ni iyo ti jitiej iyomk'i'm.”
Jesús jitiej ijiutie k'iye papo, pa Juan inajiejnawo
(Lc 7.24-35)
7Jlampa tosak'i japo Juan inajiejnawo jikawos ti yapi'ni, Jesús iyoyeyi ka injwejla'm japo ti iyo'ate:
—¿Ten siupa jiwoyeyi ka 'wena ti jloye 'niji yi'i ni ajnat mami'yi? ¿Nakat'e ni sisej ti jlajwu i'wiati'n? 8¿Jiwoyet'itiemi ka 'wena siunie i'nio' ni ji'wuye niwa je niliaja ti isis, ent'a naka? Je int'ayeyiji'n, siunapo i'nio' ji'wuye kia'iyo ti isis napoka napo yijits'i niwa 'wuki'l, ji'wuki'l napo i'nio' anechiyasis wus. 9Kiujliek'i'm, ¿tempa pi ji'yenayi? ¿Sinia' jijwejlanik jiwot'imipe? Ijiate, Juan 'yaka'm ape'e ni injwejlanik jiwo ni jikijmaye iyo pit. 10Kajeyepa ti Juan naka ni siunie ti Sinia' jlamtis t'ipi ijwi'il ti iyo'ate,
“Janiajnat ak'ioye ni 'yaka'niyewo,
janakaye ti janwakajlanit ta'a ak'ioye ni a'nayija.”#Mal 3.1 11Ijiatk'i siunie awoyi ti ajwe'el, Juan lajk'ipa ka wo'ate iyo, ape'e 'ni ajnat, ka ti'wena ka inka'm ape'e iyo pet ti jla'am. Jlam'ne pet jitieyi'i ni Sinia', siunie ti yiji ni jika anechijiayas, ti je 'esijiyi ti lajk'ipa kawo, nak 'yakama'aja pet ape'e.
12“Tajlap'e ti 'nelanjie'e yiyeyi ni inka'niye ti po' ni tiwonaja nak jika anechijiayas ni Sinia', siunie je 'es ni tiwonaja, napo jwesis napoka napo ti iyo ka inetiajnatis. 13Wikie'eyi siupapo Sinia' jijwejlanawos t'ipi, siu'neje niwa yiji na Moisés jika'neyasajnaye pet, najata wek pet ti iyoyi jika'niyeja' ti iyoyeyi ka 'nes nak jika anechijiayas pa Sinia', paj ti yiyeyi ti 'nes ni Juan.#Lc 16.16 14'Yina siuti ja ke sakakiuye, kajeyepa Juan jla'am siupa Sinia' jijwejlanik jiwo Elías, ti lajk'ipa ka je 'najane ti ja'nes.#Mal 4.5; Mt 17.10-13 15¡Jane'yi pa siunie jik'iot tiojwa'l po', jipe'yaye!
16“¿Tent'ipa ka 'yejnap napo i'nio' siu'niwa jlomas? 'Yinit'ijyi siunapo kia'lis ti yi'i ni aj'leje'n, ti yiyisk'iji'n ti tiliakijni'n, ti tana ape'e napo ijia ti iyo'ate, 17¡Si'woso'l alanajata, 'yina je liakinie! ¡Enajatajats'i siuniwa saka'laja' ti k'ijliajats'i, 'yina ka kia'iwo 'neje ka apajyi'n ka anip'elisinajyin'ni!
18“Kajeyepa ti 'nesa ja Juan, ti i'winis ti je ti'yekiu'n jla'yi ti je i'ya i'niati, iyoye 'ate napo, ¡Je 'es pa ka iwoyi, jitiej je 'es! 19'Yina 'nes 'neje pet ni I'nio' Jlas, ti jla'am ti ti'yekiu'n jla'yi ti i'ya jla'm i'niati, iyoyeyits'iji 'ate ti ijwilis, ¡Jlak je iliatk'i jla'yi ti at'es jiwo; iyo t'ajajnajwasa' napo i'nio' inkeyis jiliajnis, siu'neje napo isi'm ilia'm niwa inkat'ijnieyejes!
“Jlam'ne pet ti ti'wena ni jikijmaye ni i'nio' ti 'es, je istie ti naka ni Sinia' jika'najankijnaye ti yiyi ni i'nio'.”
Siupapo i'nio' yiji japak ajnat Galilea kakiujnietas
(Lc 10.13-15)
20Japoka'ne ti jiwak yi'ne ja Jesús, siojopo i'winaja'ni ti i'winki'n siukiwa je ti'wena'nine ka ne'yi japa ka jlomaye. Kajeyepa ti je iyoyis jlosikis ink'iejyisa', 'wanjliyi ka kia'iwo ka 'wenis, 'naka'ne ti itiajlata. 21'Yina iyo'ne 'ate:
—¡Asa'am ti as'wet jana Corazín, kia'iyojliyi ti asa'am pet ti as'wet jana Betsaida, aswet'ia japoye! Ka napokaye t'ipi jla'am siunapo yiji jana Tiro, siu'neje napo yiji jana Sidón,#Is 23; Ez 26—28; Jl 3.4-8; Am 1.9-10; Zac 9.2-4 kan'wenis siuniwa iyo niwa ji'wena, kiak je iyotaja'ni jla'am, 'yina je k'iejets'i'ni jla'am ka iwo jlosikis ink'iejyisa'. Je kia'iyotaja'ni jla'am ka je 'nots'iji'n niwa ji'wuye siuniwa je isis, jla'yi ka tijlat intatis jitipe'e, ka 'nakajanit ti ilik'i ni jike' iyo, yapilisi ni Sinia'. 22Awo'ate asa'm ja ijiatayiji ka inetiejenie'e siojona jloma ti ja ti'yena napo i'nio' siunie iyo, niwa ti ja titiajlataja, janka'm ape'e siupa tiwonat'iyipi papo i'nio' yiji japa Tiro siu'neje japa Sidón.
23“Asa'am ti as'wet pet jana Capernaum, ¿jijwelayet'e ka tikinie'asena'a ka ijnoki poliyi? ¡Je'e, 'wenajliyijna'a ti ja intatajayik'i isia'm na kiawe ti laj jlaja, siunie inlaye 'wet!#Is 14.13-15 'Yina ka japakaye t'ipi japa Sodoma ka tenajaja siukiwa iyo kiwa ti'wenkina'ase'm, japak isi' a'wenajta'ne 'nakayi. 24Jajwi'lase'm, ka inetiejenie'e siojona jloma ti ja ti'yena napo i'nio' siunie iyo ti ja titiajlataja, jla'yi ti ja tisiejek'i, asa'm ja ijiatayiji ti ja tisiejek'iase'm janka'm ape'e siupi tiwonat'iyipi papok i'nio' yiji japa Sodoma.”#Gén 19.24-28
“Joniemit, ajapats'iji'n”
(Lc 10.21-22)
25Jakayi ti Jesús iyo'ate ti iyo jlamtikie':
—Awunit, Inia' ti a'am ti jika'niona'a'm ni poli jla'yi 'ni ajnat, kajeyepa jijwek k'iye siunapo i'nio' 'yijejne'n niwak siuniwa ti ijiatk'iji'n, siu'neje napo i'nio' je t'on ti t'eyasanajataja'n. Ji'wenkijna'm pet siunapo lajk'iyi pa ka iwo ti je 'yijejne'n. 26Ijiate, Inia', kajeyepa ti nak jiwojonk'iye ka awoyi.
27Yiyik'i ti kia'iyo, sekyi'i iyo'ne 'ate:
—Inia' yikialk'i wikie'eyi niwak wask'i'nelaja.#Jn 3.35 Lajk'ipa ka nets'e ka ijiatayiji ka intant'ieje ni Jlas, ijwienjli jla'am ni Jinia' ti 'yijene pi iyone. Jla'yi ti lajk'ipa ka intant'ieje ni Jinia', najataja jla'am ni Jlas ti itiant'ieje, siu'neje napo iyo ni Jlas ka intant'iejeniti.#Jn 3.35
28“Joniemit wikie'eyi siunapo ti jikanowe iliajne'n, jla'yi napo inkijmayewos ti je tiuma'yi ilia'm ni askijmaye jla'yi niwa asjloye, nak jawaye'yi ka yajapanak'ijinna'a. 29Kima'yi ilia'm siunie tejeye pet naka inkijmaye ti kiojieti, ena'yi astepe'e. Ni'neyasanayi siunie aniwone ti akama, ti je anitonit. Jant'eminajna'a ka 'esie ka inajape'n ni asak'al, jankamajana'a. 30Siunie tejeye ni inkijmaye ti kiojieti, ti ena'yi astepe'e, nak janoye'ase'm ti jawo as'nayija', siunie je kiojieti, jak je iyoyiji siunie asjlok ja ke kiojietaja.”#Is 30.15; Jer 6.16
Nu geselecteerd:
Mateo 11: CRT97
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Nuevo Testamento en Chorote © Sociedades Biblicas Unidas, 1997.