Yohanes 4
4
Yesus arye, Samaria mutuku kil ati, nyabuk yupu
1Ura, yuk talak ara, ninye arye, “Kume, Yohanes arye peterelululba, ninye mitik tonun dem arye, el yupu dib tenebuka, elti, dobolyanganyakba, mek dongolul bukni, Yesus ara, el yupu petereliba, ninye yupa weik arye elti, diba tenebuka, el yupu ati melinyakba, ninye weik arye mek dongolule,” nyanmek. Sik nyanmekak, Farisi nang arye kekebik. 2Dipkoprop ning ara, Yesus elcuk ninye dobuka mek kum dongolamuk bukni, elce, ‘Na yupu dobuka peterelbinamak’ tenen, wipdeiyamuk mapu arye, diba tenyamik ninye dobuka mek dongolamik.
3Winilamik ati, yuk nang arye Farisi nang ati, “Yesus ati diba tenebuka melinyak ninye weik,” nyabuka ayupu laka nyanmekak kekenmek. Sik Farisi nang arye kekenmeka ara, Yesus bikukopura, Yudea tam batakukabukce, ila tamubuka Galilea mutuku tam biyuk.
4Galilea mutuku bana ati ara, bisik noutamak ara, Samaria mutuku kirikuka balamika ati ara, Yesus arye, ‘Galilea tam binamana anya arye, bisik bana ara Samaria mutuku noutamak arye bisik binamne,’ tenebukce, Samaria mutuku bisik banmok. 5Bisik banmoka ani, Samaria tam noutamak arye, asik tonok dolamikak, anyasik el si ara, Sikar mutuku biyuk. Amutuku ara, minop talak Israel yala nang, sik apu Yakup birye tuku dekuka, el mi Yusuf biti nukamuk. Yesus ara, amutuku dam biyuk. 6Tonda, Yakup arye, ‘Mek kwen deipnamle’ tenen, tuku palyamukce mek lokamukak, mekwen ton amutuku dam uamuk. Asukum mekwen awamukba, Yesus arye bisik pia banmoka ani, dikdik ubuka ati, ‘Dikdik sepnun’ tenen, Yakup birye palibuka tuku erepdeiyamukak, mekwen dam binuka bukuk. Yesus asukum binuka banmok keting ara, keting dukduk, jam dua belas (12) nyalamak keting arye binuka bukuk.
7Bukmok bukni, Samaria mutuku kil tonok arye, ‘Mek kwepnaman’ tenen, Yesus bukmokak yayuk. Yayukura, Yesus arye akil ati nyabuk. “Nara, mek dipnuna ati, ance mek kwebuka arepnilyame,” nyabuka morobuk. 8Yesus, el wipdeiyamuk nang nirya ara atalak ara, ‘Din ning deknamap’ tenen, Sikar mutuku asik akunum dekelbinmika anya arye, Yesus el tonok bukmokce ayupu nyanmok.
9Yesus arye akil ati din mek morobukba, akil arye tamubuka nyabuk. “Kume, anda Yahudi yalanye ulyam bukni, nara Samaria mutuku kil ununa anya arye, yata wiribuka ‘Mek kweipnutu’ tenen, mek moropmanilam do?” nyabuka asipdeyuk. (Ayupu nyapmoka deiyok ara ani. Sik Yahudi yala ninye arye, Samaria tam ninye ati, ‘Nun like. Samaria tam ninye ara, pia malye unyake’ tenen, memepdomikce, neika pia kum ulamika ati, akil mitik lukdanuka, ilil ubuk ati, ayupu nyabuk.)
10Akil arye nyabukba, Yesus arye tamubuka nyabuk. “Kume, akilo, Allah arye teleb ning talye arisilye ning ap, mek dena ati, moropmakinanye si ap, moubuka kel bikmanutumtoura, ance nati moropmanutumba, narye kam una deiyok mek arepkitinye,” nyabuk.
11Nyabukura, akil ara moubuka bita kel kum kibukce, ayupu tamubuka nyabuk. “Naio, anda mekwen makau ap, tapu ap kum upmakile. Tonda, amek lokne pum bisik ara, kaurwe pia weik anya arye, kam una deiyok mek nyapnilam ning ara, dan tam arye kwebuka arepnutum do? 12‘Nun apu Yakup bira mitik mambulnye bukni, nara weik mambulnye,’ tenepdalamce ayupu nyapnilam do? Nun apu Yakup birye, tuku lukamukce mekwen areamsuke. Tonda, minop talak el babye, asukumuk amek kwebuka dilamuke. Tonda elce deiamuk mapu arye sik ap amek kwebuka dilamik. Tonda, sik weilamik ning dena ati, amekwenuk kwebuka arilamike,” akil arye Yesus ati nyabuk.
13Nyabukura, Yesus arye akil ati tamubuka nyabuk. “Yata ninye do nirya, tuku lukamuk mekwen arye mek kwebuka dipting bukni, aminyan ara tuba tamubuka tonap mek patanuk unamle. 14Bukni, yata ninye do nirya, narye arebsinye mek dobuka dibikcopura, tuba tamubuka tonap mek kum patapnamle. Anggun mek patana kum bukni, na arebsinye mek dopropmunyopura, anggun kanye talima noutamak arye, mek pu atonun upsilyeura, mek pu doplirye, panabuka saklamle atonun winipnamsile. Winipnin balamlya ani, aminyan talak ara, pia kam unamlume,” Yesus arye nyabuk. 15Nyabukura, akil mankau arye, ‘Mek sirika ati nyapmanile’ tenen, tamubuka nyabuk. “Ati naio, ance nyapmanilam mek arepnilyame. Aripniminyeura, mek pia kum patanamnile, asum-asum nirya tuku lukamuk mek kum kwelyanganamne,” nyabuk.
16Akil nyabukura, Yesus arye nyabuk. “An aik bimince, an akanye yukupminyeura, anggun bitinye tamubuka yarurume,” nyabuk. 17Nyabukura, akil arye tenepce, “Kume, na akanye ton kum ulule,” tilila ati nyabuk. Nyabukba, Yesus arye, “Ance, ‘Na akanye kum ulule,’ nyapmanilam ning ara, dib nyaplame. 18Dipkoprop ara, ninye pangu barye arye domkik bukni, sik nirya arye batakike. Wini talak an ap, talye neika ulamdumnye bira, dipkoprop kum dopkuka anya arye, el babye an akanye kum ulule. Anda talye kiluk ulyama ati, ‘Na akanye kume,’ nyapmalama ara, dib nyapmalame,” Yesus arye nyabuk.
19Nyabukura, akil arye tamubuka Yesus ati nyabuk. “Ura, ayupu nyapmanilama anya arye, adeice arye anda, aminyan winipnamle ning laka nyananye, nabi ulyama ara, winira akunum kel kipkine. 20Minop talak, nun Samaria tam ninye, nun ni yapu arye, aunmap mutuku deice Allah si erelamik bukni, anggun Yahudi yala nang arye, ‘Kume, Allah el si erena ati teleb ak ara, Yerusalem mutuku uka,’ nyasululume,” nyabuk. 21Nyabukura, Yesus arye akil ati nyabuk.
Akilo, na nyapnukin yupu ara, dib tenepnalame. Aminyan yanamle talak ara, aunmalam mutuku deice babye ura, Yerusalem mutuku noutamak babye, ‘Teleb ak asukumuk’ tenen, Allah el si kum erenamlume. 22Anggun Samaria tam ululum ninye ara, moubuka kum kel bikamlum ninguk si erelulume. Bukni, nun Yahudi yala nang arye, dipkoprop kel bikamubunye, el siuk erenyabe. Ara talya ati kum nyapkine. Ninye Lyena Deiyoknye bira, Yahudi yala ninye kan-kan arye yanamle ati, nyapkine.
23Aning nyapmakin bukni, aminyan yanamle talak ara, tonda dipkoprop akunum yalye talak babye, nun Ni Koprop Allah el si dipkoprop ubuka erepnamak ninye nirya ara, talye nong bol deice winina kum bukni, Allah El Dib Kanye mikip deice melisilyebuk, dipkoprop tenebuka unyakce, el si teleb ubuka erenamake. Aning ara, Allah arye, ‘Wininamake,’ tenesilye touk, wininamake. Talya kum nyapkine.
Allah arye, ‘Na Dib Kanye mikip deice arye, dipkoprop tenebuka unyakce, na si erenamake,’ tenyamsuk touk winibicopura, Allah arye sikti, kanye delilule. Ato ninye ati el kanye delilule. 24Allah ara talye tukwaknye kume. Elda im deice Dib Kanye atonunye binya arye, el si eren nang ara, adiparyuk Allah El Dib Kanye mikip deice ap, Allah tenyamsuk touk, dipkoprop winina ap deice arye, el si erenamake. Yesus arye aSamaria kil ati nyabuk.
25Nyabukura, akil arye tamubuka nyabuk. “Na kele. Allah arye, ‘Ninye tukwak nang lyepnamle’ tenen, wipdeiamuknye, aminyan talak Ninye Lyena Deiyoknye, Kristus nyalamaknye yanamle. Elce nyalyopura, aning-aning nirya lak kibuka laka nyanamsile,” nyabuk. 26Nyabukopura, Yesus arye nyabuk. “Ance, ‘Aminyan ara anye bira yanamle,’ nyapmalamnye bira, na akunuma nyapmakine. Anye bira na uka,” Yesus arye nyabuk.
27Yesus arye nyabukba, el wipdeiyamuk nang, el mapu sik binmeka ani, tamubuka yayik. Tamubuka yayikce, Yesus ap, akil ap yupu tanmarika ak, eibikce lukdayik bukni, sik kan-kan arye tonoknye babye akil ati, “Anda yata patanmakil do?” kum nyabik. Tonda, Yesus ati, “Anda yata ati, malye mutuku kil, Samaria mutuku kil ap yupu talipmarum do?” kum nyabik.
28Yesus el mapu tamubuka yayikura, akil arye el mek makau asukumuk batakuka, el ap ulamik ninye, sik asik tamubuka biyukce, anyasik ninye ati nyalbiyuk. 29“Kume, na kayapu. Na winilamse ning nirya laka nyapmanunye bira, anggun ton dilyalulume. Anye bira, Allah arye, ‘Ninye lyepnamle’ tenen, wibuka dopdeipnamsilanye, el si Kristus nyalamaknye bira, anye akunum yanmasil do? Elda yuknye do?” nyabuk. 30Nyabukura, anyasik ninye nirya sik asik batakuka, Yesus bukmokak dilbiyik.
31Anyasik ninye tuba bisik noutamak yangayik talak ara, Yesus el yupu keken nang arye elti, nyabik. “Naio, nun peterena deiyoknye, anda din ning diplyame,” nyabik. 32Nyabikura, Yesus arye tamubuka nyabuk. “Na dina atonun upmanil ning ara, anggunda kum bikmaluma anya arye, kum tenipmalume,” nyabuk. 33Nyabukura, el mapu arye sik kanye walwal kibukba nyapdayik. “Yuk nang arye el din ning arepmonge ati, ayupu nyapmasil do?” nyabuka walwal arye nyapdayik.
34Walwal arye nyaldanmekba, Yesus arye ayupu winipmanto yupu deice, el mapu ati nyabuk.
Na din ning atonun ning nyapmasina ara nyapnusine. Ara, na dopdeipnuknye, elce, ‘Wininamle,’ tenyamnuk piluk, ‘Dopnin banmanya ani, sirya daknamne,’ tenenune. 35Anggunda, atalak ati nyalulume. “Kume, wala dumbarye tonap akunum uplyopura, kwaning nong upnamle anya arye, lilbinamabe,” nyalulume. Bukni, narye nyapsine. Anggun asing lapmunce, wa windamak nirya dipdelulume. Kwaning nirya akunum nong upmala ati, kwaning yongobuka lin talak ara akunum upsile.
36Dipkoprop kwaning yongobuka lin talak atonun talak ara akunuma. Wini talak ara kwaning lina deiyoknye birye, el dekna ning dekuka dololule. Winira, li talak akunum ulula anya arye, ‘Kwaning yala kouamuka deiyoknye ap, kwaning nong lina deiyoknye ap, neika kanye deipnamdak’ tenen, kwaning lina deiyoknye birye akunum lipnin banmale. El kwaning linmal ning nyapmasina ara, domon yupu nyapmasin bukni, ayupu nong ara, kam pia unamak ninye ati, nyapsine.
37Aning akunum wininmala anya arye, ninye arye, “Tonye wa wibuka kouamlye bukni, tonye bira lilule,” nyalamak ning ara, dipkoprop akunum winisulule. 38Na Yesus arye anggunti, ‘Kwaning nong lipnamak’ tenen, dopdeipsise bukni, anggun linamlum ning ara, ‘Nong upnamle’ tenen, mince awa wibuka pil kum dolalume. Yuk nang arye minop talak ikin deice arye, pil weik dolamik bukni, anggun aminyan talak umunye nang ara, yuk nang mince kouamik ning, nong libuka banmalume. Yesus arye el mapu ati, domon yupu deice arye nyabuk.
Samaria Mutuku ninye weik arye, Yesus ati dib tenebik yupu
39Ara, aSamaria mutuku kil arye el asik nang ati, “Kume, anye birye na winilamse ning nirya laka nyapmanue,” nyabuka ati, amutuku asik Sikar mutuku ulamik nang yupa weika arye, Yesus ati dib tenebik. 40Diba tenepmeka anya arye, amutuku bukni, sik Samaria tam nang arye Yesus dam yayikce, “Se, naio, nun ap neika unamabe,” nyabuka morobik. Morobikba, Yesus ap, amutuku ninye ap, asum like bitinye deice arye neika unmek. 41Unmek talak ara, Yesus arye sikti, peterebuka deice arye, ninye tonap weik arye dib tenebik. 42Amutuku ninye dib tenebikce, akil ati nyabik. “Kume, nun ka kilo. Arup ara, ance nyapmasulum yupu deice aryuk dib tenebupu bukni, wini talak ara, elce peterepmasilba, nun babye kekepmapa ati, winira nun kele. Anye bira talinye kume. Elda dipkoprop ninye mutuku-mutuku nirya Lyena Deiyoknye#4:42 Lyena Deiyoknye – Alkitab noutamak ara, Lyena Deiyoknye sekenyaka ara, ton talak Allah tenen ati sekenyake. Ton talak ara, Yesus tenen ati sekenyake bukni, deiyok ara, Yesus el ining arye kilipsuka deice arye Allah arye lyesulule. Yohanes arye Yesus biti ayupu sekuk. Tonda, laka nyana yupu nomor 17 dipdelelume. ulule. ‘Yuknye kume, el akunuma,’ tenepmabe,” nyabik.
Tonoknye ninye deiyoknye, el miuk talipmokba, Yesus arye kwetebuk yupu
43Yesus ap, Samaria tam ninye ap, asum like bitinye deice neika unmeka ani, Yesus arye amutuku batakuka, Galilea mutuku biyuk. 44(Ura, yuk talak ara, Yesus babye ayupu nyabuk. “Allah el yupu lak nyalamak nang, sik nabi nang ara, sik bidamang mutuku koprop bicopura, sik mutuku ninye arye, kibuka si kum erebikirye, sik yupu kum kekenyake. ‘Sikda talye nang uka,’ tenenyake,” nyabuk.) 45Yesus ara Galilea mutuku biyukura, sik Galilea tam ninye arye, kanye deibuka taruk talibikce, elti, kibuka si erenmek. Wininmeka deiyok ara ani. Yesus arye Kaplina ati Kwalina talak, Yerusalem mutuku noutamak mambul pil weik dolamuk ning nirya ara, sik ton elilamik. Sik babye, Yerusalem mutuku atalak unmekce eipmek ati, Yesus ara sik mutuku yayukopura, elti, kanye deibuka ‘Telebe,’ nyanmek.
46Galilea mutuku noutam bukni, mutuku si ara Kana mutuku, Yesus arye talye mek dobuka winipman kum pil dobukba, amek ara anggur mek daneibuk. Talye mek bukni, anggur mek dayuk mutuku ara, like tonok talak ton biyuk. Kana mutuku biyuk talak ara, tonoknye amutuku tam talibuka ninye deiyoknye ulamuknye bira, el mi uk dilamuk. Ami ara, Kana mutuku kum, pera mutuku, Kapernaum mutuku uk talipmokba, unmok. 47Yuk nang arye, “Yesus ara, Yudea tam batakuka, nun tam Galilea tam akunum yanmasile,” nyabikura, aninye deiyoknye birye kekebuk. Kekebukce, pera mutuku tenena kum bukni, Yesus dam morolyayuk. Anye bira yayukce, Yesus ati nyabuk. “Se, naio, na mi uk talipmalba, dipmanto unmala anya arye, ‘Na mi dipnilyak’ tenen, ance kweteipnutume,” nyabuka morobuk.
48Morobukba, Yesus arye anye biti nyabuk. “Anggunda, ninye kum winipmanto ning ap, winipman kum pil ap doliba, elimunye deice arye, ‘E, anye bira dipkoprop Allah ati pil dolule’ tenen, dib tenelulume. Aning kum eipmunyopura dib kum tenelulume,” Yesus arye nyabuk.
49Nyabukura, aninye deiyoknye birye, Yesus ati nyabuk. “Kume, naio, na mi min kum dipmalye talak na mutuku bitumce, na mi kweteipnutume,” nyabuka morobuk. 50Morobukba, Yesus arye nyabuk. “Anda, talye kanye bobuka binulame. An mi kum dipnamle. Kam unamle,” nyabuk. Nyabukura, anye bira, ‘Yesus arye nyapmanil touk dipkoprop winipnamnile’ tenen, teniltona kumce, adiparyuk dib tenebuka biyuk.
51Biyukce bisik noutamak banmoka ani, el pil melin nang arye omutuku arye atam yanganmekba, bisik noutamak epdayik. Epdayikce sikce nyabik. “Naio, an mi ara akunum teleb upmalba, kam tuba uk unmale,” nyabik. 52Nyabikura, anye birye asipdeyuk. “Danto keting deice arye na mi teleb upmo do?” nyabuka asipdeyuk. Sikce, “Keting dukduk bukni, jam satu karen arye, an mi ara teleb upmo,” nyabik.
53Sikce nyabikba, aninye deiyoknye birye moubuka bikatabuk. ‘Se, Yesus arye, “An mi kam unamle,” nyapmanu keting ara, dipkoprop jam satu deice arye nyapmanu touk, na mi kweteipnu ura, teleb upmanue,’ tenebukce, moubuka bikuk. Anye birye aning tenebuka ati, el ap, el aik neika unmek ninye nirya ap, Yesus ati dib tenebik. 54Ara, Yesus arye ami kwetebuk ning ara Yudea tam arye Galilea tam yayuk talak noutamak, ninye kum winipmanto pil bitinye ning winibuk.
Nu geselecteerd:
Yohanes 4: EIPA
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2023, Wycliffe Bible Translators, Inc. All rights reserved.
