متا 10
10
عیسا دوأزده تأ شأگرد
1بأزون عیسا خو دوأزده تأ شأگردَ دؤخأده خو ورجأ و اوشأنَ ایقتدأر فأدأ کی پٚلیدٚ روحأنَ بیرونَ کونٚد و همه جور نأخوشی و مرضٚ شفأ بٚدٚد. 2او دوأزده‌تأ روسولٚ نأمأن اَشأنٚد: شمعون (معروفٚ به پطرس) و آندریاس (پطرسٚ برأر)؛ یعقوب (زِبِدی پٚسر) و یوحنا (یعقوبٚ برأر) 3فیلیپ، بَرتولُما، توما، متا (او معروفٚ بأج فأگیر)، یعقوب (حلفی پٚسر)، تَدّای، 4شمعون (فدأییأنٚ حیزبٚ شین بو) و یهودا اِسخریوطی (اونی کی آخرپٚسی عیسا‌یَ خیأنٚت بوکود).
حواریونٚ مأموریت
5عیسا اَ دوأزده‌تأ روسولَ اَ فرمأنٚ اَمرأ، اوسه کوده مأموریت و اَشأنَ بٚفرمأسته: «غیرٚیوهودیأن و سأمریأنٚ ورجأ نیشید، 6فقد بیشید ایسرأییلٚ مردومٚ ورجأ کی خودا اَویرَ بوسته گوسوٚندٚد. 7بیشید و اَشأنٚ رِه وأگویا بوکونید کی آسمأنٚ ملکوت فأرٚسئندٚره. 8نأخوشأنَ شفأ بدید، بٚمٚرده‌یأنَ زٚنده کونید، جوذأمیأنٚ شفأ بدید، و پٚلیدٚ روحأنَ مردومٚ وجودٚ جَا بیرونَ کونید. موفت فأگیفتید، موفتم فأدید. 9شیمی شلأن قوزه میأن، طلأ یا نوقره یا مِسٚ سکه‌یأنٚ شیمی اَمرأ نٚبٚرید، 10حتّا بوغچه و کفش و ایضأفه لیوأس و دٚس چو هم اونسأنید. وئألید مردوم شیمی جَا پذیرأیی بوکونٚد، چونکی کأرگر حق دأره خو موزدَ فأگیره. 11هر وخت ایتأ دیهأت یا شهرٚ دورون شیدی، ایتأ لأیٚقٚ آدمَ بیأفید و تأ شیمی شؤئؤن زمأت، اونی خأنه دورون بئیسید. 12وختی ایتأ خأنه دورون شیدی، اونٚ رِه خیر و برکت طلب بوکونید. 13اگه او خأنه لأیٚق بٚبه، خیر و برکتی کی اونٚ رِه بٚخأستید، اونی رو مأنه. اگه لأیٚق نٚبه، او برکت شٚمٚره وأگرده. 14اگه ایتأ خأنه یا شهرٚ آدمأن شٚمٚره ولأشتٚده بیشید بودورون، و یا شیمی گبأنَ گوش نٚدأده، اویَه، گرد و خأکٚ، شؤئؤن موقع، شیمی پأیأنٚ جَا بٚتکأنید. 15رأس‌رأسِی شٚمٚره گم کی دأوری روجٚ رِه، سدوم و عموره وضع کی خرأبٚ شهرأن ایسٚد، اَ شهرٚ وضع جَا خٚیلی بِیتره.
جور و جفا
16«من شٚمٚره گوسوٚندأنٚ مأنستَن، اوسه کونم گورگأنٚ دورون. پس لأنتی مأنستَن، حواس جم و کوتٚرٚ مأنستَن، آرأم بیبید. 17ولی شیمی حواس بمأنه، چونکی مردوم شٚمٚره گیرده، حأکیمَ ایسپأرده، و کنیسه‌یأنٚ دورون شلأق زٚنده. 18هطویه، می وأسی شٚمٚره موحأکمه کودنٚ رِه، وألیأن و پأدیشأیأنٚ ورجأ بٚرٚده. ولی اَن ایتأ فورصت به کی می جَا، اوشأنٚ رِه و غیرٚ یوهودیأنٚ رِه گب بٚزنید.
19«وختی شٚمٚره گیرده، نیگرأن نوأبوستٚنید کی چوطو جوأب بدید یا چی بیگید، چونکی بِیترین کلمه‌یأن بِیترین زمأتٚ دورون شٚمٚره فأدأ به. 20چونکی اَن شومأن نیئیدی کی وأ گب بٚزنید، بلکی شیمی آسمأنی پئرٚ روحٚ کی شیمی زٚوأنٚ اَمرأ گب زٚنِه.
21«برأر، خو برأرَ و پئر خو زأکَ، مرگٚ دٚس ایسپأره. زأکأن خوشأنٚ پئر و مأرٚ ضد ویریزٚده، بأعیث بٚده اوشأن بوکوشته بٚبٚد. 22تومأمٚ مردوم، می وأسی شیمی جَا بیزأرَ بٚده. ولی هرکی، زحمتأنَ تحمول بوکونه، آخرپٚسی نیجأت یأفه.
23«هر وخت شٚمٚره ایتأ شهرٚ دورون آزأر فأرٚسأنِده، بوگروزید ایتأ شهرٚ دیگه. رأس‌رأسِی شٚمٚره گم قبلٚ اَنکی بتأنید تومأمٚ ایسرأییلٚ شهرأن بیشید، اینسأنٚ پٚسر#۱۰:۲۳ «اینسأنٚ پٚسر» لقبی ایسه کی عیسا خؤرَه بٚکأر بٚره. اَیِه. 24شأگرد خو اوستأدٚ جَا و غولأم خو اربأبٚ جَا پیله‌تر نییٚه. 25شأگردٚ رِه وٚسته کی خو اوستأدٚ مأنستَن و غولأمم خو اربأبٚ مأنستَن بٚبه. اگه مٚرَه کی خأنه پیله‌ترم، پٚلیدٚ روحأن رئیس دؤخأنده، می خأنوأرَ چی بد عیصمتی نأم اَمرأ دؤخأنده.
کی جَا وأستی ترسِئن
26اوشأنی جَا کی شٚمٚره تهدید کونٚده نوأترسِئنید، چون او زمأت فأرٚسِه کی هر چی جیگأ بٚدأ نٚهأ، آشیکأرَ به و همٚتأن اونچی جَا کی قأیم بوسته نٚهأ، وأخٚوٚرَ بٚده.
27«اَ گبأنی کی اَسه ظولومأتٚ دورون شٚمٚره گم، اوشأنٚ روشنٚ روجٚ میأن بیگید. هر چی کی شیمی گوشٚ دورون گم، پوشتٚ بأمأنٚ جؤر اعلام بوکونید کی همه بشتأوٚد!
28«نوأترسِئنید او کسأنی جَا کی فقد تأنٚده شیمی جأنَ بوکوشٚد، ولی نٚتأنٚد شیمی روحٚ آسیب فأرٚسأنٚد. فقد خودا جَا بٚترسید کی تأنه هم شیمی جأن و هم شیمی روحَ جهندمٚ دورون هلأکَ کونه. 29دوتأ چی‌چی‌نی پول چندر ایسه؟ ایتأ سیأ پول #۱۰:۲۹«سیأ پول» یونأنی وأژه ترجومه «اَسَریون» بِه.ولی حتّا ایتأ چی‌چی‌نی‌یم بی‌اَنکی شیمی پئر وأخٚوٚرَ به بیجیر نٚکفه. 30شیمی همٚتأ دأنه خألٚ مویَم بیشمأرده بوبوسته. 31پس نیگرأن نیبید، چون شومأن هیزأرتأ چی‌چی‌نی جَایٚم ویشتر اَرزیدی.
ایمأنٚ جَا ایعترأف کودن
32«هر کی مردومٚ جَا می نأم خو زٚوأنٚ جَا ایعترأف بوکونه، منم اونی نأمَ می آسمأنی پئرٚ ورجأ ایعترأف کونم. 33ولی هرکی مٚرَه مردوم ورجأ اینکأر بوکونه، منم می آسمأنی پئرٚ ورجأ اونَ اینکأر کونم.
شٚمشیر یا صولح
34«گومأن نوکونید بأمؤم کی زیمینٚ سٚر صولح بأوٚرٚم! نأمؤم کی صولح بأوٚرٚم، بلکی شٚمشیر بأوٚرٚم. 35من بأمؤم کی "پٚسرَ خو پئرٚ جأن، دوخترَ خو مأرٚ جأن، عروسَ خو مردٚمأرٚ جأن تأوٚدم. 36طوری کی اینفرٚ خأنه دورون همٚتأن، اونی دوشمن بٚده."#۱۰:۳۶میکاه ۶:۷
37-«اگه شیمی پئر و مأرَ می جَا ویشتر دوس بٚدأرید، لأیٚق نیئید کی میشین بیبید؛ و اگه شیمی پٚسر یا دوخترَ می جَا ویشتر دوس بٚدأرید، لأیٚق نیئید کی میشین بیبید. 38هر کی نٚخأیه خو صلیبٚه اوسأنه و می دونبألسر بأیِه، لأیٚق نییٚه کی میشین بٚبه. 39هر کی خأیه خو جأنَ قأیم بٚدأرٚه، اونَ جٚه دٚس دِهه، ولی هرکی خو جأنَ می وأسی جٚه دٚس بٚده، اونَ یأفه.
اَجر و پأدأش
40«هر کی شٚمٚره قوبیل بوکونٚه، مٚرَه قوبیل بوکوده؛ و هر کی مٚرَه قوبیل بوکونٚه، می اوسه کوده‌یَ قوبیل بوکوده. 41«هر کی ایتأ پیغمبرٚ، اوسِه کوده جٚه، خودا ور، قوبیل بوکونٚه، خودش هم ایتأ پیغمبرٚ پأدأشٚ فأگیره، و هر کی ایتأ دوروستکأرٚ آدمٚ اونی دورستکأری وأسی قوبیل بوکونٚه، ایتأ پأدأش اونی پأدأشٚ مأنستَن یأفه. 42و اگه اینفر ایتأ اَ کوجه‌دأنه‌یأنَ، جٚه اَ خأطر کی می شأگردٚده، حتّا ایتأ لیوأن سردٚ آب فأدَه، رأس‌رأسِی شٚمٚره گم، بی‌پأدأش نٚمأنه.»
Nu geselecteerd:
متا 10: GLK_NT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Transform Iran