متا 26
26
عیسا کوشتٚنٚ رِه جوفت و کلک دیچِن
1چون عیسا همه‌یٚ اَ گبأنَ تومأنَ کوده، خو شأگردأنَ بوگفته: 2هوطویی کی دأنیدی، دو روج دِه پِسَحٚ عَید شورو به. اَ عَیدٚ میأن مٚرَه گیرده، صلیبٚ سٚر کوشٚده.»
3هو موقع، پیله کأهینأن و قومٚ پیله کسأن، قیافا، پیله کأهینٚ خأنه دورون، جمَ بوستٚد، 4و کس‌کسٚ اَمرأ مشوٚرت بوکودٚد کی چی جوفت و کلکٚ اَمرأ عیسا‌یَ بیگیرٚد، بوکوشٚد؛ 5ولی تصمیم بیگیفتٚد اَ کأرَ عَیدٚ موقع نوکونٚد کی آشوب بٚرأ دنکفه.
عیسا تدهین کودن بیت عنیا دورون
6او زمأت میأن عیسا بیت عنیا دورون جوذأمی شمعونٚ خأنه دورون ایسأ بو. 7سٚفره سٚر، ایتأ زنأی ایتأ گیرأنٚ شیشه عطرٚ اَمرأ بأمؤ بودورون و عطرَ فوکوده عیسا سٚر.
8اونی شأگردأن وختی اَنَ بیدِده، اَشأنٚ اوقأت زرخَ بو و بوگفتد: 9«او عطر حِیف نوبو کی هدر بوشؤ. اونَ شأستی سیصد تأ نوقره سکه جَا بوفروشیم و اونی پولَ فِقِرأنَ فأدیم.»
10عیسا کی دأنستی کس‌کسَ چی گفتأندرده، بوگفته: «چٚره اَ زنأکَ اَذِت آزأر کودأندریدی؟ اون خورومٚ کأر مِرِه بوکوده. 11فِقِرأنَ همیشٚک شیمی اَمرأ دأریدی، ولی مٚرَه همیشٚک شیمی اَمرأ نأریدی. 12اَ زنأی رأس‌رأسِی اَ عطرَ می سٚر فوکودٚنٚ اَمرأ، می جأنَ دفن کودنٚ رِه آمأدَه کوده. 13رأس‌رأسِی گم، دونیأ دورون هر تأ جأ کی اینجیل موعیظه بٚبه، خیدمٚتی هم کی اَ زنأی مِرِه بوکود، بٚیأد بأوٚرده به.»
یوهودأ خیأنٚت عیسا جَا
14بأزون یوهودأیٚ اسخریوطی کی ایتأ جٚه او دوأزده‌تأ شأگرد بو، بوشؤ پیله کأهینأنَ ورجأ 15و بوگفته: «چندر مٚرَه فأدید کی عیسا‌یَ شیمی دٚس فأدٚم؟» اوشأن سی‌تأ نوقره سکه اونَ فأدأده. 16جٚه او موقع، اون ایتأ فورصتٚ دونبأل بو کی عیسا‌یَ اوشأنٚ دٚس فأدَه.
عیسا آخری شأم شأگردأنٚ اَمرأ
17فطیرٚ عَیدٚ اوّلی روج فأرٚسِه. شأگردأن بأمؤده عیسا ورجأ، وأورسئده: «کویه خأیی تٚرَه تدأرک بیدینیم کی پِسَحٚ شأمَ بوخوری؟»
18اون جوأب رِه بوگفته کی بیشید شهر فلأن کسٚ ورجأ، بیگید: «اَمی اوستأد گه: "می زمأت فأرٚسِه. می شأگردأنٚ اَمرأ خأیم شیمی خأنه دورون پِسَحٚ شأمَ بوخوریم."» 19شأگردأن عیسا گبٚ مأنستَن انجأم بٚدأده، پِسَحٚ شأمَ اویَه تدأرک بیدِدٚد.
20شب، عیسا خو دوأزده‌تأ شأگرد اَمرأ سٚفره سٚر بینیشت. 21شأم خوردنٚ موقع اون اوشأنٚ بوگفته: «رأس‌رأسِی شٚمٚره گم کی ایتأ جٚه شومأن مٚرَه خیأنٚت کونه.»
22همٚتأن اَ گبٚ جَا غورصه بوخوردٚد و اَیتأ اویتأ پس اونی جَا وأورسئده: «آقأ جأن، اون من نییٚم کی؟»
23اون جوأب میأن بٚفرمأسته: «اونی کی خو دٚسَ می دٚسٚ اَمرأ بوشقابٚ ور رأستَ کوده، هونی ایسه کی مٚرَه خیأنٚت کونه. 24اینسأنٚ پٚسر #26:24 «اینسأنٚ پٚسر» ایصطلأح ایتأ جٚه عونوأنأنی ایسه کی عیسا خؤرَه بٚکأر بٚره.وأستی بیمیره، هوطو کی موقدسٚ کیتأبأنٚ دورون اونی رِه بینیویشته بوبوسته. ولی وای بحألٚ اونی کی اونَ دوشمنٚ دٚس تحویل بٚدأ. اونٚ رِه بیتر بو کی هیوخت بودونیأ نأمؤ بی.»
25یوهودأیم کی بأزون اونَ خیأنٚت بوکوده، اونی جَا وأوٚرسِه: «اوستأد، آیا اون منم؟» عیسا جوأب بٚدأ: «هطویه، خودت بوگفتی!»
26وختی شأم خوردأندوبود، عیسا نأنَ اوسأد و شوکر بوکوده؛ بأزین تیکه تیکه کود و شأگردأنَ فأدأ و بٚفرمأسته: «فأگیرید بوخورید، اَن می جأنه.» 27بأزون، شرأبٚ جأمَ اوسأد، شوکر بوکوده و فأدأ اوشأنَ و بوگفته: «شومأ همّه اَ جأمٚ جَا وأخورید. 28اَن می خونه کی اونی اَمرأ، تأزه عهد و پیمأنَ، خودا و اونی قومٚ میأن مُهر کونم. می خون خٚیلیأنٚ گونأیأنٚ بٚبخشه بوستنٚ وأسی فیوِه. 29شٚمٚره گم کی من اَ انگورٚ حأصیلٚ جَا دِه وأنخورٚم تأ هو روج کی اونَ شیمی اَمرأ می پئرٚ ملکوتٚ دورون، تأزه وأخٚوٚرم.»
30بأزین ایتأ سورود بخأندٚد و زیتون کوه ور رأ دکفتد.
عیسا پطرسٚ اینکأر کودنَ پیشگویی کونه
31بأزون عیسا اوشأنَ بٚفرمأسته: «ایمشٚب شومأن همٚتأن مٚرَه تنأ نیهیدی. چون موقدسٚ کیتأبأنٚ دورون بینیویشته بوبوسته کی خودا چوپأنَ زٚنِه و گلّه گوسوندأن هر کودأم ای رأ شٚده.#26:31 زکریأ ۷:۱۳ 32ولی می زٚنده بوستن پٚسی، شٚم جلیل و شٚمٚره اویَه دینم.»
33پطرس بوگفته: «حتّا اگه همّه تٚرَه تنأ بٚنٚد، من تی جَا دورَ نٚبم.» 34عیسا اونَ بوگفته: «بأوٚر بوکون کی هه ایمشٚب، جٚه قبلٚ اَنکی خوروس بٚخأنه، تو سه وأر مٚرَه اینکأر کونی و گی مٚرَه نشنأسی!»
35ولی پطرس بوگفته: «حتّا اگه لأزیم بٚبه، تی اَمرأ میرٚم، ولی هیوخت تٚرَه اینکأر نوکونم!» البأقی شأگردأنم هطو بوگفتد.
آخرٚ دوعأ جتسیمأنی باغٚ دورون
36بأزین عیسا خو شأگردأنٚ اَمرأ فأرٚسِده ایتأ زیتون بأغَ، کی جتسیمأنی بأغ معروف بو. اون اوشأنٚ بوگفته: «شومأن اَیَه بینیشینید کی من بشم ایپچه اوشتٚر، دوعأ بوکونم.» 37بأزین پطرس و زبدی دوتأ پٚسرَ ینی یعقوب و یوحنایٚم خو اَمرأ ببرد و او حألٚ دورون کی غورصه و پریشأنی تومأمٚ اونی جأنَ بیگیفته بو، 38اوشأنَ بوگفته: «غم و غورصه شیدّتٚ جَا، مٚردأندرم. شومأن هَیه و می اَمرأ بیدأر بئیسید.»
39بأزین بوشؤ ایپچه اوشتٚر زیمین سٚر بٚکٚفت و اَطو دوعأ بوکود: «پئر، اگه ایمکأن دأره، اَ رنج و عذأبٚ جأمَ می جَا اوسأن؛ ولی نه می خأهیشٚ وأسی، بلکی تی خأستٚ اَمرأ.»
40بأزین وأگردسته او سه‌تأ شأگردٚ ورجأ و بیدِه کی خوفتِده. بأزون پطرسَ بوگفته: «نتأنٚستیدی ای سأعت می اَمرأ بیدأر بئیسید؟ 41بیدأر بئیسید و دوعأ بوکونید کی وسوسه شٚمٚره غلبه نوکونه. روح خأیه، ولی جأن ضعیفه.»
42دووأره اوشأنَ بٚنأ و بوشؤ و اَطو دوعأ بوکود: «پئر، اگه ایمکأن نأرِه کی اَ جأم جٚه می جَا اوسأده بٚبه، پس اونَ وأخٚوٚرم. اونچی کی تی خأست ایسه انجأم بٚبه.»
43وختی وأگردسته، بیدِه کی هنو خوفتِده، چون نتأنستیدی خوشأنی چومٚ پیله‌یَ وأز بٚدأرٚد. 44پس سیومی وأر رِه بوشؤ و هوطو دوعأ بوکود.
45بأزین وأگردسته شأگردأنٚ ورجأ و بوگفته: «ینی هنو خوفتِییدی و ایسترأحت کونیدی؟ اَسه او زمأت کی تعیین بوبوسته بو فأرٚسِه و اینسأنٚ پٚسر، گونأکأرأنٚ چنگٚ دورون گریفتأرَ به. 46ویریزید، وأستی بیشیم. فأندٚرید، اَنٚم اونی کی مٚرَه تسلیم کونه!»
عیسا دسگیرَ کودن و موحأکمه
47عیسا گب هنو تومأنَ نوبوسته بو کی یوهودأ، جٚه رأ فأرٚسِه. 48اونی کی اونَ تسلیم کونه ینی یوهودأ، او کسأنی کی اونی اَمرأ بودَ بوگفته بو: «هرکی‌یَ مأچی بٚدأم، هونه، اونَ بیگیرید.» 49بأزین یوهودأ صأف بوشو عیسا ور و بوگفته: «اوستأد سلأم!» و اونَ مأچی بٚدأ.
50عیسا بوگفته: «اَی ریفِق، تی کأرَ بوکون!» پس او چن نفر بوشؤده جولو و عیسا‌یَ بیگیفتٚده.
51هو دٚقّه ایتأ جٚه عیسا همرأیأن خو شٚمشیرَ فأکشه و ایتأ ضربه اَمرأ، پیله کأهینٚ غولأمٚ گوشَ بٚزِه بِیگأده.
52عیسا اونَ بٚفرمأسته: «تی شٚمشیرَ غلافَ کون. هر کی شٚمشیر فأکشه، شٚمشیرٚ اَمرأیم بوکوشته به. 53مگه نأنی کی من تأنٚم می پئرٚ جَا بخأیٚم کی هیزأرهیزار#26:53 یونأنی: دوأزده‌تأ پیش دٚکٚف فٚرٚشته اوسه کونه کی مٚرَه یاور بٚدٚد؟ 54ولی اگه اَطو بوکونم، چوطو موقدسٚ کیتأبأنٚ پیشگویی انجأم به کی فرمأیٚده اَ ایتفأقأن وأستی دکفه؟»
55بأزون اون وأگردسته او چن نفرٚ ور و بوگفته: «مگه من فرأر بوکوده دوزدم کی چو و چومأق و شٚمشیرٚ اَمرأ می دونبأل بأمؤییدی؟ من هر روج شیمی چومأنٚ ورجأ معبد دورون ایسأبوم و مردومَ آمؤختأندوبوم؛ چٚره هویه مٚرَه نیگیفتیدی؟ 56اَطویی، وأستی بوبوستی بی، چون تومأمٚ اَ ایتفأقأنَ، پیغمبرأن، موقدسٚ کیتأبأنٚ دورون پیشگویی بوکوده بود.»
اَ گیر وأگیرٚ میأن، تومأمٚ شأگردأن، اونَ تنأ بٚنأد و بوگروختٚد.
عیسا یوهودٚ شورأ ورجأ
57پس او گورو، عیسا‌یَ ببردٚد قیافا خأنه کی پیله کأهین بو. اویَه تومأمٚ دین عألیمأن و یوهودٚ پیله کسأن جمَ بوسته بود. 58پطرسٚم جٚه دور عیسا دونبأل سٚر رأ دکفته و تأ پیله کأهینٚ خأنه صأرأ دورون بوشؤ و سروأزأنٚ ورجأ بینیشته کی بیدینه عیسا سٚر چی اَیِه.
59پیله کأهینأن کی هو تومأمٚ یوهودٚ پیله شورأ آدمأن بود، جمَ بوسته بود و شأهیدٚ دونبأل گردستیدی کی دورُغ اَمرأ عیسا‌یَ بد نأمَ کونٚد، کی بتأنٚد اونَ بوکوشٚد. 60چن نفر بیأفتٚد، اوشأنم دورُغ شهأدت بٚدأده، ولی اوشأنی گبأن کس‌کسٚ اَمرأ ایتأ نوبو. آخرپٚسی دو نفرَ بیأفتٚد کی 61بوگفتٚده: «اَ مردأی گفتی من تأنٚم اَ معبدَ فوگوردأنٚم، و اونَ سه روجٚ میأن دووأره چأکونم.»
62بأزون پیله کأهین ویریشته و عیسا‌یَ بوگفته: «خأ، چی گی؟ اونچی کی گده حِئقت دأره یا نه؟» 63ولی عیسا سأکیت بئیسأ.
پیله کأهین اونَ بوگفته: «زٚنده خودا نأمٚ وأسی تی جَا خأیم کی جوأب بدی. تو مسیح، خودا پٚسر ایسی یا نه؟»
64عیسا جوأب بٚدأ: «تو خودت گی! و منم شٚمٚره گم کی بأزین اینسأنٚ پٚسرَ دینیدی کی خودا رأستٚ دٚس نیشته و آسمأنٚ اَبرأنٚ سٚر اَیِه.»
65بأزون پیله کأهین خو لیوأسٚ یقه‌یَ پأرَه کوده و ایجگره بٚزِه: «کوفر بوگفته! دِه شأهید چی خأییم بوکونیم؟ خودتأن بشتأوستید کی کوفر بوگفته. 66چی رأی دیهیدی؟» همه فریأد بٚزِده: «وأستی بیمیره!»
67بأزون اونی دیمَ فیلّی فوکودٚد و اونَ بٚزِده. بعضیتأنٚم اونَ چٚک بٚزِ‌دٚه، 68رخشنٚ اَمرأ بوگفتد: «ای مسیح، نوبوّت بوکون! بوگو بیدینیم کی تٚرَه بٚزِه؟»
پطرس عیسا‌یَ اینکأر کونه
69ولی پطرس هنو خأنه بیرون، صأرأ دورون نیشته بو کی پیله کأهینٚ ایتأ کُلفٚت بأمؤ اونی ورجأ و بوگفته: «گومأن کونم تونم عیسایٚ جلیلی اَمرأ بی!»
70ولی پطرس همه کسٚ ورجأ اینکأر بوکوده بوگفته: «نأنٚم چی گی!»
71ایپچه کی بوگوذشت، دروأزه کنأر، ایتأ دِه کُلفٚت اونی اَمرأ کس بٚکس بوخورد و اوشأنی کی اویَه ایسأ بودَ بوگفته: «اَ مردأکٚم عیسایٚ ناصری اَمرأ بو.»
72پطرس دووأره اینکأر بوکوده، و اَیدٚفأرِه قسم بوخورده، بوگفته: «من هیذره اَ مردأکَ نشنأسٚم.»
73ولی ایپچه بعد، اوشأنی کی اویَه ایسأبود بأمؤده پطرسٚ ورجأ، اونَ بوگفتد: «تو حتمن ایتأ جٚه اونی شأگردأنی، چون تی لهجه جلیلی‌یه!»
74پطرس اَیدٚفأرِه بینأ کوده لعنت کودن و قسم خوردن و بوگفته: «من هیذره اَ مردأکَ نشنأسٚم.»
دوروست هو زمأت خوروس بخأنده، 75و پطرس عیسا گبَ یأد بأوٚرده کی بوگفته بو: «قبل اَنکی خوروس بٚخأنه، تو سه وأر مٚرَه اینکأر کونی.» پس بیرون بوشؤ زرخ گریه بوکوده.
Nu geselecteerd:
متا 26: GLK_NT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Transform Iran