Mateo 20
20
U Magtrabaho Hide tu Ubasan
1Intulos ni Jesus u págtoldo na, kinagi na “U pághare nu Diyos ay kapareho ni iye: Essa a dimadimang a tahod ay limmuwas u te kao tu ubasan tu bilay na para magehyok ti upaan na hide. 2Nikuna a nakaehyok dán siya ay nagkasundo hide tu upa nu essa a tolay ti maghapon. Pinaangay na hide tu ubasan na. 3Lummuwas siya a huway nikuna magalas nuwebe tu dimadimang sakay naketa siya ti agum pa a nagistambay la tu palengke. 4Kinagi na nide, ‘Angay kam magtrabaho tu ubasan ko. Atádden takam ti tama a upa.’ Kanya immangay hide. 5Lummuwas dámman u te kao tu alas dose ti tanghale sakay tu alas tres ti apon. Sakay pareho labe u ginimet na. 6Nikuna a magala singko ti apon ay lummuwas dámman siya sakay naketa pa ti iba a awan be nagtrabaho. Kinagi na nide, ‘Bakin kam a nagistambay la he tu buo a maghapon?’ 7‘Awan be ti mangatád nikami ti trabaho,’ tábbeg de. Sakay kinagi na, ‘Ni konna hod, angay kam magtrabaho tu ubasan ko. Upaan ta kam.’
8Nikuna a sumaham dán u aldew, kinagi nu te kao tu ubasan tu tagapangasiwa na, ‘Dulawan mu dán u upaan hide sakay suwelduwan mo hide. Magsapul tu dimodyan hanggan tu dipalongo hide a nagtrabaho.’ 9U nagsapul hide tu alas singko ti apon ay nakaalap ti upa a halaga nu nagtarabaho ti essa aldew. 10Sakay nikuna immadeni u nagdipalongo hide ay akala de a makaalap hide ti higit pa; pero u kada essa nide ay nakaalap la be hide ti pareho a upa a pangsaldew. 11Pákkaalap de, nagreklamo hide tu te kao tu ubasan. 12Kinagi de, ‘Essa a odas la a nagtrabaho u demodyan hide a dimmemát, samantala maghapon kami a naghirap sakay nagtiis tu makapasi a init nu aldew. Bakin pinagpare-pareho mo u upa me?’ 13Pero kinagi na tu essa nide, ‘Barkada, awan taka dinaya. Awan beman nagkasundo kita a u upa ay halaga nu essa a aldew a tarabaho? 14Alapán mo u para niko sakay lumakad ka dán. Maanya ni gusto ko a suwelduwan u nedimodyan ti kapareho tu upa ko niko? 15Awan beman karapatan ko a gimetan u gusto ko tu ari-arian ko? O makay sumeni ka la tu kabaitan ko?’” 16Kaya kinagi ni Jesus “U nedimodyan ay mágdipalongo sakay u nágdipalongo ay medimodyan.”
Káttallo a Pángkagi ni Jesus Tungkol tu Kákkatay Na
(Markos 10:32-34; Lukas 18:31-34)
17Nadid ummangay di Jesus ti Jerusalem. Alay nu paglakad de tu dilan a patamo ti Jerusalem ay binukod na u sapulo ay ti duwwa. Kinagi na nide, 18“Magsanig kam, patamo kitam ti Jerusalem. Hod ay itukyon u Anak nu Tolay tu pupuno nu saserdote hide sakay tu maisto hide nu Kautusan. Hatulannák de ti kamatayan, 19sakay ipaubaya tu awan hide maniwala tu Diyos. Sestiyánnák de, haplitán ti grabe sakay ipako tu kudus; pero huwayák a biyagán nu Diyos tu katállo a aldew.”
U Impakpágguhon nu Ina ni Santiago sakay Juan
(Markos 10:35-45)
20Nadid essa aldew immadeni ni Jesus u kabanga ni Zebedeo, kaguman na u anak na hide. Te gusto siya a ipakpágguhon, kaya limmuhod siya tu atubang ni Jesus. 21“Anya u maari a magimet ko para niko?” tanong ni Jesus. Timmábbeg siya, “Gusto ko a ipagkaloob mo tu duwwa ko a anak u karapatan a umetnod a kadatig mo tu kaharian mo---essa ti kawanan sakay essa ti kawihe. Maghare hide a kaguman mo” 22“Awan moy tukoy u agidán moy,” kagi ni Jesus nide. “Makaya moy beman a tággadan u hirap a tiisán ko#20:22 Ti Griego: Mainom moy beman u baso a áinoman ko??” “On,” tábbeg de. 23Kinagi ni Jesus, “U hirap ko ay makayanan moy ngane. Pero bakán a hikam u mangpile ni deya u umetnud tu kawanan sakay tu kawihi ko. Itona hide a inagid moy ay para tu pinaghandaan hide nu Ama ko.”
24Nikuna a nasaneg iye nu agum a sapulo, nagngal hide tu matkaka. 25Kaya pinaadeni hide ni Jesus a atanan sakay kinagi na nide, “Tukoy moy a u pupuno nu awan hide maniwala tu Diyos ay maghare tu tolay na hide. Sakay hide i dapatay a masunod ni anya man u gusto de. 26Pero bakán a konna hina u dapat a mangyari nikam. Nan, ni deya man nikam u masoh a magin mataas ay dapat siya u magserbi. 27Sakay ni deya man u masoh a magin puno ay dapat magin tagaserbi moy. 28Konna tu Anak nu Tolay a awan ummangay para pagserbiyan nan para magserbi sakay iyalay na u biyag na para matubos u kakpalan.”
Pinagpiyya Ni Jesus U Duwwa a Buhák
(Markos 10:46-52; Lukas 18:35-43)
29Nadid tu hektat de ti Jerico, ti Jesus ay inunonod nu dapat a kakpal a tolay. 30Sakay te duwwa a buhák a mággetnod tu digdig nu dilan. Nikuna a nasaneg de a magtaleb ti Jesus ay nagpapakhawan hide “Anak ni David, mahabag ka nikami!” 31Pinagkagiyan hide nu katolayan a ummimang pero lalo hide a pimmakhaw, “Anak ni David, mahabag ka nikami!” 32Pinumirmi ti Jesus sakay dinulaw na hide sakay tinanong, “Anya u maari a gimetan ko nikam?” 33Tinumábbeg hide, “Panginoon, pagpiyyaan mo kame tán maketa kame!” 34Kinagbiyan hide ni Jesus kanya kinahap na u matamata de. Pagdaka hide a naketa sakay tulos a sumunod nikuna.
Nu geselecteerd:
Mateo 20: MBJC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Pahanan Agta New Testament © Philippine Bible Society and Wycliffe Bible Translators, Inc., 2017.