Kutangisa 3
3
Kusahwa kwe nthu
1 #
Zumbunulo 12:9; 20:2 Ndizo ngwenu, nyoka yakabe ili jenjedu linopinda phuka dzose dze shango dzakathamiwa ndi Yahwe Ndzimu. Yakabhuzwa nkadzi ikati, “Kumande, Ndzimu wakati musitongoja miti yose imu nnda iwoyu kene?”
2Nkadzi kadabila nyoka eti, “Tingaja zwedu mitjelo ye miti imu nnda, 3koga Ndzimu wakati, ‘Musitongoja ntjelo we nti u pakati kwe nnda, kene kuli kuubhata musiubhate ngoti mungafa.’ ”
4Koga nyoka ikati ku nkadzi, “Nge malebeswa dumbu, amungafe 5ngoti Ndzimu unoziba kuti mu zhuba ilelo la mungauja, mesho enyu anowozhulika mukanga Ndzimu, mukaziba bubuya ne mbipo.”
6Nkadzi kati ebona kuti nti iwoyo wakanakila kujiwa, kakale uli mbuya ngolingwa, ntome upa nthu butjenjedu, katjela ntjelo kauja. Mmwe ntjelo kaupa nlume uwe ngono kajabo. 7Ipapo mesho abo bose kazhuka, ngono bakaziba kuti bambujo, ndizo bakabe bethumanya mazhani e mpaya bezwithamigwa zwitembgwe.
8Kwakati mu madekwana kotothola, bakahwa nsindo wa Yahwe Ndzimu beyenda mu nnda, ngono nlume ne nkadzi uwe bakabgwatila Yahwe Ndzimu pakati kwe miti ye nnda. 9Koga Yahwe Ndzimu bakadana nlume bakati, “Ungayi?”
10Kadabila eti, “Ndahwa nsindo wenyu mu nnda, ngono atja ngoti ndili mbujo, ndizo abe ndibgwata.”
11Ndzimu ukabe umbhuzwa uti, “Ndiani wakubudza kuti umbujo? Waja ntjelo wandakakudwa ati usiuje kene?”
12Nlume kabe eti, “Nkadzi wamakandipa kuti agale nami, wandipa ntjelo we nti iwoyo ngono auja.”
13 #
2 Bakorinta 11:3; 1 Timoti 2:14 Yahwe Ndzimu bakabhuzwa nkadzi bakati, “Ini ikoku kwawathama kene?”
Nkadzi kashandula eti, “Nyoka yandifulila, ngono aja.”
Ndzimu unowosumikilisa
14Ndizo Yahwe Ndzimu bakadwa nyoka bakati,
“Se wathama ikoku, wabe ne bhiso kupinda zwithuwo zose,
ne phuka dzose dze shango.
Unowoyenda usoba pasi nge ntumbu,
unowotjila uja hwuluba mazhuba wose e bupenyu gugo.”
15 #
Zumbunulo 12:17
“Ndowolonga lubengo pakati kuko ne nkadzi,
na pakati kwe ludzi gugo ne ludzi gugwe.
Ludzi gugwe gowopkhwanya nsholo uwo,
iwe unowokaadza itshitshino tjitje.”
16Ndzimu ukadwa nkadzi ukati,
“Ndowowatsha zwibhayo mu kuwana mbeleko kuko.
Nge zwibhayo unowowana bana,
nenguba kwakajalo njemulo dzidzo dzowobe mu nlume uwo,
ngono iye unowokulaula.”
17 #
Bahebheru 6:8
Kuna Adamu Ndzimu ukabe uti,
“Iwe ngoti wahwilila nkadzi uwo ukaja ntjelo we nti wandakati usiuje,
pasi pabe ne bhiso nge kuko,
unowotjilila mu mang'oni
e kushinga kuti uwane zojiwa butjilo gugo gose.
18Pasi panowokumelela mihwa ne mitinyana inobhaya,
nawe unowoja milibo ye shango.
19Unowoja zojiwa nge dukuta le phazha iyo
kudzina ubgwilila mu mavu
ngoti wakatogwa mu ali,
u hwuluba ngono unowobgwilila mu hwuluba.”
20Adamu katumila nkadzi uwe kati Efa, ngoti wakabe ewobe mme be bathu bose. 21Yahwe Ndzimu bakathamila Adamu ne nkadzi uwe zwiambalo zwe makukuta bakabaambadza.
Tatiwa kwa Adamu na Efa mu nnda
22 #
Zumbunulo 22:14
Ipapo Yahwe Ndzimu bakabe beti, “Nthu ngwenu wofanana koga ne mmwe wedu, unoziba bubuya ne mbipo, ungadwa etambunudza luboko gugwe etjela ntjelo we nti we butjilo eja, edwa etjilila tjose.” 23Ndizo Yahwe Ndzimu bakabe bentata mu nnda we Edeni kunolima mavu aakatogwa mu ali. 24Ndzimu ukatatila nthu kuzhe, ngono ukabiga dzikherubhu* dzawo ku bhezhuba kwe nnda we Edeni ne thumo linothuta linoshandukila mu mbizho dzose kulinda zila inoyenda ku nti we butjilo.
Nu geselecteerd:
Kutangisa 3: KBTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Kalanga Bible © Bible Society of Botswana, 2008, 2018.