Matiu 4
4
Jesu Vena Kamajina
(Maka 1:12-13; Ruku 4:1-13)
1'E'eme Godoni 'Aveni vejume Jesuho va'e nechi'i hi'eje 'avena sisei roe vena ka'amarono va'ana. 'Enakaivo Jesu ijí 'aura arema 2hi'eme na'ia mapoka (40) pa'are'eme matumana. 3'E'eme 'avena sisei roe ijá 'wama A Godoni Hariha re'amajaho veje munakaho puretia renama 'wamana. 4'Ejume Jesura eha vene ijá 'wama Godoni ira vaji ijá 'waramana
Ea puretiapo reje majama hihuna pana kaivo ira ka'ene Godira 'waramujara reje majama hihuna 'wamana.
5'Ejumakame 'avena sisea kajara Hua ahema ajima va'e Temiporu atahuri ranamana. 6'Enarena hu ijá 'wama Areri Godoni ira vaji 'waramaja'ina'e A Godoni Hariha re'amajaho mwamapene kami mwe'i 'onava kavuma.
Godoni ona oji'inijipo A iji 'unarama apena 'ariha va'e kami ranamaakame muna A paninama kavuma 'wame 'wamana.
7'Ejumakame Jesura ijá 'wama Godoni ira vaji kú'o ika'ina 'waramana. A oni Godi paapene vena ka'amana 'wamana. 8'Ejume kú'o 'avena sisea kajara Jesuho ahema va'e huri'a ka'ene niho'o jopatu'uriji ajima va'e kahi huri nami'i kaivo kwaa araka mapokakija 'ee puni mamaijaho nahana. 9'Enarena 'avena sisea Jesu ijá 'wama A nitupari same nuana vetie na oja mi'amajaho ike uneunechaka mapokakija ni'aha kwino nara A vaja'eju 'wamana. 10'Ejume Jesura 'avena sisea kajaho ijá 'wama 'Avena sisea karera! Karori va'a! Godoni ira vaji 'warumajaho
Natohwa ka'ene oni Godijiru oja mahe Hunaru vena'amana 'wamana.
11'Ejume 'avena siseijaho Jesu rana'ika'i va'eme ona oji'inapo roe Hu ni'ajahara.
Jesura Huni Kaukara Karari Vaji Aneja 'Emajina
(Maka 1:14-15; Ruku 4:14-15)
12'Enakaivo Jesuho hejume Joniho tipurai ranavuma heji'i Hu Karari va'ana. 13'Enarena Hu va'e Nasareti are'ika'i va'e Kapeniami hinana. Ijí ara kajaho soha rorina. Ara kajaho Sepurani 'wame 'ee Napatarai 'wavuri vajina. 14Ijaho Poropeti Aisea oni vaji 'waramajara roe nimai nimai renu. Hu ika'ina'e 'waramana.
15Ara ka'ene Sepurani 'wame 'ee Napatarai 'wavujija soha rori Jotani ona kara'i Karari ka'ene Jenitaruepo hijujina.
16Ea ka'ene ijí nutuvi'ini hijujija hanaji'ina ni'ima'ura kavara. 'Ene ea ka'ene nutuvi'inaka nikwamasahuja'ina rena hijujihi hanaji'ina kajara hananiu 'wamana.
17Vea kajiano Jesuho aneja vene vu'a 'waramarena ijá 'iama Ta'arohe joni sisea vwihane teamukave aremamai are'i kaivo ea maiu'ina reha! Ijihuni maijaho Godoni ara niroe rori roa paranukúnina 'iamana.
Jesura Huni Tisaiporu Amura 'Umenajina
(Maka 1:16-20; Ruku 5:1-11)
18'Enarena Jesuho Karari soha rora kaji kahi va'i kivume ea iha Saimani ka'ene Pitana 'wavuji'o huni 'u'ua ka'ene Enituruna 'wavuji'o hine úa vesamapene roara. Ijihuni maijaho pu úa vesavi'ina. 19'Ejumakame Jesura pu ijá 'iama Nuni roajivakame jara 'úa vesavu kaja'ina'e Na ja najahe ja ea ahera'avara 'iamana. 20'Ejume pu ni'aha kwino puni namea irecha 'o'i kaivo pu pu'úmo va'ara. 21'Ejume pu va'i kivume vu ea 'aho'a Sepati oni harihija Jemisina 'wavuji'o Joni ka'ene huni 'u'uiji'i emahwa pu'úmo puni sisima vaji hine puni namea hwearikara. 'Ejume Hu pu 'umenaana. 22'Ejume pu ni'aha kwino puni sisima raname 'ee omaha rana'i kaivo pu pu'úmo va'ara.
Jesura Kaukara Iraka'e Venajina
(Ruku 6:17-19)
23'Enarena Jesura va'e Karari vaja kaji 'uraha oji'i puni Sinakoku vaji Godoni arijihuni vu'a mai maiu'ina najahana. 'Eji'i eaka mapokijihi atama ani ani'ina ka'ene rena'e 'ee 'uniravajija vejume sonahiara. 24'Ejumakame Huni pinani 'urina va'e Siria vaji va'uma henarene eaka mapokijipo hahapo hianame 'ee hahapo siseranie 'ee ea ka'ene 'avena sisei ajima'e 'ee ea ka'ene mwe'i 'arihe simavi'i name 'ee ea ka'ene irima'ina 'eka Huni roume Hura vejume maranie 'ee sonahiara. 25'Ejumakame ijihuna'e ea niho'o mapoka mapoka Hu tamatihara. Ara ka'ene Hu tamatihajaho Karari ora 'ee Jerusaremi ora 'ee Jutia ora 'ee ara ka'ene Jotani toa one kara'i hijujija 'ee Tikaparasi hijujija ni'aha kwinu Hua tamatiha ojara.
Markert nå:
Matiu 4: mcq
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 1999, Wycliffe Bible Translators, Inc. All rights reserved.