JOHANA 11
11
Lazara thih thu
1Bethani khuaa mi pakhat Lazara a damlo va, chu khua chu Mari leh a laizâwn Marthi awmna a ni. #Mk. 11:1; Lk. 10:38,39. 2Damlo chu Mari nuṭa Lazara a ni. Mari chu Lalpa hriak rimtui chulha, a sama a ke hrûksaktu kha a ni.#Mk. 14:3; Lk. 7:38; Jn. 12:3. 3Tichuan, a farnute chuan, “Lalpa, i hmangaih kha a dam lo ve,” tiin mi an hrilhtîr a. 4Isuan a lo hriat chuan, “He natna hi thihna tûr a ni lo ve, Pathian ropuina tûr a ni zâwk. Hemi avâng hian Pathian Fapa hi chawimawiin a awm dâwn a ni,” a ti a. #Jn. 9:3. 5Isuan Marthi leh a laizâwnnu leh Lazara chu a hmangaih a; 6mahse, a damlo tih a hriatin a awmna ngaiah ni hnih a la awm ta cheu va. 7Chumi hnu chuan a zirtîrte hnênah, “Judai ramah i kal leh ang u,” a ti a.
8A zirtîrte chuan, “Zirtîrtu, tûn lawkah Juda-ten lunga den che an tum a, chutah chuan i kal leh ang maw?” an ti a. #Jn. 8:59; 10:31.
9Isuan a chhâng a, “Chhûnah dârkâr sâwm leh pahnih a awm lo vem ni? Mi chhûna a lên chuan a petek ngai lo, he khawvêl êng hi a hmuh avângin. #Jn. 9:4; 12:35. 10Zâna a lên erawh chuan a petek ṭhîn, amahah êng a awm loh avângin,” a ti a.
11Chu chu a sawi zawhin an hnênah, “Kan ṭhian Lazara kha a muhîl a; mahse, amah kaitho tûrin ka kal dâwn a ni,” a ti a. 12A zirtîrte chuan a hnênah, “Lalpa, a muthilh chuan a ṭha leh mai ang chu,” an ti a. 13Isuan a thih thu a sawina chu mut pangngaia a muthilh thu a sawina emaw an ti a. 14Chutichuan, Isuan fiah takin a sawi a, “Lazara a thi a ni; 15nangmahni avângin chuta ka awm lo chu ka lâwm a ni, in rin theih nân; eng pawh ni se, a hnênah i kal ang u,” a ti a. 16Thoma, Phîra an tih chuan a zirtîrpuite hnênah, “Thih leh thih, a hnênah i kal ve ang u,” a ti a.
Isua - thawhlehna leh nunna
17Isua a va thlen chuan ni li thlânah a awm tawh tih a hria a. 18Bethani chu Jerusalem kiang lawka awm a ni, km. thum vêla hla a ni. 19Juda-te zînga tam tak, an nuṭa thih chungchânga Marthi leh Mari khawhar lênpui tûrin an lo kal a. #Jn. 2:11. 20Marthi chuan Isua a lo thleng dâwn tih a hriat chuan a va hmuak a; Mari erawh chuan in a nghâk a. 21Marthi chuan Isua hnênah, “Lalpa, hetah awm ni la chu, ka nuṭa a thi lo tûr. 22Tûnah pawh Pathian hnêna i dîl apiang Pathianin a pe ang che tih ka hria e,” a ti a. 23Isuan, “I nuṭa a tholeh ang,” a ti a. 24Marthiin, “Ni kin nia thawhlehnaah chuan a tholeh ang tih chu ka hria e,” a ti a. #Dan. 12:2.
25Isuan, “Kei hi thawhlehna leh nunna chu ka ni, tu pawh mi ring chu thi mah sela, a nung reng ang; #Jn. 5:26; Thup. 1:18. 26tu pawh mi nung la dam kei mi ring chu, kumkhuain a thi lo vang; chu chu i ring em?” a ti a. #Jn. 6:47; 8:51. 27Ani chuan, “Ring e, Lalpa, Krista, Pathian Fapa khawvêla lo kal tûra chu i ni tih ka ring e,” a ti a. #Mt. 16:16.
Isua a ṭap
28Chu chu a sawi zawhin a kal a, a laizâwn Mari chu a rûk têin a va ko va, “Zirtîrtu hetah a awm a, a ko va che,” a ti a. 29Ani chuan chu chu a hriat veleh a tho thuai a, a hnênah a kal ta a. 30Isua chu khuaah a lût rih lo va, Marthiin a va hmuhna hmunah khân a la awm a. 31Juda-te, in chhûnga khawhar ṭhutpuia awmte chuan, Mari a tho thuai a, a chhuak ta chu an hmuhin, thlânah ṭap tûrin a kal dâwn emaw an ti a, an zui a.
32Marin Isua awmna a va thlena, amah a hmuh chuan a ke bulah a bawkkhup a, “Lalpa, heta awm ni la chu, ka nuṭa a thi lo tûr,” a ti a. 33Isuan Mari ṭap leh amah rawn zuitu Juda-te ṭap chu a hmu a, a rilru a khawih a, a hnuk a ulh a. 34“Khawiah nge in phûm?” a ti a. Anni chuan, “Lalpa, lo kal la, en teh,” an ti a.
35Isua a ṭap ta a. #Lk. 19:41.
36Juda-te chuan, “En teh u, Lazara hi a va lo hmangaih êm!” an ti a. 37An zînga ṭhenkhat chuan, “Mitdel mit tivârtu hian he mi pawh hi a thih lohtîr thei dâwn lâwm ni?” an lo ti a.
Lazara a nung leh
38Isua chu hnuk ulh ṭeuh chungin thlân chu a thleng ta a. Pûk a ni a, lunga khâr a ni. 39Isuan, “Lung hi dah sawn rawh u,” a ti a. A thia farnu Marthi chuan a hnênah, “Lalpa, tûnah zawng a rimchhe tawh ang, a thihna ni li a ni tawh si a,” a ti a. 40Isuan a hnênah, “I rin chuan Pathian ropuizia i hmu ang ka ti lo che em ni?” a ti a. 41Tichuan, lung chu an dah sawn ta a. Isua chu a vânvadâk a, “Ka Pa, ka thu i ngaihthlâk avângin lâwmthu ka hrilh a che. 42Ka thu i ngaithla ṭhîn tih pawh ka hria; nimahsela, heta pung khâwmte avâng hian chu chu ka sawi a ni, nangin kei mi tîr tih an rin theih nân,” a ti a. 43Chu chu a sawi zawh chuan aw ring takin a au va, “Lazar, lo chhuak rawh,” a ti a. 44Mitthi chu a kut a ke thlân puana inzem chungin a lo chhuak a, a hmai pawh inhrûkna puana tuam a ni a. Isuan an hnênah, “Phelh ula, kaltîr rawh u,” a ti a. #Jn. 19:40; 20:7.
Isua thah tuma phiarna
(Mt. 26:1-5; Mk. 14:1,2; Lk. 22:1,2)
45Mari lênpuitu, Isua thiltih hmutu Juda-te zînga tam tak chuan amah chu an ring ta a. 46Ṭhenkhat erawh chu Farisai-te hnênah an kal a, Isua thiltihte chu an va hrilh a. 47Chutichuan, Puithiam lalte leh Farisai-te chuan Sanhedrin an ko va, “He mi hian chhinchhiahna thil mak tam tak a ti ta si a, engtin nge kan tih tâk ang? 48Hetianga kan thlahzal chuan mi zawng zawngin amah an ring dâwn a, Rom mite an lo kal ang a, kan hmun thianghlim leh kan hnam hi min rawn tihchhiatsak mai ang,” an ti a.
49An zînga pakhat, Kaiafa, chumi kuma Puithiam lalber chuan an hnênah, “In va han hre lo êm! 50Mipui aia mi pakhat a thiha, hnam pum pui a chimih loh chu in tân a ṭha zâwk tih in hrethiam lo va ni,” a ti a. 51Chu chu ama rilru puak chhuaka sawi a ni lo; chumi kum chuan Puithiam lalber a ni a, an hnam aia Isua thih tûr a sawi lâwk a ni zâwk. 52An hnam ai mai pawh ni lovin, Pathian fa khawvêla darhte pâwl khata a hruai khâwm lehna tûr pawh a sawi a ni. #Jn. 10:16; 17:21. 53Chumi aṭang chuan amah tihhlum an tum ta a. 54Chuvângin, Isua chu a langin Juda-te zîngah a lêng ta lo va, chuta ṭang chuan thlalêr dep rama khaw pakhat Efraim an tihah chuan a kal a, chutah chuan a zirtîrte nên an awm ta reng a.
55Juda-te Kalhlên Kût a lo hnai ta a, thingtlâng aṭangin mi tam tak chu Kalhlên Kût hmaa inthian tûrin Jerusalem-ah an chho va. 56Isua chu an zawng a, Tempula an din ho laite chuan, “Eng nge in rin dân? Kûtah hian a lo kal lo vang maw?” an inti hlawm a. 57Puithiam lalte leh Farisai-ten amah an man theih nân, tu pawhin a awmna an hriat chuan, thuneitute an hriattîr tûr a ni tih thu an pe si a.
Markert nå:
JOHANA 11: MIZCLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
