JOHANA 18
18
Isua phat leh man
(Mt. 26:47-56; Mk. 14:43-50; Lk. 22:47-53)
1Isuan chûng thu chu a sawi zawhin, a zirtîrte nên an chhuak a, Kidron luikawr an kân a, chutah chuan huan a awm a, a chhûngah chuan a zirtîrte nên an lût a. 2A mantîrtu Juda pawh chuan chu hmun chu a hria, chutah chuan Isua leh a zirtîrte an inhmuh fo ṭhin avângin. 3Chutichuan, Juda chuan sipai pâwl khat leh puithiam lalte leh Farisai-te tirh Tempul vêngtute chutah chuan a rawn hruai a; khâwnvâr te, meichher te, hriamhrei te an keng a.
4Isuan a chunga thil lo thleng tûr zawng zawng chu a hre vek a; a va pên chhuak a, an hnênah, “Tu nge in zawn?” a ti a. 5“Nazaret Isua,” tiin an lo chhâng a. Isuan, “Keimah hi#18:5 Mss ṭhenkhatah, ‘Isua chu kei hi ka ni,’ tih a ni. ka ni,” a ti a. A mantîrtu Juda pawh chu an zîngah a ding a. 6Tichuan, “Keimah hi ka ni,” an hnêna a tih veleh, an hnungtawlh a, leiah an tlu hlawm a. 7“Tu nge in zawn?” tiin anni chu a zâwt leh a, “Nazaret Isua,” an ti a. 8Isuan a chhâng a, “Keimah hi ka ni tih ka hrilh tawh che u alâwm, kei mi zawng in nih chuan hêngho hi thlah ṭha rawh u,” a ti a. 9A thu sawi, “Nangin kei mi pêkte kha pakhat mah ka hloh lo,” a tih kha a lo thlen theihna tûrin. #Jn. 17:12; 6:39.
10Simon Petera chuan a khandaih a phawi a, Puithiam lalber bawih a sât a, a beng ding lam a hlawisak a. Chu bawih hming chu Malka a ni. 11Isuan Petera hnênah chuan, “Khandaih kha a paiah khung rawh; Pain mi pêk no hi ka in lo vang em ni?” a ti a. #Mt. 26:39; Mk. 14:36; Lk. 22:42.
Isua Puithiam lalber hmaah
(Mt. 26:57,58; Mk. 14:53,54; Lk. 22:54)
12Tichuan, sipai pâwl leh an hotu leh Juda-te Tempul vêngtuho infin khâwm chuan Isua chu an man a, an phuar a, 13Anna hmaah an hruai hmasa a. Anna chu, chumi kuma Puithiam lalber Kaiafa puzawn a ni. 14Kaiafa chu a ni, ‘Mipui thih aiin mi pakhat thih a ṭha zâwk,’ tia Juda-te thu râwntu kha. #Jn. 11:49-51.
Peteran Isua a phat
(Mt. 26:69,70; Mk. 14:66-68; Lk. 22:55-57)
15Simon Petera leh zirtîr dang pakhatin Isua chu an zui a. Chu zirtîr chu Puithiam lalber hmêlhriat a ni a. Puithiam lalber kawtlaiah chuan Isua a luhpui ve a. 16Petera erawh chu kawngka pâwn lamah a ding a. Zirtîr dang, Puithiam lalber hmêlhriat chu, a va chhuak a, kawngka vêngtu nula chu a bia a, Petera chu a hruai lût a. 17Kawngka vêngtu nula chuan Petera hnênah, “Nang pawh he mi zirtîrte zînga mi i ni lâwm ni?” a ti a. Ani chuan, “Ni lo ve,” a ti a. 18Chutah chuan chhiahhlawhte leh vêngtu sipaite an ding a, a vawh avângin meihawlin mei an chhêm a, an ai hlawm a; Petera pawh chuan an zîngah mei lum chu a ai ve a.
Puithiam lalberin Isua thu a zâwt
(Mt. 26:59-66; Mk. 14:55-64; Lk. 22:66-71)
19Puithiam lalber chuan Isua chu a zirtîrte chanchin leh a thu zirtîr chungchâng a zâwt a. 20Isuan ani chu a chhâng a, “A langin mi tin hnênah thu ka sawi ṭhîn; Juda zawng zawng kal khâwmna sunagog-ah te, Tempulah te ka zirtîr fo ṭhîn a; a rûkin eng mah ka sawi ngai lo. 21Engah nge kei mi zawh? Ka thu sawi ngaithlatute hnênah eng nge ka sawi ṭhin zâwt ta che u, eng nge ka sawi an hria alâwm,” a ti a. 22Chu chu a sawi zawh chuan vêngtu sipai dingho zînga pakhat chuan Isua hmaiah a bêng a, “Chutianga Puithiam lalber chhân tûr em ni?” a ti a. 23Isuan ani chu a chhâng a, “Thu dik lo ka sawi a nih chuan mi hrilh mai la, thu dik ka sawi si chuan engah nge mi ben?” a ti a. #Mt. 5:39; Tirh. 23:2-5. 24Anna chuan phuar chungin Puithiam lalber hnênah a tîr ta a.
Peteran Isua a phat leh
(Mt. 26:71-75; Mk. 14:69-72; Lk. 22:58-62)
25Simon Petera chuan dingin mei lum a la ai a, “Nang pawh hi a zirtîrte zînga mi i ni lo maw?” an ti a. Ani chuan a phat a, “Ni lo ve,” a ti a. 26Puithiam lalber chhiahhlawhte zînga pakhat, Peteran a beng a hlawisaka laichîn chuan, “Huanah khân a hnênah ka hmu lo che maw?” a ti a. 27Petera chuan a phat leh a; tin âr a khuang ta nghâl a.
Isua Pilata hmaah
(Mt. 27:1-2,11-14; Mk. 15:1-5; Lk. 23:1-5)
28Isua chu Kaiafa in aṭangin Ramawptu inah#18:28 Ramawptu in praitorian, amah vêngtu sipaiho awmna. an hruai a. Zîng tak a la ni a. Juda-te chu bawlhhlawh lova Kalhlên Kût chaw an ei theih nân a inah chuan an lût duh lo va.
29Tichuan, Pilata chu an hnênah a va chhuak a, “He mi hi eng tisualah nge in puh?” a ti a. 30Anni chuan, “He mi hian thil sual a tih loh chuan i hnênah kan rawn hruai lo vang,” an ti a. 31Pilatan, “Nangmahniin hruai ula, in dân angin a thu rêlsak ta che u,” a ti a. Juda-te chuan, “Keini chuan mi tihhlum theihna kan nei hlei nêm,” an ti a. 32Chu chu Isuan engtianga thi tûr nge a nih a sawina thu a lo thlenna tûrin a ni. #Jn. 3:14; 12:32.
33Tichuan, Pilata chu a inah a lût leh a, Isua a ko va, a hnênah, “Juda-te lal i ni maw?” a ti a. 34Isuan a chhâng a, “Chu chu nangma rilru puak chhuaka sawi nge i nih, mi dangin ka chungchâng thu hi an hrilh che?” a ti a. 35Pilatan a chhâng a, “Kei hi Juda ka ni em ni? I chipuite leh puithiam lalten ka hnênah an rawn hlân che a nih hi; eng nge i tih le?” a ti a.
36Isuan a chhâng a, “Ka ram chu he khawvêla mi hi a ni lo; ka ram chu he khawvêla mi ni sela, Juda-te kuta mantîra ka awm loh nân ka ṭhuihruaiten an bei ang; ka ram zawng heta mi a ni lo ve,” a ti a. #Jn. 6:15; Mt. 26:53. 37Pilatan, “Chu, lal i ni maw?” a ti a. Isuan a chhâng a, “Nangman lal mi ti a; kei chu thutak hriattîr hi ka pian chhan leh khawvêla ka lo kal chhan chu a ni. Tu pawh thutaka awm chuan ka aw an ngaithla ṭhîn,” a ti a.#Jn. 8:14. 38Pilatan a hnênah, “Thutak eng nge ni?” a ti a.
Isua thi tûrin an ruat
(Mt. 27:15-31; Mk. 15:6-20; Lk. 23:13-25)
Chu chu a sawi zawhin Juda-te hnênah a va chhuak leh a, an hnênah, “A chungah thu pawi eng mah ka hmu lo. 39Amaherawhchu, in tih ṭhin dânin Kalhlên Kût laiin mi tâng pakhat ka chhuahsak dâwn che u a, Juda-te lal hi chhuahsak che u ila in duh em?” a ti a. 40Nimahsela, ring takin an au va, “He mi hi chu ni lo ve, Barabba zâwk le,” an ti a. Barabba chu suamhmang a ni.
Markert nå:
JOHANA 18: MIZCLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
