METIU 18
18
Sc:kobv Bottar Ya:ncdcn?
(Mark 9.33-37; Lu:k 9.46-48)
1Odo ayirdo agom tadjvgla gvmvnnc tani:kvdv:dc Jisukolo:pc scmpc lula gva:to, “Ru:ncpvnckc taycng among migom mongkvdo sc:karbv bottaya:ncn?”
2Odokkc ko:koncm Bvkkolo:pc gogangge:la, Bv bvm buluk ara:do du:moto, 3Odokkc luto, “Aroru:pc, ngo nolum lubidung, nolu asin mc:latsulangkula ko:waokvdv:dcmpc ima:mvlo, nolu kapcsin taycng among migom mongkvdo:pc gvangkuma:yc. 4Sc:kobvi sc ko:scmpc avyc asin adji:suycnc, bv taycng among migom mo:pvdok battarya:ncpc iycku.
5“Sc:kobvi scmpinc ko:ako ngok aminno torvgsuycnc bv ngommci torvgsutobong.
Pa:bcm Ipc Mc:boka:bo
(Mark 9.42-48; Lu:k 17.1-2)
6“Cmpige:la sc:kobvi ngom mc:jvgnc sc ko:ako scmpincko invgsikorko imoycnc, bvkkcpc bottaru:nc vlvnko lv:po:do raglvgsuge:la o:rvngko siycng asilo oyudsunamdci aiya:dag.
7“Pa:p du:la:yam ankangkangkvnam kvdv:dok lcgangc rcngamsokkcpc mc:dvr-mc:so:pcnamc! Kapia:nc unkangkangkvnamdc a:ycrung, ckvdaggom sc:kobvi mc:boka:bonammc a:dagnc cdc tani:dc mc:dvrmc:so:pcnamc!
8“Odokkc nok alagdc:ma:mvlo nok alcdc nom pa:bcm imodagmvlo, cdcm papaksutoka odokkc cdcm crpaktok; nokkcpc lcbe:-be:la alag asongko kama:pc gva:namdci aidag alag so:nyiko manggom alc so:nyiko dungge:la cdvlosin midma:nc vmvlo cra:lvgkosunamdcmpcyam. 9Odokkc nok amigc nom pa:bcm imodagmvlo, karrensutok cdcm odokkc cdcm yoppaktoka; nok amik apironggcge:la turnamdc aiya:dag amik pirnyiko kage:la uiamo:bok vmvlo cra:lvgkosunam dcmpcyam.
Yognc Me:r Soben Kvkanna Kvbinam Do:yvng
(Lu:k 15.3-7)
10“Ka:sulangka sc adji:onckvdv:sok akosinci tayumyok; 11kapila:nc ngo nolum lubidung taycngamo:to buluk lutad lubinc tani:kvdv:dc lo:dcm taycng amo:tok ngok Abukc dumsimikmom ka:la du:dag.
12“Nolu okkomna mc:dang? Tani: akolokkc lvngkoko me:r sobenc dungai, odokkc odok adorko gvnyoksukang, bv na:yingkolang konang me:r sobendcm adi: ru:yido dola du:moyc odokkc gvnyokncdcm makapc gvma:yclang. 13Odokkc bv cdcm pangkumvlo aropakpc, ngo nolum lubidung, cdvlosin gvnyoksuma:nc na:ying kolang konangdcmyam bv mc:poya:dag. 14Cdcmpidag sc adji:onckvdv:sok akoncsinci yognamdcm taycngamo:tok ngok Abubv yogmolv:mang.
Pa:b Inc Bvrodc
15“Nok bvrro nom imurko iycmvlo, bvkkolo:pc gvlang odokkc bvk imurcm lubilang, bvkkclang nok arango:lo. Bv nok agomcm tadmvlo, nok bvrodcm no pa:toku. 16Cmpige:la bv nok agom tadma:mvlo, nok lcdulo akomanggom anyiko gvbolang, cdc agom appv:dc arro cmna lenycpc anyikomanggom awum tadkolo appvng lude:sumvlo. 17Bv bulumsin tadma:mvlo, cdcm mondoli:ycm lubilang; odokkc bv mondoli: agomcmsinci tadma:mvlo, bv nolukkcpc amikc opvncmpc odokkc migom bipcnam murkong urkumnc akoncmpc imolang.
Motumnammclang Mclvgnam
18“Aropakpc, ngo nolum lubidung, okodcmci so mopvso nolu mokapycnc taycngamo:to:sin mokabyc, odokkc okodcmci mo:pvso moge:ycnc cdcmci taycngamo:to:sin moge:yc.
19“Ngo nolum lckoda ludung, noluk anyikonc tani:amo:so atvko konamcm lckopc mc:la koycnc, cdcm taycng amo:tok du:nc ngok Abubv konamdcmv:pc ibiyc. 20Kapila:nc okoloi anyikomanggom awumko ngok aminno gvkumsuycnc, oddoi ngo buluk dungkolo du:do.”
Mc:yin suma:nc Ager gerya:nc Tani:dok Kvkanbila Kvnam Do:ying
21Odo Pitorbv gva:to odokkc Bvm luto, “Ru:tuma, cddvko ngok bvrodc ngom imurcm iycmvlo, odokkc ngo mc:yinsuycn? Kvnvdkopcnci?”
22Jisub bvm luto, “Ngo nom kvnvdkopc cmnangci lumang, cmpige:la nv:yying kolang kvnvdkopc.
23“Cdcmpidag taycng among migom dungko mo:pvdcm migom akonc bvk pagbo kvdv:dokki kvkan kvnam kvkumsukunc migomkoncmpc idag. 24Bv kvrobbomnamc, bvm akonc lv:yvng vyvng cdum-kopc dorkupcncko bvkkolo:pc gva:boto; 25Odokkc bv cdcm dorrangkuma:la, bvk ru:tumdc bvm lulvgto, bvk nc:ngcm odokkc ommangkvdv:dcm ka:pangamdopc odokkc bvkkc oko okko dungaji, odokkcm dorkupcnamdcm dordokupc. 26Cdcmpila pagbodc bvk kcra:do lcbvng tuma:to, kumna:sola: bvm luto ‘Ru:tuma, ngom toya:po:tei, odokkc ngo appv:dcm dorycku.’ 27Odokkc aya:pc mc:la bvm pagbodok ru:tumdc bvm mclennvgtoku odokkc bvk dorkupcnam murko:dcm mc:yinsuto.
28“Ckvdaggom cdc pagbu:dc, bv gvlennangkula:yam, bvk pagbo ajonkolo:pc gvto sc:ko bvm murkong lvngkoko bikupcnckona:nc odokkc lv:podok yumgabge:la bv luto, ‘Ngom dorkupcnamdcm dortokuk.’ 29Cdcmpila bvk pagbo ajondc owa:la bvm kumya:suto ‘Ngom mcpo:teibong, ngo nom dorycku cmna!’ 30Bv tattomang odokkc lutvdanna bvm makana:lo lvgto bv dorkuma:sisscm. 31Bvk pagbo ajonkvdv:dc kapc ika:ji cdcmbulum ka:toncm, bulu airu:pc mc:nyingkang; odokkc bulu gvla buluk ru:tumdcm kapc kapc ika:ji appv:dcm lungabbito. 32Odo bvk ru:tumdc bvm goga:to odokkc bvm luto, ‘No aima:nc pagbo! No kumya:sudakkcpc ngom dorkupcnam appv:dcm ngo mc:yinsubito; 33odokkc nok pagbo ajondcmsin mc:yinsupcnammc cmmangalang, ngo nom kapc aya:la mc:yinsutonc?’ 34Odokkc aglvngkokki bvk ru:tumdc bvm makana:lok ru:tumkolo:pc yc:lvgbito, bvk dorpcnam appv:dcm dorabkuma:sisscm.
35“Cdcmv:pc ngok taycng amongtok Abubv appvngcm iyc, nolu bvrrom noluk asinbokkc mc:yinsuma:mvlo.”
Markert nå:
METIU 18: MISIBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.