Jenesis 3
3
Koedh Mab-den
1Lemmyn an sarf o moy sotel es pub best a'n gwel re wrussa an Arloedh Duw aga gul. Hag yn-medh hi dhe'n venyn, ‘A wrug Duw dhe wir leverel, “Na wrewgh hwi dybri a bub gwydhenn an lowarth”?’ 2Hag yn-medh an venyn dhe'n sarf, ‘Ni a yll dybri a frut gwydh an lowarth; 3mes a frut an wydhenn usi yn kres an lowarth, Duw re leveris, “Ny goedh dhywgh naneyl dybri anodho na'y dochya ma na verwowgh.” ’ 4Hag yn-medh an sarf dhe'n venyn, ‘Yn sur, ny wrewgh hwi merwel; 5rag Duw a woer, y'n jydh may typprowgh anodho, agas dewlagas a vydh igerys, ha hwi a vydh kepar ha duwow, ow kodhvos da ha drog.’ 6Ha'n venyn, pan welas bos an wydhenn da rag boes, ha'y bos teg dhe'n dewlagas, ha gwydhenn dhesiradow dhe wul den fur, hi a gemmeras nebes a'y frut ha dybri; ha hi a ros ynwedh dh'y gour esa gensi, hag ev a dhybris. 7Ena aga lagasow aga dew a veu igerys hag i a wodhva aga bos noeth, hag i a wrias delyow figys war-barth dhe wul apronyow ragdha aga honan.
8Hag i a glewas lev an Arloedh Duw ow kerdhes y'n lowarth yn awel glor an jydh, hag Adam ha'y wreg a omgudhas dhiworth golok an Arloedh Duw, yn mysk gwydh an lowarth. 9Ha'n Arloedh Duw a elwis dhe Adam ha leverel dhodho, ‘Ple'th es'ta?’ 10Hag ev a leveris, ‘My a glewas dha lev y'n lowarth ha kemmeres own drefenn ow bos noeth, ytho my a omgudhas.’ 11Hag yn-medh ev, ‘Piw a leveris dhis dha vos noeth? A wruss'ta dybri a'n wydhenn may hworhemmynnis dhis na wrelles dybri anedhi?’ 12Hag yn-medh an den, ‘An venyn a wruss'ta ri dhymm dhe vos genev, hi a ros dhymm a'n wydhenn ha my a dhybris.’ 13Hag yn-medh an Arloedh Duw dhe'n venyn. ‘Pyth yw henna re wruss'ta?’ Hag yn-medh an venyn, ‘An sarf a'm toellas, ha my a dhybris.’ 14Hag yn-medh an Arloedh Duw dhe'n sarf,
‘Rag ty dhe wul hemma, milliges osta
dres oll chatel
ha dres pub best a'n gwel;
war dha dorr ty a wra mos,
ha doust ty a wra dybri
pub dydh oll a'th vewnans.
15Ha my a worr avi yntra jy ha'n venyn,
hag yntra dha has jy ha'y has hi.
Ev a vrew dha benn
ha ty a vrew y seudhel.’
16Dhe'n venyn ev a leveris,
‘My a gress dha bayn yn feur ha ty gans flogh;
yn payn y fydhydh ow tineythi fleghes,
mes dha dhesir a vydh troha dha wour,
hag ev a wra dha rewlya.’
17Ha dhe Adam ev a leveris,
‘Rag ty dhe goela orth lev dha wreg,
ha dybri a'n wydhenn
may hwrug vy gorhemmynna dhis, ow leverel,
“Na wra dybri anedhi”,
milliges yw an dor a'th wovis jy;
dre lavur ty a wra dybri anodho
oll an dydhyow a'th vewnans.
18Ev a dhre spern hag askall dhis
ha ty a wra dybri losow an gwel.
19Yn hwys dha fas ty a dheber bara,
bys may tehwylli arta dhe'n dor;
rag a henna ty a veu kemmerys:
rag doust osta,
ha dhe dhoust arta ty a dhehwel.’
20Hag Adam a elwis hanow y wreg Eva drefenn hi dhe vos mamm peub oll bew. 21Ha'n Arloedh Duw a wrug powsyow a groghen rag Adam ha'y wreg ha'ga gwiska. 22Hag yn-medh an Arloedh Duw, ‘Awotta, devedhys yw an den ha bos kepar hag onan ahanan, ow kodhvos an da ha'n drog. Ha lemmyn, ma na worro yn-rag y leuv, ha kemmeres ynwedh a'n wydhenn a vewnans, ha dybri ha bewa bys vykken’ – 23ytho an Arloedh Duw a'n dannvonas yn-mes a lowarth Eden dhe wonedha an dor may fia kemmerys anodho. 24Ytho ev a jasyas an den yn-mes ha gorra an cherubim a'n barth est dhe lowarth Eden ha kledha ow flammya ow treylya war bub tu rag gwitha fordh an wydhenn a vewnans.
Markert nå:
Jenesis 3: ABK
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Kesva an Taves Kernewek 2004, 2024
© Cornish Language Board 2004, 2024