JENESIS 28

1U Isaak u khot ïa u Jakob, u khublei ïa u, bad u ong ha u, “Wat shongkurim ïa ka nong Kanaan. 2To leit pynban sha Mesopotamia, sha ka ïing jong u Bethuel u parad jong me, bad shongkurim ïa kawei na ki samla kynthei hangta, kawei na ki khun kynthei jong u Laban, u kñi jong me. 3To U Blei Badonbor Baroh un kyrkhu ïa ka shongkha shongman jong me bad un ai ïa me bun ki khun ki kti, ba men ïoh long u kpa jong kiba bun ki jaitbynriew. 4#Jen. 17:4-8To un kyrkhu ïa me bad ïa ki khun ki ksiew jong me kumba u la kyrkhu ïa u Abraham, bad ai ba men shim kynti ïa kane ka ri ha kaba me la shong la sah bad ïa kaba U Blei u la ai ha u Abraham!” 5U Isaak u phah noh ïa u Jakob sha Mesopotamia, sha u Laban, uba long u khun jong u Bethuel u nong Aram, bad u hynmen jong ka Rebekka, ka kmie jong Jakob bad u Iso.

U Iso u shim sa kawei pat ka tnga

6U Iso u la ïoh jingtip ba u Isaak u la kyrkhu ïa u Jakob bad ba u la phah noh ïa u sha Mesopotamia ban shem ïa ka tnga. U la ïoh jingtip ruh ba haba u Isaak u la kyrkhu ïa u, u hukum ba un ym shongkurim ïa ka kynthei nong Kanaan. 7U la shem ba u Jakob u la kohnguh ïa la u kpa bad ïa la ka kmie bad u la leit sha Mesopotamia. 8Kumta u Iso u sngewthuh ba u kpa jong u, u Isaak um mynjur ïa ki kynthei nong Kanaan. 9Kumta u leit sha u Ishmael u khun jong u Abraham, bad u shongkurim ïa ka khun kynthei jong u, ka Mahalath, kaba long ka para jong u Nebaïoth.

Ka jingphohsniew u Jakob ha Bethel

10U Jakob u la mihnoh na Beersheba bad u leit shaphang Haran. 11Ha ka por sep sngi, u poi sha ka jaka bakhuid bad u la sher dara hangta. U dem ban thiah, u da pynshaniah ïa la ka khlieh halor u maw. 12#Ïoan. 1:51U la phohsniew ba u ïohi ïa ka lynti mawkyrdon na khyndew sha bneng, bad ki angel kiba ïakiew ïahiar ha ka. 13#Jen. 13:14,15Bad hangta la don U Trai uba ïeng hajan jong u. “Nga long U Trai, U Blei jong u Abraham bad u Isaak,” u ong. “Ngan ai ha me bad ha ki khun ki ksiew jong me ïa kane ka jaka ha kaba me thiah. 14#Jen. 12:3; 22:18Kin man bun kum ki phngit pui pui ha ka khyndew. Kin pynïar ïa la u pud u sam ha ki liang baroh; bad da me bad ki khun ki ksiew jong me ngan kyrkhu ïa ki jaitbynriew baroh. 15To kynmaw, ba ngan long ryngkat bad me bad ïada ïa me kat shaba me leit, bad ngan wallam pat ïa me sha kane ka ri. Ngan ym iehnoh ïa me tad haduh ba ngan da pyndep ïa kata baroh ïa kaba nga la kular ha me.”

16U Jakob u la kyndit thiah, bad u ong, “U Trai u don hangne! U don ha kane ka jaka, bad ngam shym tip ïa kata!” 17U la sheptieng bad u ong, “Kane ka jaka kaba da sngewphieng! Kan dei ban long ka ïing jong U Blei, ka dei ban long ka khyrdop ba plie sha bneng.”

18U Jakob u la khie dang step phyrngab, u shim ïa uta u maw ïa uba u la syngkhlieh, bad u thung ïa u ban sah jingkynmaw. Nangta u theh ïa ka umphniang Olib halor jong u ban pynkyntang ïa u sha U Blei. 19U khot kyrteng ïa kata ka jaka ka Bethel. (Ïa ka shnong kaba don hangta la tip shisien kum ka Lus.) 20Nangta u Jakob u pynlong ka jingsmai ha U Trai: “Lada men long ryngkat bad nga bad ïada ïa nga ha kane ka jingleit jong nga, bad men ai ka bam ka dih bad ka kup ka sem ïa nga, 21bad lada ngan wan phai pat da kaba suk sha ïing u kpa jong nga, te men long U Blei jong nga. 22Une u maw buh jingkynmaw ïa uba nga la thung un long ka jaka ha kaba ïa me yn mane, bad ngan ai sha me ïa kaba shiphew na kiei kiei baroh kiba me ai ïa nga.”

Markert nå:

JENESIS 28: KHACLBSI

Marker

Del

Kopier