JENESIS 29
29
U Jakob u wan poi ha ka Ïing jong u Laban
1U Jakob u la bteng ïa ka jingleit jong u bad u la leit sha ka ri kaba shaphang mihngi. 2Kynsan kynsan u poi ha kawei ka pukri ha ki lyngkha bad lai kynhun ki langbrot kiba dem sawdong jong ka. La ju ai um ïa kita ki kynhun langbrot na kata ka pukri ha kaba don u mawkhang uba heh, ha khlieh jong ka. 3Ha man ba ki kynhun langbrot baroh ki la ïapoi lang hangta, ki nongap langbrot ki ju pyntyllun sharud ïa uta u maw bad ki ai um ïa ki. Nangta ki buh pat ïa uta u maw ha kajuh ka jaka.
4U Jakob u kylli ïa ki nongap langbrot, “Ko paralok, phi dei kiba na-ei?”
“Na Haran,” ki jubab.
5U kylli, “Phi ithuh ïa u Laban u khun jong u Nahor?”
“Ho-oid, ngi ithuh,” ki jubab.
6“Hato u shait u khlaiñ?” u kylli biang.
“U shait u khlaiñ,” ki jubab. “Khmih, hangne ka Rakhel ka khun jong u ka wan lem bad ki kynhun langbrot jong u.”
7U Jakob u ong, “Haba ka sngi ka dang jlan kumne bad ka por ruh kam pat dei ban leit set ïa ki langbrot, te balei phim nang ai um ïa ki bad ïalam biang ïa ki sha ka jaka bam phlang?”
8Ki jubab, “Ngim lah ban leh kumta tad haduh ba ki kynhun langbrot baroh kin don hangne bad ba ym pat pyntyllun sharud ïa u maw; nangta ngin sa ai um ïa ki langbrot.”
9Katba u Jakob u dang ïakren bad ki, ka Rakhel ka la poi bad la ka kynhun langbrot. 10Haba u Jakob u ïohi ïa ka Rakhel bad ka kynhun langbrot u kñi jong u, u Laban, u leit sha ka pukri, u pyntyllun sharud ïa u maw, bad u la ai um ïa ki langbrot. 11Te u la doh ïa ka bad u la sdang ïam namar ka jingkmen. 12U la ïathuh ha ka, “Nga dei u ba-ha-ïing ha-sem jong i pa jong phi, u khun jong ka Rebekka.”
13Ka leit bran bran ban ïathuh ha la u kpa; bad haba u la ïohsngew ïa ka khubor shaphang u pyrsa jong u, u Jakob, mar mar u leit ban ïashem ïa u; u la kdup bad u doh ïa u, bad u la ïalam ïa u sha ïing. 14Haba u Jakob u la ïathuh ha u Laban ïa kaba la jia baroh, u Laban u ong, “Ho-oid, da shisha phi dei ka doh ka snam jong nga.” U Jakob u la shong la sah hangta baroh shi bnai.
U Jakob u shakri ïa u Laban na ka bynta ka Rakhel bad ka Leah
15U Laban u ong ïa u Jakob, “Tang namar ba me dei u kur u jait jong nga, mem dei ban shu trei ei na ka bynta jong nga. Katno ka bainong me kwah?” 16U Laban u don ar ngut ki khun kynthei; kaba heh ka kyrteng ka Leah, bad kaba rit pat ka Rakhel. 17Ka Leah ka don ki khmat kiba i-ieit, katba ka Rakhel pat ka long i-lub bad kaba bhabriew.
18U Jakob u ïapmat ïa ka Rakhel, kumta u ong, “Ngan trei hynñiew snem na ka bynta jong phi, lada phi shah ba ngan shongkurim ïa ka Rakhel.”
19U Laban u jubab, “Ka kham bha ba ngan ai ïa ka ha phi ban ïa kaba nga ai ha uwei pat; to sah hangne bad nga.” 20U Jakob u la trei hynñiew snem ba u lah ban ïoh ïa ka Rakhel, bad kata ka por ka i kum khyndiat tylli ki sngi ïa u, namar u la ieit ïa ka.
21Te u Jakob u ong ha u Laban, “Ka por ka la kut noh; to shah ba ngan shongkurim noh ïa ka khun jong phi.” 22Kumta u Laban u pynlong ka jingkhawai shongkurim bad u khot sngewbha ïa ki briew baroh. 23Hynrei ha kata ka miet, ha ka jaka jong ka Rakhel, u shim ïa ka Leah bad leit ïalam ïa ka sha u Jakob, bad u Jakob u la ïathiah shongkha bad ka. 24(U Laban u ai ïa ka mraw jong u ka Silpah ha ka Leah ka khun jong u ban shakri ïa ka.) 25Dei tad ynda ka la shai mynstep ba u Jakob u shem ba ka dei pynban da ka Leah. U leit sha u Laban, bad u ong, “Balei phi leh ïa kane ha nga? Nga la trei ban ïoh ïa ka Rakhel? Balei phi la shukor ïa nga?”
26U Laban u jubab, “Kam ju dei ka dustur hangne ban ai shuwa ïa ka khun khatduh ban shongkurim ha shuwa ka hynmen. 27To ap tad haduh ba ka taïew ka jinglehkmen shongkurim kan kut, bad ngan ai ha me ïa ka Rakhel, lada men trei na ka bynta jong nga sa hynñiew snem.”
28U Jakob u la mynjur, bad haba ka taïew ka jinglehkmen shongkurim ka la kut, u Laban u la ai ha u ïa ka Rakhel ka khun jong u ba kan long ka tnga jong u. 29(U Laban u ai ïa ka mraw jong u ka Bilhah ïa ka Rakhel ka khun jong u kum ka shakri jong ka.) 30U Jakob u ïathiah shongkha bad ka Rakhel ruh, bad u kham ieit ïa ka ban ïa ka Leah. Nangta u la trei na ka bynta u Laban sa hynñiew snem.
Ki khun ba la kha ïa u Jakob
31Haba U Trai u ïohi ba ka jingieit ka kham duna ïa ka Leah ban ïa ka Rakhel, u la pynlah ïa ka ban ïoh khun, hynrei ka Rakhel ka ïailong kaba khlem khun. 32Ka Leah ka la punkhun bad ka kha khun shynrang. Ka ong, “U Trai u la ïohi ïa ka jingjynjar jong nga, bad mynta u tnga jong nga un ieit ïa nga”; kumta ka la khot kyrteng ïa u, u Reuben. 33Ka la punkhun biang bad ka kha sa uwei pat u khun shynrang. Ka ong, “U Trai u la ai ruh ha nga ïa une u khun, namar u la ïohsngew ba ngam shym long kaba la ieit”; kumta ka la khot kyrteng ïa u, u Simeon. 34Sa shisien la ka punkhun biang bad ka kha sa uwei u khun shynrang. Ka ong, “Mynta u tnga jong nga un sa kham jan sha nga, namar nga la kha lai ngut ki khun shynrang ïa u”; kumta ka la khot kyrteng ïa u, u Lebi. 35Nangta ka punkhun biang bad ka kha sa uwei pat u khun shynrang. Ka ong, “Ha kane ka sien ngan ïaroh ïa U Trai”; kumta ka la khot kyrteng ïa u, u Judah. Nangta ka la wai noh ban ïoh khun.
Markert nå:
JENESIS 29: KHACLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Khasi CL Bible
Copyright © Bible Society of India, 2016.
Used by permission. All rights reserved worldwide.