JENESIS 33
33
U Jakob u ïakynduh bad u Iso
1U Jakob u ïohi ïa u Iso ba u wan lem bad sawspah ngut ki rangbah. Kumta u pynïabynta ïa ki khun hapdeng ha Leah, ka Rakhel, bad ki tnga kliar ar ngut. 2U buh ha khmat eh ïa ki tnga kliar bad ki khun jong ki, nangta sa ka Leah bad ki khun jong ka, bad khatduh ïa ka Rakhel bad u Joseph hadien duh. 3U Jakob u la leit ha shuwa jong ki, u da nguh ngon haduh khyndew hynñiew sien katba u nang leit sha jan u hynmen jong u. 4Hynrei u Iso u mareh ban ïakynduh ïa u, u kdup ïa u, bad u doh ïa u. Ki ïa-ïam baroh ar ngut. 5Haba u Iso u phai sawdong, bad u ïohi ïa ki kynthei bad ïa ki khynnah, u ong, “Kiei kine ki briew kiba bad phi?”
U Jakob u jubab, “Kine, kynrad, ki dei ki khun kiba U Blei u la sngewbha eh ban ai ïa nga.” 6Nangta kita ki tnga kliar ki la wan lem bad ki khun jong ki, bad ki nguh; 7nangta ka Leah bad ki khun jong ka ki la wan, bad khatduh eh, u Joseph bad ka Rakhel ki la wan bad ki nguh.
8U Iso u kylli, “Kumno pat shaphang kato ka kynhun kaba nga la ïakynduh? Ka mut aïu kato?”
U Jakob u jubab “Ban ïoh ïa ka jingsngewbha jong phi.”
9Hynrei u Iso u ong, “Ko hep, nga dap biang kyrhai; buh ïa kaei kaba phi don.”
10U Jakob u ong, “Em, kata kam da pher eh; lada nga la ïoh ka jingsngewbha jong phi, to pdiang ïa ka jingai sngewbha jong nga. Ban ïohi ïa ka khmat jong phi ka long ïa nga hi kumba ïohi ïa ka khmat U Blei, mynta ba phi la leh jan ïa nga katne. 11Sngewbha pdiang ïa kane ka jingai sngewbha kaba nga la wallam ïa phi; U Blei u la lehsbun ïa nga, bad u la ai ïa nga baroh kaba nga donkam.” U Jakob u la ïai kyrpad ïa u haduh ba un da pdiang.
12U Iso u ong, “Ïa ngin ïaleit noh; ngan nang ïaid ma nga sha khmat.”
13U Jakob u phai ktien, “Phi tip ba ki khynnah ki tlot, bad nga dei ruh ban pyrkhat shaphang ki langbrot bad ki jingri kiba dang ai buiñ. Lada yn ñiah jubor ïa ki wat tang shi sngi ruh, baroh ki jingri kin ïap lut. 14Sngewbha, khie nang ïaid sha khmat, ngan nang bud suki suki, ban ïaid katba nga lah lem bad kine ki jingri bad ki khynnah haduh ba ngin sa ïashem pat bad phi ha Edom.”
15Kumta u Iso u ong, “Te kumta, shah ngan ieh katto katne ngut ki briew jong nga bad phi.”
Hynrei u Jakob u ong, “Ym da donkam ban leh kumta namar nga kwah tang ban ïoh ïa ka jingsngewbha jong phi.” 16Kumta u Iso u leit phai pat ha kata ka sngi sha Edom. 17Hynrei u Jakob u la leit sha Sukkoth, ha kaba u la shna ka ïing ïa lade bad ki sem na ka bynta ki jingri jong u. Dei namar kata ba la khot kyrteng ïa kata ka jaka, Ka Sukkoth.
18Ha ka jingwanphai na Mesopotamia, u Jakob u la poi suk poi saiñ ha ka nongbah Shekhem ha ka ri Kanaan, bad u sher ïa la ka dara ha ka madan kaba hajan kata ka nongbah. 19#Josh. 24:32; Ïoan. 4:5U la thied ïa kata ka bynta jong ka madan na ki khun ki siew jong u Hamor u kpa jong u Shekhem ha ka dor shispah tylli ki sbai rupa. 20U pynïeng ïa ka duwan hangta, bad u la khot kyrteng ïa ka da ka kyrteng El, U Blei jong ki Israel.
Markert nå:
JENESIS 33: KHACLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Khasi CL Bible
Copyright © Bible Society of India, 2016.
Used by permission. All rights reserved worldwide.