LUK 10
10
Jisu no Lhotsuni Puwu
1Hipa thiu Ampeu no kutami lhotsuni#Hamiloye “Lhotsuni kini” ipi puani kishelu eno kininino pano wuniepi akeu phughilo pa zuuno puwue. 2Pano panongu vilo pi, “Ghile hukepu kumzapu ani, ikemu ajumi aghuloshi, tighenguno ghile mipeu pelo ajumi pawu ghilelo puhutsu penike inikhulo. #Mt 9.37-38 3Bheritiqono atineqo gholo ilolukeu toi, ino nongu puwu anike, wulo! #Mt 10.16 4Pisabo, jolabo, apukhu kuqho namu pewukevilo; eno alalo khumu sasu petha shikile kevilo. #Mt 10.7-14; Mk 6.8-11; Lk 9.3-5 5Nonguno kiu kiu toike kilo wulu namu, atughushi hipilo, ‘Aki hipaulo aloinokeu alo!’ 6Aloinokemi tile aghi aye, nongu lokiqi pano shou alu nani, moaye ikhichileve pelo. 7Tipa kilo ngolo, eno panono kiu kutotsu keno chu sholo; kughengu akumlami lakhiye pa jume ithulukuzue. Aki lakhi lono aki kutaulo wuve kevilo. #1 Kori 9.14; 1 Timo 5.18 8Kughou nonguno aphughi lakhilo ilo kelo timino nongu sasuno kiu pesu nongu tsuni keno ti chulo, 9tipa phughilo kusukinimi shipivilo, eno tile akeqo vilo pilo, ‘Alhou yehkipe ye nongu kupunu ighi anie!’ 10Nonguno aphughi lakhilo ilo kelo timino nongu sasumo aye, tipa laghilalo ipeno pilo, 11Ninguye nongu sasu alau kiumu shikepu kuhavae nophughi lono nipukhulo dape aghivekeu ayeghi mukhu ghi kukhuqhive ani, ikemu hi ithilo, Alhou yehkipe ye nongu phivilo ighi anie! #Aposto 13.51 12Ino nongu vilo piani, atsakukugha tsalalo tipau phughi nguno Sodom noghami lau Alhou no kimiyeqhiyi keu alau piye nani. #Bothu 19.24-28; Mt 11.24; 10.15
Pulumokeu Phughi
(Mt 11.20-24)
13“Khorazinmi, oghengu aha! Bethsaidami, oghengu ghi aha! Kughengu olau akumzapu kumla shitsukeu Tur ngo Sidon lau shi kenapi aye, panonguye yeqhiye phi pepu puzu ayevu kuchhuno khaghino xukitheluve aghini cheke. #Isa 23.1-18; Ezek 26.1—28.26; Joyil 3.4-8; Amus 1.9-10; Zekha 9.2-4 14Ikemu atsa kukugha ghulokiloye nongu lau nguno alauno Turmi ngo Sidonmi ghenguno kusuqhivetsu nikeu anani. 15Eno no Kapernaummi! Noye atsutsu kutolo suqhe ikuniye ani keshea? Noye Hades lo sunhesuve nani!” #Isa 14.13-15 16Jisu no pa khopemi vilo pi, “Khuno nongu tsa chiluni keno itsa chilu anie, eno khuno nongu miliveni keno imilive ani eno khuno imiliveni keno ipuwukeu milive anie.” #Mt 10.40; Mk 9.37; Lk 9.48; Jn 13.20
Lhotsuni Ideighikeu
17Lhotsuni huno alokivishi ideghino pi, “Ampeu, tughami ghi oje ghenguno ni-qhoqhue.” 18Pano panongu vilo pi, “Tsutsukukulo musu toi kunguu atsutsu lono Satan ikiqikeu ino ithulue. 19Julepi, ino nongu pelo apighi, achuwapaza, eno aghumi kuka kumtsu shou qodalu penike akuka tsuvea, eno kiu nomu nongu ghuzamo nani. #Leshe 91.13 20Tishinamu hipaqo ghahwuno nongu qhoqhulu pekeulo alokivi shikevilo; ikemu nongu je kunguu yehpuakeulo alokivi shilo.”
Jisu Lokivi
(Mt 11.25-27; 13.16-17)
21Tipa dolo Aghungu Kimthe no alokivi pesu Jisu hupitetsu, eno pano pi, “Atsutsu eno ayeghi Mpeu, Apuo, ino oshikimthi ani, kughengu nono thime hipaqo alokutsumi ngo ithishekemi launo kusuluveno, mthakemi lau pephepiyeke. Iye, Apuo, nono hi shitsukeuye tino opulou kehue. 22Ipuno thime kumtsu pesu itsuvae; Apu likhino thono Anu ye khuu kela khunomu mthae,eno Anu likhino thono Apuye khu kela eno Anu no khuno lau pephepiye niye kishelu keno tipano likhino thono khunomu mthae.” #Jn 3.35; 10.15
23Tithiu Jisu no akhopemi lau tsughu ighieno panongu vilo likhi pi: “Nonguno kiu kiu ithulu keno ti ithuluke nhethi aghi keqo kumghae! 24Ino nongu vilo pini, tungkupmi eno kukami kutomono nonguno kiu ithulu ani keno ti ithulu nishi cheke, ikemu panonguye tishi mlave, eno nonguno kiu chilu ani keno chilu nishia, ikemu panonguye tishi mlaveke.”
Samariami Akiviu Holetsa
25Tileno Ayezah kukutsumi lakhino puthugho ithughi eno pa ghujughi pi, “Kutsuchekeu, niye lhokta kuxu ithulu nike ghenguno kiu shimasa kya?” #Mt 22.35-40; Mk 12.28-34 26Jisu no pa vilo iniju, “Kuchoyesulo kiu yehpuani kya? Noye tile kishi philu puania?” 27Timi huno khochile pi, “Noye omlo kuchopu ongulho kumtsu okumto kumtsu eno okukumsu kumtsu pe Ampeu Alhou kimiye masa eno okitomi olikhi otoi kimiye masae.” #Zaki 6.5 28Jisu no pa vilo pi, “Mutsumishei shi khochilevae; hi shilo eno noye akuxupu aniae!” #Achine 18.5
29Ikemu Ayezah kukutsumi huno pa likhi paye achipie pinishive kehu pano Jisu vilo iniju, “Khuuno ikisughumi kya?” 30Jisu no khochile pi, “Timi lakhi Jerusalem lono Jerikho lo iqiche eno paye kupukami ulo ilove, ikelauye panonguno thwokha xalukhave eno akithi kumlho shi pa heqhipe qhiveno wuve. 31Khileno kela achinemi lakhi ghi tipau lalo iqiche, kughou pano timi hu ithulu keno kughowuno muxusu wuve. 32Tihutoi Levi laghami lakhi tipau-alo ighi, kughou pano timi hu ithulu keno kughowuno muxusu wuve. 33Ikemu Samariami lakhi tipa lalo izuwuche eno tipa-a lo ighi kelo timi hu ithulu puzu pa mlolo ighono kimiyeqhiyive. 34Pa lau wu puzu pa zakuqolo teli ngo aji lepukuno khavetsu; eno timi hu khape pawu gadaha shou kughuqano pa sasu aghuzumikilo saghi eno pa tuchomujo ae. #2 Yeki 28.15 35Tishiwo thoghiu pano tsandiyi kini ikhipe aghuzumi ki-kheu tsughi pi, ‘Pa tuchomujo aghilo, nono hinguno alau puwove aghi namu ino ideghi kelono otsu chileni.’ ” 36“Hipano kuthu gholo noye khikhiuno kupukami ulo ilovekeu lau akisughumi kivi ghili pephe piye kepi kumsulu ania?” 37Ayezah kukutsuu no khochile, “Kimiyekini kumla shikeu hunoe.” Jisu no pa vilo pi, “Wuno tipaphi shilo!”
Jisu no Martha ngo Maria kilo Wu
38Jisu ngo akhopemi izu susu wuche kelo aphu lakhi tolu, tile Martha no li kilo Jisu kusu. 39Li tsunipu Maria ye Ampeu pukhu philo iqano pano kiu pi akeno inia. #Jn 11.1 40Ikemu Martha ye akumla kutomo shikepushi akehu mighimghai kelauno lino ighino pi, “Ampeu, itsunipuno akumla kumtsu kulhuqhipe itsuve ake noye jumo kesha? Li vilo ikuphulo pilo.” 41Ampeu no khochile pi, “Martha! Thime kutomo kehu noye mighimghai eno kutakihi ani. 42Ikemu thime lakhi avehupu shi ani. Maria no thime akiviu kisheluvae eno tiye li launo ikhisuwuve mla nani.”
Markert nå:
LUK 10: SUMIBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.