MARK 11
11
Jerusalem lo Hutti Ilo
(Mt 21.1-11; Lk 19.28-40; Jn 12.12-19)
1Panonguno Jerusalem kupunulo Bethpage ngo Bethani lo ighi kelo, Oliv to lono pano pa khopemi kini azuuno puwu-ghi pi, 2“Nokujo zulo aphu akeulo wulo, eno nokujono ti tokemtsa gadahati lakhi, timi khuu nomu iku-iqa mphikeu tshupe puaghikeu nokujo no ithulu nanike, ti kuqhope saighilo. 3Timi khualano nokujo vilo, ‘Nokujoye kushiye tishi ani kya?’ ipi iniju aye pa vilo ishi pilo, ‘Ampeu no hipau avehupu shiani eno keyi hilau tsu chile puwovetsu nanike.’ ” 4Ike pama no wuno alaghilalo ahukikha lakhilo gadahati lakhi tshupuaghike ithulu, pamano ti kuqho akelo, 5tile puthugho aghi kemino pama vilo iniju, “Nokujoye kushiniye gadahati tipau kuqho ani kya?” 6Jisu no pama vilo pikeu tsa pesu panoqo vilo pive, ikehu panonguno pama pelo sawuvepe. 7Pamano Jisu lau gadahati hu saghi, eno panongu ku-uphi tipau shou xape be eno Jisu no tipau shou iqa. 8Timi kutomono panongu ku-uphi alalo qhatsu, eno kutami khamino aluzalo asutsuni loka miche suwo qhatsue.#Jisu gihukeu kiqishi shitsuke 9Timi azuu ngo athiu chekeqono ishi ighamuku, “Alhou shelo!#Hossanna Ampeu je lono chekeu Alhou no kumghatsu pelo! #Leshe 118.25-26 10Nipu David kukaqha ighini kuau hu Alhou no kumghatsulo! Kungughalo kuau Alhou shelo!”
11Jisu no Jerusalem lo ighino achineki lo ilono thwokha kumtsu hemxa jukutoe. Ikemu tipani munuve kehu pa khopemi chighikini sasu Bethani lo wuve.
Jisu no Khughuthibo Musuini
(Mt 21.18-19)
12Tishiwo thoghiu, panonguno Bethani qhiveno wuche kelo Jisu ye muzuthive. 13Pano putouno khughuthibo lakhi anipano mini boboshi akeu ithulu, ike pano tipaulo alothi pithi aghinimalaye juniye tila wue. Kughou pano tile ighi keno anipaqo likhi thono kiumu ithumlae, kughengu khughuthi pithikeu tusho kumo kehu. 14Jisu no khughuthibo vilo pi, “Timi khuu pelomu hinguno hilauye oxathi chupemoni!” Pano pikeu tsa akhopemino chiluve.
Jisu no Achinekilo Wu
(Mt 21.12-17; Lk 19.45-48; Jn 2.13-22)
15Kughou panonguno Jerusalem tolu keno, Jisu no achineki lono je aghi kemi ngo qhuaghikemi kumtsu haphe thu. Pano pisa kilitsu aghikemiqo kibepu-a ngo kubutur je aghi kemiqo lakhu ngo ishi tukuluvetsu, 16eno khu-u pelomu kiumu pesu achineki bokutha kathaghi wupemove. 17Tishieno pano timiqo vilo ishi kutsu, “Kuchoyesulo ishi yepuani, ‘Ikiye timi kumtsu ghenguno akighini ki lakhi ipi ku nani.’ Ikemu nonguno hipau pesu kupukami kughutshu-a kughulho vetsuae!” #Isa 56.7; Jere 7.11
18Achinetomi eno Ayezah kukutsumino hi chiluve, ike panonguye Jisu pithive nike alaghi phuthuve. Ikemu timi aqokitikhi kumtsuno pano kutsukeulo thughuyi akehu panonguye pa msae.
19Kughou avela shive keno Jisu ngo pa khopemi ishi taun lono wuve.
Khughuthibo launo Shikalu
(Mt 21.20-22)
20Thanau inaqhe panonguno alalo wuchekelo, khughuthibo hu akuhu kutolo thizummyive aghikeu ithulu. 21Pitor no ti kumsuchileluno Jisu vilo pi, “Kutsuchekeu, julo, khughuthibo nono musu-inivekeu hu thizummuyivae.” 22Jisu no panongu vilo pi, “Alhou lau akupulu alo. 23Kuchouno ino nongu vilo pini, nongu khuno naghuto hipau vilo, ‘Iqesu azughilo ilu lovelo’ ipinikeno, omlolo lipi mono tiye shikupu nani putsakepi pulu aye oghenguno ti shivetsu nani. #Mt 17.20; 1 Kori 13.2 24Tighenguno akighini lono kiukiumu khunikeno, nonguye ti ithulu nani kepi pululo, eno tiye nongu wu shiluve nani. 25Kughou nonguno puthughono Alhou lau inikhuni keno, timi kutami shou mopikepu kiuala aghiaye ti qhivetsulo, tishianguno kungughalo nongu paPuh no nongu kipimi qhivetsu nani. 26[Ikemu nonguno kutami kipimi qhivetsukeu kuha aye, nongu paPuh kungughalo akeu ghi nongu kipimi qhivetsumo nani.] “ #Mt 6.14-15
Jisu Kuka Ghili Iniju
(Mt 21.23-27; Lk 20.1-8)
27Panonguno itaghi Jerusalem lo ighi. Ike Jisu no achinekilo chechekelo, achinetomi ngo Ayezah kukutsumi eno kichimiqo pa lau ighi, 28eno panonguno pa vilo iniju, “Kiu kuka pesu noye hipaqo shi cheni kya? Khuno hipaqo shikepu kuka otsu kya?” 29Jisu no panongu khochile, “Ino nongu vilo kiukela lakhi inijunike ikhochilelo, tishianguno niye kiu kuka pesu hipaqo shi cheni kela ino nongu vilo pini. 30Johan no baptiz shitsuchekeu huye Alhou launo akuka tsukeo timi launo kya? Ikhochilelo.” 31Panongu dolo ishi kutsalakile ae, “Ninguno ‘Alhou launoke’ ipi aye, pano, ‘Tishiaye nonguye kushiye pa pulumo kya?’ ipini cheni. 32Ikemu ninguno, ‘Timi launo’ ipinike kishimoe.” Panonguye timiqo msave, kughengu timi kumtsuno Johan ye tungkupmi kuchou lakhike pi kumsupusu ache. 33Ikehu panonguno ishi Jisu khochileve, “Ninguye mthae.” Jisu no panoqo vilo pi “Tishiaye ino kiu kuka pesu hipaqo shi cheni kela, nighi nongu vilo pimoe.”
Markert nå:
MARK 11: SUMIBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.