MARK 16
16
Xuchilethuve
(Mt 28.1-8; Lk 24.1-12; Jn 20.1-10)
1Sabat tsala wove kethiu, Magdala noghami Maria, Jems paza Maria eno Salome ishino Jisu sukumo nupe qhi nike ghenguno axokutsungu qhu. 2tile Tughakhani inaqhe tsukinhe ipeghikelo panonguno akumokilo wu. 3Alalo chekelo panongu dolo ishi kuptsache: “Akumoki ikulolalo atuqu akeu khuu pelo ningu ghenguno tukulove tsupeni kya?” 4Tiye atuqu kijeke. Ike panonguno jupuwo kelo atuqu huye tukulove aghikeu ithulu. 5Akumoki alou iloghi kelo apumi lakhi metsughoyikeu phimini chijeboyipepu puzu ajeu iqa aghike panonguno ithulu, ike panonguye thughuyive. 6Panoqo vilo pano ishi pi, “Msakevilo, nonguye Nazaret noghami Jisu kros lo yedavekeu hu phuchenike. Ikemu paye hile kuha, paye xuthuvae. Julo, panonguno hilehi pa pewo qhike. 7Nonguye wulo eno pa khopemi ngo Pitor vilo asutsa hipau pithilo: ‘Paye nongu zuuno Galil lo wuni cheni; pano nongu vilo pivekeu hutoi, tilauno nonguno pa ithulu nani.’ ” #Mt 26.32; Mk 14.28 8Ikelo panonguye msakhokhoshive eno akumokilive lono posusu wuve. Panonguye khuu vilomu kiumu pimoe, kughengu panoqoye musaveke.
KISHEKHAKEU AQAU LAKHI
Jisu no Magdala noghami Maria lau Ipeghipiye
(Mt 28.9-10; Jn 20.11-18)
9[Jisu no kughou tughakhani akithi lono xuthuvekeno pano atughushi Magdala noghami Maria lau ipeghipiye, pano li launo tughami tsuni haphevetsukeu huke. 10Lino wu puzu likusamiqo vilo hipau pi. Panonguye mlo-qa eno ighaqa ae. 11Ikemu kughou panonguno paye xuaphi eno lino pa ithuluvae pikeu chilukeno panonguno ti pulutsumoe.]
Jisu no Akhopemi Kini lau Ipeghipiye
(Lk 24.13-35)
12Hipathiu, Jisu no pakutakeu ghola lono panoqomi mikinino aphulo wuche kelono ipeghi piye. 13Pamano ideghino kutamiqo vilo hipau pesu pi, ikemu panonguno ti pulutsumoe.
Jisu no Akhopemi Chighi-qhaqhi lau Ipeghipiye
(Mt 28.16-20; Lk 24.36-49; Jn 20.19-23)
14Tipathiu Jisu no akhopemi chighi qhaqhino kuchukusho shi ake lono panongu lau ipeghi piye. Panoqo kupulukumo, amlo kumka pano xuthughive kethiu khunoqono pa ithulukeno tipaqo tsa pulutsumo ke ghenguno Jisu no panongu sakiyi. 15Pano panoqo vilo pi, “Ayeghiqha kumtsulo wulo eno lokivipu sutsa pesu timi lhoxu kumtsu vilo asheshulo. 16Khunoqono pulu puzu baptiz shilu nikeno xalu nani, ikemu khunono pulumo nikeno peve nani. 17Kupulumi lau amchipukuka hipaqo panongu gholo anani: Ije lono panonguno tughami haphelu nani, panonguno amli kithe lono pi nani; 18Panongu no apighi ikhiqhelu momu tughu yelu namu panongu shipsamla nani; panonguno kusukinimi shou au betsu kelo tipaqono viluve nani.”
Jisu Kungughalo Sakuve
(Lk 24.50-53; Aposto 1.9-11)
19Ike Ampeu Jisu no panoqo putsatave kethiu, paye kungugha lo sakuve, eno Alhou-u ajeu iqave. #Aposto 1.9-11 20Akhopemino aqha kumtsulo wuno asheshu, eno Ampeu no panoqo gholo mla eno panonguno asheshukeu sutsaye kuchouke ipikeu shi-ghi amchipu kuka panoqo tsu.#Akiyepa kutau loye hitoi kishekha puaghi: [9 Totimiqono Pitor ngo pakusamiqo lau wupuzu ikhonheyi shi-ghi, panongu vilo kiu pipuakeno tipau pie. 10 Eno hipa thikhau ye, Jisu ampino pakhopemiqo vechewo kipelauno kulolau kutolo akimthe eno puhamlakeu lhokta-xakulupu sutsa pesu pewupe.]
Markert nå:
MARK 16: SUMIBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.