MARK 7
7
Apu-asuqo Kukutsu
(Mt 15.1-9)
1Jerusalem lono Farisimi ngo Ayezah kukutsumi khami iqighikeqo no Jisu suhope kumqo ae. 2Panonguno Jisu khopemi khamiye a-u shikimthemono achuqupu chuakeu ithulu, tiye Farisimi no timi vilo a-u mutsulo pikeu ghola lono shimo kehue. 3Kughengu Farisimi ngo Judami kumtsuno apu-asuno kutsukeu pekishe sughikeu papeche, tiye panongu yeh gholauno a-u mutsumokeloye chuchemoe. 4Panoqoye kughou alhikishi-a lono ighini keno pano shikimtheve mphi loye chuchemoe. Tinguno alau ghi apu-asu launo pekishe sughikeu panonguno pepimhe che, ajukhu, alazayili, ali eno azu-a ngo ishi pano khuayeh gholauno shikimthe che.
5Ike Farisimi ngo Ayezah kukutsumino Jisu vilo iniju, “Okhopemiqoye kushiye apu-asu launo pekishe sughikeu kukutsu kiqi lono xumo puzu a-u shikimthemono chucheni kya?” 6Jisu no panongu khochile. “Isaya no kughou tungkuptsa nongu ghili pikeno pa ye achipishi pivae! Nonguye pano yepe qhikeu toi kuhakughamiqoe.
‘Timi hipaqoye akichilo likhino igihue,
ikemu panongu mloye ilauno putou anie;’ ipi Alhou no pi.
7‘Panonguno adou lono imlla achenie,
Timino shikeu yezah hu pesu Alhou launo ighikeu khuayeh kepi kutsu cheni!’ ” #Isa 29.13
8Jisu no highi pi, “Nonguye Alhou no ahza tsukeu qhive puzu timi launo pekishe sughikeu kukutsu mutotoi tsuqupe acheni.” 9Jisu no highi pikithe, “Nonguye muquijoyi shino Alhou no ahza tsukeu peveno nonguno pekishe pesu kutsuchekeu qhipuaniye shi cheni! 10Kughengu Muse no ishi ahza tsu puani, ‘Opu eno oza gihulo’ eno ‘Khuno apu aza lhoksa pinikeno pa pithivelo.’ #Ipe 20.12; 21.17; Achine 20.9; Zaki 5.16 11Ikemu nonguno pikeuno, timi lakhino kiwala aghieno tipau peitha puzu pa puaza kuphukulupu shi ani,ikemu pano, ‘Hiye korban shive ake,’ tipau kiqiye, hiye Alhou wu shiveake, ipi aye, 12nonguno timi tipau pelo apu-aza kuphumonikeu jekukivi shivepe cheni. 13Hitoi shikeu nonguno pekishepe kutsuchekeu kutami shikawokeu lono Alhou tsaye adou shivetsu cheni. Hitoikeu kutomo nonguno shi acheni.”
Timi Shikuchhubevepekeu
(Mt 15.10-20)
14Tile Jisu no timi aqokitikhi itaghi ku-kumqono panoqo vilo pi, “Nongu kumtsu itsa inilo eno ithitoilulo. 15Ashouno kiu timi lolo ilokeno tiye pa shikuchhubeve chemo, ikemu timi lakhi lolono kiu ipeghikeno tipauno pashikuchhubeve cheni. 16Khuno chilunishi anikeno pa pelo inilu pelo.”
17Kughou pano timiqo qhiveno akilo ilove keno, pa khopemiqono pa vilo kimighipiyekeutsa iniju. 18Jisu no panoqo vilo pi, “Tishiaye nongu ghi kutami nguno alokutsu kumoe. Ashouno timi lolo ilokeuye pa shikuchhubeve lu chemo pi nonguye mtha kesha? 19Kughengu tiye pa lolo ilo chenike kumoe, ikemu pa kivelo ilove cheni, eno tishieno ashou ipeve cheni.” [Jisu no hi pikeu huye achuqupuye kumtsu chulu nani kepi pano pitsuke.]
20Pano itaghi ishi pi “Timi lakhi lolono kiu ipeghi cheni keno tino pa pelo kuchhubeve kepu shipe cheni. 21Kughengu alou timi mlo lono alhoksa kukumsu ipeghikeu lono hipaqo shi cheni: Asalha, akupuka, timi ghiqhi, kutami nipu sazukeu, 22aghichikupo, kusakugha kumla, pishikiqhi, anhekushu, kuthakugha, aqhekuza eno mbomzushikeu. 23Alhoksa hipaqo thwokha kumtsu timi lolono ipeghi cheni eno tipaqono pa shikuchhubeve cheni.”
Topumi lakhi Kupulu
(Mt 15.21-28)
24Tithiu Jisu ye Tur ngo Sidon qhalo wuniye cheve. Pano ighino aki lakhilo iloe eno timi khuu pelomu paye tile ani kepi ithipemo nikeu shia, ikemu paye itshu khamlave. 25Topumi lakhi nga tughakusano sa-ake atopuuno Jisu ghili chilu puzu mtazu ighieno pa pukhu philo itsaiqi. 26Atopu-uye Judakumomike. Siriya lo Fonika lono punukemi. Lino anga phi lono tughami haphevetsu lopi Jisu qhuyiniju. 27Jisu no li vilo pi. “Angaqo paghi loji paghi pelo, kughengu angaqo chuqu ikhi pesu atsuqo lau veqhitsu nikeuye achipi kumoe.” 28Ikemu lino ishi khochile, “Akijeu tishike, ikemu alakhu qholo atsuqo ghi angaqono phekiqhikighi chu cheni.” 29Jisu no li vilo pi, “Nono hipau pikeu ghenguno noye akilo wujulo, tughamiye onga qhiveno cheveake.” 30Lino akilo ighi kelo anga zuaghi eno tughamiye cheve aghi.
Amlitshu, Akinikughupou Shipivi
31Tithiu Jisu ye Tur qha lono cheveno Sidon vechesu Taun Chighi kudau Galil zughilo wuve. 32Timi khamino akini ipo atsa ghi piphemlakemi lakhi palau saghi, eno Jisu vilo pa-u pesu timi tipau bujutsulo pi qhuiyiniju. 33Ike Jisu no aqokitikhi gholono timi tipau likhi sawu puzu, pa- uloti pesu timi tipau kinilo chope ngo eno amtti musuqhi puzu timi mili ditsu. 34Tishino Jisu no kunguu jupukuno amlo kughuju tuthu kishe toi sheno pi, “Efatha” tipau kiqiye, “Khaqhivelo” 35Eno timi tipau kini khaqhiluve, eno pa mili kuqholuve, eno paye kiumu kupunamono atsa piluve. 36Jisu no hipau pesu khuvilomu pikevilopi kumtsu hakhave, ikemu pano khije panoqo lakhakeno tijehi panonguno vekuphasu piwuve. 37Eno ti chilukemi kumtsuno shishe akumzaveno ishi pi, “Thwokha pano shipivivetsu: Pano akini kughupomi pelo chilupe eno atsa piphemlakemi pelo pilupe ke!”
Markert nå:
MARK 7: SUMIBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.