Luk 10
10
Yecu Atoc Kɔc Kathiërdhorou ku Rou
1Na wën, aacï kakë thök, ke Bɛ̈nydït jɔ kɔc kɔ̈k kathiërdhorou cɔɔl aya, ku tooc keek renë kapäc ku renë kapäc, bïk lɔ pänydït ëbɛ̈n ku baai ëbɛ̈n, të bï en dap bɛ̈n thïn. 2#Math 9:37,38. Go keek yɔ̈ɔ̈k an, “Ka cï luɔk ajuëckï, ku kɔc luui alikï. Yen aa wek Bɛ̈nydït ë ka cï luɔk lɔ̈ŋ an, bï kɔc ë luui tuɔɔc domdɛn cï luɔk. 3#Math 10:16. Lakï tei: tiëŋkï, wek tuɔɔc cït man ee amithöök lɔ në aŋuööth yiic. 4Duökï anyɔŋɔ ë wëu muk, ayï athep, ayï war, ku duökï raan däŋ ee thiëëc kueer. 5Ku ɣön bä wek lɔ thïn ke jakï kɔn lueel an, ‘Ë mät tɔ̈u ke ɣönë.’ 6Ku na nu raan nhiaar mät thïn, ke mändun abï rëër ke yen, ku na liu, ka bï rɔt pɔ̈k week. 7#1 Kor 9:14; 1 Tim 5:18. Ku jakï cool ee ɣönë guöp, ke we ye cam ku dɛ̈kkï në ka bï yiɛ̈n week: raan ee luui ee röŋ ke ariöpde. Duökï ɣööt wïïl. 8Ku pänydïït la wek thïn, ku tɔ kɔc week ee kamaan, ke we ye ka cï tääu ë wenïïm cam: 9Ku takï kɔc tök dem kɔc nu thïn, ku yɔ̈ɔ̈kkï keek an, ‘Ciɛɛŋ de Nhialic acï ɣeet të thiɔ̈k ke week.’ 10#Luɔi 13:51. Ku pänydïït la wek thïn, ku cïï kɔc we tɔ ye kamaan, ke we jɔ lɔ biic ë kuɛɛr ke paanë yiic, ku luɛɛlkï an: 11#Math 10:7-14; Mak 6:8-11; Luk 9:3-5. ‘Ayï tɔr ë pänyduöndït tɔr wën cï nuɛt ë wogup, yen a weecku wei, jäny jiëëny wok week ka! Ku jakï kënë ŋic an, Ciɛɛŋ de Nhialic acï ɣëët tëthiɔ̈k ke week!’ 12#Cäk 19:24-28; Math 11:24; Math 10:15. Ku week yɔ̈ɔ̈k an, Këtuc bïï Thɔdom yök acïï bï kït kekë këtuc bïï pänydïïtë yök ee köölë!
Wuöt Cïn Piɔ̈ɔ̈th Gäm
(Math 11:20-24)
13 #
Yith 23:1-18; Edh 26:1–28:26; Jol 3:4-8; Amo 1:9,10; Dhek 9:2-4. Amawoou në yïn, Koradhin! Amawoou në yïn, Bethaida! Tëë kadït ril cï looi ë Tayer ku Thidon cït man cï ke looi ë weyiic, adï cïk kepiɔ̈ɔ̈th puk ɣɔn thɛɛr, ke ke ceŋ cual ku yek rëër ë aropic! 14Ku këtuc bïï Tayer ku Thidon yök acïï bï kït kekë këtuc bäk yök. 15#Yith 14:13-15. Ku yïn Kapernaum, yïn cï jat nhial aɣet paannhial, yïn bï bɛ̈ɛ̈i piny aɣet paan ë thuɔɔu!”
16 #
Math 10:40; Mak 9:37; Luk 9:48; Jɔn 13:20. Go Yecu kɔckɛn ë piööcë yɔ̈ɔ̈k an, “Raan piŋ këdun, ka piŋ këdï, ku raan reec week, ka reec ɛn, ku raan reec ɛn, ka reec raan ë toc ɛn.”
Bɛ̈n Ciëën de Kɔc Kathiërdhorou ku Rou
17Na wën, ke kɔc kathiërdhorou ku rou#10:17: thiërdhorou ku rou; këcïgɔ̈ɔ̈r däŋ ade yic thiërdhorou (tïŋ cöök 1). ke ke jɔ kenïïm dhuny, ke ke mit piɔ̈ɔ̈th, ku jɔkï lueel an, “Bɛ̈nydït, aɣɔ̈l jɔɔk rac ayek këda gam në rinku!”
18Go ke yɔ̈ɔ̈k an, “Yɛn ë Catan tïŋ ke lööny piny paannhial cït man ë wilëdeŋ. 19#Diɛt 91:13. Tïeŋkï, wek gäm riɛl bä wek karɛc käc ë wecök, ayï manciëëi, ku gäm wek riɛl bä wek riɛl dïït ë raan de ater tiaam ëbɛ̈n: ku acïn kë bï week nɔ̈k anandun. 20Ku duökï piɔ̈ɔ̈th mit në ee cöökë an, ye jɔɔk rac këdun gam, aŋuän luɔi bä wek piɔ̈ɔ̈th miɛt në gäär cï rinkun gɔ̈ɔ̈r paannhial.”
Yecu Amit Piɔ̈u
(Math 11:25-27; 13:16-17)
21Ku në thaar manë guöp ke Yecu jɔ piɔ̈u miɛt në Wëidït,#10:21: në Wëidït Ɣer; këcïgɔ̈ɔ̈r däŋ ade yic në Wëidït; kɔ̈k adekï yiic në wëike. ku lueel an, “Yïn lɛɛc, Wäär Bɛ̈nydït de Paannhial, në luɔi cïn kakë mɔ̈ny kɔc pel ku kɔc de nïïm, ku jɔ keek nyuöth mïththii ateteet: ee yen, Wäär, en acï guɔ miɛt ë yïpiɔ̈u.
22 #
Jɔn 3:35;
Jɔn 10:15. “Käŋ kedhie acï Wäär ke yiɛ̈n ɛn: ku acïn raan ŋic wënde, nɔn ee yen ŋa, ee wun etök, ku acïn raan ŋic wun, nɔn ee yen ŋa, ee wënde etök, ku raan nu ë Wënde piɔ̈u luɔi bï en ë nyuöth en.”
23Go rɔt pɔ̈k kɔcpiööcë, ku yöök keek kapäc an, “Thieithieei ë nyin tïŋ ka tiëŋkï! 24Wek yɔ̈ɔ̈k an, tït juëc ayï meliik acïk piɔ̈ɔ̈th dɛ luɔi tïŋ kek ka wɔikï ku akënkï ke tïŋ, ku luɔi piŋ kek ka piɛŋkï, ku akënkï piŋ.”
Kääŋ de Raan de Thamaria Piɛth
25 #
Math 22:35-40; Mak 12:28-34. Na wën, ke raan tök, jɔt rɔt, ee bɛ̈ny de löŋ, ku jɔ them thiëëc an, “Bɛ̈ny ee wëët, eeŋö bä looi kë bän pïïr athɛɛr lɔ̈ɔ̈k lak?”
26Go lueel an, “Eeŋö cï gɔ̈ɔ̈r ë löŋic? Ye kueen adï?”
27 #
Nyöŋ 6:5;
Leb 19:18. Go bɛ̈ɛ̈r an, “ ‘Yïn bï Bɛ̈nydït Nhialicdu nhiaar ë piɔ̈ndu ëbɛ̈n, ku wëiku ëbɛ̈n, ku riɛldu ëbɛ̈n, ku nɔmdu ëbɛ̈n,’ ku ‘nhiaar raan rɛ̈ɛ̈r ke yïn cït man nhiɛɛr yïn rɔt.’ ”
28 #
Leb 18:5. Go lueel an, “Acï tiiŋ nɔm: na loiye wulë, ke yïn bï pïïr.”
29Go kɔɔr luɔi bï en rɔt kɔl, en ee raanë, ku jɔ Yecu thiëëc an, “Ku raan rɛ̈ɛ̈r ke yɛn yen eeŋa?”
30Go Yecu bɛ̈ɛ̈r an, “Ade raan ë jël Jeruthalem le Jeriko, ku jɔ rɔ̈m ke cuɛ̈ɛ̈r, na wën, ke ke döör lupɔde bei ë yeguöp, gokï dui, ku jɔkï jäl, ku nyiëëŋkï piny ke deyic wëi. 31Na wën, ke bɛ̈ny töŋ ë ka ke Nhialic ke bïïyë piny ee kueerë, go tïŋ, ku jɔ rɔt yal ë kueer biäktui, ku tëëk. 32Ayï raan ë Lebi aya, të cï en ɣëët të nu raan, ke woi, ku jɔ rɔt yal ë kueer biäktui, ku tëëk. 33#2 Lëk 28:15. Na wën, ke raan töŋ ë Thamaria keny ëtɛ̈ɛ̈n, ku jɔ bɛ̈n të nu raanë, na wën, aacï e tïŋ, ke jɔ piɔ̈u kok ke yen, 34ago lɔ të nu yen, ku jɔ ɣään tök deer, wën cï en ke tɔc ë miök kekë mɔ̈u, ku tɛ̈ɛ̈u ë mulde kɔ̈u, ku bïï ɣön ë kamaan, go jɔ muk apiɛth. 35Na ɣɔn amiäk, të jël en, ke jɔ rial bɛ̈ɛ̈i bei, yïn raan de ɣöt, ku yöök an, ‘Muk apiɛth, ku na de wëu kɔ̈k cï yïn ke ye ɣɔ̈ɔ̈c, ke yïn bä cuööt miäk, të cän bɛ̈n.”’
36Na yïn an, “Në keyiic kadiäk eeŋa cï rɔt tɔ ye raan rɛ̈ɛ̈r ke raan wën räm ke cuɛ̈ɛ̈r ee käŋ rum?” 37Go lueel an, “Ee raan wën cï piɔ̈u kok ke yen.”
Go Yecu yɔ̈ɔ̈k an, “Lɔ, ku ye looi wuya.”
Yecu anem Martha kekë Meri
38 #
Jɔn 11:1. Na wën, aa ciɛthkï kueer, ke jɔ lɔ paan tök, go nyuööc ë tiiŋ töŋ cɔl Martha. 39Ku de nɔm nyankënë cɔl Meri, nyan cï nyuc ë Bɛ̈nydït cök, ke piŋ wëëtde. 40Na wën, ke Martha nuan arëët ke luɔi dït, ku jɔ bɛ̈n të nu yen, bï ku lueel an, “Bɛ̈nydït, luɔi cï nyankäi a päl luɔi yatök, cïn këdu thïn? Yɔ̈ɔ̈kë bï a kony!”
41Go Bɛ̈nydït bɛ̈ɛ̈r, yöök an, “Martha, Martha! Yïn cï piɔ̈u diɛɛr ku cï nuan ë kajuëc, 42ee tök tei en dak. Ku Meri acï baŋ piɛth lɔc, baŋ cïï bï nyaai tëde yen.”
Markert nå:
Luk 10: dip-JPB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible in Jieeng de Padang © The Bible Society in South Sudan, 2011.