Luk 9
9
Yecu Atoc Kɔc ë Piööcë Kathiëër ku Rou
(Math 10:5-15; Mak 6:7-13)
1Go kɔc kathiëër ku rou cɔɔl, ku gëm keek riɛl bï kek jɔɔk rac cieŋ kedhie, ku tɔkï juäi waar. 2Go ke tooc lek kɔc aa guiëër ciɛɛŋ de Nhialic, ku tɔkï kɔc tök dem. 3Ku yöök keek an, “Duökï ka ke kueeric muk, acïn thieec, ayï athep, ayï kuïn, ayï wëu, ku duökï aluluut leer kaarou. 4Ku ɣön bä we lɔ thïn, jakï rëër thïn, ku bäk jäl ëtɛ̈ɛ̈n. 5#Luɔi 13:51. #Luk 10:4-11. Ku na de kɔc reec week nyuööc, të jäl wek paanden, ke we teŋ abuui wei ë wecök, abï aa cäätɔ bï dɛ ater ke keek.
6Gokï jäl, ku jɔkï bɛ̈i caath yiic, ke ke guiir wëlpiɛth, ku tɔkï kɔc dem ë baai yic ëbɛ̈n.
Ɣerod ë Nɔm Nuɔɔn
(Math 14:1-12; Mak 6:14-29)
7 #
Math 16:14; Mak 8:28; Luk 9:19. Na wën, ke Ɣerod bɛ̈ny, ke jɔ kë cï looi piŋ ëbɛ̈n, go gäi arëët, në kë cï lueel ë kɔc kɔ̈k an, cï Jɔn rɔt jɔt ë kɔc cï thou yiic, 8Ku lueel kɔc kɔ̈k an, cï Elija tuöl, ku në kɔ̈k an, cï raan töŋ de tït thɛɛr rɔt bɛ jɔt. 9Go Ɣerod lueel an, “Jɔn acä kiɛp nɔm wei, ku eeŋa ee raanë, raan cän ka cït ee kakë piŋ në këde?” Ku ade piɔ̈u luɔi bï en e tïŋ.
Yecu Aciëëm Kut ë Kɔc
(Math 14:13-21; Mak 6:30-44; Jɔn 6:1-14)
10Na wën, aacï kɔc cï tooc kenïïm puk, ke jɔkï guiëër ka cïk looi. Go ke lɛɛr, ku jɔ rɔt wuony të cïn kɔc ë jɔ̈ɔ̈ric jɔ̈ɔ̈r ë pänydït cɔl Bethaida. 11Na wën, aacï kut ë kɔc e ŋic, ke jɔkï biɔɔth cök: go keek loor, ku jɔ keek guiëër ka ke ciɛɛŋ de Nhialic, ku tɔ kɔc dem kɔc de kë nu ë kegup.
12Go akɔ̈l rɔt puk, ku jɔ kɔc kathiëër ku rou bɛ̈n, bïk ku luelkï an, “Tɔ kut ë kɔc jël, bïk lɔ ë wuöt yiic ku bɛ̈i yiic tëthiɔ̈k lek të tɔ̈ɔ̈c kek kɔɔr, ayï këcam piny tɔ̈u wok thïn ee jɔ̈ɔ̈ric tei.”
13Go keek yɔ̈ɔ̈k an, “Week, miackï keek ë këcamkï.”
Gokï lueel an, “Acïn kë cath ke wook, ee kuïn cï pam kadhïc tei, ku rec kaarou. Kɔɔr buk lɔ, buk këcam lɔ ɣɔ̈c keek kedhie? 14Aake cït agum kadhïny ë röör.
Go kɔckɛn ë piööcë yɔ̈ɔ̈k an, “Takï ke nyuc ë buluuk, buluŋ tök ee thiërdhïc, ku buluŋ tök ee thiërdhïc.”
15Gokï looi aya, tɔkï ke nyuc kedhie. 16Na wën, ke kuany kuïn cï pam kadhïc ku rec kaarou, ku jɔ tënhial lieec, go ke thieei, ku wɛ̈k keyiic, gëm ke kɔcpiööcë, bïk ke lɔ tääu ë kut ë kɔc nïïm. 17Gokï cam, abïk kuɛth kedhie: ku jɔkï ka lɔ thueithuei kuany ë diööny yiic diööny kathiëër ku rou në ka cï both.
Petero Anyooth Yecu nɔn Yen Kërtho
(Math 16:13-19; Mak 8:27-29)
18Na wën, ke läŋ etök, ku tɔ̈u kɔckɛn ë piööcë në yen: go ke thieec an, “Ye kɔc ɛn tɔ ye ŋa?”
19 #
Math 14:1,2; Mak 6:14,15; Luk 9:7,8. Gokï bɛ̈ɛ̈r an, “Jɔn Baptith, ku lueel kɔ̈k an, Elija, ku në kɔ̈k an, ye raan töŋ de tït thɛɛr en cï rɔt bɛ jɔt.”
20 #
Jɔn 6:68,69. Go keek thiëëc an, “Na week, yak a tɔ ye ŋa?”
Go Petero bɛ̈ɛ̈r an, “Yïn ee Kërtho de Nhialic.”
Yecu Ajam në Biäk de Guömde ku Thuɔɔu
(Math 16:20-28; Mak 8:30–9:1)
21Go ke lom thook, ku yöök keek arëët an, ë cïn raan lɛ̈kkï ee kënë. 22Ku lueel an, “Wën ë Raan abï kajuëc dhil guum, ku abïï röördït rɛɛc, ku bänydït ke ka ke Nhialic, ku kɔc ee löŋ gɔ̈ɔ̈r, ku abï nɔ̈k, ku be rɔt jɔt ëkööl ee kek diäk.”
23 #
Math 10:38; Luk 14:27. Go keek yɔ̈ɔ̈k kedhie an, “Na de raan de piɔ̈u luɔi bï en a kuany cök, ë ye rɔt nyɔ̈ŋ, ku ye timdɛn cï rïïu nɔm jɔt ë aköölnyïïn, ku kuɛny a cök. 24#Math 10:39; Luk 17:33; Jɔn 12:25. Raan kɔɔr luɔi bï en wëike kony, ka bï ke möör, ku raan mär wëike në biäkdï, yen abï wëike kony. 25Të ciɛmë raan piny nɔm ëbɛ̈n, ku mɛ̈ɛ̈r rɔt, ku nɔn tɔ yen rɔt riääk, ee piathou bï yök thïn? 26Raan cï guöp riɔ̈ɔ̈c në biäkdï ku në biäk de wëlkï, raanë abï Wën ë Raan guöp riɔ̈ɔ̈c në biäkde, të bï yen ke dhuëëŋ de yenguöp, ku dhuëëŋ de wun, ku dhuëëŋ de tuucnhial ɣeriic. 27Ka wek lɛ̈k yic an, ade kɔc kääc ee tënë, kɔc cïï thuɔɔu bï thiëëp, të ŋoot kek ke ke kën ciɛɛŋ de Nhialic kɔn tïŋ.”
Yecu ë Yeguöp Waar
(Math 17:1-8; Mak 9:2-8)
28Na wën, aacï wëlkë thök të cït nïn kabɛ̈t, ke jɔ Petero nööm, ku Jɔn ku Jakop, go lɔ ë kuurdït nɔm, le lɔ̈ŋ. 29Ku të ŋoot en ke läŋ, ke täu de yenyin ë puk rɔt, go lupɔde jɔ ɣɛɛr abï lɔ bilbil. 30Na wën, ke kɔc kaarou ë ke jam në yen, ee yï Mothe kekë Elija: 31acïk tuöl në dhuëëŋ ke ke jam në këde jäl bï en jäl në piny nɔm ë Jeruthalem. 32Ku Petero kekë kɔc cath në yen acï nïn ke nɔ̈k: na wën, aa cïk guɔ pääc, ke ke jɔ dhuëëŋde tïŋ, ku tïŋkï kɔc kaarou ke ke kääc në yen. 33Na wën, aa jël kɔc ë yelɔ̈ɔ̈m, ke Petero yöök Yecu an, “Bɛ̈ny, täu tɔ̈u wok eenë en apiɛth: jɔku kɛ̈ɛ̈t looi kadiäk, ye tök këdu, ku ye tök këde Mothe ku ye tök këde Elija.” (Akuc kë lueel.)
34Të ŋoot en ke jam, ke luät bɔ̈, kum ke piny: gokï riɔ̈ɔ̈c të le kek ë luätic. 35#Yith 42:1; Math 3:17; 12:18; Mak 1:11; Luk 3:22. #2 Pet 1:17,18. Ku bɔ̈ röl bei ë luätic an, “Wëndiën nhiaar kï: yak kake piŋ!”
36Të cï röl mim, ke ke jɔ Yecu yök etök. Gokï lɔ ku mimkï, ku cïn kë cïk lɛ̈k raan däŋ ë aköölkë në ka wën cïk tïŋ.
Yecu Atɔ Mɛnh de Guöp Jɔŋrac Dem
(Math 17:14-18; Mak 9:14-27)
37Na ɣɔn amiäk, aa cïk bɛ̈n piny ë kuurdït nɔm, ke jɔ rɔ̈m ke kut dïït ë kɔc. 38Na wën, ke raan töŋ ë kut ë kɔc yiic cöt an, “Bɛ̈ny, yïn läŋ, woi wëndï: ee mɛnhdiën tök: 39Ku tïŋ, aye jɔk dɔm, go dap röl ëthiäu, aye tɔ lɔ juɔ̈kläŋ, abï ayɔ̈k gut ë yethok, ku acie dap pɔ̈l, aye kɔn bɔ̈ɔ̈t guöp. 40Aguɔ kɔckuön ë piööcë lɔ̈ŋ an, bïk cieec biic, agokï cuö lëu.”
41Go Yecu bɛ̈ɛ̈r an, “Rem reec gäm oou, rem ee löŋ yalic oou, bä rëër ë weyiic ë run kadï, ku bä kakun guum ë run kadï?” Go lueel an, “Bɛ̈ɛ̈iyë wëndu ee tënë.”
42Na wën, të ŋoot en ke bɔ̈, ke witë jɔŋ rac piny, ku tɔ lɔ juɔ̈kläŋ arëët. Go Yecu jɔŋ rac jɔ̈ɔ̈ny, ku tɔ meth waar, ku jɔ bɛ yiɛ̈n wun. 43Gokï gäi arëët kedhie në riɛl dïït gök ë Nhialic.
Yecu abe Jam në Biäk de Thonde
(Math 17:22-23; Mak 9:30-32)
Na wën, të ŋoot kek ke ke gäi kedhie në këriëëc cïï Yecu looi, ke jɔ kɔckɛn ë piööcë yɔ̈ɔ̈k an: 44“Takï wëlke lööny ë weyïth ya! Wën ë Raan ë thiɔ̈k ke luɔi bï ë tääu ë kɔc cin.” 45Ku akënkï jamë gïth thar, acï mɔ̈ny keek, ke cïkï bï yökic: ku acïk riɔ̈ɔ̈c në lop bï kek e luɔp ee jamë.
Eeŋa Dït?
(Math 18:1-5; Mak 9:33-37)
46 #
Luk 22:24. Na wën, ke ater cak rɔt ë keyiic an, ee raanou bï lɔ tueŋ ë keyiic. 47Go Yecu ke cïk tak ë kepiɔ̈ɔ̈th ŋic, go mɛnhthiinakäŋ nööm, ku tɛ̈ɛ̈u ë yelɔ̈ɔ̈m, 48#Math 10:40; Luk 10:16; Jɔn 13:20. go ke yɔ̈ɔ̈k an, “Raan bï mɛnhthiinë dɔm në rinkï, ka ee yɛn ë dɔm, ku raan koor ë weyiic wedhie, yen abï dït.”
Raan Cïn Ater ke Week ee Raandun
(Mak 9:38-40)
49Go Jɔn bɛ̈ɛ̈r ku lueel an, “Bɛ̈ny, wo ë raan tïŋ ke ciec jɔɔk rac në rinku, agoku pëën, luɔi cïï en ee cath ke wook.”
50Go Yecu lueel an, “Du pën: raan cïn ater ke wook, yen aye mat ke wook.”
Kɔc ke Paan Töŋ de Thamaria Areeckï Yecu
51Na ɣɔn, aacï nïn thiɔ̈k nïn ke leer bï ye lɛɛr nhial, ke jɔ enɔm wɛ̈l të lɔ Jeruthalem an, bï dhil lɔ. 52Ku aacï tuuc tooc bïk lɔ ë yenɔm tueŋ, gokï jäl, lek paan töŋ ë Thamaria, lek këde guik. 53Na wën, ke reeckï nyuööc, luɔi de en nyin lɔ Jeruthalem. 54#2 Mel 1:9-16. Na wën, aacï kɔckɛn ë piööcë yï Jakop ku Jɔn e tïŋ, ke jɔkï lueel an, “Bɛ̈nydït, de yï piɔ̈u luɔi bï wo mac cɔ̈ɔ̈l piny tënhial, cït man cï Elija e looi aya?”#9:54: Këcïgäär däŋ ade yic cït man cï Elija ye looi.
55Go rɔt puk, jiëëny keek an, “Wek kuc wëi cath ke week nɔn ee kek wëi cït ŋö. Wën ë Raan aa cïï bɔ̈ bï kɔc bɛ̈n riɔ̈ɔ̈k wëi, ee kunydewëi en ë bï yen.” 56Gokï lɔ paan däŋ.
Kɔc Kɔɔr bïk Yecu Kuany cök
(Math 8:19-22)
57Na wën, aa ciɛthkï kueer, ke lueel raan tök an, “Bɛ̈nydït, yïn bä kuany cök të de en të le yïn thïn.”
58Go Yecu lueel an, “Awɛn adekï ɣöötkɛn cïk wec piny, ku diɛt nhial adekï ɣööt, ku Wën ë Raan acïn të kɛn en enɔm.”
59Go lɛ̈k raan däŋ an, “Kuany a cök.”
Go lueel an, “Bɛ̈nydït, päl ɛn ë ya kɔn lɔ la wäär thiɔ̈k.”
60Go Yecu yɔ̈ɔ̈k an, “Päl kɔc cï thou ë ke thiäk kɔckɛn cï thou: ku yïn lɔ, guiëërë kɔc ciɛɛŋ de Nhialic.”
61 #
1 Mel 19:20. Ku lueel, raan däŋ aya an, “Bɛ̈nydït, yïn bä kuany cök, ku päl ɛn ë ya kɔn lɔ la kɔc nu paanda tɔ̈ɔ̈ŋ.”
62Go Yecu yɔ̈ɔ̈k an, “Raan ë puur dɔm ë yeciin, ku be ciëën lieec, acïï röŋ ke ciɛɛŋ de Nhialic.”
Markert nå:
Luk 9: dip-JPB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible in Jieeng de Padang © The Bible Society in South Sudan, 2011.