Mak 12
12
Kääŋ de Tim de Enap
(Math 21:33-46; Luk 20:9-19)
1 #
Yith 5:1,2. Go jam gɔl ke keek ë kääŋ: an, “Raan ë dom piith ë tim cɔl enap tim de mïth mit, go geeu ë rɔk, ku wec të bï mɔ̈u dhiim thïn, ku yïk aloocdïït bäär, go tääu ë kɔc cin kɔc bï dom aa tiit, ku jɔ keny paan mec. 2Na wën, ë pɛɛi ë luɔk de tim, ke tuc lïm tök kɔc wën tit dom an, bï käŋ nööm tëde kɔc tit dom në ka cï luɔk domic. 3Gokï dɔm, ku duikï, ku tɔkï dɔk enɔm ë yecin. 4Go ke bɛ tuöc lïm däŋ, gokï biɔ̈ɔ̈k ë kur, ku duikï nɔm, ku tɔkï jël, ke cïk läät ë lɛ̈ɛ̈t rac. 5Go däŋ bɛ tooc, agokï nɔ̈k abï thou: ku loikï lïïm kɔ̈k juëc aya, ayek kɔ̈k dui, ku nɛ̈kkï kɔ̈k. 6Na wën, nɔn ŋoot en ke cath ke wëndɛn tök, wën nhiɛɛr, ke jɔ tuöc keek ë kɔc cök ciëën, aa lueel an, ‘Abïk wëndï riëëu.’ 7Na wën, ke kɔc wën tit dom ke jɔkï lueel kapäc an, ‘Kënë ee mɛnh bï käŋ lɔ̈ɔ̈k lak, bäk lok näkku, ke käŋ abïk aa kakuɔ!’
8Agokï dɔm, ku näkkï, ku jɔkï cuat ë dom këc biic. 9Go lop an, “Eeŋö bï bɛ̈ny de dom jɔ looi? Abï bɛ̈n bï kɔc tit dom bɛ̈n nɔ̈k, ku jɔ dom yiɛ̈n kɔc kɔ̈k. 10#Diɛt 118:22,23. Acakaa cöök cï gɔ̈ɔ̈rë kɛ̈nkï kueen an,
‘Kuur cï yïk rɛɛc,
Yen guöp acï tɔ ee kuur ë aguk nɔm:
11Ee luɔi de Bɛ̈nydït ee kënë,
Ka ye këde gäi tëde wook!”’
12Gokï piɔ̈ɔ̈th dɛ luɔi dɔm kek en, ku acïk riɔ̈ɔ̈c ë kut ë kɔc: acïk guɔ ŋic nɔn ë lueel en ë kääŋë në këden: agokï pɔ̈l, ku jëlkï.
Thiëc në Biäk de Kun de Athölbö
(Math 22:15-22; Luk 20:20-26)
13Na wën, ke ke jɔ kɔc kɔ̈k ke Parithai tuöc en, kekë kɔc ke Ɣerod, lek deep ë wël yiic. 14Na wën, ë ke bɔ̈, bïk ku luelkï an, “Bɛ̈ny ë wëët, yïn ŋicku nɔn ee yïn yic lueel, ku acïn raan bï yïn riɔ̈ɔ̈c ë ye, yïn cïï kɔc ë woi gup biic tei, yïn ee kɔc wɛ̈ɛ̈t ë kueer ë Nhialic në yic. Cï päl wook nɔn bï wok Kaithar aa kuöt athölbö, ku cie ye?”
15Buk aa miööc, ku cuku bï aa miööc? Ku acï aguk nu ë keyäc ŋic, go lueel an, “Eeŋö thɛm wek ɛn? Bɛ̈ɛ̈ikï rial, bä bɛ̈n tïŋ.”
16Gokï bɛ̈ɛ̈i. Go keek thiëëc an, “Raan cï gɔ̈ɔ̈rë eeŋa, ku jam cï gɔ̈ɔ̈r ee këde ŋa?”
Gokï lueel an, “Ee këde Kaithar.”
17Go Yecu bɛ̈ɛ̈r, yöök keek an, “Yak Kaithar yiɛ̈n ka ke Kaithar, ku yak Nhialic yiɛ̈n ka ke Nhialic.”
Gokï gäi në yen arëët.
Thiëc në Biäk de Jönërɔt
(Math 22:23-33; Luk 20:27-40)
18 #
Luɔi 23:8. Na wën, ke Thadokai ke ke bɔ̈ tëde yen, kɔc ë ye lueel an, cïn jön bï kɔc röt jɔt nu, bï ku thiëckï an, 19#Nyöŋ 25:5. “Bɛ̈ny ë wëët, acïï Mothe gäär wook an, ‘Të thouwë mänhë ë raan, ku nyiëëŋ tik piny, ku cïn mɛnh cï nyääŋ piny, ke mänhë löök tiiŋ de yen nööm, ago mïth lɔ̈ɔ̈k dhiëth mänhë.’ 20Wɛ̈ɛ̈t ke raan tök anukï kadhorou: go mɛnh tueŋ tik thiaak, ku jɔ thou ke cïn mɛnh cï nyääŋ piny. 21Na wën, ke mɛnh wën ee kek rou jɔ tik nööm, ku thou, ke cïn mɛnh cï nyääŋ piny, ayï mɛnh wën ee kek diäk ayadäŋ: 22agokï lɔ në tik keek kedhie kadhorou, ku cïn mïth cïk nyääŋ piny. Na wën, ë kecök ciëën, ke tik löök thou ayadäŋ. 23Ku ënɔɔnë, kööl ë jönërɔt ë kɔc, të cï kek röt jɔt, bï tik jɔ aa tiiŋ de ŋa ë keyiic? Acïk lɔ në yen keek kedhie kadhorou ke ye tiiŋden.”
24Go Yecu bɛ̈ɛ̈r, yöök keek an, “Cie yen wäc aa wek käŋ wööc, yen kuny kuöc wek kacïgɔ̈ɔ̈r, ayï riɛldïït de Nhialic? 25Të jɔt kek röt ë kɔc cï thou yiic, ka cïkï ye thiëëk ku cï ke ye thiaak, ayek ciët tuucnhial nu paannhial. 26#Bɛ̈n 3:6. Ku në këde kɔc cï thou, jön jɔt kek röt, kɛ̈nkï kueen ë awerek de Mothe yic, luɔi cï Nhialic jam kekë yen ë butic an, “Yen ee Nhialic de Abraɣam, ku ya Nhialic de Yithaak, ku ya Nhialic de Jakop.’ 27Acie Nhialic de kɔc cï thou, ee Nhialic de kɔc pïïr: we ye käŋ wööc arëët!”
Löŋdït
(Math 22:34-40; Luk 10:25-28)
28Na wën, ke raan bɔ̈, raan töŋ de kɔc ee löŋ gɔ̈ɔ̈r, ku të cï en keek piŋ ke ke lop röt, ku ŋic nɔn cï Bɛ̈ny këden ŋiëc bɛ̈ɛ̈r, ke jɔ thiëëc an, “Ee cöökou nu tueŋ ë cök ke löŋ yiic kedhie?”
29 #
Nyöŋ 6:4,5. Go Yecu bɛ̈ɛ̈r an, “Cöök nu tueŋ ë cök yiic kedhie kï an, ‘Piëŋkï wek Yithriɛl, Bɛ̈nydït Nhialicda ee Bɛ̈nydïït tök.#12:29: Bɛ̈nydït Nhialicda ee Bɛ̈nydïït tök; nɔn Bɛ̈nydït ee Nhialicda, Bɛ̈nydït yetök. 30Ku yïn bï Bɛ̈nydït Nhialicdu aa nhiaar në piɔ̈ndu ëbɛ̈n, ku në wëiku ëbɛ̈n, ku nɔmdu ëbɛ̈n, ku riɛldu ëbɛ̈n. Cöök nu tueŋ kï.’ 31#Leb 19:18. Ku cöök ee kek rou acït en alë an, ‘Yïn bï raan rɛ̈ɛ̈r ke yïn aa nhiaar cït man nhiɛɛr yïn rɔt.’ Cöök däŋ wär ëkake aliu.”
32 #
Nyöŋ 4:35. Go raan ee löŋ gɔ̈ɔ̈r lueel an, “Bɛ̈ny ee wëët, yïn ë yic lueel, nɔn ee yen Nhialic tök En nu, ku acïn däŋ ee kek rou ee yen Etök: 33#Ɣodh 6:6. ku nhiëër nhiɛɛrë raan en ë yepiɔ̈u ëbɛ̈n, ku yenɔm ëbɛ̈n, ku wëike ëbɛ̈n, ku riɛlde ëbɛ̈n, ku nhiëër nhiɛɛr en raan rɛ̈ɛ̈r ke ye acït man nhiɛɛr en rɔt, yen adït awär ka cï gäm Nhialic, ke ye miɔ̈c ye nyop ëbɛ̈n, ayï ka cï lam ku näk keek kedhie.”
34 #
Luk 10:25-28. Na wën, aacï Yecu ye tïŋ nɔn cï en e ŋiëc bɛ̈ɛ̈r, ke jɔ lueel an, “Yïn cïï mec wekë ciɛɛŋ de Nhialic.”
Na wën, ë kake cök, ke cïn raan cï nyin riɛl, lop en ë käŋ.
Thiëc në Biäk de Mathaya
(Math 22:41-46; Luk 20:41-44)
35Go Yecu bɛ̈ɛ̈r, wëët en kɔc Luaŋdït, lueel an, “Eeŋö ye kɔc ee löŋ gɔ̈ɔ̈r e lueel an, “Kërtho ee wën ë Debid? 36#Diɛt 110:1. Debid guöp acï lueel në Wëidït ɣer an,
‘Bɛ̈nydït acï Bɛ̈nydiëndït yɔ̈ɔ̈k an,
Nyuc ë baŋ cuënydï,
aɣet të bän kɔc dɛ wek ater tɔ ye kɔm ee yïn yïcök dhɔ̈ɔ̈r.’
37Debid guöp aye tɔ ye Bɛ̈nydït, ku ye wënde adï?”
Yecu Ayöök Kɔc në Biäk de Wëët ë Kɔc ee Löŋ Gɔ̈ɔ̈r
(Math 23:1-36; Luk 20:45-47)
Go kut dïït ë kɔc këde piŋ ke ke mit piɔ̈ɔ̈th. 38Go keek yɔ̈ɔ̈k ë wëëtde yic an, “Yak röt tiit ë kɔc ee löŋ gɔ̈ɔ̈r, kɔc nhiaar cath ke ke ceŋ lupɔɔ bär ku nhiaarkï thiëc ë thuk yiic, 39ku nhiaarkï tëpiɛth ee rëër ë ɣööt ke Nhialic yiic, ayï tëpiɛth ee rëër ë akööl ke këcamdït: 40kek ee kɔc ë ɣööt ke diëër thum cam, agokï kërɛɛcden aa thiaan në luɔi ee kek lɔ̈ŋ tɔ bäär, kɔckë abïk këtuc gök yïk.
Miɔ̈c de Tiiŋ Thuööm
(Luk 21:1-4)
41Na wën, ke nyuc piny të nu kën ee käŋ juaar thïn ë Luaŋdïtic, ku jɔ daai të cuɛtë kut ë kɔc wëu ë kën ee käŋ juaar thïnic: go kɔc juëc kɔc cï bäny gokï wëu juëc cuat thïn. 42Na wën, ke tiiŋ tök bɔ̈ tiiŋ thuööm kuany nyin, bïï ku cuɛt kathiiakäŋ thïn kaarou, të mɛtë keyiic, abïk ciët milim tök. 43Go kɔckɛn ë piööcë cɔɔl, ku yöök keek an, “Wek yɔ̈ɔ̈k ëyic an, tiiŋ thuööm kuany nyinë acï kajuëc cuat thïn, awär kɔc kedhie kɔc ë käŋ cuat ë kën ee käŋ juaar thïnic: 44keek acïk käŋ cuat thïn në kuɛthden, ku yen ee tiiŋë, në däŋ dɛk en ë käŋ acï kake cuat thïn kedhie, ayï kë duëër en ke pïïr kedhie.”
Markert nå:
Mak 12: dip-JPB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible in Jieeng de Padang © The Bible Society in South Sudan, 2011.