Иуан 4
4
ЯПЛӀЭНЭРЭШЪХЬ
Исус Самарие бзылъфыгъэм зэрэдэгущыӀагъэр
1Иуан игъогу рыкӀохэрэм анахьи Исус игъогу рыкӀохэрэр нахьыбэ хъухэу, Исус ахэр зэриумэхъыщтыгъэхэм икъэбар фарисейхэм зэранэсыгъэр Исус къышӀагъ. 2(Ау ахэр зыумэхъыщтыгъэхэр Исус игъогу рыкӀохэрэр арыгъэ, ежь Исус арыгъэп.) 3А къэбарыр Исус зызэхехым, Иудей хэкум икӀи, Галилей хэкум кӀожьыгъэ.
4Аущтэу Самарие хэкум#4:4 Самарие хэкур – Иудей хэкумрэ Галилей хэкумрэ азыфагу дэлъ хэкур ары. Джуртхэмрэ самарие цӀыфхэмрэ яхабзэхэри ядинхэри зэрэзэфэшъхьафхэм пае, зэпыищтыгъэх. пхырыкӀын фаеу хъугъэ. 5Исус кӀозэ, Самарие хэкум ит къалэу Сихар нэсыгъ; а къалэр Якъубэ ыкъо Юсыф ритыгъэгъэ чӀыгу Ӏахьым#4:5 чӀыгу Ӏахьыр – еплъ Пегъымбар Мусэ апэрэ тхылъэу ытхыгъэм (УблапӀэм) 48:22. пэгъунэгъугъ. 6А чӀыпӀэм Якъубэ ипсынэ итыгъ. Исус гъогууанэм ыгъэпшъыгъэти, псынэм дэжь тӀысыгъэ. Сыхьатыр пшӀыкӀутӀум дэжьыгъ.#4:6 сыхьатыр пшӀыкӀутӀум дэжьыгъ – зытырахыгъэ алыджыбзэм зэритыр «яхэнэрэ сыхьат». Ащ къикӀырэр щэджагъор ары.
7Исус псынэм дэжь щысэу самарие бзылъфыгъэ горэ псыхьэ къэкӀуагъ.
– Псы тӀэкӀу сегъашъу, – риӀуагъ Исус а бзылъфыгъэм.
8Джащыгъум Исус игъогу рыкӀохэрэр гъомылэ къащэфынэу къалэм кӀогъагъэх.
9– О уджурт, сэ сы самарие бзылъфыгъ, – къыриӀуагъ бзылъфыгъэм. – Сыдэущтэу псы уезгъэшъонэу укъысэлъэӀушъура? – (Аущтэу зыкӀиӀуагъэр джуртхэмрэ самарие цӀыфхэмрэ зэхахьэщтыгъэхэпти ары.)
10– Тхьэм итын зыфэдэри, «Псы тӀэкӀу сегъашъу» къыозыӀорэр хэтми зыщыщри пшӀэщтыгъэмэ, о ащ уелъэӀущтыгъ, ащи о щыӀэныгъэ къыозытыщт псым уригъашъощтыгъ, – пэгъокӀ ритыжьыгъ Исус.
11– Тхьэматэ, – къыриӀожьыгъ бзылъфыгъэм, – псынэр куу, о псы къызэрипхыни уиӀэп. Ащыгъум а псэу щыӀэныгъэ къысэзытыщтыр тыда къыздипхыщтыр? 12Тятэжъышхоу Якъуб ары мы псынэр къытфэзгъэнагъэр. Ежьыри ыкъохэри мы псым ешъощтыгъэх, ябылымхэри рагъашъощтыгъэх. Ащ нахьи унахь ина о?
13– Мы псым хэт ешъоми, псыфалӀэ лӀэжьыщт, – пэгъокӀ ритыжьыгъ Исус. 14– Ау сэ псэу естырэм ешъорэр ныбжьи псыфалӀэ лӀэжьыщтэп. Сэ псэу естырэр цӀыфым ыгу илъэу, псы лъэшэу къызэрычъ зэпытырэ псынэкӀэчъ фэхъужьыщт; а псыми мыкӀодыжьын щыӀэныгъэ иӀэ ыгъэхъущт.
15– Тхьэматэ, – къыриӀуагъ бзылъфыгъэм, – псыфалӀи сымылӀэжьынэу, псыхьи сыкъэмыкӀожьынэу а псым щыщ къысэт.
16– КӀуи, уилӀ къеджи, къэкӀожь, – риӀуагъ Исус.
17– Сэ лӀы сиӀэп, – къыриӀожьыгъ бзылъфыгъэм.
– Тэрэз, – риӀуагъ Исус бзылъфыгъэм. – ЛӀы зэрэуимыӀэр шъыпкъэу къэпӀуагъ. 18ЛӀитф уиӀагъ, джы уиӀэри о уилӀэп. КъэпӀуагъэр шъыпкъэ.
19– Тхьэматэ, узэрэпегъымбар горэр къэсшӀагъ, – къыриӀожьыгъ бзылъфыгъэм. 20– Тэ тятэжъхэр мы Ӏуашъхьэм Тхьэм щелъэӀущтыгъэх, ау шъо, джуртхэм, шъоӀо Ерусалим арэу Тхьэм узыщелъэӀун фаер.
21– О бзылъфыгъ, – риӀуагъ Исус, – пшӀошъ гъэхъу, мы Ӏуашъхьэми Ерусалими Ты лъапӀэм шъузыщемылъэӀун мафэ къэкӀощт. 22Шъо, самарие цӀыфхэм, Тхьэу шъузэлъэӀурэр шъушӀэрэп, ау тэ Тхьэу тызэлъэӀурэр тэшӀэ, сыда пӀомэ, мы дунаим ицӀыфхэр мыкӀодхэу къэзгъэнэжьырэр джуртхэм ащыщ.
23Исус етӀанэ ыӀуагъ:
– Ты лъапӀэм шъыпкъэу елъэӀухэрэр агу етыгъэу, шъыпкъагъэкӀэ зыщелъэӀурэ мафэр къэсыщт ыкӀи къэсыгъ. Ащ фэдэу елъэӀухэрэр ары Ты лъапӀэм икӀасэхэр. 24Тхьэр псэ, ащ елъэӀухэрэри Тхьэм ы Псэ ЛъапӀэ илъэкӀыкӀи шъыпкъагъэкӀи елъэӀунхэ фае.
25– Мэссихьэу ХристоскӀэ заджэхэрэр къызэрэкӀощтыр сэшӀэ, – къыриӀожьыгъ бзылъфыгъэм. – Ар къызыкӀокӀэ, Ӏоф пстэури къыдгуригъэӀощт.
26– А зыфапӀорэр сэры, джы къыбдэгущыӀэрэр ары, – риӀуагъ Исус.
27Джащыгъум Исус игъогу рыкӀохэрэр къэкӀожьыгъэх. Исус бзылъфыгъэ горэм дэгущыӀэу залъэгъум, агъэшӀэгъуагъ, ары шъхьакӀэ «Сыда узыфаер?» е «Сыда ащ узкӀыдэгущыӀэрэр?» ыӀоу, ахэмэ ащыщ къыӀуагъэп.
28ЕтӀанэ бзылъфыгъэм ипсы къошын къыгъани, къалэм кӀожьи, цӀыфхэм ариӀуагъ:
29– ШъукъакӀу, модэ лӀы горэм сэ сшӀэгъэ пстэури къысиӀожьыгъ. Христосыр ары шъуӀуа?
30Ахэр къалэм къыдэкӀхи, Исус дэжь къэкӀуагъэх.
31Ахэр джыри къэмысхэзэ, игъогу рыкӀохэрэр Исус къелъэӀугъэх:
– Рабби, шхэ.
32Ау Исус ариӀуагъ:
– Шъо шъумышӀэрэ шхын сиӀ.
33Ащ къыхэкӀэу игъогу рыкӀохэрэм, «Зыгорэм шхын къыфихьыгъ шъуӀуа?» аӀуи, зыр адрэм еупчӀыжьыгъ.
34– Сэ сишхын сыкъэзгъэкӀуагъэр зыфаер згъэцэкӀэнри, ащ иӀоф сыухынри ары, – ариӀуагъ Исус ахэмэ. 35– Джыри мэзиплӀыкӀэ хыныгъор къэсыщт, арыба шъуӀорэр? Ау сэ шъосэӀо, шъунапӀэхэр къэшъуӀэтхи, губгъо хьасэхэм шъуяплъ! Лэжьыгъэхэм ягъо къэхъуи, яхыныгъо къэсыгъ. 36Джы лэжьыгъэр къэзыхыжьырэм ифэшъошэ Ӏахь егъотыжьы, мыкӀодыжьын щыӀэныгъэм пае лэжьыгъэр къехыжьы. Аущтэу чылапхъэр зыпхъырэри лэжьыгъэр къэзыхыжьырэри зэдэгушӀощтых. 37Аущтэу «Зым чылапхъэр епхъы, адрэм лэжьыгъэр къехыжьы» зыфаӀорэ гущыӀэр шъыпкъэ мэхъу. 38Шъо шъуздэмыулэугъэ лэжьыгъэр къэшъухыжьынэу шъузгъэкӀуагъ. А лэжьыгъэм нэмыкӀхэр дэулэугъэх, шъо ахэмэ яӀоф шъухэхьагъ.
39А къалэм дэсхэу самарие цӀыфыбэми ИсускӀэ шӀошъхъуныгъэ яӀэ хъугъэ, а бзылъфыгъэр Исус шыхьат фэхъоу, «Сэ сшӀэгъэ пстэури къысиӀуагъ» зэриӀуагъэм пае. 40Аущтэу самарие цӀыфхэр Исус дэжь къызэкӀохэм, адэжь тӀэкӀурэ щыӀэнэу Исус къелъэӀугъэх. Исус ахэмэ адэжь мэфитӀукӀэ къэнагъ. 41Исус игущыӀэхэр зызэхаххэм, ежьыркӀэ шӀошъхъуныгъэ зиӀэ хъугъэхэр нахьи нахьыбэ хъугъэх.
42– Джы о къэпӀуагъэхэм язакъоп шӀошъхъуныгъэ тиӀэ зыгъэхъугъэхэр, – раӀуагъ ахэмэ бзылъфыгъэм. – Ау тэ ттхьакӀумэхэмкӀэ ежь къыӀохэрэр зэхэтхыгъ, дунаим ицӀыфхэр мыкӀодхэу къэзгъэнэжьырэри шъыпкъэмкӀэ зэрэежьырыр къэтшӀагъ.
Исус пачъыхьэм фэлэжьэрэ Ӏэшъхьэтетым ыкъо зэригъэхъужьыгъэр
(Маттэ 8:5-13; Лука 7:1-10)
43А мэфитӀум ыуж Исус а чӀыпӀэм икӀи, Галилей хэкум кӀуагъэ; 44сыда пӀомэ, пегъымбарым янэ икъалэ дэсхэм лъытэныгъэ зэрэфамышӀырэр ежь Исус къыушыхьатыгъагъ. 45ЕтӀанэ Галилей хэкум Исус къызэкӀом, ащ ис цӀыфхэм къырагъэблэгъагъ, сыда пӀомэ, мэфэкӀ мэфэшхом ахэр Ерусалим щыӀагъэхэти, а мафэхэм Исус ащ дэжьым щишӀэгъэ пстэури алъэгъугъагъ.
46Джаущтэу Галилей хэкум ит къуаджэу Канэ Исус джыри къэкӀожьыгъ. А къуаджэр ары псыр сэнэпс зыщишӀыгъагъэр. Пачъыхьэм фэлэжьэрэ Ӏэшъхьэтет#4:46 пачъыхьэм фэлэжьэрэ Ӏэшъхьэтет – зыфэлажьэщтыгъэр Ирод Антипэу Галилей хэкумрэ Перей хэкумрэ япщ ары. горэ къалэу Капернаум дэсыгъ. Ащ ыкъо сымаджэу щылъыгъ. 47Исус Иудеим къикӀи, Галилей къызэрэкӀуагъэр а Ӏэшъхьэтетым зызэхехым, Исус дэжь къэкӀуагъ. – КъыздакӀуи, скъо сымаджэу лӀэным нэсыгъэр сфэгъэхъужь, – къелъэӀугъ.
48– Нэшэнэ гъэшӀэгъонхэмрэ Ӏофышхо гъэшӀэгъонхэмрэ шъумылъэгъухэмэ, шӀошъхъуныгъэ шъуиӀэ хъущтэп, – риӀуагъ Исус.
49– Тхьэматэ, сэ скъо мылӀэзэ къакӀуи, ыдэжь ех, – къыриӀожьыгъ пачъыхьэм фэлажьэрэ Ӏэшъхьэтетым Исус.
50– КӀожь, пкъо псэущт, – риӀуагъ Исус. Исус риӀогъэ гущыӀэхэр а лӀым ышӀошъ хъуи, кӀожьыгъэ. 51Ӏэшъхьэтетыр гъогум тетызэ, иунэӀутхэр къыпэгъокӀыхи, къыраӀуагъ:
– Пкъо псау.
52– Сыхьатыр тхьапшыхэм адэжь хъужьынэу къызиублагъэр? – яупчӀыгъ Ӏэшъхьэтетыр.
– Тыгъуасэ щэджэгъоужым сыхьатыр зым дэжь#4:52 сыхьатыр зым дэжь – зытырахыгъэ алыджыбзэм зэритыр «яблэнэрэ сыхьат». Ащ къикӀырэр щэджэгъоужым сыхьатыр зыр ары. плъыр-стырыр хэкӀыжьыгъ, – къыраӀожьыгъ ахэмэ.
53Ар къызаӀом, кӀалэм ятэ къышӀагъ плъыр-стырыр ыкъо зыщыхэкӀыжьыгъэ уахътэр «Пкъо псэущт» Исус къызщыриӀогъэгъэ сыхьат дэдэм зэрэтефагъэр. Джащыгъум Ӏэшъхьэтетыми зэкӀэ иунагъуи шӀошъхъуныгъэ яӀэ хъугъэ.
54Исус Иудеим къикӀи, Галилей къызэкӀом, джары ятӀонэрэ нэшэнэ гъэшӀэгъонэу къыгъэлъэгъуагъэр.
Markert nå:
Иуан 4: AdgNT14
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Институт перевода Библии, 1991, 1992, 2014. Стокгольм
