Иуан 5
5
ЯТФЭНЭРЭШЪХЬ
Псыхъурэе зыгъэпскӀыпӀэм дэжь Исус лӀы горэ зэрэщигъэхъужьыгъэр
1Ащ нэужым джурт мэфэкӀ мэфэшхо щыӀагъ, Исуси Ерусалим къэкӀуагъ. 2Ерусалим Мэл Къэлапчъ зыцӀэм дэжь псыхъурэе зыгъэпскӀыпӀэ горэ, джуртыбзэкӀэ Бет-Хьазд ыцӀэу, дэт. Шъхьэ зытелъ пкъэу къэлэпчъитф а зыгъэпскӀыпӀэм иӀ. 3А чӀыпӀэм сымэджэ Ӏаджи чӀэлъыгъ, нэшъуи, лъащи, зыӀэпкъ-лъэпкъ узым зэкӀиубытагъи. Ахэр псым зыкъыгъэхъыеным ежэщтыгъэх; 4сыда пӀомэ, Зиусхьаным имэлэӀич загъорэ а зыгъэпскӀыпӀэм хахьэти, псыр къыгъэхъыещтыгъ. Псыр къызыхъыекӀэ, апэу ащ хэхьагъэр сыд уз иӀэми хъужьыщтыгъ. 5Илъэс щэкӀырэ ирэ сымэджэгъэ лӀы горэ а сымаджэхэм ахэлъыгъ. 6Исус ар щылъэу зелъэгъум, бэ шӀагъэу зэрэсымаджэр ешӀэти, еупчӀыгъ:
– Ухъужьынэу уфая?
7– Тхьэматэ, – къыриӀожьыгъ сымаджэм, – псыр зыхъыекӀэ, зыгъэпскӀыпӀэм сыхэзгъэхьан гъусэ сиӀэп. Сэ сыкӀо къэс, сапэ нэмыкӀ горэ псым хэхьэ.
8– Къэтэдж, уипӀуаблэ къашти, къэкӀухь, – риӀуагъ Исус.
9Исус ар къызэреӀоу, а лӀыр хъужьыгъэ. ИпӀуаблэ къыштэжьи, къыкӀухьагъ. Ар зыхъугъэр шэмбэт мэфагъ#5:9 шэмбэт мафэр – джуртхэм ямэфэ лъапӀ ары. А мафэм хэти Ӏоф ышӀэн фитэп.. 10Арыти, джуртмэ а лӀэу хъужьыгъэм раӀуагъ:
– Непэ шэмбэт маф, хабзэкӀэ уипӀуаблэ пштэжьы хъущтэп.
11– Сэ сызгъэхъужьыгъэм «УипӀуаблэ къашти, къэкӀухь» къысиӀуагъ, – къариӀожьыгъ а лӀым.
12– «УипӀуаблэ къашти, къэкӀухь» къыозыӀуагъэр хэт щыщ? – еупчӀыгъэх ахэр.
13Ау лӀэу хъужьыгъэм зыгъэхъужьыгъэр зыщыщыр ышӀэщтыгъэп; сыда пӀомэ, а чӀыпӀэм цӀыф купышхо щыӀагъэти, Исус ӀукӀыжьыгъэхагъ.
14Ащ нэужым Исус а лӀым Тхьэм иунэшхо щыӀукӀи, риӀуагъ:
– Джы дэгъоу ухъужьыгъ. Нахь Ӏае къыомыхъулӀэным пае, псэкӀод умышӀэжь.
15А лӀыр ӀукӀыжьи, джуртмэ адэжь кӀуи, зыгъэхъужьыгъэр зэрэ Исусыр ариӀотэжьыгъ. 16Шэмбэт мафэм ащ фэдэ Ӏофхэр зэришӀэхэрэм пае, джуртхэм Исус къин рагъэщэчэу аублагъ, аукӀынэуи ыуж ихьагъэх.
17– Джы къызнэсыгъэм ся Тэ Ӏоф ешӀэ, сэри Ӏоф сэшӀэ, – ариӀуагъ Исус ахэмэ.
18Ащ пае джуртхэм Исус аукӀынэу нахьи нахь лъэшэу ыуж итыгъэх. ЬӀуж зыкӀитыгъэхэр шэмбэт мафэм яхабзэкӀэ мыхъущтыр Исус зэришӀагъэм имызакъоу, Тхьэм зыфигъадэу, Тхьэр ежь я Тэу зэриӀуагъэри ары.
Къо лъапӀэм иӀэ тетыгъор
19– Шъыпкъэ дэдэр шъосэӀо, – ариӀуагъ Исус ахэмэ, – ежь-ежьырэу Къо лъапӀэм зи ыгъэцэкӀэн ылъэкӀыщтэп; Ты лъапӀэм ыгъэцакӀэу ылъэгъурэм нэмыкӀ зи ыгъэцэкӀэн ылъэкӀыщтэп. Ты лъапӀэм сыд ыгъэцакӀэми, ы Къуи ар егъэцакӀэ. 20Сыда пӀомэ, Ты лъапӀэм ежь ы Къо шӀу елъэгъу. Ежь ыгъэцакӀэрэ пстэури ы Къо къырегъэлъэгъу, жъугъэшӀэгъоным паий, мы Ӏофхэм анахьи нахь Ӏофышхохэр ы Къо ригъэлъэгъущтых. 21Аущтэу лӀагъэхэр Ты лъапӀэм къыгъэтэджыжьхэзэ къызэригъэпсэужьхэрэм фэдэу, ы Къуи ежь зыфэе цӀыфхэр къегъэпсэужьых. 22Ты лъапӀэм зыми хьыкум тыришӀыхьэрэп, ау хьыкум шӀын Ӏоф пстэури ы Къо къыфигъэзагъ, 23цӀыф пстэуми Ты лъапӀэм лъытэныгъэ зэрэфашӀырэм фэдэу, ы Къуи лъытэныгъэ фашӀыным пае. Ы Къо лъытэныгъэ фэзымышӀырэм Ты лъапӀэу ар къэзгъэкӀуагъэми лъытэныгъэ фимышӀэу мэхъу.
24– Шъыпкъэ дэдэр шъосэӀо, сэ сигущыӀэхэм ядэӀоу, сыкъэзгъэкӀуагъэмкӀэ шӀошъхъуныгъэ зиӀэ хъурэм мыкӀодыжьын щыӀэныгъэ иӀэ хъугъэ. Тхьэм ар ыгъэмысэщтэп, ау ар лӀэныгъэм ӀэкӀэкӀыжьи, щыӀэныгъэм ӀэкӀэхьагъ. 25Шъыпкъэ дэдэр шъосэӀо, лӀагъэмэ Тхьэм ы Къо ымакъэ зэхахынышъ, ежь едэӀухэрэм щыӀэныгъэ зыщагъотыщт мафэр къэкӀощт ыкӀи къэкӀогъах. 26Сыда пӀомэ, Ты лъапӀэм цӀыфхэм щыӀэныгъэ зэраритырэм фэдэу, ежь ы Къуи цӀыфхэм щыӀэныгъэ аритынэу тетыгъо къыритыгъ. 27Сэ ЦӀыф Лъэпкъым сызэры Къом пае, цӀыфхэм хьыкум атесшӀыхьанэу Ты лъапӀэм тетыгъо къыситыгъ.
28– Ар шъумыгъэшӀагъо, сыда пӀомэ, къэхэм ачӀэлъ пстэуми Тхьэм ы Къо ымакъэ зэхахынышъ, къэхэм къазщычӀэкӀыжьыщт мафэр къэкӀощт. 29ШӀу зышӀагъэхэр псэунхэу къэтэджыжьыщтых, ер зышӀагъэхэри ямысагъэ фэшъуашэр агъотыжьынэу къэтэджыжьыщтых. 30Сэр-сэрэу зи сшӀэн слъэкӀыщтэп, ау Тхьэм къыӀоу зэрэзэхэсхырэм фэдэу, цӀыфмэ хьыкум атесэшӀыхьэ; хьыкумэу сэ атесшӀыхьэрэри зафэ, сыда пӀомэ, сэ сызыфаем ыуж симытэу, сэ сыкъэзгъэкӀуагъэр зыфаер згъэцэкӀэным ыуж сит.
Исус шыхьат фэхъухэрэр
31– Сэр-сэрэу шыхьат сызфэхъужьмэ, сишыхьатныгъэ хъущтэп, 32ау нэмыкӀ горэ шыхьат къысфэхъунэу щыӀ. Ащ сэ къысэхьылӀагъэу къыушыхьатырэр зэрэшъыпкъэр сэшӀэ.
33– Шъо лӀыкӀохэр Иуан фэжъугъэкӀуагъэх, ежьыри шъыпкъэм шыхьат фэхъугъ. 34ЦӀыф горэ шыхьат къысфэхъунэу сищыкӀагъэп, ау шъо шъумыкӀодэу Тхьэм шъукъыгъэнэжьыным пае, ар къэсэӀо. 35Иуан остыгъэу къэнэфырэм фэдагъ. Ащ инэфынэ тӀэкӀурэ шъукӀэгушӀунэу шъуфэягъ.
36– Иуан шыхьатэу къысфишӀыгъэм нахьи нахь шыхьатышхо сиӀ. Сэ згъэцэкӀэн фэе Ӏофхэу Ты лъапӀэм спшъэ къырилъхьагъэхэр сэгъэцакӀэх. А Ӏофхэр ары Ты лъапӀэм сыкъызэригъэкӀуагъэмкӀэ шыхьат къысфэхъухэрэр. 37Ты лъапӀэу сыкъэзгъэкӀуагъэр ежь ышъхьэкӀэ шыхьат къысфэхъугъ. Ащ ымакъэ егъашӀэми зэхэшъухыгъэп, ынапи шъулъэгъугъэп. 38Ащ сыкъызэригъэкӀуагъэмкӀэ шӀошъхъуныгъэ зэрэшъуимыӀэм пае, ащ игущыӀэхэр шъугухэм арылъ зэпытхэп. 39Тхьэм игущыӀэ тхыгъэхэм мыкӀодыжьын щыӀэныгъэ ахэжъугъотэн шъушӀошӀэу, лъэшэу шъуахэплъэ. Ахэр ары шыхьат къысфэхъухэрэр. 40Ау щытми, а щыӀэныгъэр шъуиӀэ хъуным пае, садэжь шъукъэкӀонэу шъуфаеп.
41– ЦӀыфхэр къысщытхъунхэм ыуж ситэп. 42Ау шъо шъусэшӀэ: Тхьэм ишӀулъэгъу шъо шъугухэм арылъэп. 43Сэ ся Тэ ыцӀэкӀэ сыкъэкӀуагъ, ау шъо сышъуштэрэп; ау нэмыкӀ горэ ежь ыцӀэкӀэ къакӀомэ, ар шъуштэщт. 44Тхьэ закъом дэжь къикӀырэ щытхъум ыуж шъуимытэу, зыр адрэм щэтхъужьмэ, сыдэущтэу шӀошъхъуныгъэ шъуиӀэ хъуна?
45– Ты лъапӀэм ыпашъхьэ шъущызгъэмысэнкӀэ шъумыгугъ. Шъо шъузгъэмысэщтыр пегъымбар Мусэу шъузыщыгугъырэр ары. 46МусэкӀэ шӀошъхъуныгъэ шъуиӀагъэмэ, сэркӀи шӀошъхъуныгъэ шъуиӀэщтыгъ, сыда пӀомэ, Мусэ зигугъу ышӀыгъэр сэры. 47Ащ ытхыгъэхэр шъушӀошъ зымыхъукӀэ, сэ сӀохэрэр сыдэущтэу шъушӀошъ хъуных?
Markert nå:
Иуан 5: AdgNT14
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Институт перевода Библии, 1991, 1992, 2014. Стокгольм
