मत्ती 15
15
डायडायान हिकवोण
(मरकुस 7:1-13)
1तेवी यरूशलेम हेयराम रेन थोड़ाक फरिसी एने देरेमगुरू यीशुन आहने आवीन केतेह, 2“तारा चेला डायडायान रितीह काहा नाह पालते? एने बिगेर आथ दुयेल रूटो खातेह!”
3यीशु ताह जापाप आप्यो, “तुमू बी तुमरी रितीह मान्नेन केरता काहा बोगवानान उकुमाह टालतेह? 4काहाकाय बोगवान कियेल हे, ‘तार आबाख एने तार आईख ने मान मिलज्यो, एने जो कुण आबाख नाहते आईख खाराब केय तो माराय जाय।’#निर्गमन 20:12; 21:17; व्यवस्था 5:16; लेव्यवस्था 20:9 5पुण तुमू केतेह केदी एगदो तान आबाख नाहते आईख केय, ‘जो काय तुवाह माहु फाय रेन जुड़तालो, तो मी बोगवानाह बेट चेड़ाव दियेल हे,’ 6ते तो तान आबाख ने मान नाह मेलेत।#15:6 थोड़ाक लेख माय तान आहख आबोख लिखेल हे तानकेरीन तुमरी रितीन केरता बोगवानान वचनाह टाल देनाह। 7एय कोपट्या! यशाया जाणकार तुमरा बाराम ज्यी जाणाव ठिक किरेल हे!
8“न्या माणहे, ओठा केरीन ते मारो मान मेलतेह,
पुण न्यान मोन माहु हेऱ्यो रेन सेटो रिथे।
9एने न्या उदडुस मार नावान बोक्ती केरतेह,
काहाकाय माणहान नेमाह बोगवानान नेम हे केरीन हिकाड़तेह!”
एठी केरनार वातु
(मरकुस 7:14-23)
10तेवी यीशु माणहाह आहने हादिन केयो, “हुमलो एने सोमजो! 11जो मुया माय जाथे तो माणहाह एठो नाह किरेत, पुण जो मुयाम रेन निकलेह, तोच माणहाह एठो किरेह।”
12तेवी चेला आहने आवीन केया, “तुवाह मालुम हे काय तारी ज्यी वात होमलीन फरिसी नाराज एय गीया?”
13तो चेलाह केयो, “एकेक जाड़ जाह मार हेरगावालो आबोख नाह लागाड़ेल सोतो, ताह तु मुला बेलुच उखाल देय। 14#लुका 6:39ताह जाणे दिवो, ता आंदलाह वाट देखाड़नारे हेते; एने केदी आंदलो आंदलाह वाट देखाड़ी, ते दुयू बी खाडाम जाय पोड़ती।”
15ज्य होमलीन पतरस ताह केयो, “ज्यो किस्सो आमुह सोमजाड़ दे।”
16तो चेलाह केयो, “काय तुमू बी नासमज हेते। 17काय तुमू नाह जाणते, जो काय मुयाम रेन पेटाम जाथे, तो आगणेन द्वारे बाहेर निकेल जाथे। 18#मत्ती 12:34पुण जो काय माणहान मुयाम रेन निकलेह, तो मोनाम रेन निकलेह एने तोच माणहाह एठो केरने। 19काहाकाय खाराब विचार, खुन, चोरी, सिनालो, दिहरा सिनालाम फासाड़ने, जुठो पुरावो, एने चिहटा मोना माय रेन निकेलने। 20ज्योच हे जो माणहाह एठो केरने, पुण बिगेर आथ दुयेल रूटो खाणु तो माणहाह एठो नाह किरेत।”
बायकुन बुरहो
(मरकुस 7:24-30)
21यीशु तारीन निकलीन सुर एने सेदान देसा माय जात रिनो। 22ता देसा माय रेणार एक कनानी जातीन बायकु रेड़तेन ता फाय आवीन आयड़ीन केयी, “एय मालीक! दाऊदान सोरा, यीशु। मार पोर किव केर, काहाकाय मार सोरीह बुतड़ो जुलूम विताड़ने बाजरिनोह।”
23पुण यीशु तीह कायच जापाप नाह आप्यो। तेवी तान चेला आवीन ताह केया, “तीह मोकेल दे, काहाकाय ती आमरे पासाण आयेड़तेन आवणे बाजरेनीह।”
24यीशु जापाप आप्यो, “इस्राएलान गेराणान टाकायेल मेंड्राह सोड़ीन, बोगवान माहु दिहरा कुणीस फाय नाह मोकलेल सोतो।”
25पुण ती बायकु आवी एने यीशुह नमस्कार केरीन केणे बाज गियी, “एय मालीक, मारी मोदेक केर।”
26यीशु तीह जापाप आप्यो, “सोरान रूटो चिताह आपणे हाजो नाह सोतो।”
27ती केयी, “ज्य खेरीच हे मालीक, पुण चिता बी ते मालक्यान खाणे बुखेत टेबला पोर रेन उसटालो बुंदे पुड़ेह ते, विसीन खाणु ते खोरा।”
28ज्य होमलीन यीशु तीह जापाप आप्यो, “एय बाय, तारो बुरहो मोटलो हे! जिहकेरीन तु हुदेह तिहेस केरीन तार केरता एय।” एने तीन सोरी चालोस हुदरी गियी।
यीशु मोकतास दुखाऱ्या हुदारने
29ओवतो यीशु ता रेन निकलीन गेलीलान देरीयान आहने आवो, एने एक बोयड़ा पोर चेड़ीन बोह गीयो। 30तेवी माणहे यीशु फाय लेंगड़ाह, आंदलाह, पांगलाह मुकाह, एने दुखाऱ्या माणहाह बी लावीन यीशुन पाया हेऱ्या मेल देना, एने यीशु ता आखाह हुदार दिनो। 31मुका बोलतेह, एने पांगला हुदेरतेह, एने लेंगड़ा चालतेह, एने आंदला देखतेह, ज्य आखो देखीन माणहे बोंगलाय गीया, एने इस्राएलान बोगवानान बोड़ाय केऱ्या।
यीशु चार एजार माणहाह खाणो खावड़ावणे
(मरकुस 8:1-10)
32तेवी यीशु तान चेलाह हादिन केयो, “माहु न्या माणहा पोर किव आवेह, काहाकाय न्या तीन दिह रेन मार हेऱ्या हेते, एने न्या फाय खाणेन केरता कायच नाह सोतो। मी न्याह बुखल्योच मोकेलने नाह होदेत, नाह ते बुखल्या न्या वाटेच लेवायीन रेय जाती।”
33चेला ताह फुशा, “आपुह ज्या उजाड़ी माय ओला रोटा कारीन जुड़ती, काय आपु ओला होवटा माणहाह खावाडीन आफराव हु?”
34यीशु ताह फुशो, “तुमू फाय कोलाक रोटा हेते।” ता जापाप आप्या, “हात रोटा, एने थोड़ाक आतल्या मासा बी हेते।”
35तेवी यीशु माणहाह बुई पोर बोहणे केयो। 36एने तो ता हात रोटा, एने मासाह आथाम लेन हेरगान उगे देखीन बोगवानान दन्यवाद केरीन मुड्यो, एने तान चेलाह आपते गीयो; एने चेला माणहाह वाट देना। 37इहकेरीन आखा माणहे खाईन आफरी गीया, एने चेला उगरेल रोटान टुकड़ा हात टोपला बोरीन विशा। 38खाणारे बायकुह एने सोराह सोड़ीन चार एजार एदमीच एता।
39तेवी यीशु माणहाह मोकेल देन डोंडह्या पोर चेड़ीन बोह गीयो, एने मगदन देसान एद्दी माय आवो।
Markert nå:
मत्ती 15: NTNii2020
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
