1 Musa 16
16
Si Hagar dekket si Ismael
1Si Sara sinibages si Abram laju madèng lot dukakna. Tapi lot ngo sada kalak hambana i Mesir nai, sada simerbaju simergerar si Hagar. 2Idokken si Sara mo taba si Abram, “Oda iduè Jahowa aku menubuhken dukak. Kerna i lotien mo rebbak meddem kono dekket hambangku èn. Tah bakunè ndorok ia menubuhken dukak lako bangku.” Iuèi si Abram ngo pendokken si Sara i. 3Bagi mo iberèken si Sara taba si Abram si Hagar mahan cimbangna. Tikanna i enggo mo sipuluh tahun si Abram i tanoh Kanaan. 4Nai rebbak meddem mo si Abram dekket si Hagar, nai mengkandong mo daberru i. Tapi ibettoh si Hagar kessa enggo mengkandong ia, gabè jukkat mo ia, janah oda nè isangko si Sara.
5Nai nina si Sara mo taba si Abram, “Enggo kuberèken hambangku si Hagar bamu, janah ibettoh kessa enggo mengkandong ia gabè oda nè isangko aku. Salahmu ngo i. Jahowa mo maing putusen simasa èn taba ko dekket aku.”
6Ialoi si Abram mo, “Selloh, hambamu ngo ia janah merkuasa ngo kono bana; baing mo bana bakunè dok atèmu.” Nai idersa si Sara mo si Hagar, gabè mburo mo ia.
7Idahi malaèkat Jahowa mo si Hagar i gembar laè mata-mata i gurun pasir, i dalan lako mi gurun Sur. 8Nina malaèkat i mo, “Alè Hagar hamba si Sara, idikè nai ngo ko, janah laus mikè?”
Ialoi si Hagar mo, “Mburo ngo aku bai si Sara indukku i nai.”
9Nai nina malaèkat i mo, “Balik mo ko mendahisa, janah kebbasi mo ia.” 10Janah nina malaèkat i dèng ma, “Kuberèken pè bamu mbuè pinempar isè poda terbaingsa memilang pinemparmu. 11Oda ndekkah nè menubuhken anak mo ko; baing mo gerarna si Ismael. Kerna enggo idengkoh Jahowa tangismu. 12Tapi ukum anakmu, bagè pernggelluh kuda perjumbalang ngo ia; ialo ngo gennep jelma, janah karina jelma mengalosa. Bagè bengkiang terpistak mo ia bai karina kaka-anggina nai.”
13Kuso-kuso mo si Hagar ibagasen penarihenna, “Tuhu ngo aku ndia enggo mengidah Dèbata simemperdatèken aku?” Nai igerari ia mo Jahowa sienggo mengerana i tabasa, “Dèbata Simemperdatèken.” 14Kumarna i ngo asa idokken dèba sumur sinikellang-kellang Kades dekket Bered i, “SumurNa Singgelluh i Memperdatèken Aku.”
15 #
Gal. 4:22
Nai itubuhken si Hagar mo anak, janah igerari si Abram bapana i mo si Ismael. 16Tikanna i merumur ualuhpuluh ennem tahun mo si Abram.
Markert nå:
1 Musa 16: LAIBTD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)