JƆN 18
18
Tiaa Yesu Houma
(Mat 26.47-56; Mak 14.43-50; Luk 22.47-53)
1Kia Yesu i kpɔyɔni a Ngewɔ vɛlilei ji, tia ngi gaalopoisia ti gbuɛilɔ yeehindei na ti li ti lɛmbui na huvo ta toli a Kidlɔn, ti li tuhani gbaala yila hu i yeehindei na. 2Judas na i Yesu veni i yɛ yeehindei na gɔɔlɔ ajifa Yesu tia ngi gaalopoisia ti yɛlɔ a gomɛ na pɛɛpɛ. 3Famia Judas i Roma sojangaa majɔɛilɔ kɛɛ Saagbuablaa Waawaisia tia Farisiisia ti polisisia tia tieni ti li na a lamboisia kɛɛ hɛmuisia kɛɛ kɔhakangaa. 4Yesu i yɛ hindei gbi gɔɔlɔ i yɛ wama ngi wiema, faale i wɛilɔ ti gama i ti mɔli yɛ, “Ye lɔ wu ngi gɔkɔlima?”
5Ti kpɛmboilɔ tɛɛ, “Yesu Nasalɛtimɔi.”
Kɛ Yesu i ndenga ti ma yɛ, “Ta lɔ a nge.”
Judas na i ngi veni i yɛ ti lia lɔ. 6Kia Yesu i ndeni ti ma yɛ, “Tamia a nge,” ti gbi ti yamɛilɔ a wooma wee ti gula ndɔmɛi. 7I gbɔma ti mɔlilɔ yɛ, “Ye lɔ wu ngi gɔkɔlima?”
Kɛ ti ndenga tɛɛ, “Yesu Nasalɛtimɔi.”
8Yesu i ndeilɔ ti ma yɛ, “Ngi wilanga a ndela wu ma kɛ tamia a nge. Ina wu nya lɔ gɔkɔlima, a gbe jisia ma ti li.” 9(I ji leilɔ aako njɛpɛi na i wie i yɛ ndeni yɛ, “Nasia bi ti veni nya wɛ ngii yeengila bɛɛ loni hu.”)
10Kɔbowei i yɛlɔ Saimɔn Pita yeya. I ndalɛilɔ nga i Saa Gbuablɛisia ti gulɔmɔi luwɔi ŋɔna la, i ngi yejama wolii lewe na. Yeenduwɔi na laa wɔɔ a Malkɔs. 11#Mat 26.39; Mak 14.36; Luk 22.42 Yesu ndeilɔ Pita ma yɛ, “Bi gɔ-bowɛi yama yeetei hu. Bi langɔe la kɛ ngɛɛ luma kpalɛi na aa la nya ma nya Kɛkɛ i hugbatɛnga nya va?”
Yesu Lɔ Loma Anas Gulɔ
12Kɛ Roma sojeisia kɛɛ ti mahumɔi kɛɛ Juuisia ti polisisia ti Yesu hounga ti ngi yili. 13Ti liilɔ a ngie Anas gama. Anas mblɛi mia wɔɔ a Kayafasi na Saagbuablɛisia ti gulɔmɔ wai yɛla foi na hu. 14#Jɔn 11.49-50 Kayafasi ji mia i yɛ nɛmahulewe veni Juuisia wɛ yɛ mahoungɔe numu yila i haa numui kpɛlɛɛ va.
Pita Lɔ Mawalima Yesu Hinda Ma
(Mat 26.69-70; Mak 14.66-68; Luk 22.55-57)
15Saimɔn Pita kɛɛ kaalopo weka yila ti toilɔ Yesu wooma. Jifa kaalopo wekei ji tia Saagbuablɛisia ti gulɔmɔ wai ti gɔngɔ yɛla ma i wuailɔ Saagbuablɛisia ti gulɔmɔ wai gatei hu tia Yesu-ni. 16Pita ta i lo looni ngitii ya katei laa. Faale kaalopoi na tia Saagbuablɛisia ti gulɔmɔ wai ti gɔngɔ yɛla ma i gbuailɔ gbɔma i yɛpɛ nyapoi na gama i yɛ katei gbɔwu, i wuaa a Pita. 17Nyapoi na i yɛ katei gbɔwu i Pita mɔlilɔ yɛ, “Taamɔi ji gaalopoisia yeengila yaa a bia bɛɛ?” Pita kpɛmboilɔ yɛ, “Ngi gaalopo yaa a nge.”
18Jifa kɔlɛi i yɛ wa, Saagbuablɛisia ti gulɔmɔ wai bɔilopoisia tia polisisia ti kpunyɛ yɔmbui lailɔ, ti lo ti kaala ta gɛwo.
Pita bɛɛ i liilɔ, i lo ti lia, a gɛwo.
Saagbuablɛisia Ti Gulɔmɔ Wai Lɔ Yesu Mɔlimɔlima
(Mat 26.59-66; Mak 14.55-64; Luk 22.66-71)
19Kɛ Saagbuablɛisia ti gulɔmɔ wai i Yesu mɔlimɔlinga kɔlooni ngi gaalopoisia ma kɛɛ kaai na i yɛ nungaa gaa la. 20Yesu i kpɛmboilɔ yɛ, “Watii gbi nga yɛpɛ wɔɔ nungaa gama fofo hu lɔ; watii gbi nga nungaa gaa wɔɔ komɛ wɛleisia bu lɔ kɛɛ Ngewɔ Wɛlei, mia nungaa gbi ta yandɔɔ na; wɔɔ gba ngii yaa njɛpɛ gbi leni ndɔwuma. 21Gbɛe bi nya mɔlima? Nasia ti nya woo mɛninga, ti mɔli gbɔɔ ngi ndeni ti ma; ti kɔɔlɔ gbɔɔ ngi ndeni.”
22Kia Yesu i ji leni, kɛ polisi nasia ti yɛ looni ngi gbla yeengila i ngi baahu gbolɛnga yɛ, “Gbɛe ba yɛpɛ hii Saagbuablɛisia ti gulɔmɔ wai gama?”
23Yesu i ndeilɔ ngi ma yɛ, “Ina ngi njia nyamu lɔ lenga, hugɛ lɛ a numui kpɛlɛɛ ti looni bei. Kɛɛ ina na ngi ndeni kama lɔnyangɔe gbɛe hɔɔ bi nya leweni?”
24Kɛ Anas i Yesu venga ti li a ngie Saagbuablɛisia ti gulɔmɔ wai Kayafasi gama, ngi yilingɔ lɔɔ.
Pita Lɔ Gbɔma Mawalima Yesu Hinda Ma
(Mat 26.71-75; Mak 14.69-72; Luk 22.58-62)
25Pita i yɛ loonilɔ lɔɔ a gɛwo. Kɛ nungaa wekei nasia lɛɛnga ti yɛ looni na ti ngi mɔlinga tɛɛ, “Taamɔi ji gaalopoisia yeengila yaa a bie?”
Pita i mawalilɔ yɛ, “Ngi gaalopo yaa a nge.”
26Saagbuablɛisia ti gulɔmɔ wai bɔilopo yila, ngi lenyɔu a taamɔi na Pita i yɛ ngi wolii leweni na, i Pita mɔlilɔ yɛ, “Ngii bi lɔni wua Yesu-ni tuhani gbalei hu?”
27Pita i gbɔma mawalilɔ; kɛ tɛhinɛi i gokolenga ngaama.
Yesu Lɔ Loma Paileti Gulɔ
(Mat 27.1-2,11-14; Mak 15.1-5; Luk 23.1-5)
28A ngenda tɛtei Juuisia ti mahublɛisia ti gbuɛilɔ a Yesu Kayafasi gatei hu ti li a ngie Gɔvinei gatei yeekootii hu. Tia vulii tii wuaani kɔtii goohu ajifa ti longɔ yɛla ti lo sɛwɛsɛwɛya hu Ngewɔ yaama aako ti gu a Tewema Gomɛi yeemɛhɛi mɛla. 29Famia Paileti i liilɔ ti gama yɛ, “Gbɔɔ nyamu le taamɔi ji pienga?”
30Ti kpɛmboilɔ tɛɛ, “Muii yɛ wa a ngie bi gama ina ii hinda nyamu wieni.”
31Paileti ndeilɔ ti ma yɛ, “A li hɔɔ a ngie wua yekpe wu ngi gbɛmbo kia wu nda jawei i na.”
Juuisia ti poteilɔ tɛɛ, “Sawei ii lumani mu wɛ numu hɛlɛva.” 32(Ji i wieilɔ aako njɛpɛi na i wie Yesu i yɛ ndeni kɛva hee yeelasii na i wama piema krɔsii ma.)
33Paileti i yamɛilɔ gbɔma Kotii hu, i pie ti wa a Yesu, i ngi mɔli yɛ, “Bia lɔ Juuisia ti mahɛi a bie?”
34Yesu i kpɛmboilɔ yɛ, “Na bi kɔɔnga kɔloongɔ nya ma ta lɔ i wanga a mɔli ji ɔɔ nungaa wekangaa lɔ ti ji leni bi ma nya va.”
35Paileti i poteilɔ yɛ, “Juumɔ lɔ a nge? Bi gbɔugbɔu bondeisia tia Saagbuablaa Waawaisia mia ti bi venga nya wɛ; gbɔɔ bi pienga?”
36Yesu i kpɛmboilɔ yɛ, “Nya mahayɛi dunyei ji hu mahaya ii le; kiaa dunyei ji hu mahaya mia a nya mahayɛi, nya bɔilopoisia ti yɛ lapilɔ aako taa nya ve Juuisia wɛ; kɛɛ nya mahayɛi ii gbɔkuni dunyei ji hu.”
37Faale Paileti i ngi mɔlilɔ yɛ, “Kɛ maha lɔ hɔɔ a bie?”
Yesu i kpɛmboilɔ yɛ, “Bia vulii lɔ bi ndenga bɛɛ maha lɔ a nge. Sabu yakpei ji va lɔ ngi wani dunyei hu, ti nya le aako ngi tɔnyɛi hugɛ. Numu gbi lekee i tɔnyɛi wooma a nya woo mɛnilɔ.”
Paileti Lɔ Kiti Lewema Yesu Haala Ma
(Mat 27.15-31; Mak 15.6-20; Luk 23.13-25)
38Kɛ Paileti i ngi mɔlinga yɛ, “Gbɔɔ tɔnyɛi le?” Kia Paileti i mɔli ji wuaani, i gbuɛilɔ i li Juuisia gama gbɔma i nde ti ma yɛ, “Ngii sabu gbi lɔni taamɔi ji lɛɛva. 39Kɛɛ kia kɛngɔ la wu jawei hu Kɛ kpeima gbi tewema gomɛi hitea ma, nga gbe lɔ gbama kpindi wɛlɛbu mɔ yila ma. Faale wu longɔ ngi gbe Juuisia ti mahɛi ma wu wɛ?” 40Ti yele waa gulailɔ gbɔma tɛɛ, “Sawo! Taamɔi ji ii le; mu longɔ bi gbe Barabasi ma.” Kapumɔ waa lɔ wɔɔ a Barabasi ji.
Markert nå:
JƆN 18: MENNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mende New Testament © The Bible Society of Sierra Leone, 2002.
