JƆN 20
20
Kamba Wopoi
(Mat 28.1-8; Mak 16.1-8; Luk 24.1-12)
1Sɔndei ma a ngenda tɛtei, pɛiŋ hu i yaa wo, Meri Magdalamɔi i liilɔ kambɛi gama tawao i maleni kɔtii gbuangɔ kambɛi laa. 2Kɛ i ya a piimɛ Saimɔn Pita gama kɛɛ Yesu gaalopo wekei na ngi longɔ yɛla la, i nde ti ma yɛ, “Ti Ndemɔi gbuanga kambɛi hu, tawao muii mia gɔɔ ti ngi langa na.”
3Kɛ Pita tia kaalopo wekei ti ya kambɛi gama. 4Ti veenjɔɔ ti yɛlɔ a wiimɛ kɛɛ kaalopo wekei na i leweilɔ Pita ma, ta yese i foo kambɛi gama. 5I mawɛɛlɔ, i hugbee, i kula golei lɔ i laani na kɛɛ ii wuaani kambɛi goohu. 6Na wooma Saimɔn Pita bɛɛ i foeilɔ, i wuaa kambɛi goohu, i kula golei lɔ laani na, 7kɛɛ yeena ti ngilini Yesu wui ma kotongɔ i laani gba. 8Kɛ kaalopo wekei na ta yese i foni kambɛi gama i wuaanga kohu ta bɛɛ, i tɔ, kɛ i langa la; ( 9ajifa kiahuna tii yɛ Ngewɔ Gɔlɛi na gɔɔ i ndeni yɛ a hiyelɔ huɛɛŋ hee hu.) 10Kɛ kaalopoisia ti yamanga ti yeekuwuhuisia.
Yesu Lɔ Gɛma A Meri Magdalamɔi
(Mat 28.9-10; Mak 16.9-11)
11Meri yɛlɔ looni kambɛi gbla a wɔɔ. I loni wɔɔmaa, i mawɛlɛ, i kambɛi hugbee; 12kɛ i malika fele lɔnga, kula golei i ti ma, ti heini mia Yesu womɛi i yɛ laani na, yeengila i wukɔɛi, yeena i kɔɔyahui. 13Ti ngi mɔlilɔ tɛɛ, “Nyapoi, gbɛe bi wɔɔma?”
Kɛ i ndenga ti ma yɛ, “Ajifa ti nya Lemɔi womɛi wumbunga, tawao ngii mia gɔɔ ti ngi langa na.”
14Kia i ji leni, i woteilɔ kɛ i Yesu lɔnga i looni kɛɛ ii kɔɔni kɛ Yesu mia. 15Yesu i ngi mɔlilɔ yɛ, “Nyapoi, gbɛe bi wɔɔma? Ye lɔ bi ngi gɔkɔlima?”
Meri ta i yɛ tɔ yɛ katei na yeengengemɔi mia, famia i ndeilɔ ngi ma yɛ, “Kɛkɛ, ina bia lɔ bi ya a ngie, hugɛ a nge mia bi ngi langa na aako ngi li ngi gi wumbu.”
16Yesu i ngi lɛi loliilɔ yɛ, “Meri.” I woteilɔ i nde Yesu ma Hibuyiɛi hu yɛ, “Raboni!” (yeembui lɔ a nya Kaamɔ.)
17Yesu ndeilɔ yɛ, “Baa vɛmbɛ a nge, ajifa ngii yaa lɛni lɛ nya Kɛkɛ gama; kɛɛ li nya ndewengeisia gama bi nde ti ma bɛɛ nyaa lɛma nya Kɛkɛ gama, wua bɛɛ wu Kɛkɛ, nya Yewɔɛi, wua bɛɛ wu Yewɔɛi.”
18Meri Magdalamɔi i liilɔ i nde kaalopoisia ma yɛ, “Ngi Ndemɔi lɔnga;” kɛ i na gbi hugɛnga Yesu i ndeni ngi ma.
Yesu Lɔ Gɛma A Ngi Gaalopoisia
(Mat 28.16-20; Mak 16.14-18; Luk 24.36-49)
19Sɔnde yakpei na yeekpɔkɔi, Yesu gaalopoisia ti pɛlei na gbi gbɔwuilɔ ti yɛ mbu ajifa ta luwa Juuisia ti mahublɛisia ma. Yesu i weilɔ, i lo ti lia, i nde ti ma yɛ, “Ndiilɛli i yɛ wu ma.” 20Kia i ji leni, i ngi lokoisia gɛilɔ a tie kɛɛ ngi gakamɛi. Kɛ kaalopoisia ti goohu i nɛnga ji ti Ndemɔi lɔni. 21Yesu i ndeilɔ gbɔma ti ma yɛ, “Ndiilɛli i yɛ wu ma. Kia Kɛkɛi i nya loni, hii ngi wua bɛɛ loma.” 22Kia i ji leni, i fɛfɛi wuilɔ ti ma yɛ, “A Ngewɔ Yafei majɔɔ. 23#Mat 16.19; 18.18 Wu manungaa numu gbi jumbuisia ma, Ngewɔ a maanulɔ ti ma; wu numu gbi jumbuisia longaa ngi ma, ta lolɔ ngi ma fɔ.”
Yesu Tia Tɔmɔsi
24Yesu gaalopo puu maahu yileisia yilayee ta toli a Tɔmɔsi, na Flɛi yɛla, ii yɛ na Yesu i wani. 25Famia kaalopo wekeisia ti hugɛilɔ a ngie tɛɛ, “Mu Ndemɔi lɔnga.”
Kɛɛ i ndeilɔ ti ma yɛ, “Kɛlee ngi lɔndimɛi yeepoi lɔ ngi lokoisia ma, ngi nya lokoyiwoi wuaa yeendoweisia hu kɛɛ ndowei yeena i ngi gakabui, ngɛɛ la la fɔ.”
26Njii wayakpa wooma Yesu gaalopoisia ti yɛlɔ gbɔma yeepɛlei na bu tia Tɔmɔsi-ni. Pɛlei gbi gbɔwungɔ yɛla, Kɛɛ Yesu i wɛilɔ i lo ti lia, i nde ti ma yɛ, “Ndiilɛli i yɛ wu ma.” 27Kɛ i ndenga Tɔmɔsi ma yɛ, “Bi lokoyiwoi wuaa mbei bi nya lokoisia lɔ, bi bi lokoyiwoi wuaa nya gakabui yeendowei bɛɛ hu. Gbua na kitii hu bi la a nge.”
28Tɔmɔsi i ndeilɔ Yesu ma yɛ, “Nya Lemɔi lɔ a bie kɛɛ nya Yewɔɛi!”
29Yesu ndeilɔ ngi ma yɛ, “Bi langa na la jifa bi nya lɔnga? Kohunɛ lɔ nungei nasia ma ti langa a nge kia bɛɛ ti yaa nya lɔni.”
Bukui Ji Nyɛi Sabui
30Yesu i kabande hinda weka gboto wielɔ ngi gaalopoisia yaama, nyɛingɔ ii le bukui ji hu; 31kɛɛ jisia ti nyɛingɔe aako wu la la kɛ Yesu lɔ Ngewɔ Maha Heingɔi le, Ngewɔ Hindoloi, tawao wu langaa a ngie, wa kunafɔ lɛɛvui majɔɔ lɔ.
Markert nå:
JƆN 20: MENNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mende New Testament © The Bible Society of Sierra Leone, 2002.
