John 4
4
Jesus Molopai Samaria Pon Nossan
1Pharisee yamùk uya, “Jesus, John yentai tùnenupa ton yepoyan molopai tok yenpataukayan,” te yetappù. 2Jesus uya kappon yamùk yenpataukappù pen màlà. Tùse inenupa ton uya làkku. 3Yetasak tùuya yau, Judea nàmàppù Jesus uya molopai iwennappotukkappù Galilee pona. 4Màlà yattai Samaria polo iitàtok wechippù màlà. 5Màlàyau iwelepamùppù Samaria pon pata Sychar itesek pona, mei pùla là iwechippù pata Jacob nùtùlùppù tùmu Joseph yemyak lùppù piyau. 6Jacob tunakkwa yennùppù inakappù lùppù wechippù molo molopai Jesus usetakkasak wechippù tùutà ke, iweleutappù màlà tuna yen piyau. Inakattapailà wei wechippù màlà.
7Màlàyau nossan Samaria pon uyàpùppù tuna yepose. Jesus uya ipàk, “Tuna ke ka' uwoppa auya lù?” teppù. 8Inenupa ton utàppù wechippù màlà pata pona kùyali ye'maik. 9Samaria kok nossan uya ipàk, “Jew àmàlà molopai Samaria pon molopai Iulà nossan Samaria pon, yà'là pe ken uchi iwechi pàk, ‘Kùwoppakà,’ te auya nai'nùk upàk?” teppù. Masapùla Samaria kok yamùk pokonpe wakù pe tùwessan pe pùla Jew yamùk wechippù màlà. 10Jesus uya ipàk, “Katù uya lepantok ittu auya yau, molopai ànùk uya tùwuku woton yenna iitu auya yau, ‘Kùwoppakà,’ làkkunne, te auya eppaino. Molopai elepatoppe ya wema'nà tunakkwa ke,” teppù. 11Nossan uya ipàk, “uyepulu, yanùntok auya yai pùla kunaik molopai nàlà i'nau tuna yen naikko. I'nai motau ken uchi wema'nà tunakkwa yepolo auya? 12Ina tamo Jacob yentaino ken na' àmàlà? Sàlà màlà ina lepatok ya tuna yen, inchippù ya tùmàlà pe sàlà tuna yen yapai, imunkà yamùk molopai itùkùnnon nàlà uya inchippù,” teppù. 13Màlàyau Jesus uya imaimu yeikuppù, “Tamù'nawolon kon sàlà tuna inchinnan we'nakklipa tu'ma màlà. 14Tùse ànù'là sàlà tuna untùlù inchinài we'nakklipa tu'ma pen màlà. Tùse i'nakkwa pe yau iwena, tàwàlàlà iwu'ma molopai tàwàlàlà iwemattok ke ilepa ya,” tukaik. 15Nossan uya ipàk, “uyepulu, kùlepakà sàlà tuna ke we'nakklipa tu'ma tukaik, sàlà motak echipalà u'nakkwa yepose use'mattà tukaik,” teppù. 16Jesus uya ipàk, “Itàkà atayappù ikà'mata, molopai menappoik sàlà motak,” teppù. 17Nossan uya imaimu yeikuppù, “Itayappù pùn nen Iulà,” tukaik. Jesus uya yeikuppù, “Ikasa meselupayaik, ‘Itayappù pùn Iulà,’ tukaik. 18Masapùla 5 pe kaichalà kàyik yamùk pokon pe ewechippù man, tùse sàlà pe ipyau messai'nùk mùkkàlà atayappù pen. Màlàpàk ailon pe upàk mekamapàssaik,” teppù. 19Nossan uya ipàk, “ uyepulu, Katù Maimu yenpoikanài pe ewechi pe tùttuyaik,” teppù. 20“Ina Samaria kok tamo yamùk wàpùlemapàtùppù sàlà wùk po, tùse amyamlo Jew yamùk uya màlà Jerusalem nen màlà wàpùleman patassek tesak,” teppù nossan uya. 21Jesus uya ipàk, “Nossan, ailon kakkà upàk, pata weyu nùyàssan màlà yattai sàlà wùk po wapùla Jerusalem po Ukàipùnù nama pe yapulà pen nen uchi màlà. 22Amyamlo Samaria kok yamùk mùkyamlo inama pe anapulà kon ittunnan pen, tùse inama pe tùnapulà kon ittunnan ina, masapùla wepùikattàntok uyàssak màlà Jew yamùk winàpai. 23Pata weyu nùyàssan molopai iyàkkassak man ailon pe yapulànnan uya Ukàipùnù nama pe yapulà màlà, ailon pe molopai takkwalù kon ke, masapùla mùkyamlo yekkwa ton tùnama pe tapulànnan iche màlà Katù wechi. 24Katù mùkkàlà akkwalù, màlàpàk mùkyamlo yapulànnan uya yapulà màlà molopai inana yakkwalù yau molopai ailon pe,” teppù.
25Nossan uya ipàk, “Mùkkàlà nen Messiah tùttuyaik,” Christ tukaik tesassen uyàpù. “Tùuyàssak yau tamù'nawolon yekama ya màlà ina pàk,” teppù. 26Jesus uya ipàk, “Iulà Mùkkàlà eyelupayai'nùk, Mùkkàlà,” teppù.
27Màlà kùlottau inenupa ton wennapposak wechippù. Tok usenumenkappù kulu nossan pokonpe ichelupa pàk. Tùse tok uya, “ Tùse yà'là iche messan?” teppù pen, wapùla “Yà'là pe iwechi pàk nossan pokonpe euselupa màlà?” teppù pen.
28Màlàyau nossan uya tù'nakkwa yen nàmàppù, iwennappoppù pata pona, molopai kappon yamùk pàk, 29“Àittàk kon, kàyik yense tamù'nawàlà unkupùppù lùssan yekamapàsan. Christ pe na' iwechi màlà?” teppù ya. 30Màlàyau kappon yamùk utàppù pata poi Jesus yense.
31Màlà notau inenupa ton uya, “Ticha, ata'lettàkà,” teppù Jesus pàk. 32Tùse tok pàk, “Uyekkyali molo man ànùttu kon pen,” teppù ya. 33Màlàpàk inenupa ton uya tùyiwalà'nokon, “Ànù'là uya na' màlà kùyali nepùppù ipyak pe iwechi?” teppù. 34Jesus uya tok pàk, “Uyekkyali màlà uyeuno'nàippù yeselu kupù molopai wotoko intùlùppù ikuttoppe uya yenuka'nùppù.
35‘Àwàppànsak yau, asakùlà'ne kapùi lùppù ikko'mamù màlà tùpo ipilipù tawonnan pen na' amyamlo?’ Àpàkù'nokon tekamayaik, umà yawàlà yentàk kon, yawon kon wappùkassak man molopai ipilittok yattai man. 36Mùkkàlà ipili'nài uya tepeppù yepolo màlà, molopai kùyali pilipù ya tàwàlàlà wema'nàtok ponaloppe. Mùkyamlo ipànnài molopai ipili'nài tawonnan utauchinpa màlà tamùkke. 37Sàlà màlà mayin ailon, ‘Tewinan uya ipàmà molopai tùulon uya ipilipù,’ tawon. 38Eyeunossak kon uya man ànpàmàppù kon pen piliche. Tùulon kon uya sa'man kulu wotoko kukkapùppù molopai ewettùsak kon màlà tok wotokoyi yak,” teppù.
39Tukke Samaria kok yamùk uya ailon teppù ipàk masapùla nossan uya ipatakasak pàk, “Tamù'nawàlà unkupùppù lùssan yekamapàssan,” tukaik. 40Màlàyau Samaria kok yamùk uyàpùppù ipyak ipawanattàse, tok uya yekamappoppù tùpyau'nokon iwettoppe. Màlàyau asa'là wei Jesus uko'mamùppù molo.
41Tukkan kon uya tu'ma ailon teppù itekale yekama ya tetase, 42tok uya nossan pàk, “Ina nen uchi ailon nùkayan yekamasak auya pàk neken pùla, tùse tùyiwalà'nokon nen uchi ina netapàssan molopai ina nùttuyan sàlà wolù Pùikattànài pe kulu iwechi pe,” teppù.
Jesus Uya Itepulu Mumu Ipittà
43Asa'là wei molo tùuko'mamù tùpo, Jesus utàppù Galilee pona. 44Jesus uya tùmàlà pe, “Katù Maimu yenpoikanài mùkkàlà itonpa yamùk ipata yawon kon nùnama pen,” teppù. 45Iwelepansak Galilee pona yau molonkonnà uya yanùmùppù, masapùla tok utàppù màlà Jerusalem pona Usentaka'nàppà yattai uta'lettàntok yak molopai tamù'nawolon inkupù yeneppù tok uya màlà yattai.
46Màlàyau Jesus uyàpùppù tu'ma Cana, Galilee pon pona, tuna lattàppù tùuya wain pe motak. Molo iwechippù itepulu, kin poitolù, e'neppe imu wechippù Capernaum po. 47Jesus welepansak Judea poi Galilee pona yetasak tùuya yau, iitàppù ipyak molopai ipawanattàppù ya tùmu ipittàik iyàttoppe, iwelikù piyau iwechi pàk. 48Jesus uya ipàk, “Ailon te auya'nokon pen tùse neken tensanyek ton pen eke wotoko kupù yene auya'nokon yau,” teppù. 49Kin poitolù uya Jesus pàk, “Itepulu, àikkà tàwà uya'là umle welikù wapiya,” teppù. 50Jesus uya ipàk, “Itàkà, àmu wenna màlà,” teppù. Màlàyau ailon teppù kàyik uya Jesus maimu pàk, molopai iwemeikuppù. 51Asantawàlà lùppù iità tùse, ipoitolù ton uya yepoloppù, “Àmu pàli'yau man,” teppù tok uya. 52I'nai yailà wei tùse tùmu wennappù yekamapposak ya yau, “Ko'manyak 1 o'clock yattai nàkkàmi'makattai,” teppù tok uya. 53Ikàipùnù uya ittupù, màlà yattai kulu Jesus uya, “Àmu wenna màlà,” teppù. Màlàpàk itùwùk tawon kon molopai mùkkàlà tawonnan uya ailon teppù Jesus pàk.
54Sàlà màlà yakon itekkwa pe tensenyek pen wotoko kupùppù Jesus uya Judea poi tùuyàpù tùpo Galilee po.
Markert nå:
John 4: PNTR
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Patamuna New Testament Revised © United Bible Societies, 1973, 2019.
