Matthew 10
10
Jesus Uya 12 Pan Kon Yeunoko
(Mark 3.13-19; Luke 6.12-16)
1Jesus uya 12 pan kon ta'lon kon kà'mappù màlà tùpyak. Molopai tok lepappù ya meluntà ke, àli ton akkwalù yamùk yenpakkatoppe tok uya, molopai yà'là yekkwa là palan molopai e'nek ipittàtoppe tok uya. 2Sàlà yamùk uchi màlà teunossan yesek. Wapiyalok mùkkàlà Simon (Peter itesek) molopai itonpa Andrew, James molopai yakon John, Zebedee munkà yamùk, 3Philip molopai Bartholomew, Thomas molopai Matthew pùlayatta pili'nài, James, Alphaeus mumu, molopai Thaddaeus, 4Simon, Zealot molopai Judas Iscariot, Jesus yeimipponài.
12 Pan Kon Teunossan Nùkupù
(Mark 6.7-13; Luke 9.1-6)
5Jesus uya pùsamlo 12 pan kon yeunokoppù màlà suwa tukaik tok tùpanamase. “Kùtàtàu tùulon kon kappon yamùk, Jew yamùk pen pata yak wapùla Samaria pon kon pata yak. 6Tùse làkku itàtàk kon iitassak kon kalinilu yamùk walainon Israel pon kon piyak. 7Àutà kon pe, ‘Itepulu pe we'nàtok epùn po wechi mei pùla, mekamatàik” teppù Jesus uya. 8“E'netton mipittàtàik, iwelichak kon mùwuluukatàik, welei pokon kon mipittàtàik, molopai àli ton akkwalù yamùk menpakkatàik. Te'mase pùla yeposak auya'nokon man, màlàpàk me'lepatàik te'maik pùla. 9Kolù wapùla chilùpa wapùla kalukuli pùlayatta kùsatàu. 10Paiki kùsatàu àutà kon yau, wapùla asa'là pon kùsatàu, wapùla pùtassa wapùla tekessen. Tùwe'wotokomasan mà mùkkàlà tùlepasen yek tà.
11“Pata pona àutàsak kon yau, ànù'là tùpyau àku'nài'nokon yek mùwatàik, molopai ipyau mettàik màlà pata nàmà auya'nokon ponalà. 12Tapùi tak ewewomù kon yau, ‘Echitonpa pe we'nàtok wechi apyau'nokon màlà,’ mùkatàik. 13Kappon yamùk màlà tapùi tawon kon uya ayanùmù kon yau, tàwà echitonpa pe we'nàtok tok piyau nechii, tùse ayanùmù kon tok uya pùla iwechi yau, tàwà echitonpa pe we'nàtok nennappoi apyakù'nokon,” teppù Jesus uya. 14“Molopai kappon yamùk tùwùk kon tawon kon, wapùla pata uya ayanùmù kon pùla iwechi yau, wapùla eyeta tok uya pùla iwechi yau, màlà pata mùnàntàik molopai non mùtu'metàik atta kon poi. 15Ailon kulu sàlà, Ittuntok Weyu yattai Katù usentuppa màlà eke peiwa Sodom molopai Gomorrah pon kon pàk, màlà pata yawon kon kappon yamùk pàk tùusentuppa yentai!” teppù Jesus uya.
Tùuyàssen Talumattàntok
(Mark 13.9-13; Luke 21.12-17)
16“Yetatàk kon! Kalinilu yamùk kasa eyeunoko kon uya sàlà tukkan kon àsà ton kamo yamùk kùlottak. Pukkek peichi mettàik àkài yamùk kasa molopai tenpe wakokkwa yamùk kasa. 17Enpen mentàik, masapùla kappon yamùk wechi màlà molo ayachi kon woton molopai ayalà kon woton potolù yamùk yemloto pona, molopai tok uya eyippoppàtù kon màlà tùwepilittok kon itak tau. 18Upàkànsau enepù kon màlà kin yamùk molopai kopùna yamùk yemloto pona, Wakù Itekale yekama kon pa tùpàkù'nokon molopai tùulon kon Jew yamùk pen pàk. 19Tok uya enessak kon eyittutok kon pe yau, kataimelunpatàu yà'là te auya'nokon pàk wapùla yà'là kasa euselupa kon pàk. Iweyu uyàssak yau, yà'là tetok auya'nokon ke elepa kon màlà. 20Masapùla euselupatok wechi màlà àmàlà pe pùla. Àkàipùnù kon Yakkwalù winàpai iyàpù màlà, ayai'nokon iichelupa,” teppù Jesus uya.
21“Takon tùlù màlà ilui uya iwàtoppe, molopai ikàipùnù uya tùmule tùlù, mule yamùk uya tùsan kon molopai tùkàipùnù kon yentaika màlà molopai tok wàtoppe tok tùlù tok uya. 22Tamù'nawolon kon uya eyeya'noma kon màlà upàkànsau. Tùse mùkkàlà ailon pe tùwessen iwenukapù tepose wepùikattà màlà,” teppù Jesus uya. 23“Molopai atalumattà kon tok uya tewinan pata yau yattai mepetàik tùulon pata yak. Ailon kulu sàlà, tamù'nawolon pata yamùk Israel yawolon kon yaletùkka auya'nokon pen màlà, Kàyik Mumu uyàpù wapiya,
24Tenupasen mùkkàlà tenupanài yentaino pen. Apyoto mùkkàlà tepotolù yentaino pen. 25Eichilà mà iwechi màlà tà tenupasen wechi tenupanài kasa molopai apyoto wechi tepotolù kasa yau. Tapùi yesak wechi Beelzebul pe yau màlà yentai nen uchi itùwùk tawon kon wechi màlà!” teppù ya.
Mùkkàlà Tùnamasen
(Luke 12.2-7)
26“Kappon yamùk pàk kesenalippatàu. Yà'làlà iwaputtàsak nai'nùk wapukka màlà, molopai tamù'nawolon tonantau nai'nùk ittu màlà. 27Ewalupà yau tekamayai'nùk mekamatàik wei nai, molopai enetappù kon amak yai, mekamatàik tapùi ipu poi. 28Kesenalippatàu mùkyamlo esak wànnan tùse akkwalù wànnan pen pàk. Tùse làkku esenalippatàk kon, Mùkkàlà asakklàma esak molopai akkwalù mattanù'nài apok yau pàk. 29Asa'là kamaliya yamùk ye'manài màlà tewinan nùkkwà pùlayatta pun. Tùse tewinnà tok tonpa wepuka non pona àkàipùnù uya ittu pùla pen màlà. 30Molopai appai kon pùpok là ittusak màlà tamù'nawàlà. 31Màlàpàk uchi kesenalippatàu, epekkek ton kulu amyamlo kamaliya yamùk yentaino kon!” teppù Jesus uya.
(Luke 12.8-9)
32“Ànù'là uponaloppe tùwechi yekamanài ayupo, yekama uya nàlà màlà Ukàipùnù epùn pon yemloto po. 33Tùse ànù'là uponaloppe tùwechi yekamani pen ayupo, yekama uya Ukàipùnù epùn pon yemloto po pen màlà,” teppù Jesus uya.
34“Echitonpa pe we'nàtok nessak uya non pona pe kùsekamatàu. Echitonpa pe we'nàtok nessak uya pen sàlà, tùse pàlàu nessak uya. 35Uyàssak sàlà
tùkàipùnù kon winàkàik àsà pe walawotichi yamùk wettoppe, tùsan kon winàkàik ema'nomichi wettoppe, passe yamùk wettoppe tewoppù kon winàkàik. 36Kappon yeyaton wechi màlà itonpa yamùk kulu kùlottawon pe. {MIC 7.6}
37“Ànù'là tùkàipùnù wapùla tùsan pùnùnmanài uyentai mùkkàlà wechi màlà uponalok yek pe pùla. Ànù'là tùmu wapùla tenchi pùnùnmanài uyentai wechi màlà uponalok yek pe pùla. 38Ànù'là tùnalà pulusuk yanùnnài pen molopai uye'mappù tawà tùutàsen pen mùkkàlà uponalok pen. 39Ànù'là takkwalù ku'nài tùponalok pe uya ilachima màlà. Ànù'là takkwalù lachimanài upàkànsau uya yepolo màlà,” teppù Jesus uya.
E'mantok
(Mark 9.41)
40“Ànù'là ayanùnnài'nokon uya uyanùmù màlà. Molopai ànù'là uyanùnnài uya mùkkàlà uyeuno'nàippù yanùmù màlà. 41Ànù'là Katù Maimu yenpoikanài yanùnnài, masapùla imaimu yenpoikannài pe iwechi pàk uya màlà mùkkàlà yepeppù yepolo. Molopai ànù'là wakù kappon yanùnnài masapùla wakù pe iwechi pàk uya màlà mùkkàlà yepeppù yepolo. 42Ànù'là elekkwà uya'lon kon tonpa woppanàippù i'nàkenan tuna ke tewin nùkkwà là kon, masapùla uya'lon pe iwechi pàk, ailon kulu sàlà mùkkàlà uya tepeppù yepolo màlà,” teppù Jesus uya.
Markert nå:
Matthew 10: PNTR
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Patamuna New Testament Revised © United Bible Societies, 1973, 2019.