Génesis 3
3
Yanowamö cäcöbö lä wa̦lidiblaliyono wei tä a̦
1Abinaja tä cuoma. Jeobaa a lä bufiblamou wei a lä cuinö, yalo bä bluca tablalema, ulifi jamö bä yalo jubä. Ö̦jö bä bluca lä tablaleno wei bä nija, olu cäcö shino yai moyawäo fe balojooma. Suwä nija cäcö fa icuicunö, cäcö a̦ falayoma.
—Ei täca jamö, defibä bluca lä ublajale täcö nii ja, ¿Yai Bada tänö wafäcö iyaö wasöma daanö? —cäcö cuma.
2Suwä a wa̦ juoma.
—Ma. Ei täca jamö, defibä bluca lä ublajale täcö nii ja, yafäcö nia lä iyaö wei täcö nii ma cui, 3defi lä möamole defi ja, yafälecö shino wasöma, Yai Bada tänö. “Ö̦jö wafä täcö waböö dicoo mlai”, a cuma. “Täcö ca̦i jubabö dijä, wafäcö nomalayou”, a ca̦i cuma. Einaja yafälecö nowa shino tama —a suwä cuma.
4Ö̦jö ma cui, abinaja suwä a nija cäcö jole cuma.
—Ma. Wafäcö nomaö mlaicätä. 5Cama Yai Bada a bufi dao lä culenaja, wafäcö bufi nia cublou mö lä feduo wei tä daö yalo, a wa̦ li cuo bädaoma malä cui. Wafä täcö waö däjä, bufi dao wäfäcö nia cublou. Wa̦lidiwä tä ma cui ja, dodijidawä tä ma cui ja, cama Yai Bada tä bufi dao lä culenaja, wafäcö bufi nia li cublou mö feduo —cäcö olu cuma.
6Einaja cäcö cuu ja, suwä anö defi fa mönö, täcö dodijidawä dalalema. Defi ca̦i liyäjäwä dalalema. A bufi nia lä jaducublou wei tä ca̦i fa dalalönö, imicö quequema. Täcö fa jucälänö täcö walema. Bei fe̦yalobö e ca̦i dobäa fa showadalönö, ö̦jönö täcö ca̦i waa mö fedulema. 7Cäcöbö bufi möblou fa showadalonö, cäcöbö nö ca̦i shinoco ö̦jöbömoa showadalayoma. Ö̦jö däjä, cäcöbö fa quililalunö, cäcöbö colocu jo̦yaobä, ico jenabä diyäblabölema.
Yai Bada tänö cäcöbö a̦
lä wämaqueno wei tä a̦
8Ficali ca jamö, Jeobaa a lä bufiblamou wei a jo̦wa weyade juu fa ji̦libölänö, fii defibä jamö cäcöbö jo̦yaaliyoma, a möböö fa quilinö. 9Ö̦jö ma cui, Jeobaa a lä bufiblamou wei a lä cui, wa̦lo nija a comöma.
—¿Wedi jamö bei wa li cua cule? —a cuma.
10—Ficali ca jamö wa lä juu wei, bäfä a̦ fa ji̦lilänö, ya shinoco dablamou fa quilinö, eja ya jo̦yaa lä cuboyoi —Adana bei a cudaliyoma.
11—¿Wedinö wa wa̦fa shinoco taö ja, bei wa li jo̦yaa cule? Ya täcö waö da wasöblei täcö ja, ¿wa iyaö dicoo mlaofawä? —Yai Bada e cudaliyoma.
12—Suwä wa da jöbäbai a suwänö, wale fa dobälönö, ya täcö waa dicolei culoi —a wa̦lo cuma.
13Ö̦jö däjä, Jeobaa a lä bufiblamou wei a lä cuinö, suwä a wa̦lii nomöjöoma.
—¿Wedinaja wa li cuaaö dicoo cufe? —a cuma.
Ö̦jö däjä, suwä a wa̦ wawälayoma.
—Olu cäcönö wale fa mölamalönö, ya täcö waa dicolei culoi —a suwä cuma.
Yai Bada tänö bä nö lä bleaamano wei tä a̦
14Ö̦jö däjä, Jeobaa a lä bufiblamou wei a lä cuinö, olu cäcö nowa taö nomöjöoma.
—Inaja wa cuaama yalo, bäfä nö bleaamaö lä cule. Yalo bä ji̦ima lä tabou wejei bä ma cui, ulifi jamö bä lä juu wei bä ma cui, bä ca̦i dodijidawä cuo ma ayao däjä ma cui, cafä bei wa nö nia shino yai bleaaö. Wa demio däjä, bei wa balöcö jamö wa fa jölölonö, showadi mashita bä ja, wa nia iyadii bashio.
15’Suwä sho showadi wafäcö nofi wa̦liayobä, bäfäcö tablamaö lä cule. Obi ma cui, suwä bei ijilubö e nodiwä sho, afä a nia lä nodiblou wei a sho, cäcöbö nofi nia wa̦liayou nodiablalou showao. Ya̦cumö suwä a lä cui, bei ijilubö nodiwä e nö nia shino wa̦lojaö ayao. Wa fe nia shäaö. Cafänö bei wa e mamicö shiona nia difequiaö —cäcö nowa tama.
16Suwä nija, abinaja a cuma.
—Wa shibönaböo däjä, bäfä nö ninili bleaamaö fe balojoo wä. Wa nini nö bleaalanö, ijilufä wa bä wawämaö wä. Ö̦jö ma cui, fe̦yalofä wa nia bufibou showao fe yadio. Cama nija, wa nia nosiemamou —a cuma.
17Adana nija, abinaja a cuma.
—Suwäböfä wa wa̦ juaö fa dicolunö, ya täcö waö da wasöblei täcö ja, wa iyama yalo, ya tä ulifi wa̦liablaö lä cule. Wa iyabä, ficali ca jamö wa nia ojodamou nö bleaaö. Wa demio däjä, showadi inaja wa nia ojodamou nö bleaaö cuaaö.
18’Mösöcö cäbä nia bluca cauu —a cuma—. Caje caje bänö täca nia baömöö nocamou. Ulifi jamö bä nii lä lalou wei bä ja, wa ofili nofi nia shino jaluo. 19Wa wa̦quefe falanö, wa nia iyaö. Wa demio däjä, inaja wa fa cuaadaloimadunö, ya̦cumö mashita a ja, wa nia co̦cablou co̦o. Mashita a ja, wa tablamolayoma yalo, ö̦jö wa cublou co̦obä wa malä cui —Yai Bada a cuma.
20Wa̦lo a lä cuinö, bei suwäbö Ewa a wa̦fa jilaquema. Ö̦jö a suwä nija, yanowamö täbä jödödöwä nia balama yalo, Ewa a wa̦fa jilaquema. 21Ö̦jö däjä, Jeobaa a lä bufiblamou wei a lä cuinö, yalo sibä ja cäcöbä didiobä, esicö fa tablalönö, cäcöbö lucämalema.
22Ö̦jö däjä, Jeobaa a lä bufiblamou wei a wa̦ faö co̦oma.
—Bei. Camiyä bämacö lä culenaja a yanowamö cublaliyo lä cufe. Wa̦lidiwä tä ma cui ja, dodijidawä tä ma cui ja, a bufi dao waiquiwä. Bei imicönö defi iyoa fa dicolänö, ba̦limiblamodima täcö ca̦i waa fa nomöjölönö, a ba̦limi bälöa shi wa̦lia dicoalu —bei a cuma.
23Inaja a yanowamö cuaaö mlaobä, Edena täca noshi umlaa fa nomöjölönö, a sibomalema. Mashita a ja, a jaba lä tablamolayono wei a mashita showawä ja, a ficalimobä. Bei suwäbö sho cäcöbö siboa showamalema. 24Yanowamö cäcöbö lä yashublalei wei, yai waiteli täcöbö majecö lä cule, täcöbö läa jäa showamaquema. Edena täca lu̦locu jamö, täcöbö lämaquema, motoca a lä juimaö wei tä mashi jamö. Ba̦limiblamodima defi lä ublale yo nowamabä, shocobi aca wacö lä wao wei, aca ya̦wedeablalobä aca ca̦i lämaquema.
Markert nå:
Génesis 3: GUU
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©2012, All Rights Reserved