maṯa 16
16
asa 16
yecu gwudonyo ḏiɽoṯeḏa ḏan ḏəŋinio
mks. 8:11-13, lk. 12:54-56
1na lɩbarɩsi wila dino na lisadugi nalɩdeije nalɽoṯeḏe lar lalaŋijo ḏəŋinio ḏeḏi kanyin. 2nulwɩrlijo ŋuɽuna nuleicɩno, ḏa galo gɩmaro nyinyibir, nyalarno, giləganu gau gate gar gani no gi gwune kanyin gure. 3na mimmi gilio nyalarno, gau gani gwunanyine, gi gwune kanyin gure na gikɩɽɩbəḏɩnu jəbɩɽu je. nyalilɩŋiḏi nanyouwɩrli ŋuɽuna ŋun ŋaŋinu kanyin, nanyamɩni ate nyəṯi ŋɩma nyalalɩŋe ḏəŋinio ḏeḏi gaja keno no. 4liji leno leḏi gwunne lun lɩki na lun laṯe laṯiməṯo eloŋu no laṯiɽoṯeḏe ŋuɽuna ŋun ŋɩbuḏo, nate nalɩnḏəḏə ŋuɽuna ŋun ŋɩbuḏo no namɩni ŋuɽuna ŋeḏi yunan ŋun ŋɩbuḏo gwun gwiro nebi. nulouwɩrico nuwele.
yecu gwugɩreṯɩnyeḏi ḏirimiḏo gi jei ḏeḏi calɩmis
mks. 8:14-21
5gwune na calɩmis juŋun wila kiməmu giro kaja ge ḏɩrawe nalḏuḏe ganu gilape ŋɩa. 6nal yecu eicɩno, jil muma nyadɩmɩnə ga ŋuɽun ŋeḏi lɩbarɩsi na lisadugi ŋun ŋiro gi jɩduɽu. 7naluməḏəte laginŋu nalarno, anate nimapana gia no. 8nal yecu lɩŋe nuleicɩno, gwudaro gəko nanyuməḏəte lagaloŋu, nyaŋa lun lɩti ḏɩməṯo, gi gwune nya late lɩmapa gia no? 9nya lore late lilɩŋiḏi na? nya late laḏɩŋano gia gun giro ṯoḏɩne geḏi liji lun liro alɩb ṯoḏɩne na jɩdi umɩnyo jun jɩmanyalape na? 10i gia ŋun ŋiro kwoɽoṯəɽɩl geḏi liji lun liro alɩb kwoɽo na jɩḏi umɩnyo jun jɩmanyalape jun jɩbuḏo a? 11galakwe nya late lilɩŋiḏi nyi gwate gwuməḏɩjaje gwan gia no? namɩni najuməḏɩjo kani nyədɩmɩni ga jɩduɽu jeḏi lɩbarɩsi na lisadugi? 12gwune nalɩŋe late luməḏijulo no naldɩmɩni ga gi jɩduɽu jeḏi gia, namɩni alḏɩmɩni ŋa gi ḏalɩmia ḏeḏi lɩbarɩsi na lisadugi.
buṯrus gwiteijo ga yecu gwiro kɩrisṯo
mks. 8:27-30, lk. 9:18-21
13gwune na yecu wila gi diɽil ḏeḏi amɩrɩgen yeḏi gesaria bilɩbus, nuɽoṯeḏe calɩmis juŋun, nuleicɩno, liji laṯarno ŋaɽe ŋeḏi liji ŋan əḏi? 14naleicɩno, kworo laṯarno yuwana mamadan, na liro kaja laṯarno iliya gwiro, na liro kaja laṯarno irmiya i gwete gweḏi nebɩŋa. 15nuleicɩno, namɩni nyalaṯarno nyi gwan əḏi? 16na simian buṯrus eicɩno, ŋa gwiro kɩrisṯo ŋaɽe ŋeḏi elo gwun ŋwumiḏo. 17na yecu wɩrlijo ŋuɽuna nueicɩno, ŋa gwəṯi ḏimoreḏa simian ŋaɽe ŋeḏi yuna, gi gwune aŋɩnu na ŋuwən ŋate ŋaŋɩjaŋa no, namɩni baba gwi gwun gwaṯɩje kanyin. 18na nyi gweicaŋa dino no, ŋa gwan buṯrus, na gi loɽi elo leno nyi gwute kɩniso ginyi na ŋɩma ŋeḏi ŋele ŋeḏi kalo geḏi liji lun laiyo ŋate ŋanḏami no. 19na nyi gwaŋaḏəḏə lɩmubṯa leḏi ŋele ŋeḏi kanyin, na ŋun ŋalgaki ga kɩḏilio ŋaje ŋigəkɩnu kanyin, na ŋun ŋalkədə ga kɩḏilio ŋaje ŋɩkədəḏɩnu ga kanyin. 20nuuməḏɩjo calɩmis juŋun ŋuɽuna ŋɩbɩɽe nuarno late lanumə gwiji gwetɩdo ŋu gwiro kɩrisṯo no.
yecu gwuməḏi ŋuɽuna ŋan ḏaɩya ḏuŋun na ḏidiɽo gi ḏaiya gwerre ganu ŋate ŋɩmila no
mks. 8:31-33, lk. 9:22
21na uro kaja kono na yecu iḏeije ŋa nuaŋinijo calɩmis juŋun arram nuwele urucəlim nuiḏe ŋɩdi ŋe ŋun ŋutu ŋɩ liji lun lu jun na jɩsis jun jɩbuḏo na jalgaṯɩm, nalɽinye na gi lamon lun liro ṯəɽɩl nudiɽi. 22na buṯrus gwuloḏa kaja nulo, nueicɩno, əgeye gwele gwi; ŋeno ŋate ŋaro lugwuŋa no. 23nuwɩrla ga nueico buṯrusŋ no, tuḏi gi ḏuɽo ganu lugwi seiṯan gi gwune ga gwiro ŋɩdi gun ŋaṯinyiobɩlkejo, gi gwune ŋa gwate gwaṯuməḏɩni gwan ŋuɽun ŋeḏi elo no, nalmɩni ro ŋeḏi liji.
yecu gwarno ḏa ma gwiji gwujane nudonye gwula gwuyun
mks. 8:34—9:1, lk. 9:23-27
24na yecu eico calɩmis juŋun no, na ḏa gwete mar gwigwujane, nudonye gwula gwuŋun, nuape luɽi lugun lun lɩmalɩḏo ganu nilgwujane. 25na gwun gwar gwadɩme ḏɩmiḏa ḏuŋun ḏuḏuji, na gwun gwaḏuji ḏɩmiḏa ḏuŋun gwan nyi ḏubuje. 26ḏiḏiena ga ḏəḏə ḏa gwiji maḏɩme ŋɩdio ŋeḏi gɩḏilio wei numɩni ḏuji gwula gwuŋun? i gwiji gwəbi aŋ ganu kalo geḏi gwulo gwuŋun? 27gi gwune ŋaɽe ŋeḏi liji ŋaɽuwa ḏoɽeḏa ḏe ḏeḏi baba gwuŋun na liji lugun leḏi kanyin, nulḏəḏə wei gwete gwete gwan ŋɩru ŋuŋun. 28gwerkwe, gwerkwe ganu, nyi gweiceijɩno, lo kworo leḏi liji leno lun lɩḏuḏɩnu ŋɩne late lai no kəbe laŋu ŋaɽe ŋeḏi liji ŋaɽuwa ŋele ŋe ŋuŋun.
Markert nå:
maṯa 16: OTR1966
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Nuba, Otoro New Testament
© British and Foreign Bible Society, 1966.