JOHN 18
18
Jisü Thechu eno Küghaluve
1Jisü no atsa hipaqo pive kethiu pa ye akhopemi sasü ipeve no Kidron ghokiti kathasü aghutu lakhi akeu lo akhopemi sasü ilove. 2Judas khuu Jisü thechuve keno, pa ghi tipa-a ithi ae, kughengu Jisü no pa khopemi sasü ghuthu kutomo tileno kusho cheke. 3Ikehu Judas no achinetomi ngo Phariseemi launo ghüshimi amqo lakhi eno kijemi khami sasü amizükulu ngo akuluqhe eno azüta angu pesü tile wu. 4Jisü ye pa shou kiu shinani keno thokha ithi akehu pa no azüu ipeghi no panoqo vilo pi, “Nongu ye khuu phucheni kea?” 5Panongu no khochile, “Nazarethmi Jisü.” Jisü no panoqo vilo pi, “Ni ye pake.” Pa thechuve keu Judas ye panoqo sasü kümtsa puthugho ae. 6Kughou Jisü no panoqo vilo, “Ni ye pake” ipi keno, panongu ye athiu idewove eno ayeghi lo iluqive. 7Ikehu Jisü no panoqo vilo itaghi iniju, “Nongu ye khuu phucheni kea?” Panongu no pi, “Nazarethmi Jisü.” 8Jisü no khochile, “Ni ye pa kepi I no nongu vilo pivae. Ikehu nongu no I phucheni aye, timi hipaqo pelo wuve pelo.” 9Hi ye pa no pi püakeu tsa shikupu niye ke: “Nono I tsü keqo gholo ni ye lakhimu pühamoe.” 10Tile Simon Peter, khuu azütakikihi peche keno, pa ti süjope achinetou qeu kini ajeu küsave tsü. (Aqeu je ye Malchus.) 11Jisü no Peter vilo pi, “O azütakikihi pesü asükhi lo süvelo. Ni ye Apu no I pelo shope niye tsükeu jukhu shomoni keshea?”
Annas ngo Caiaphas Zülo
(Mt 26:57-58; Mk 14:53-54; Lk 22:54)
12Jewmi ghüshimi eno panongu shou kepten ngo kijemi no Jisü küghape tshüluve. 13Panongu no atüghüshi pa sasü Anna lau wu, kughengu pa no achinetou Caiaphas pangu kishiu ke. 14Caiaphas no Jewmi mije no, milakhi no timiqo ghenguno thive keu pavi kepi pike.
Peter no Jisü Milive
(Mt 26:69-70; Mk 14:66-68; Lk 22:55-57)
15Simon Peter ngo akhopeu lakhiu pama no Jisü papeche. Akhopeu tipau ye achinetou sasü kilethi akehu Jisü gholono achinetou küghaki lo ilove, 16ikemu Peter ye khalau ahukikha lo puthugho ae. Akhopeu khuu achinetou sasü kilethi akeno pa no khalau ipe ahukikha khe akeu aqeliu pütsa no Peter sasü alou iloghive. 17Ahukikha lo akeu aqeliu no Peter vilo pi, “No ghi timi hipau khopemi lakhike kumo?” Pa no khochile, “Ni ye kumoe.” 18Süthi akehu aqemi ngo kijemiqo no amiyi pesü ami shino puthughope ti pügha ae. Peter ghi panoqo gholo ngono pa phi pülü ae.
Achinetou no Jisü vilo Iniju
(Mt 26:59-66; Mk 14:55-64; Lk 22:66-71)
19Tishino achinetou no Jisü vilo pa khopemi ngo paw shiküka vehu ighiju. 20Jisü no khochile, “Ni ye ayeghiqha zülono piche. Ni ye sinagog ngo achineki khile Jewmi kümtsü no kumqo cheni keno, tile kütsüche; ni ye küsüuno kiumu pi püamoe. 21No ye kushiye I vilo ighiju ani kea? Khunoqo no I tsa chilu püani, eno I no panoqo vilo kiu pi keno ighiju lo, kughengu I no kiu pi keno panongu no ithi ani.” 22Kughou Jisü no hi pi keno, tile puthugho akemi kijemi lakhi no pa u pesü Jisü gha püzü pi, “No ye hipa gholau no achinetou khochile nani keshea?” 23Jisü no pa khochile, “I no pikeu no akumou shiaghi aye, kiu no akumou keno hileno thopi shilo; ikemu I no pikeu no achipi shiaghi aye, no ye kushiye I he ani kea?” 24Tishino Annas no pa tshüpe achinetou Caiaphas lau puwuve.
Peter no Itaghi Jisü Milive
(Mt 26:71-75; Mk 14:69-72; Lk 22:58-62)
25Simon Peter ye puthugho no ami pügha ae. Panongu no pa vilo pi, “No ghi pa khopemi gholo lakhi kekumo keshea?” Pa no ti milive no pi, “Ni ye kumoe.” 26Achinetou qemi gholo lakhi, Peter no akini küsave tsükeu no bolomi no itaghi iniju, “Aghutu lo no ye pa gholo akeu I no ithulu püanike kumo?” 27Peter no itaghi milive, eno tipamtsa awudu no ighave.
Pilate zülo Jisü Sawu
(Mt 27:1-2,11-14; Mk 15:1-5; Lk 23:1-5)
28Tishino panongu no Caiaphas ki lono Jisü sasü Anghw oking lo wuve. Ti ye inaqhe noke. Panongu ampi ye sholokuu ilomoe kughengu panongu ye kitiqemo no Hechekulu Ghulhu chuniye ke. 29Ikehu Pilate no khalau ipeghi no pi, “Timi hipau shou kiu nguku kepu süghi ani kea?” 30Panongu no khochile, “Timi hipau no alhoksa shiaghimo aye, ningu ye o lau pephetsü moni cheke.” 31Pilate no panoqo vilo pi, “Nonguu pa sawuve no nongu yezah kiqi lono pa shou küghathave lo.” Jewmi no khochile, “Ningu ye timi khumu pithive kepu yezah kühae.” 32Hi ye Jisü no pa ye kiu ghola lono thive nani keno pi püakeu shikupu niye ke.
33Ikehu Pilate no oking lo ideilove no Jisü kupüzü pi, “No ye Jewmi Kükau keshea?” 34Jisü no khochile, “Hi ye o lolono ipeghi no iniju ani keo, kütami no I ghili pesü o vilo pi kea?” 35Pilate no khochile, “Ni ye Jewmi keshea? No likhi no shiye eno achinetomi no o pesü I u lo süve tsüae. No ye kiu shive kea?” 36Jisü no pi, “I yekipe ye hipa yeghi lo yekipe kumoe. I yekipe no hipa yeghi lo yekipe keaye, I küghape Jewmi u lo sümoni ye I khopemi no aghüshi aghini cheke. Ikemu I yekipe ye hipa yeghi lo yekipe kumoe.” 37Tile Pilate no pa vilo pi, “Tishiaye no ye akükau keshea?” Jisü no khochile, “Ni ye akükau kepi nono piani. Hi ghenguno I punue eno hi ghenguno ni ye ayeghi lo ighie— ti ye kuchou lau thopi shiniye ke. Khunono kuchou laumi keno I sütsa ini cheni.” 38Pilate no pa vilo pi, “Kiu no kuchou kea?”
Pilate no hi pive no khalau Jewmi lau ideipe panoqo vilo pi, “Ni ye pa shou akipimi phulu amoe. 39Ikemu nongu khuaye lono Hechekulu Ghulhu lo I no akughumi lakhi nongu lau kuqhophe masa keu acheni. Ikehu nongu ye I pelo Jewmi Kükau nongu kuqhophe penishi anima?” 40Panongu no itaghi ighamku pi, “Timi hipau kumono Barabbas!” Barabbas ye süxakulumi ke.
Markert nå:
JOHN 18: SUMRVBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible Society of India
© 2023, Used by permission. All rights reserved. More
