Matta 4
4
Shaitan pǝta Yeso a sanglo
1Pa Wis Kaa wa yǝ too Yeso yaa sa ko a sanglo me Shaitan yaa pǝta. 2Ndiira Yeso tomsǝ kwal mbraa wa tǝro pakurun pǝrtǝra ma kaa wa, pa ɗoora a si. 3Pa an pǝtara ke yǝ wo a sani yaa nkee me, “Me ngǝ Au Kaa ya, a nkee kundate ya yǝ kang nkaadǝng.”
4Yeso yǝ kak yaa nkee me, “Nyorsǝ a mara Kaa ra me, ‘Ete yǝ ɗanyǝ ma mbuseya maɗɗa, pa ma mara u fiɗsǝ nsaad a ee Kaa ni ɓa.’ ”
5Pa Shaitan yaa too yaa sa ko a Ur ɗekɗek u Kaa wa yaa ti yǝ nǝɗ a ɗuura Hit ɓǝɗ Kaa Urshalima wa. 6Pa yaa nkee me, “Me ngǝ Au Kaa ya, a tuulǝ a putu. Me nyorsǝ me,
“ ‘Kiya nkee ɓantimira ɓisa a ɗuura nga, ɓǝ ngǝ pak ɓoti a nem ɓose, me ngǝ kwiu natsa sǝnga a dungate ra.’ ”
7Pa Yeso yaa kak me, “Nyorsǝ ɗǝm me, ‘Ngǝ kong pǝta Ankundi Kaa ɓǝnga ra.’ ”
8Ɗǝm Shaitan, yǝ toosǝ yaasa ko a yolko ɓoti, yaa weɗa nsaad kuɓsutu put taandi wa wa ma too usu. 9Yaa nkee me, “Nsaad mbu ɓa kǝ nǝngǝ na, me ngǝ kwirsǝ ngǝnǝ nyoon.”
10Yeso yaa nkee me, “A faɗ ngǝnǝ lee, Shaitan! Me nyorsǝ me, ‘A nyoo Ankundi Kaa ɓǝnga, ɗǝm sase seɗɗe kǝ nga sa tom hooto wa.’ ”
11Pa Shaitan yaa lee, ɗǝm ɓantimira Kaa ɓa ɓǝ wo ɓaa tom tinima.
Yeso ntii fǝɗkǝra
12Pa Yeso kurasǝ me ɓaa tung Yohanna a pursuna wa, yǝ nii yǝ kang a put Galili wa. 13Yǝ leesǝ Nazarat wa, yǝ ko yǝ kaɗ Kafarnahum, u yǝsaa kal aulaara a put Zebuluna ma Naptali wa, 14me a kung mbu nyorsǝ ma lau an nawanto Ishaya wa me,
15“A put Zebuluna ma put Naftali wa,
a ɗǝɗa aulaara wa, a kal Urdun wa,
Ɗǝm ma Galili u ɓaa ɓǝ maa Kaa ra ɓa,
16ɓaa ɓǝ kaɗsǝ a ham tebteb ɓa wa
ɓǝ wǝr kwangto ɗekɗek wan;
ɓǝ kaɗ a kuu woɗɗa wa,
pa waso ɗekɗek to too ɓǝn.”
17Tǝng a fer siso wa, Yeso yǝ ntii fǝɗkǝra yǝn nkee me, “Sǝ kon nfaata, me Kuɓsutu a liura wa yǝ won ngwang.”
Yeso yar emfǝɗkaa ɓisa ntiiri ɓa
18Yeso yǝsǝ a siko a kal aulaara Galili ra wa, yǝ wǝr koɓe ma tii raɓ, Siman u ɓan yarsǝsǝ me Bitrus wa ma ate isi Andarawus, ɓǝn yaɓ langtanga a aulaara, me ɓǝ ɓan ma nseeya ɓa. 19Pa Yeso yǝɓǝ nkee me, “Sawo sǝnǝ ɓǝɗǝ, kǝnǝsǝ ti kosǝ yar ɓeta ɓǝ wo a nani.” 20Nok kǝnso ɓǝ lee langtanga ɓosa ɓaa ɓǝɗǝ.
21Yǝ kosǝ a wiiyo wa, pa yǝ wǝr ɓaata raɓ koɓe ma tii, Yakubu au Zabadi ya ma ate isi Yohanna, ɓǝ ɗaan a kurnyaamo ma pap ɓose Zabadi, ɓǝn werkǝ langtanga ɓosa. Yeso yǝ ɓǝ ya ra, 22nok kǝnso ɓǝ lee kurnyaamo kawa ma pap ɓose pa ɓaa ɓǝɗǝ.
Yeso roɓ ɓaa ma siyo ɓa
23Yeso yǝ ɓaɗ a put Galili wa nsaad, yǝn fǝɗkǝ a hitsa kwau Yahudawa ɓosa, yǝn nkee mara kwalari kuɓsutu wa, ɗǝm yǝn roɓ hana nkaamǝra siyaa naara ma ɓaa sem kwakwa ra ɓa a ɗaaso ɓeta wa. 24Mara a ɗuura ira a yaasǝ nsaad a put Suriya wa, ɗǝm ɓeta ɓǝn wosǝsǝ ma ɓaa sem kwakwa ra ɓa ma nsaamse ɓolɓol, ɓaa ɓǝn weesǝ kongsa a maabiri ɓose, ma ɓaa ɓǝsǝ ma nsaamse ɓa, ma ɓan mǝrkǝm ɓa, ma sǝrsǝta yǝ ɓǝ roɓɓo. 25Ɓeta dem ɓǝ fiɗsǝ a put Galili wa, ma put Dikafolis wa, ma Urshalima, ma put Yahudiya wa, ma ɗǝm ura ɓǝsǝ tale sen Urdun wa ya, ɓaa ɓǝɗǝ.
Markert nå:
Matta 4: LLA
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©2023 Seed Company in collaboration with Language Developers and Bible Translators Association