Lukë 18
18
Plɛbʋbɔgätʋnyɔɔ nyra 'kusroŋlʋʋa tapönänä
1Jesu nya 'pala 'üün tapönänä 'klɩ ‑bɛ 'ɔ srara 'üün 'sɩrɩ 'ü käa' 'ümäa' nyɔsʋabibie 'plɔʋplɔʋ, 'üa 'klü 'nyɩ jä 'lɩ. 2'Ɔ ‑gbala 'üün ‑maa: «‑Gätʋnyɔɔ 'doo bä kä bätä 'dööa 'mlɩ. 'Ɔa ‑gbʋʋ 'nyɩ Nyɔsʋa ‑gba ‑a bä; ‑bɛ 'ɔ ma 'nyɩ ‑träärälɩ nyɔɔ ‑a. 3'Kusroŋlʋʋ 'doo bä kä bätäläa 'mlɩ; 'ɔ mö 'plɔʋplɔʋ nyɔɔlɔa ‑nyɛɛ 'kä 'ɔ ‑gbala 'ɔɔn ‑maa: ‹Ji 'mɩ ‑gba ‑a kä 'na ‑gä 'na 'nyüamlɩjraranyɔɔ ‑gä ‑gälɩ!› 4Blaraa 'doo nyɔɔlɔ blara 'i mi mi 'ɔa 'mʋgbɛ ‑nëma: ‹‑Bakää 'na ‑gbʋʋ 'nyɩ Nyɔsʋa ‑gba ‑a bä, ‑bɛ 'nyɩ ‑träärälɩ nyüü nɩ, 5'kusroŋlʋʋlɔ kʋa' ‑pɩ sɩara 'mɩ 'dɔ! 'Ia ‑gʋ 'nyaa 'ɔɔn ‑gbajia 'ɔmä 'ɔa ‑gä kä. ‑Maa ama 'nyɩ 'saa ‑a nʋ, 'ɔnya 'mɩ sɩaraa ‑gböösa!› » 6'Pläkänyɔɔ ‑nëma 'sɔɔwʋ: «'Ba 'nu wiili bʋbɔ ‑gätʋnyɔɔlɔ ‑gbaa' 'wli 'cɩcasa! 7‑Bɛ Nyɔsʋa le? 'Ɔa 'jülü 'ɔ 'baa' 'lɩ ü wea' ‑srɩ ‑bɛ ‑gbia 'sɔ nɩ, 'ɔ ‑nëmä 'üün 'üa ‑gä ‑a ‑nyɩ? 'Ɔnya dɛrɩ ‑wlɛa 'ɔmä 'üün ‑gbaji? 8'Amɔ 'n ‑gbala: 'ɔnya 'üa 'wli 'lɩa ‑gbi 'baa sɔsɔ. ‑Maa 'taɩn 'lɩ Nyɔɔa 'Jʋ 'mäa' ‑tɛ ‑tʋtʋ ‑gälɩ dɛrɩblöö nɩ, 'kä 'ɔnya 'lɩ nyɔsʋaplɛkänyüü jrä?»
Farisinyɔɔ nyra dapookälɩpɛrɛnyɔɔa tapönänä
9'Ɔnya 'pa tapönänä ‑mölöö 'ɔnya ‑gbala nyüülü jrea' 'saa 'ü ‑gäklɩ 'ünya ‑si 'üa ‑mölöö 'wʋ, i kä ‑gʋ 'ünyɩ 'daraa' 'üün nyüü: 10«Nyüü 'sɔɔ 'jra#18.10 'jra: 'Dʋgba 'wli Nyɔsʋaanyuku kpakulu bä kä Jerusalɛɛmë, 'ii nyüü ma 'jraa ‑bɛ 'ü bibie Nyɔsʋa. 'ünya mi Nyɔsʋaanyuku kpaku ‑wälɩ Nyɔsʋa bibrie. 'Doo bä Farisinyɔɔ, 'sɔɔa nʋ bä dapookälɩpɛrɛnyɔɔ. 11Farisinyɔɔlɔ nya 'nyüglö ‑bɛ 'ɔ bibrie Nyɔsʋa 'ɔa plɛklɩ#18.11 bibrie Nyɔsʋa 'ɔa plɛklɩ: 'I 'mrɛɛ i bä bɩa: «'ɔnya bereklɩ ‑bɛ 'ɔ bibie Nyɔsʋa». 'ɔ ‑nëma: ‹Nyɔsʋa, 'n 'trɛɛ ‑mɩ 'sɩrɩ 'nyɩa' nyüü ‑mölöö, ü 'jiea', ünyɩa' 'klɩgä, ü 'paaa' bätësa ‑a 'sa bä. 'N 'trɛɛ ‑mɩ ‑gböösa 'sɩrɩ 'nyɩa' ‑taa dapookälɩpɛrɛnyɔɔlɔa 'sa bä. 12'Sɔrɛa 'mlɩ, 'n pa su 'wʋ 'sɔɔwʋ, 'kä 'n 'pɛɛ diili kä 'fɩɔ 'n 'jääa', 'ia ‑pʋa ni.› 13Dapookälɩpɛrɛnyɔɔlɔ nɩ, 'ɔnya bereklɩ. 'Ɔnyɩ cɛa 'klɩ tɛtɛkʋ ‑a 'bata 'nɩmɩ, 'ɔa ‑tɔklʋ 'ɔ bɔtɔ#18.13 ‑tɔklʋ 'ɔ bɔtɔ: Juifëa ‑nyɛɛ, wii ma pa nyɔɔ ‑gba ‑gböösa 'asɩ 'ɔ nö. ‑bɛ 'ɔ nö: ‹Nyɔsʋa, 'jä 'na nyatɛrɩ! ‑Balʋnyɔɔ 'n bä!› » 14'Amɔ 'n ‑gbala: «‑Taa nyɔɔlɔ nɩ, 'ɔɔ ‑gäklɩ Nyɔsʋaa 'klʋɩ ‑gälɩ 'ɔnya mi ‑gbööli, ‑mää ‑mɔlɔ ‑a; 'be nyɔɔ o nyɔɔ 'jraraa' 'ɔa nyufa 'ɔnya 'wʋcierea, ‑maa nyɔɔlɔ 'ciea' 'ɔa nyufa 'wʋ 'ɔnya 'jraraa.»
Jesu 'paa' 'jüjie 'nɩ
Matiö 19.13-15; Marëkë 10.13-16
15Nyüü nya ja 'üa 'jüjie 'ɔa ‑nyɛɛ 'ɔmä 'üün klʋgbë ‑gälɩ 'pie. ‑Maa 'ɔa 'wʋnyɛrɛnyüü 'jäa' 'iin nɩ, 'ünya 'daa 'üün. 16‑Maa Jesu nya we 'jüjielü, 'ɔnya ‑gbala 'wʋnyɛrɛnyüülü: «'Ba 'cɛrɛ 'jü ‑wälɩ ü jijrö 'mɩ ‑gba, 'anyɩ kaka 'üün 'klɩ; 'be nyüülü bäa' 'üa 'saa, 'a 'üü kä Nyɔsʋaa 'kamaplä. 17'Cɩcasa 'n ‑gbala 'amɩ, nyɔɔ o nyɔɔ ‑nëmäa' 'jüjiea 'saa Nyɔsʋaa 'kamaplä ‑a 'kʋɛɛ nɩ, 'ɔ ‑nëmä ‑srɩɩ 'äa 'mlɩ ‑a 'jra.»
'Bɩɔjinyɔɔ
Matiö 19.16-30; Marëkë 10.17-31
18Juifëa 'kamanyɔɔ 'doo nya 'bete Jesu: «'Cɩca 'kpɩkpɩanyɔɔ, ‑asɩ 'nyaa nʋ ‑bɛ 'nyaa 'klälä 'nyɩa' blöröfa kä 'jä le?» 19'Iibäa' 'ɔɔn nɩ: «'Cɩcanyɔɔlɔ ‑daaraa' 'mɩ nɩ, ‑jre 'ia ‑gba? Nyɔsʋaa 'doo 'ɔɔ bä 'cɩcanyɔɔ! 20‑Jre ‑dɔlʋ 'daaa': ‹‑Nyɩ 'pa bätësa; ‑nyɩ 'bla nyɔɔ; ‑nyɩ 'jie; ‑nyɩ ‑tʋ nyɔɔ ‑gbagblɛ ‑gälɩ; ‑träärälɩ ‑na tʋ nyra ‑na 'yio#18.20 Ɛgësɔɔdë 10.12-16; Deteronɔɔmë 5.16-20..› » 21'Iibäa' nyɔɔlɔ nɩ: «I kä 'fɩɔ ‑daaa', 'n ‑träärälɩ 'iin kolo 'na nyɔkɔdɛɛ 'lɩ 'kä.» 22'Ɔ 'wlaraa' Jesu nya ‑gbala 'ɔɔn: «Dɛɛ 'dee ‑ka tɩɔ 'lɩ ‑mɩ: mi, 'pa diili kä 'fɩɔ ‑klaaa' 'peru, ‑nyɩ 'iin 'pʋablanyüü, ‑bɛ ‑mä 'bɩɔ cɛlɩ kälä, 'kä ‑jö ‑bɛ 'nyraa ‑mɔ 'mä 'nyɛ.» 23‑Maa 'ɔ 'nua' wiili Jesu 'paa' 'wli nɩ, 'i pala 'ɔɔn sɩɔ, 'be 'ɔ ji 'bɩɔ ‑gböösa.
24Jesu jrea' 'saa nyɔɔlɔ 'kpɔɔ ‑gböösa nɩ, 'ɔ ‑nëma: «'Inya 'lɩklaa 'kä 'bɩɔjinyüü 'mä Nyɔsʋaa 'kamapläa 'mlɩ pa! 25'I klalɩ 'kä Samoo 'mä 'kʋɛɛa ‑flääa 'mlɩ ‑srörö, ‑maa 'bɩɔjinyɔɔa ni nya 'wʋsia ɔma nëmä Nyɔsʋaa 'kamapläa 'mlɩ pa.» 26Nyüülü po ɩa' 'ɔɔn 'nyakli nya 'bete 'ɔɔn: «‑Mɔ 'plɛɛ nya ɔ 'lɩmlɩwʋ le?» 27'Ɔ ‑nëma: «'Inyɩ nʋnʋsa ‑a bä nyɔɔa ‑nyɛɛ, ‑maa Nyɔsʋaa ‑nyɛɛ diia 'fɩɔ bä nʋnʋsa.»
28'Iibäa' Piɛɛrë nɩ: «Tɛ 'lɩ, ‑na ‑gʋ a ‑gba ‑nyɛɛ ana dii 'kä, ‑bɛ a nyra ‑mɔ 'mä 'nyɛ.» 29'Ɔnya ‑gbala 'üün: «'Cɩcasa 'n ‑gbala 'amɩ: nyɔɔ ma ‑gbaa ‑nyɛɛ 'ɔa nyuku 'kä, 'aiɛ 'ɔa 'ŋlʋʋ, 'ɔa ‑wlajü, 'ɔa tʋɩɩ, 'ɔa 'jü, 'kä Nyɔsʋaa 'kamapläa ‑gʋ, 30i 'ɔ nëmäa' 'jä nya 'wʋsia ‑taa 'taɩn 'lɩ a kʋa' ‑plɩɩ ‑gälɩ 'ia 'mlɩ, 'kä 'ɔnya 'klälä 'nyɩa' blöröfa kä 'jä ‑srɩɩ ‑mɩlɩ bäa' dɛrɩ 'ia 'mlɩ.»
Tääfawʋ Jesu 'paa 'ɔa jäjäkʋ nyra 'sɩrɩ 'ɔmäa' 'kuaabresɔsɔkʋa ‑gä
Matiö 20.17-19; Marëkë 10.32-34
31Jesu nya were 'ɔa 'wʋnyɛrɛnyüü ‑pʋ nyüü 'sɔɔ ‑gasë ‑gba, 'ɔnya ‑gbala 'üün ‑maa: «‑Jää Jerusalɛɛmë a 'jraa, ‑bɛ wiili kä 'fɩɔ nyɔsʋaamlɩpalanyüü ‑jɩjraa' Nyɔɔa 'Jʋa ‑gʋ nɩ, 'inya nröröa. 32'Ünya 'ɔɔn nyüülü 'nyɩa' juifë bä kälɩ 'saraa, 'kä 'ünya 'ɔɔn srörö, 'kä 'ünya 'ɔɔn ‑gbigba nʋ, 'kä 'ünya 'ɔɔn ‑tatrii 'wʋ ‑gbagba. 33'Ünya 'ɔɔn ‑gbalɛfi ‑gälɩgbaa, 'kä 'ünya 'ɔɔn 'bla, ‑maa 'dugua jrüü tääa ‑srɩ 'lɩ 'ɔnya 'kuaabre sɔa.» 34‑Maa 'ɔa 'wʋnyɛrɛnyüü 'nyɩ 'ia 'mlɩ 'wli ‑a 'nu; 'ünyɩ wiili 'ɔ 'paa' a ‑gbaa 'wli ‑a 'nu, 'i ‑sisre 'üün ‑gba.
'Nɔnɔnyɔɔlɔ Jesu 'pʋɔa'
Matiö 20.29-34; Marëkë 10.46-52
35Jesu 'tɔa' Jerikoo nɩ, 'nɔnɔnyɔɔ 'doo kʋ ‑plɩɩ 'nyʋfɔ ‑gba ‑bɛ 'ɔ ‑sɛɛɛ mölii. 36'Ɔ 'nua' nyüü 'kɔkɔmlɛa wii 'wli ‑bɛ 'ü ‑sööa' nɩ, 'ɔnya 'bete nyüü wiili bäa' 'lɩ. 37'Ünya ‑gbala 'ɔɔn: «Nasarɛɛtënyɔɔ#18.37 Nasarɛɛtë: Galileea ‑tʋtʋ ‑gälɩa bätä. 'Ii Jesu 'bʋala. Jesu bäsaa 'ɔɔ ‑sööö.» 38'Ɔnya we: «Daviidëa 'Jʋ#18.38 Daviidëa 'Jʋ: 'Asɩ juifë were 'Lɩmlɩbanyɔɔ (Mesii), nyɔɔlɔ nëmäa' 'kɩɩ Daviidëa ‑glügbö 'klɩ ‑glooro., Jesu, 'jä 'na nyatɛrɩ!» 39Nyüülü bäa' 'ɔa 'klɩ fa 'ɔɔn 'mä dɛrɩ ɔ 'kpla 'mä; mlɩ 'ɔ ‑gbolo ‑bɛ 'ɔ 'kpöö ‑gböösa: «Daviidëa 'Jʋ, 'jä 'na nyatɛrɩ!» 40Jesu nya 'nyüglö, 'ɔnya ‑gbala 'üün ü ja nyɔɔlɔ. 'Ɔ 'tɔa' 'ɔa ‑gba nɩ, 'ɔnya 'bete 'ɔɔn ‑maa: 41«‑Asɩ ‑baata ‑a nʋ ‑mɩ le?» 'Iibäa' 'nɔnɔnyɔɔlɔ nɩ: «'Pläkänyɔɔ, ‑a 'jäkä!» 42Jesu nya ‑gbala 'ɔɔn: «'Jäkä! ‑Na nyɔsʋaplɛtorokʋ 'a ‑mɩ 'pʋɔ.» 43'A ‑plɩɩ 'ɔ kʋ 'ɔnya 'jäkä; ‑bɛ 'ɔ prɛ Jesu dɛrɩ 'ɔ 'bʋala Nyɔsʋaa 'nyrɩ. Nyüüa 'fɩɔ 'jäa' 'iin nɩ, 'ünya 'bʋala Nyɔsʋa.
Markert nå:
Lukë 18: Bakwé
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Wycliffe Bible Translators, Inc.