Joaancha Laenai 1
1
Cana Coaunera Ere
1-2Jauriaanejeeinte nenaa ne caa Erenaa.
Itolere, dede, cana rai chauratane, naaojoain coaaunaa Cana Coaunerane ajinihate nelu caa Cana Coaunera Ere, jelai Cana Coauneraneein.
3Nii jelai Erenaa quete itolere coauneratelu Cana Coaunera. Nihei nii colane necoaaunaain nei.
4Nii Erenaate ichaonaa teraneein ne.
Nii ichaonaa terate, cacha cononeein ne. 5Nii Erenaate, cononeein nocohena conaeraneein ne. Jacatiasihei nocohena tabai.
Charijieein chaainti cana rai chauratane conae caa enoto. Nii rijijieeinte cacha suujua conae nii Erenaa. Amuritonaa nainesihei nocohena tabai.
6-9Inae chauratane que turuelalajia nii cono esine, satiin cachaauru conaeranune janate, Joaan letoae Cana Coaunera, nii cono que ereerejeein cachaauru relaane, aonaain esenetaain coitucuuruhane coina.
10Nii Erenaa quete, chauratane coaunerate Cana Coaunera niqui. Nete cajiha chauratane que turuhane jana coitucuurene caa chauratane que nenacaauru, niicha coaunanohineein neeuruhane saijieein.
11Caa niicha coaaunai chauratane que turuhane janate, que jaolequiin raaurene cachaauru. 12Nii janate, atiin raain esenetaaure coroatajajei cachaauru. Nii corenihate, calaohi raane rijijieein acaauru rae Cana Coaunera. 13Joaereein cacha calaohi rijijieein nihei inae Cana Coaunera ere esenetaane cacha. Rauhijiriinte Cana Coaunera calaohi rijijieein nereein nii Erenaa esenetaane.
14Nii Erenaate, cachaneein nejanoaain canacaanu aina ichoae. Nii jaunna aina amuhemujueein coaracaanune jaun, leinjiin acaihanejein Cana Coaunera Calaohineein nihane coaracaanu canacaanu nota que, jerichanejeein Cana Coaunera rijijieein chabana nohanelanaala rauhijiriin canacaanu belaihane jaun. 15Nii janate, turuha uhane jana: “Taa quenara aitonajacoonra, ‘Canu caaijiete turuha ureein canu ajiniha nenaara’, naain aitonajacoon”, nae Joaan, nii Erenaa cojoeluhin.
16Inetono janonaa banate, satiin cacha belaain cana coroatajane nii Erenaa.
17Moisesa quete rai naitoonjoan berateein laenaeratelu niqui Cana Coaunera. Nete tonoraaurene cachaauru. Nii natiinte, atiin cachaauru belaiha ichaonaa rauhi que cachaauru relaane coina turue Cana Coaunera Calaohi Jesocurisito, nii cacha relaane jaan ichaonaa rauhi raauruha cachaaurune coina. 18Chabana Cana Coaunera coaracuruhi cachaauru niqui, nete inaca Cana Coaunera coitucuhane jaun, nii inaca que cana relae, acaihaniji Calaohineein nihana jaun.
Turuha urichaain Jesocurisitone beebejiha Joaan cacha cojunacaterane
19Joaan renete batirichuru letoaaure nii Jerosaleen nenacaauru bichauhenaauru: “Chaneeina”, naain Joaan caje bajaauruhane coina.
20Inae Joaan rene turuhin bajaauruhane janate: “Curisito nihaaunta”, naain rauhijiriin tonoranaaca Joaane jana:
21“Chaneein najian. Cana Coaunera ere bera Erihasineeina”, naain coaiteen bajaauruhane jana:
“Aca nihaaunta”, naain coaiteen tonoranaaca Joaane jana:
“Aca neneeine jaun, chaneein najian. Nii turuha niicha jerecuri canacaanuhacha cohajei Cana Coaunera ere beranecaai”, naauruhane janate:
“Ahan aihei, aca nihaaunta”, naain tonoranaaca coaiteenne jana:
22“Chaneein najian. Beeinete ne, bihacaanu canacaanu letoaurera raine coina. Chatoanai icharaneein najian”, naain bajaauruhane jana:
23“Canu quetejia, nerichaain leinjiin cacha, cacha areroo cuhin eeheehejeein cacha cotiaranura: ‘Turuha cana curaanaane jaan coero raujiauchera, naain beranura’, naa Isaihasi najaan nichaunra”, naain biha Joaane jana:
24-25“Chanuna jana chaaen, acau que cachaauru coujunacate, nii canaacha cohajei Mesihasi neein, niheichu Erihasi neein, niheichu leeocha Cana Coaunera ere bera profeta neein, naaonjoainuri neein nenaalanaala”, naain bajaauruha nii fariseeocuru letonocurune janate:
26“Acauhanau teeinne canu, cachaauru cojunacatiha baotisanajaaun. Inae turuha urichaain canu caaijie inaraacha coitucuhi cacha. 27Canu caaijiete turuha ureein, nii inoaelu nenaa cacha jataain canu amuritoeriin cocoainanacai”, naain acaauru rai be Joaan.
28Nitohaneeinte, Jorodaan jeraniha nenaa Betabarau niha Joaane jana, Jerosaleen caje uhin Joaan rene turuhin bajaauruhane janate: “Canune laen cacha areroo eeheehejeein cacha cotiaraneein neeunra”, naain acaauru rai be Joaan cacha coujunacatera.
Cana Coaunera carenero narejeen
29Nii cojoanoote, tajiha uujiha Cana Coaunera Calaohi Jesosone jana coaariin: “Notara Cana Coaunera carenero narejeeinna. Taate itolere caa chauratane que nenacaauru cachaauru caje osa itajeranu que oha cureeincha. 30Taa quenara aitonajacoonra, ‘Canu caijiete turuha ureein nii canu ajiniha nenaa cacha’, naain aitonajacoon. 31Inae niqui inoaelu caje coaauneein nesianiha niqui, nete caa cacaaijie turuha uhe. Canu netonaichu coitucuhaunlu jauriaa nejeein. Jianacoon cana mitaeranu que Cana Coaunera letononeein nihane coitucuhaunlu. Nena laen inae ena coitucuun, carai biha caletoaerana jaun. Isaraele cocoaichacuru que coitucueratihanune coinate, carai beein caletoae caletoaera. 32-33Osa caje cana mitaeranu que letononeein nihane coitucuhaunlu niqui. Nena, ‘Leinjiin cacha choae fauha uha serori rijijiein Cana Coaunera Suujuenete, Cana Coaunera Suujue que coujunacatihate aicheeincha’, naain carai biha caletoaerana jaun, choae fauha uha dede caje serori rijijieeine coaracaaunne jaunna coitucuun. 34Nii jaunna, ‘Acate Cana Coaunera Calaohi necaihara’, naaun, nitohanihane coaracaaunne jaun”, naain be Joaan.
Ichoachania Jesoso Ere tonoraeraauru
35Nii cojoanoote jelaiha Betabarau coroatajai nere tonoraeraauru Simoon Fedoro ocoala Anderesi, chaaen canu, naojoain nihacaanu Joaan ainane jana, 36situha uhe Cana Coaunera Calaohi Jesoso. Nii janate: “Taa Cana Coaunera carenero narejeen coaracuche”, naain biha Joaan canacaanu raine jaun, 37Cana Coaunera Calaohi Jesoso coaariin caaijie cuhacaanu. 38Nitohaneein caaijie cuhacaanune janate, jaotoraain canacaanu coaariin:
“Chate ichaquiche niriirijieeinta cachaauru”, naa Cana Coaunera Calaohi Jesoso canacaanu raine jana:
“Chute neei aaita cacha relaera”, naacaanune jana:
39“Chajaauchetejian coanicha”, naain canacaanu amaane jana, inae enuna cacoijihu teejia enotone jaun, cuu aina sonafaacaanu.
40-41Nii baihate, nihana Simoon Fedoro ariha cue nii Anderesi. Ariin, ruhin: “Inae canaacha cohajei jianacoon cana mitaeranu que Cana Coaunera letono Curisito eruhacaanura”, naain nihana Simoon Fedoro rai biha cue Anderesi.
42Nii baihate, Cana Coaunera Calaohi Jesoso rene, Simoon Fedoro turuaa uha Anderesine jana, Simoon coaariin:
“Jonasi calaohi Simoonneein niqui, nete Fedoro nereein ichurujuara”, naain Fedoroneein curuaate Cana Coaunera Calaohi Jesoso, aca laraajiin nere beraneein nerichaaine coitucuhane jaun.
Ferifi aina Natanaaeli cotihaca Cana Coaunera Calaohi Jesosone
43-46Nii cojoanoote Calileea batane que cuna jaaun, Ferifi aina itaque tacaauruhane jaun: “Caniha neeorihura”, nae Cana Coaunera Calaohi Jesoso, Ferifi rai.
Fedorooru nese Betesaaida caje unaa nii Ferifi netonai.
Niritiin cotihacane jaunte, Natanaaeli ariha cue Ferifi. Ariin, eruhin: “Inae turuha nii Cana Coaunera Quiricha Inoaesi cuhane turuha uha niicha jerecuri eruhacaanura. Nii cacha canacaanuhacha eruhite, Jose calaohi Nasarete cocoaichanera”, naain biha Ferifi, Natanaaeli raine jana jetaote:
“Chaquete nelatere Nasarete cocoaichata”, naane jana jetao:
“Chajaachaautejian coanicha”, naa Ferifine jaun, Ferifi jiniichaain uhin turuha uhe.
47Nii janate, inae rohan nichuuntaa Natanaaeline jana: “Nocoa inae uha Isaraele cocoaicha esine coritanacae lanaala nenaara”, naa Cana Coaunera Calaohi Jesosone janate:
48“Inasiinte cacoitucuhita. Cacoitucuhi inachute”, naane janate:
“Eejeen aihanura. Ii cotihaca uha Ferifine ajinihana inae ii coitucuun. Nii uheraneein curajaain enuha asaae neeine janana, ichoharajeeunra”, naane janate:
49“Iite Cana Coaunera Calaohineein canacaanuhacha cohajei Isaraele curaanaa Reey neeicha cacha relaera”, naa Jesoso rai Natanaaeline jana:
50“Nii uhera asaae neeine coaracaaunne que aitocoaunne najaanchana canu esenetaai. Inae jataain nii amuritoeriin coaariquiincha. 51Rauhijiriine aitoonra. Inae nejoracaa dede bacuujuane janate inaraacha cohajei Cacha Calaohi nichaaunne choae fauhin, jelaiha iniha cuuruha Cana Coaunera letonocuru anjeraaurune coaariquiincha”, nae Cana Coaunera Calaohi Jesoso.
Markert nå:
Joaancha Laenai 1: URA
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2005, 2024, Wycliffe Bible Translators, Inc.
