Pe eya 15
15
Wak tuli ge Dok ne ke ne Abram
1Go̰r kaŋ mbe ma no go, Bage ɗiŋnedin dyan tene Abram ta daalam zi, jan na go: «Abram! Sya vo to, mbi mo ɓiyaar ne, mo tok-koyom mbo kat ɓaŋlaŋ ge be to.» 2Abram gwan ne na janna go: «Mbi Bageyal, Bage ɗiŋnedin, mo mbo hon mbi da ɗaa? Mbi an ne go be vya, bage zam mbi joo, a Eliyezer ndu ge suwal Damas ne.» 3Gwan jan go: «Ndi, mo be hon mbi hir ne go to, a mbi dore ge ne tó mbi diŋ mbo zam mbi joo ne.» 4Bage ɗiŋnedin jan na go: «A be na zam mo joo ne to, a vya ge ne tó ne mo zi zam mo joo ne.» 5Na sḛ mbo ne na ya zum, jan na go: «Kyare swaga ndilla pḭr digi gale, isi guwa̰r ma, kadɗa mo mbya isi nama isi.» Go̰r go gwan jan na ta uwale: «Mo pehir mbo kat go no ca.»#Rom 4:18, Ibr 11:12. 6Abram hon fareba fare janna ge Bage ɗiŋnedin ne pal. Da ne pe no, Bage ɗiŋnedin ndi no go, na ndu ge dosol ne#Rom 4:3,9,22, Gal 3:6, Yak 2:23.. 7Bage ɗiŋnedin jan na go uwale: «Mbi Bage ɗiŋnedin, mbi ndage mo ne suwal Ur ge Kaldeya ma ne ya ne, ndwara hon mo suwal mbe no joo.» 8Abram ele na go: «O Bageyal, Bage ɗiŋnedin, a ma kaŋ ŋgay ne go suwal mbe no mbo gá mbi joo ɗaa?» 9Bage ɗiŋnedin jan na go: «Wa̰ nday kale ge del ataa ɗu, ɓiya̰ ge del ataa ɗu, gamla ge del ataa ɗu, maale ɗu, ne tuk vya ɗu me.» 10Abram abe kavaar mbe ma, kun nama seɗe ne tuŋsi go, e nama ta ndwara zi. Amma be kun njoole ma se to. 11Boge ma ka sugi kan bama koo ge kavaar mbe ma pal, Abram ka yan nama uzi.
12Swaga ge gyala ne ka mbo dimma go ɗe, Abram son dam vop, vo ne tṵ ge ɗeɗek wan na. 13Bage ɗiŋnedin jan na go: «Kwa yaɗat go, mo pehir ma mbo mbo kat mbay suwal ge ɗogle ya, a mbo gá mo̰r suwal mbe go, a mbo ke nama yál ɗiŋ del kikis anda#Wat 1:1-14, Tkm 7:6.#Wat 12:40-41, Tkm 7:7.. 14Swaga ge mbi ne mbo mḛre naa ge a ne ke nama mo̰r ma ya ɗe, a mbo gwan’a ne kaŋ kwaɗa ma gḛ. 15Amma mo ɗe, ne halas mo mbo jyat mo bá ma pe ya, sabar ge mo ne zi, a mbo mbul mo ne laar saal. 16Ge doŋ pe ge anda go gale, nama sḛ ma ba ɗage gwan’a go go. Ago ya̰l kerra ge Amoriya ma ne be mbyat tap to gale.»
17Swaga ge gyala ne di, swaga ne sebe se ɗe, ndi, ol wak yeŋgel ge ne sor ol ma ne ol-swama ka kaleya kavaar ge ne kṵ se ma buwal zi. 18Dam mbe go no, Bage ɗiŋnedin ke wak tuli ne Abram, jan na go: «Mbi ho̰ suwal mbe no mo pehir ma, ne maŋgaɗam ge suwal Masar ne wak ya ɗiŋ mbo ya maŋgaɗam ga̰l Efrat go. 19Suwal ge Keniya ma ne, ge Keniziya ma ne, ge Kadmoniya ma ne, 20ge Hittitiya ma ne, ge Feresi ma ne, ge Refayim ma ne, 21ge Amoriya ma ne, ge Kanan ma ne, ge Girgasiya ma ne, ne ge Yebus ma ne.»
Markert nå:
Pe eya 15: FGN2013
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
La Bible en langue Kim © Alliance Biblique du Tchad, 2013.