Pe eya 23
23
Abraham yat taal ge mbul Sara
1Sara ke del kis para wara azi para ɓyalar. 2Sara sú suwal Kiryat-Arba go, ndwara go Hebron, suwal Kanan go. Abraham e na gwale siya fyalla. 3Abraham ɗage ne swaga siya ge na gwale ne ya, mbo ya jan Hittitiya ma go: 4«Mbi gwasal ne, mbi ka mbay ne aŋ buwal zi baŋ, aŋ ho̰ me mbi taal yatɗa ge aŋ suwal go, ne da pe, mbi ba mbul mbi gwale go.» 5Hittitiya ma jan Abraham go: 6«Za̰ i gale, bageyal! Mo ndu ga̰l ge Dok ne ne ne i buwal zi. Mbu mo gwale ge i táál siya a̰me ge mo ne ndil na ya kwaɗa go. Ago ndu a̰me ne i buwal zi ge ba mbo kuri go mo mbu mo gwale ge i táál siya se to, a to.»
7Abraham ɗage, mbo gur na koo naa ge suwal ma ndwara se, Hittitiya ma ndwara se. 8Na sḛ jan nama go: «Kadɗa aŋ vin mbi ya go, mbi mbu mbi gwale, aŋ mbo e mbi fare no ge Efron ge Sohar vya ta go, 9na ho̰ mbi njal pṵṵl ge Makpela ne, ge ne na gaaso wak go yatɗa. Na ho̰ mbi na na ye pal tem, aŋ ndwara go, ne da pe táál siya mbe ba ga ge mbi ne.»
10Efron ge Hittitiya ne katɗa na kaam buwal zi me. Gwan ne Abraham fare janna ne ka̰l ndaar ge go, naa ge ne ka ne tandal viya̰ wak pal ma za̰ na pet, jan go: 11«A go to, bageyal, za̰ mbi gale! Mbi hon mo gaaso mbe, ne njal pṵṵl ge ne zi mbe me. Mbi hon mo na ya go ge mbi naa ge suwal ma ndwara go mwaɗak, mbu mo gwale na zi.»
12Abraham gwan mbo gur na koo naa ge suwal ma ndwara se, 13jan Efron fare ge naa ge suwal ma ndwara se mwaɗak go: «Mbi kaɗe mo, za̰ mbi me! Vḭ ame yé ge gaaso mbe ne, mbi ba ɗage mbul mbi gwale na zi.» 14Efron gwan ne Abraham janna go: 15«Mbi bageyal za̰ mbi gale! Swaga ge ne yat gursu saal kikis anda gagak, ke nee ne mo da! Mbu mo gwale!» 16Abraham vin Efron fare, isi na gursu saal ge na sḛ ne jya̰ mbe na kaam ma ndwara go, hon na, ndwara go gursu saal kikis anda, bware erra ge naa ge ke tujar ma ne zam na pal. 17A go no, gaaso pul ge Efron ne, ge ne Makpela go, ge ne Mamre ndwara ŋga le ge ham ge pe go, ndwara go, gaaso pul, ne njal pṵṵl ge ne gaaso mbe zi, ne uwara ge ne gaaso mbe zi ma mwaɗak, 18a gá ge Abraham ne no, ge Hittitiya ma ge ne mbo ya tandal viya̰ wak go ma pet ndwara go no pet.
19Go̰r go, Abraham mbul na gwale Sara ge táál siya ge gaaso ge Makpela ne zi, na ge ne Mamre ndwara ŋga, ndwara go Hebron, suwal Kanan go. 20Gaaso mbe ma ne njal pṵṵl ge ne gaaso mbe zi, a gá Abraham swaga mbul ta. Ago yá na da ne Hittitiya ma tok go.
Markert nå:
Pe eya 23: FGN2013
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
La Bible en langue Kim © Alliance Biblique du Tchad, 2013.