METIU 20
20
Darkha toipyii lungto tha katiimei
1“Kadapokii sating gam sazyii tei mei hangninanii mpou mah darkha toipyiilu kito tha tiimatu tang karam jangpii tingchoi nukii tat patsii tha katiimeigo ngat katu takumle. 2Mpounii ahnyiigo ting- neikii pumjang tei dinar#dinar hangninii ai tingneikii pumjang maile hangninii pyiitangle katupii mazhii takle, darkha toipyiilu kikii tha tiimatu tang karam jangpii lang matu takle. 3Sateichii pung sokchyii ki mpounii saliki kajang tatpat loisanii mei kangka teikito makado tiisupii satsii kalei tei mpounii ngou wotakle. 4Teito mpounii ahnyii dakii tamle, ‘gonyiido maasii darkha toipyiilu kito tha tiitulo, sateichii pyii kamajyii tei Inii gonyiigo pyii tangle’ sii tam takle; teipiinii ahnyiinii tat tutakle. 5Sateichii mpounii pung keariisiina- khii ki sateichii pung tumkii tatpat loisanii nu-takumpii tiitakle. 6Sa- teichii pung mangii doukii mpounii salikijang tat kapat tinglang kak, teikito mei kangka mah kado tiisupii satjousii kalei tei mpounii ngou wosii, mpounii ahnyii dakii tamle, ‘Gonyiinii aikito mah kado tiisupii tingna majang kadajangpii tinglang tiikadaksii leipo?’ 7Ahnyiinii mpou dakii tamle, ‘mei kaniido nyiigo ngat makle,’ bitakle, teitiileponii, ‘gonyiido darkha toipyiilu kitei maasii tha tii- tulo’ sii mpounii ahnyii dakii tamle.
8“Sateichii tingkhiilam liit sek-kii darkha toipyiilu mah abangpii teinii mpou mah mahbam kajumei dakii tamle, ‘tha katiimei hang gotei lat-tosii ahnyiimah ajang-mai tei akatkatsang sekto housii karei reisang katang tei ahnyiigo pyii ailo.’ 9Sateichii pung mangii doukanii tha tiikahou mei gotei dinar nsang-nsang pyiitakle. 10aitoinii ngat karei reisang mei teinii kapat tinglang ki, ahnyiinii kisii doutang manasii ahnyiinii maningle, nlenii ahnyii hang godo dinar nsang nsang pyii- takle dinar#dinar hangninii ai tingneikii pumjang maile nsang nsang pyiitakle. 11Sateichii ahnyiinii teitei doukalu kito ki abangpii phyiiryii teikii manam marangsii tamle, 12‘Ai kana nasang mei hang ainii pungkii roinii atha tiile, sateichii nangnii ahnyiigo tingneikii mah kamage ninado tingthangnii karu leh wokalu nyiigo masamsii poi wotakle.’
13“Nlenii ahnyii kak kito mei hangniniigo mpounii khekalatle, ‘Kanghemei, Inii n-go mah kado tiima makle, dinar hangninii pyii- tanglesii nei karashii makpo? 14Gonyii mah tei poisii ki tat tulo, kana nasang meigodo gonyiigo Inii kapyii masam tei pyiitanglesii Inii sat-to takle. 15Gumah sanah tei Inii tiikanyii tiitang karam tei gurang makde? Mak-kii Inii mah kalaa jangpii nang maimhii leipo?’
16“Teijangpii kana meinii karei, sateichii karei meinii kana tangle.”
Jisunii mpoumah katai mah kaang kito hangtum kashang tiisii katam
(Mrk 10.32-34; Luk 18.31-34)
17Sateichii Jisunii Jerosalem ki tatpi kalei kak, mpounii boumei keariisiinakhiigo poitaam wosii pwidito mpounii ahnyii dakii tamle. 18“Julo nyii Jerosalemki tatpi leile; sateichii meinah sapfii mpou gotei Tingdimei ninado ajaitingshang kati ojamei dakii pyiitoi aitangle; satei- chii ahnyiinii mpougo gijyiile katupii tam mashyii tangle, 19sateichii mpougo Lui kakimei dakii hoksii nuimatu tang karam jangpii, lak matutang karam jangpii, sateichii Krosh gamto gi matu tang karam jangpii pyiitoi aitangle, sateichii leimik hangtum kashang piinei mpounii ringkhii tangle.”
Jems nei Jon pwinii Jisu dato kakhang
(Mrk 10.35-45)
20Teito Zebedi-nou teinii mpoupei nah sapfiimei hangna go kaswisii Jisuda gongsii mpou doito kok- kumsii mpoupeinii mpou dato mah hangninii khangle.
21Sateichii mpounii mpoupei dakii tamle, “Nang kadapei marei- po?” Mpoupeinii mpou dakii tamle, “Gomah sating sazyii kito gunah sapfii mpou hangna ai, hangninanii gobah ajiilamto, sateichii hangni- nanii go-bah abilamto bam matu tang karam jangpii tiidaseilo.”
22Nlenii Jisunii khekalatle, “Gonyiinii khang kalei tei gonyiinii timakle. Inii sak tang karam peek tei gonyiinii sakpei wobuipo?” Ahnyiinii mpougo khekalatle, “Nyiinii ngam wobuile.”
23Mpounii ahnyii dakii tamle, “Gonyiinii gumah peek tei saknii sak tangle, nlenii gubah ajiilamto ninado gubah abilamto bam tang karam teinii, Inii pyiitang karam mah makle, nlenii ainii gu pfiinii mbam tang karam jangpii tiikadakai kabam mei jangpiiniile.”
24Sateichii mei kearii teinii ai shii wosek-kii, ahnyii teinii asana hangna gotei rarhii takle. 25Nlenii Jisunii ahnyiigo lat ndwisii tamle, “Lui kakimei mah apum katiimei teinii ahnyii phyiiryiito apum tiile, sateichii ahnyii mah doi majang katatmei teinii ahnyii phyiiryiito teimaham tei jumle, katu tei gonyiinii tile. 26Gonyii kak kitonii teitii lakle, nlenii gonyii kak kito kadi mikanyiimei hangteinii gonyii nga kangamei tiitang karamle; 27satei- chii gonyii kak kito karei reisang tiikanyiimei teinii gonyii mah kika- leimei tiitang karamle. 28Teita- kumpii meinah sapfii mpou teinii nga-ngamatu tang karam jangpii gong makle, nlenii nga ngatang karam jangpii sateichii mei hang- kago kaleipyii tang karam jangpii mpou mah karing tei pyiilesii gongle.”
Jisunii mik kachetmei hangnago tii mbikapyii
(Mrk 10.46-52; Luk 18.35-43)
29Sateichii ahnyiinii Jeriko kito tat kapat tinglang kak, meimoi moisangnii mpou-tai swi wotakle. 30Sateichii julo, pwidi kuto bam kalei mik kachetmei hangnanii Jisu tat kalei koi tei shii wosek-kii, saa takle, “Devit nah sapfii mpou, abangpii, nyiigo lungsyii pyiilo!”
31Sateichii meimoi teinii malhii sulosii ahnyiigo n-gile; nlenii ah nei hangnanii kisii kisii saa tutakle, “Devit nah sapfii mpou, Bangpii, nyiigo lungsyii pyiilo!”
32Teito Jisunii satsii ahnyiigo latsii tamle, “Inii gonei jangpii kadapei tiikasei mareipo?”
33Mpoupiinanii mpou dakii tamle, “Bangpii, nei mik rak matulo!” 34Teito Jisunii mpoupiina phyiiryii- kii lungkasyii tei patsii mpoupiina mah mik tei dengpyii takle, sateichii teisek-ki mpoupiinanii mik tei ngou wotakle sateichii mpoupiinanii mpou-tai swi wotakle.
Obecnie wybrane:
METIU 20: NAG2
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Maram Naga, KARANU KABI SAMTAM © Bible Society of India, 2007.