LUK 8
8
Jisu le Kanruai Numei
1Hingahin a hongni, Puma ning khopuiale khuo sunga Pathian rengram chong thiang arilaihan ama thiamruoi somleiningai om Puma nuk an lui jui. 2Hana numei khat a nat damthei luinuha amandam seitan sari Magdalen ning Meri tenna an phut aluinotsuak. 3Herod rengpa thuaia a om Chuza a numei Joanna le Susana, hale a dang numeitam ning Jisu le a thiamruoingai ha sep a an lui tho pe jui.
Chimuru Tetan na
(Mat. 13:1-9; Mrk. 4:1-9)
4Han khopui rakip mitamin Jisu jiang an hong pha han Jisun an jet thei na tetanna anmani jiang aripe.
5“Chimuru vorning achimuru vor ranga a hong suak, hale ama ning a vorra, aviar ning lampuia a chul han mi ning anluisir, hale vate ning om anrutjui. 6Chimuru aviar ko lung karra aluichulla among, tak-ha ram ajillui jarra a rajung che na om mak a hong charjui. 7Chimuru aviar ning lingbuk karra a chul, a hongmong tak-ha lingin akhudea a hong thi khir jui. 8Chimuru aviar ningko simleihuina a thiang achula asat ahongmongjui, a chang khat reakhatje ahongrajui.”
Tetan na Lungdo
9Puma thiamruoingain ama jiang andingkella, tetanna hi athinga imo ani? 10Han puma ning anmani jiang a ti, Pathian rengram ranga chong thiang, chong ruk nang ni jiang a na pek jui tak-ha a dang ngainingko an en tak-ha mu ma u, hale an ngai tak-ha jet ma u.
Chimuru Tetan na Ruia Jisun Ari
(Mat. 13:18-23; Mrk. 4:13-20)
11Tetan na kariha hi ani; Chimu ruha Pathian chong thiang ha ani, 12lampuia a chul chimuruha Pathian chong ko a jet, anngaiom an ngai, tak-ha seitan ning an lung sunga a lut Puma chong ha man lut pemakna a thope ani. 13Lungchunga a chul chimu han Pathian chong ko an jet, an lui om an lui ningsat a tak-ha an lung ril tungako thun ma u, anmanin phatbongkhat rang jak a an luingai, mathemna a hong karra Pathian chong ha luijuitormau. 14Lingbuk karra a chul chimulamha Pathian chong ko anjetbak a ramuol chunga huinale nei na lamin atorra Pathian jiang a ra a om torlui ngaiha anni. 15Simlei a thiang na mun na a chul chimu rulam a thiang chongaiha an jet karra an lung sunga a lut le adik a an luia chong anjuia a ra om mingai ha anni.
Meivar Khude
(Mrk. 4:21-25)
16Tu aninnum thoumei a sit karra bellin khupdemau, hale, khancham nuai a siakmau, tak-ha a var ha mi ning an mu na ranga thaimei siakna chunga ansiak ani.
17Ajarko ri lui rang chong ruk i te khat om mak, hale jet lui ranga le rijot lui rang i te khat om mak.
18Hiva jarra nang ni ija mo nanngai, “Kan ning theiru, ajarko, a nei ama jiang pek nati, hale a nei chillui ama ning om ka nei ti na ta alapek rang ke.”
Jisu Anule A naipangai
(Mat. 12:46-50; Mrk. 3:31-35)
19Hava rakip suale Jisu a nu le anaipangai ning an honga, an hongtok, tak-ha mi antam reia anmanin Jisu ha kanmutorlai ma u. 20“Han Jisu a nu le a pangai ning va ralla an om na kanmupuiranga chong an lui pek.”
21Han Jisu ning anmani jiang a hong sang, “Puma chong a ngai, a jui chuan a tho ngai ha kei ka nu le ka u ka naingai anni.”
Jisun Ruo Le Phaivuo Amanbang
(Mat. 8:23-27; Mrk. 4:35-41)
22Nikhat Jisu le a thiamruoingai rokuang anluichuanga anmani jiang alui tipe, keini tuivaral tiangson che rei, han anmanin rokuanga an hong jui. 23Anmanin rokuanga anhonglai tak han Jisu hi ajalla alui om jui, hava lai tak han rothiphaivo kanchella adik khan alui ranga rokuang sunga tui ahonglutjui. Thiamruoingain a tam anluichitjui. 24Han thiamruoi khat ning a chea Jisu ha a kei thuia, “Puma, Puma, keini hi thirang kan ni jui;” han Jisun a thuia ruale phaivou ha aluikhapjui, han anmani a hip a dai tak a an om jui. 25Han a man a ti, “Thiamruoi ngai jiang nang ni nan takngai ha hon mo nansiakjui.” Han thiamruoi rakip ning a tam anluichitjui. Hivahi imimo ani? Ruale phaivou ning om a chong anjuihi.
Satmak Thavang Choi Pasal Jisun A mandam
(Mat. 8:28-34; Mrk. 5:1-20)
26Han Jisu le a thiamruoingai le Gerasene khopui hin Galili va ralla an hong tung jui. 27Jisun hingahin khopuia a hong lut karra Seitanning i choi mi khat a kan tong pui. 28A ma ning Jisu ha a mu karra a khek ahongchap Jisu madonna rasa ringa alui ti, “O, a sang tak a om Pathian nai nang le kei imo kan suak, kein nang kinangaituihi, kei hi na man pong lai maro.” 29Han Puman Seitan ha suak taro atipejui, ajarko Seitanning ama ha a manponga alui om, han mingain ama ha thirruia an khit innom Seitan in aphoisat mi hi ramtiangjak aluimanche ani.
30Han Jisu ning ama jiang ading kel, “Naming imo anti?” Hale a man alui ti, “Kaming a tam anti,” ajarko Seitanngai ning ama jiang anluilut. 31Han Seitanngai ning Jisu jiang anmathem, keini hi mei khurra namasul maro tia an lui ri.
32Han tangkor khat voktam selpa khat alui om, hava han Seitanngain chekanti tia Jisu jiang an ri a Jisun a jot pe jui. 33Hale Seitanngain mipa tenna an phut an suak a vokngai jiang an lut karra, voktam ngaiha an lui kan se jui, bual karra an thei an theia an lut jui.
34Vokselpaning imo a suak tihi alui jet a khopuirakip hava chong ha a ri mathangjui. 35Hingahin a suak chuan ngaiha en ranga mitam an lui hong Jisu jiang an hong karra Seitanning alui man vetpa puan si diar kei asatak akai a Jisu jiang a huia alui om ha an mu karra a tam an chitjui. 36Hale Seitan in achoipa ija mo asat ti ha amungain mi jiang an lui ripe jui. 37Han Gerasene khopuia a om ngain Jisu ha atam an chit jarra khopui tenna an phut chetaro antipejui, han Jisun rokuang a chuanga a nuk a hong kir jui. 38Seitan a lut pasalham Jisu nuk ha juirong tia aluirijui. 39Tak-ha Jisun ama ha a mak alui ti, “Na inna kirtaro, han Pathian in nang chuanga hiva duk chuan a lian anathopehi vari manthang taro. Hingahin ama ning khopuirakip Jisu ning ama chunga athopena rakip ha a ri manthangjui.”
Jairos Anainu Le Jisu Puansit Numei
(Mat. 9:18-26; Mrk. 5:21-43)
40Hingahin Jisu ning a hong karra mitamin ama ha a hui a andonjui, ajarko mitamin Puma ha an lui ngak ani. 41Enru Yairu anti pasalkhat alui om, ama hi sainagokhin reng ani, hale a man Jisu ke thuaija akunna ama inna na hong pero tia a mathem. 42Ajarko ama a numeinai khat jak kum somleini jak alani nu ha thirang a tho jui. Hiva jarra mitam ning Jisu ha anhir khap a an om ani.
43Hava lai tak kumsomleini thi acharra a nat an khat alui om, ama hi thiampungai jiang a tor khan na atinga a lui kan en in num damtorlui ani. 44Hava numeinuning Jisu nuk tiang mitam karra alui honga Jisu puanmor ruk a asitjui, havalaitak han a thi alui charha a dam jui. 45Han Jisu ning a dingkel la, tu angkhat ning kei nannasit mo? Mirakipning anluidajui, han Pitar in a ti, “Puma mitamngain nang annasitjui.” 46Ajarko ka ranak aviar a che ka jet, “Tu ang khat in annasitjui.”
47Han numei nainuhan annajetjui tia a chit reia aluikannikjui, hale Jisu madonna ahongkiakjui, a man ija mo Puma puan ka sit le hinghin ka dam lenjui tia mitam jiang a ripe jui. 48Jisu ning hava nujiang a ti, “Kanainu, na takngai na han nang a na mandamjui, a hip a chetaro.”
49Jisu ning hiva chong hi aluirilai, “Yairu ha nanainu a thi jui” tia chong a hong jui, “Thiampu tok lai maro.”
50Jisu ning a jet karra Yairu jiang a ti, “Chitmaro, takjak ha ngairo, ama aladamrangke.”
51Han Jisu ning Yairu Inn a tung karra Johon, Pitar, Jems hale, insung nai pang a nu apalejak aluilutpui jui. 52Mirakip ning chajang shiarra an chap naipangnuha an lui oi, han Jisun a ti, “Chapmaru, naipangnuhi a jalke.”
53Anmanin Jisu ha an lui nuiso, ajarko naipangnuhi a thi jui tihi anjetsa ani. 54Han Jisu ning a kut a o va alui kei thui, Alei thuitaro. 55Han a hong thui jui, Jisu ning atipe ama jiang chak le nek pekru. 56Hingahin a suak rakip an mu karra a nu a pa ngain pum ngak an ngak jui, hiva rakip hi tu khat jiang om manjet maru tia Jisu ning anmani jiang chong a bejui.
Obecnie wybrane:
LUK 8: AIMOLBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.