Luk 23
23
Yisa zani Gomna Pailɛt tooni
(Matiu 27.1-2, 11-14; Maak 15.1-5; Jɔn 18.28-38)
1Ka niriba maa zaa daa yiɣisi zaŋ Yisa tahi Gomna Pailɛt sani 2nti gbaag’ o fiɣisibu yɛra, “Ti nya ka doo ŋɔ birigirila ti zuliya ŋɔ zaa, ka yɛri ni ti di yo farigu Naa Siiza sani, ka lan yɛri ni ŋuna n-nyɛ Masia ni naa.”
3Ka Gomna Pailɛt daa bɔh’ o, “A shiri nyɛla Yɛhudianim’ Naa?”
Ka Yisa garigi yɛl’ o, “A ni yɛli shɛm maa n-nyɛ li.”
4Ka Gomna Pailɛt yɛli maligumaaniba kpamba mini salo maa, “M bi nya doo ŋɔ taali.”
5Amaa ka bɛ nini kul mooi ka bɛ mɔhiri vuri yɛra, “O piligila o wuhibu maa Galili n-wuhi li Judia tinsi zaa ni zaŋna hal ti paai kpe, ka di zuɣu chɛ ka niriba taari duŋ.”
Bɛ tahi Yisa Naa Hɛrɔd sani
6Gomna Pailɛt ni daa wum lala maa ka o bɔhi ni Yisa nyɛla Galili nira? 7O ni daa baŋ ni Yisa nyɛla Naa Hɛrɔd sulinsi ni nira, ka o chɛ ka bɛ zaŋ o tahi Naa Hɛrɔd sani, dama Naa Hɛrɔd gba daa kala Jɛrusalɛm na di saha maa. 8Naa Hɛrɔd ni daa ti nya Yisa di daa niŋ o nyaɣisim pam, dama o daa pun wum’ o yɛla ka di wɔɣa, ka bɔri ni o nya o ni o nini, ka daa lan tɛhiri ni di pa shɛli Yisa ni tum alahiziba tuun’ shɛli ka o nya. 9Lala zuɣu ka o daa bɔhi Yisa bɔhigu pam, amaa ka o bi garig’ o. 10Ka maligumaaniba kpamba mini Naawuni zaligubaŋdib’ daa ʒe nimaani kul fiɣisir’ o ni suhuyiɣisili. 11Naa Hɛrɔd min’ o tɔbbihi daa ʒiɛm Yisa ka mal’ o ansarisi; ka daa zaŋ kpar’ viɛlli yɛl’ o, ka chɛ ka bɛ zaŋ o labi Gomna Pailɛt sani. 12Naa Hɛrɔd mini Gomna Pailɛt daa malila dimdi ni taba, amaa dindali maa zaŋ chana bɛ daa laɣila tab’ zɔri.
Bɛ bahi noli ni bɛ kum’ Yisa
(Matiu 27.15-26; Maak 15.6-15; Jɔn 18.39—19.16)
13Ka Gomna Pailɛt daa lan laɣim maligumaaniba kpamba mini zuɣulaannima ni salo maa zaa na 14nti yɛli ba, “Yi ni zaŋ doo ŋɔ tahi n sanna nti yɛli ni o birigirila yi zuliya la, n vih’ o yi zaa ha ninni, amaa ka bi nya o taali ni yi ni fiɣis’ o shɛlikam zaa zuɣu maa. 15Hal Naa Hɛrɔd gba bi nya o taali, dama o chɛ ka bɛ zaŋ o lab’ ti sanna. Nyamiya, o bi tum tuumbiɛ’ shɛli din simdi kum. 16Dinzuɣu n ni chɛmi ka bɛ fiɛb’ o, ka zaŋ o bahi.”
[ 17Di daa yi nyɛla kali ni Gomna Pailɛt yihi Yɛhudianim’ dansarikanim’ ni yino bahi Yaɣigari Chuɣu dali.] 18Ka bɛ zaa daa duhi bɛ yee yɛli, “Yihimila Barabas bahi, ka ku doo ŋɔ!” 19Barabas daa nyɛla bɛn daa taai duŋ tiŋ’ maa ni yino, ka daa lan nyɛ ŋun ku nir’ ka bɛ kpɛh’ o duu di zuɣu.
20Gomna Pailɛt daa bɔri ni o bahi Yisa, dinzuɣu ka o daa lan lab’ tɔɣisi ba di yɛla maa; 21amaa ka bɛ daa kul mɔhiri vuri yɛra, “Kpahim’ o tabili dapulli zuɣu! Kpahim’ o tabili dapulli zuɣu!”
22Ka Gomna Pailɛt daa bɔhi ba pahi buta, “Bɔzuɣu? Tuumbiɛ’ bɔ ka o lee tum? M bi nya ka o tum tuumbiɛ’ shɛli din simdi kum. Dinzuɣu n ni chɛmi ka bɛ fiɛb’ o, ka zaŋ o bahi.”
23Ka bɛ nini daa mooi ka bɛ mɔhiri vuri yɛri ni o kul kpahim’ o mi tabili dapulli zuɣu. Ka Gomna Pailɛt daa saɣi ti bɛ ni bɔri shɛm maa, 24ka bahi noli ni niriba maa ni yu shɛm maa n-ni zani. 25Ka daa yihi niriba maa ni bɔri do’ so bɛ ni daa kpɛhi duu o duŋ taabu min’ o ninvuɣ’ kubo zuɣu la bahi, ka zaŋ Yisa ti ba ni bɛ niŋ o bɛ ni bɔri shɛm.
Bɛ kpahi Yisa tabili dapulli zuɣu
(Matiu 27.32-44; Maak 15.21-32; Jɔn 19.17-27)
26Bɛ ni daa mali Yisa chani maa ka Sairiini do’ so ŋun yuli daa booni Saimɔn yi tinshee garita, ka bɛ gbaag’ o nti zaŋ Yisa dapulli maa ʒil’ o ni o ʒi li doli Yisa.
27Ka salo pam daa doli Yisa nyaaŋa, ka paɣ’ shɛb’ daa be bɛ ni n-kuhiri ka fabind’ o zuɣu. 28Amaa ka Yisa daa ŋmaligi yɛli ba, “Jɛrusalɛm paɣiba, di kuhiriya n zuɣu, amaa kuhimiyala yi mini yi bihi zuɣu. 29Nyamiya, dahin’ shɛli kanna ka bɛ ni ti yɛli ni paɣiŋɔhi mini paɣ’ shɛb’ bɛn na bi dɔɣi ni bihi ni bi mɔɣi paɣ’ shɛb’ biha mal’ alibarika. 30#Hoz 10.8; Kah 6.16 Di saha bɛ ni ti kuhiri yɛri zoya, ‘Lumiya ti zuɣu na! Ka ni ti yɛri kuŋkuna mi, Limsimiya ti!’ ” 31Ka bɔhi ba, “Bɛ yi niŋ ti’ mahili ŋ-ŋɔ, ka di yi kuui, wula ka di ni be?”
32Ka bɛ daa zaŋ niriba ayi bɛn nyɛ tuumbiɛtumdiba pahi Yisa zuɣu ni bɛ ti ku ba. 33Bɛ ni daa ti paai luɣ’ shɛli din yuli booni Zuɣuŋmaŋ Shee la ka bɛ daa kpahi Yisa tabili dapulli zuɣu, ka daa kpahi tuumbiɛtumdiba ayi maa gba tabili dapula zuɣu n-zaŋ yino sa Yisa nudirigu polo, ka zaŋ ŋun’ la mi sa o nuzaa polo. 34#Yila 22.18 Ka Yisa daa yɛli, “M Ba Naawuni, chɛli paŋ ba, dama bɛ bi mi bɛ ni niŋdi shɛli maa gbinni.” Ka bɛ daa zaŋ Yisa binyɛra pumpu n-sɔŋ n-tɔri tɛte ni bɛ nya bɛ zaa yinoyino ni yɛn di shɛli. 35#Yila 22.7 Ka niriba daa ʒe kpaŋ’ lihir’ o; amaa ka tiŋ’ maa ni kpamba daa maan’ o ansarisi yɛra, “O daa tiligi shɛba, dinzuɣu o yi shiri nyɛla Naawuni ninvuɣ’ gahindili ŋun nyɛ ŋun’ Naawuni Masia, ŋun’ tiligim’ omaŋa!”
36 #
Yila 69.21
Ka tɔbbihi la gba daa maan’ o ansarisi, ka zaŋ komihigu ti o ni o nyu 37ka yɛra, “A yi shiri nyɛla Yɛhudianim’ Naa, nyin’ tiligim’ amaŋa!”
38Ka bɛ daa sab’ sabbu shɛli Giriikili ni mini Latinli ni ni Hiburuli ni n-tabili o dapulli maa zuɣusaa. Ŋ-ŋɔ ka bɛ daa sab’ li: “Yɛhudianim’ Naa la m-bɔŋɔ.”
39Ka bɛ ni daa kpahi tuumbiɛtumdiba ayi shɛb’ tabili dapula m-pahi Yisa zuɣu maa ni yino daa yiɣisi o suhu bahi Yisa zuɣu m-bɔhir’ o, “A pala Masia? Tiligim’ amaŋa, ka tiligi ti pahi!”
40Amaa ka o kpee la daa tah’ o zuɣu ka bɔh’ o, “A bi zɔri Naawuni? A bi nya ka bɛ bahi noli ni bɛ kum’ ti min’ o zaa? 41M min’ a n-simdi lala, dama tinim’ tuma nyɔri ka ti diri ŋɔ; amaa ŋun bi tum taal’ shɛli.” 42Ka ŋmaligi yɛli, “Yisa, ti teemi n yɛla a nam ni.”
43Ka Yisa yɛl’ o, “Yɛlimaŋli ka n yɛr’ a, zuŋɔ dabisili ŋɔ a ni ti be n sani Naawuni yili.”
Yisa kum yɛla
(Matiu 27.45-56; Maak 15.33-41; Jɔn 19.28-30)
44-45 #
Yibu 26.31-33
Luɣ’ shɛlikam zaa daa zibigimi agbaa dɛde zaŋ ti paai kurig’ ata saha, ka wuntaŋ’ daa bi lan ne. Ka chinchin’ shɛli din daa yili Naawuni jɛmbu duu la cheei di sunsuuni m-pirigi buyi. 46#Yila 31.5 Di saha ka Yisa daa kuhi pam yɛli, “M Ba Naawuni, n zaŋ n shia niŋ a nuu ni!” O ni daa yɛl’ lala maa ka o dii bahi.
47Ka sapashin’ so ŋun daa ʒe nimaani nya din niŋ maa ka paɣi Naawuni yɛli, “Yɛlimaŋli, doo ŋɔ shiri nyɛla ŋun ka taali.”
48Ka salo bɛn zaa daa laɣim ʒe nimaani ni bɛ lihi ninliha maa daa nya din niŋ maa. Ka ŋmaligi buri bɛ nyɔri kuna. 49#Luk 8.2-3 Ka Yisa nimmiriba zaa mini paɣ’ shɛb bɛn daa dol’ o yi Galili na daa ʒe kpaŋ ha n-nya dimbɔŋɔnim’ zaa.
Yisa sɔɣibu
(Matiu 27.57-61; Maak 15.42-47; Jɔn 19.38-42)
50Do’ so daa beni ka o yuli booni Yisifu. O daa nyɛla Yɛhudia tin’ shɛli din yuli booni Arimatia la nira, ka daa nyɛ Yɛhudianim’ jintɔriba ni yino ŋun nyɛ bilichina ni wundabili. 51O daa nyɛla ŋun yuuni Naawuni nam kandina soli, ka daa bi yu o tab’ la ni daa lo ni bɛ niŋ Yisa shɛm la. 52Ŋuna n-daa chaŋ Gomna Pailɛt sani nti suh’ o soli ni o chɛ ka o zaŋ Yisa ti sɔɣi. 53Ka Yisifu daa bo bimpiɛlli chaŋ ti siɣisi Yisa dapulli maa zuɣu na n-zaŋ bimpiɛlli maa niŋ o n-zaŋ o ti sɔɣi sil’ shɛli bɛ ni daa chib’ tampiŋ ni ka na ʒi n-sɔɣ’ so di ni la. 54Dindali maa daa nyɛla Vuhim Dabisili dazɔhigu dali, ka Vuhim Dabisili maa yɛn kpe.
55Ka paɣ’ shɛb’ bɛn daa doli Yisa yi Galili na la daa doli Yisifu chaŋ ti nya siliga maa ni bɛ ni sɔɣi Yisa shɛm; 56#Yibu 20.10; Zal 5.14 ka daa lab’ kuli ti bo tulaale mini kpaʒiɛrim zali.
Ka bɛ daa vuhi Vuhim Dabisili dali maa kaman zaligu ni wuhi shɛm.
Obecnie wybrane:
Luk 23: RLDB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Red Letter Dagbani Bible © Bible Society of Ghana, 2011