Juan 2
2
To pakalun ka Kana
1Ket ito kalpasan niya duwa nga algew, uwed pakalun enna Kana, nga isa nga ili iya prubinsiya nga Galilya. Uwed antuni ya ina ne̍ Je̍sus nga makipacpakalun. 2Ket naawis met pe̍ nge̍ Je̍sus se̍ dito adalan na nga nawe̍ nakipakalun. 3Ket to napasamac enna pagpapakalunan, naamin mettin to basi da nga ubas. Itu nga kinunen nito ina ne̍ Je̍sus igina, “Naaminan da ka basi yin,” kunen na.
4Ket e̍ Je̍sus, kinunen na, “Ina, masapul nga iiyaken nas ya makaemmu kadiya wangwanglec. Madi pekkem nadatngan ya timpuc,” kunen na.
5Ket to ina ne̍ Je̍sus, kinunen na kadiya agsirsirbi iyan, “Orey nagan ya ibaga na dakayu, tungpalen nu was, a,” kunen na.
6Ket diya Hudyu, uwed alagaden niya pammati da maipanggep iya panagbeggu, itu nga uwed ennem antuni nga dadackel nga burnay nga batu, nga papayan ka danum. Ket dito burnay, aglaun ya tunggal isa ka pasar sangagasut nga litru. 7Ket kinunen ne̍ Je̍sus kadito agsirsirbi, “Pennuwen nu ka danum diyan nga papayan,” kunen na. Ket pinnu da ngarud dito papayan agingga nga naninib da. 8Kalpasan na, kinunen manin ne̍ Je̍sus igida, “Ket ita, kumod kayu ket ipen nu iya manput,” kunen na.
Ket winangel da ngarud ya agten iyan. 9Ket ito naramanan nito manput to danum, ket basi met gayamin. Ngem madi na emmu ya naggayatan niyan nga basi. Ngem dito agsirsirbi nga gennung, emmu da met. Ket to manput, pinalbe̍t na to mangasawa. 10Ket kinunen nito manput igina, “Gangey diya toltoley nga ipasangu nga mona ya kaimasan nga basi, ket se̍ da nad ipasangu ya kadawyan nga basi no adu ya nainum diya sangaili yin. Ngem dakayu, nipodi nu met ya kaimasan nga basi!” kunen na.
11Ket yan nga inariman ne̍ Je̍sus enna Kana iya prubinsiya nga Galilya, itu ya kaonaan nga nakaskasdaaw nga inariman na. Ket iya agten iyan, nipasingen na ya kinadayaw na antuni, ket namati igina dito adalan na.
12Kalpasan niyan, nawe̍ nge̍ Je̍sus ka Kape̍rnaum nga kabulun na nge̍ ina na, se̍ dito kakabsat na nga lalaki, pati dito adalan na. Ket nagedyan da antuni ka sumagpipiga nga algew.
To panangpatalew ne̍ Je̍sus kadito aglaclaku ka Te̍mplu
Mat. 21:12-13; Mar. 11:15-17; Luk. 19:45-46
13Ket itun, dandani yin to padaya diya Hudyu nga maawagan ka Padaya Nitatalib. Ket nanang-at nge̍ Je̍sus nga nawe̍ ka He̍rusale̍m nga makipadaya. 14Ket enna emwag niya Te̍mplu, nadateng ne̍ Je̍sus diya aglaclaku ka baka, karne̍ru se̍ kalapati, ket uwed da pe̍ toley nga agtugtugew iya puwe̍stu da nga agisucsukat ka kuwarta. 15Ket e̍ Je̍sus, nagariman ka babaut nga tali, se̍ na da pinagtalew nga amin iya emwag niya Te̍mplu, agraman dito baka se̍ karne̍ru. Niwarawara na met ya kuwarta dito agisucsukat, ket binalintukang na dito lamlamisaan da. 16Ket binilin na dito aglaclaku ka kalapati, nga kinunen na, “Iruwar nu pe̍ didi! Bekken nu nga pagbalinen nga tindaan ya baley ne̍ Amac!” kunen na.
17Ket ito nasingen dito adalan na ya winangel na, nalagip da to naisurat iya Bibliya nga kunen na, “Apu Diyus, arig nga apuy nga mangung-ungew iyaken ya panangipateg ku iya baley mu.”
18Ket itun, gapu ito winangel ne̍ Je̍sus iya Te̍mplu, kinunen diya pangpangulu diya Hudyu igina, “Nagan kad ya maipasingem nga pagilasinan, tasun ipanecnec mu dakami ya kalinteggam nga mangariman idi?” kunen da.
19Ket nisungbat ne̍ Je̍sus nga kinunen na, “Lasangen nu yani nga pagdaydayawan e̍ Apu Diyus, ket bangunec mettas ka unus tellu nga algew,” kunen na.
20Ket kinunen dito pangpangulu diya Hudyu igina, “Ahah! Mabangun mu ka unus tellu nga algew? Eppat nga pulu ket ennem nga dagun nga inar-ariman da yani nga Te̍mplu,” kunen da.
21Ngem e̍ Je̍sus, ya pagdaydayawan nga kinagi na, itu ya beggi na mettas. 22Itu ya gapu na nga ito napagungar nge̍ Je̍susin, nalagip dito adalan na nga kinagi na yan. Itu nga namati da ngarud ito naisurat iya Bibliya se̍ ito kinagi ne̍ Je̍sus.
Emmu ne̍ Je̍sus ya uwed iya lemlemmet niya toley
23Ket itun, uwed nge̍ Je̍sus ka He̍rusale̍m ito madama ya timpu Padaya Nitatalib. Ket adu diya namati iya turay na, gapu ta nasingen da diya nakaskasdaaw nga pagilasinan nga inar-ariman na. 24Ngem e̍ Je̍sus, madi nagtalec iya panamati da, ta emmu na met ya uwed iya lemlemmet diya amin nga toley. 25Itu nga madi na masapul ya mangibaga igina maipanggep iya gangey toley, ta emmu na nga sigud ya uwed kadiya lemlemmet diya toley.
Obecnie wybrane:
Juan 2: YBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 1990 New Tribes Mission, Sanford, FL 32771-1487, USA.
Printed in the Philippines.