MATIUS 4
4
Fafrowes ro sup ḇeursḇa
4:1-11
(Mrk. 1:12-13; Luk. 4:1-13)
1 #
Ibr. 2:18, 4:15 Raimnai Rurya dun Yesus ḇe sup ḇerursḇa insa Isma fafrowes ro Ibiris. 2Ma ḇyefarfor ras ma roḇ samfur rifiak kwar, papupesya Yesus Ibiser. 3Raimnai ḇefararwrowesya ryama ma ikofen faro I: “Kaku Au Rumkun Allah, buk sasoser insa karu nane nemamami.”
4 #
Ul. 8:3
Ḇape Yesus kyarem: “Fas-fasya isya: ‘Snonkaku sikenem snar mamamiya dererḇa ḇape ro wos oser-oser ḇesasyar ro Allah sḇari.’ ”
5Ḇarpur Ibiris dun Iḇe Mnu Ḇasrenya ma ryir I ro Rum Allah bunemya, 6#Mzm. 91:11-12 raimnai ikofen faro I: “Kaku Au Rumkun Allah, wasawen mankundau snar fas-fasya isya:
‘Ḇekur Au Allah syoser malaikat-malaikatsya
ma nari skansin fa siser Au kuker siḇrasna insa wemin besu susbui awer ro karui.’ ”
7 #
Ul. 6:16
Yesus Ikofen faro i: “Fas-fas oso isya kako: ‘Wafrowes awer Manseren Allah bedi!’ ”
8Raimnai Ibiris dun I wer ḇe bon ḇekaki kaku ma fyasnai faro I ḇaḇesasoser ḇeḇor kam ro supswan ine kuker payamyum ḇyena, 9ma ikofen faro I: “Nanekam nari jaḇukna faro Au, rofyor Ban suba ḇo wasyom aya.”
10 #
Ul. 6:13
Inja Yesus Ikofen faro i: “Ibiris, wabur Aya! Snar fas-fas isya: Mḇoi wasyom faro Manseren, Allah bedi, ma derer faro I monda ḇenadi!”
11Raimnai Ibiris ibur I, mamkada, ma malaikat-malaikat srama fa suf farmyan Yesus.
Yesus ryama ḇe sup Galilea
4:12-17
(Mrk. 1:14-15; Luk. 4:14-15)
12 #
Mat. 14:3; Mrk. 6:17; Luk. 3:19-20 Ḇape rofyor Yesus Imnaf, mḇoi sfor Yohanes ikwar I syof bur ḇe Galilea. 13#Yoh. 2:12 Ibur Nazaret ma kyain ro Kapernaum, ro danosen andirya, ro supya fyor Zebulon ma Naftali, 14insa ḇyeimnis wos Manseren Ikofen kuker sḇayo Nabi Yesaya:
15 #
Yes. 8:23–9:1
“Sup Zebulon ma Naftali,
nyan ḇeso munda, ḇe sup war Yordan ḇarya,
isoine Galilea, sup er-er ḇese, –
16er ḇekain ro pampan,
smam kwar Isnai ḇeba ma faro ḇekain ro sup kadarin marmar,
Isnaiya dek kwar faro si.”
17 #
Mat. 3:2
Ro fafisu ani Yesus ḇyaryas: “Mkombror, snar Ḇaḇesasoser Boiyas fyanam kwar!”
Yesus dor manfamyan ḇeponsya
4:18-22
(Mrk. 1:16-20; Luk. 5:1-11)
18Ma rofyor Yesus Isya imbran sye danosen Galilea, myam manbekanayek risuru, isoine Simon sap kako ḇe Petrus ma ḇedar ḇyedi, Andreas. Suisya ssunap pam ro danosen, snar su mandaswan in. 19Yesus Ikofen faro su: “Murama, muso Aya, insa Yana muḇe mandaswan snonkaku.” 20Inja fafisuya beri subur pam suḇena ma suso I.
21Ma rofyor Yesus Ibur moḇ ani kwar, myam manbekanaek risuru wer, isoine Yakobus Zebedeus mandaḇendi kuker ḇedar ḇyedi Yohanes, sufnoḇek kma suḇedi, Zebedeus, skoisya skoyanem pam ḇe waiya. Yesus dor su, 22fafisuya beri subur waiya kuker kma suḇedi, ma suso I.
Yesus ḇyuk farkarkor ma pararei faro kawasa sibor
4:23-25
(Luk. 6:17-19)
23 #
Mat. 9:35; Mrk. 1:39 Yesus Imbran yar sup Galilea ḇesiper; ma ḇyuk farkarkor ro rum nadi sena ma ḇyaryas Ankankinem Ḇeḇye ro Ḇaḇesasoser Allah ma ḇyuk pararei faro snonkaku ḇeduf ma ḇeḇeroro sibor ro fandu er ine. 24Inja ḇyesno-sno ro sup Siria ḇesiper ma ssun faro I snonkaku ḇeduf ḇepyumba sya kam, ḇeduf dafduf ḇeḇor kam ma ḇeḇeroro, rur ḇemaḇaksya sower si, ma ḇeduf mandai ma ḇepapipen, ma Yesus ḇyuk pararei faro si. 25Ma kawasa sibor kaku semarani ma siso I. Sramuma ker Galilea ma Dekapolis, ro Yerusalem, ro Yudea ma Yordan ḇarya.
Obecnie wybrane:
MATIUS 4: LAIBHW
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj