Jâŋ 11
11
Yěso ghʉ Lazâa zʉ̂ʉ lə̂ ləwʉ̂
1Cǒ ŋuu lə pə́ wó, ləjôghʼ yé pə̂ Lazâa, ə́ ngʉ̌ ngí pfúŋ ghou, gháp pə pəfə̌r pé pə́pwô pi pəngyě pə̂ ncî cər lâʼ Betanî, ə́ mbə́ Máatə gháp Mǎyaa. 2Mǎyaa wêi pə̂ yi a lǎʼ ndǎghʼ ləmə́ndaa ńzóʼ məku Nde, ə́ ndǎghʼ mənyuŋu tû mé ńzǎghʼ lə̂. Lazâa yi a lə ghou pə̂ fə̌r ye. 3Pəfə̌r pé pêi pə́pwô tə̂u ŋuu ńgó a wó ndǎʼ lə́ Yěso ngô: «Ə́ Nde sə̌u ləpe gho pə̌ ngǒu.» 4Yěso zûʼ yə́rə́, ə́ ndáʼ ngô: «Yo ghou kâa pə́ yi ləwʉ̂, ə́ pə́ pə́ yi pye wo fú mə́u ə́ jwó mətəʉ Sê, ə́ ŋə́ ləghûʼ Môu ye.» 5Yěso lə koŋ Máatə gháp Mǎyaa lə́ Lazâa gháʼate. 6A lə zûʼ no ghou gháʼa, ə́ nkʉʼʉ́ nyáŋ yʉʼ yi a lə pə́ wó leʼé pwô. 7Ə́ ncʉ́ʼ ndáʼ lə́ ngaŋə-jyêʼ-no yé ngô: «Paghʼə pə̂ʉ lə̂ Yudêi.» 8Ngaŋə-jyêʼ-no yé pwor lə́ zʉ́ ngô: «Cícye ə́ kə́ cî yé ghíʼ pəyúda lə pə́ ndôu ńdághʼ məghǒ ńtə́m gho wó ńjwí; o kə́ cí pə̌ʉ lə̂ wó áa?» 9Yěso lâʼ lə́ páp ngô: «Lə́u tâʼ leʼé-lâʼ ghwo pəmə́nəu ntsap pwô lə̂ ləghə̂m péh? Ŋuu lə̌i mə́ ŋə̂i ntə̌ʉ-nəu a kôtə yé po ńté ńgó nkeʼ nzʉ̂ wo ghʉ̌ a jwó yʉʼ. 10Lə́ ŋuu lə̌i mə́ ŋə̂i lətwûʼ, a kôtə ńté ńgó yʉʼ kâa pə́ fwô yé mbi zʉ́.» 11Yěso lâʼ yə́rə́ tə ə́ kuʼ, a nkə́ ncí ndáʼ ngô: «Sə̌u wághʼə Lazâa pə̌ ndé, lə́ n ngwǒ jyě yé.» 12Ngaŋə-jyêʼ-no yé cʉ̂ʼ ndáʼ lə́ zʉ́ ngô: «Ə́ Nde, ə́ lə̌i mbə́ yi a pə̌ ndé mə́i a wo shwítə́.» 13Yěso lə laʼ gháp gháʼá ńgó Lazâa kwʉ mə́, lə́ gháp kwaŋ záp pə́ ńgó a lâʼ ńgó a lê lě. 14Ə́ pə̂ yə́rə́, Yěso fû sâa-sǎa ndǎʼ gháp ngô: «Lazâa kwʉ mə́. 15Ə́ pôŋ ghâa gháʼate ńté wéi, ghíʼ a tə̌i ngǐ nkwʉ́, káa m mbə̂ ghâa yʉʼ wó. Pei wo lěi lə́ ləwʉ̂ ye wêi, pə̂i-ntə̂ʉ zéi nzəm məŋ kʉʼʉ́ ngúʼ. Lə́ Paghʼə lə́r mpfu wo lə̂ mbəʉ zʉ́!» 16Ə́ pə̂ yə́rə́, Tomásʉ yi ləjôghʼ yé yi məsəu ə̂ Môu-ləfâghʼ lâʼ lə́ pəcó ngaŋə-jyêʼ-no ngô: «Pei tó, ə́ pə wó nǎa wághʼə pə Nde njwí lə.»
Yěso ŋuu yi a ghʉ pə́ zʉ̂ʉ lə̂ ləwʉ̂, ə́ mbou ngʉ́ pə́ pə̂ wó
17Yěso lə̂r tə nkə́u wó, ə́ nzúʼ ńgó Lazâa ghʉ mə́ leʼé ləkwo cər ləshi. 18Ghíʼ ə fú Yelúsalêm ńkə́u Betanî lə pə́ pə̂ no zə̂u pəkíləu mítə pə́tárə́ lə̂, 19ə́ ghi pə́ mə́i pye Yudêi tə nzáa tó mə́ ḿbə́ nzeʼ Mǎyaa gháp Máatə lə̂ nzâghʼ nci nyôghʼ gháp, ńté ghíʼ fə̌r gháp kə kwʉ́. 20Máatə zûʼ ńgó Yěso pə̌ ntó, ə́ ngǐ lə̌r lə̂ ngwó mbəutə́ yé, Mǎyaa cʉ̂ʼ nyáŋ ndə̂. 21Máatə tô ńdáʼ lə́ Yěso ngô: «Ə́ Nde, o kə gháʼa mbə́ yaʼa gháʼa, mə́i káa fə̌r ghâa kə kwʉ̂ yé. 22Lə́ tə mbaa pə̂ mpfu wo, m mə̌ njî ńgó o lə̌i ndóu pə̂ hó mbó Sê, mə́i a wo ŋə́ lə́ gho.» 23Yěso lâʼ lə́ zʉ́ ngô: «Fə̌r gho ghʉ̌ zʉ́ʉ lə̂ ləwʉ̂.» 24A lâʼ ngô: «M mə̌ njî ńgó a ghʉ̌ zʉ́ʉ lə̂ ləwʉ̂ ə́ mpfu yi pəpfû ghʉ̌ zʉ́ʉ lə́ ndyəghʼ-nzəm leʼé.» 25Yěso lâʼ lə́ zʉ́ ngô: «Mə̂ŋ ŋuu yi a ghʉ pə́ zʉ̂ʉ lə̂ ləwʉ̂, ə́ mbə́ ŋuu yi a ghʉ pə́ pə̂ wó. Ŋuu lə̌i ncóghʼ ntə̂ʉ yé lə́ məŋ, ə́ mbəi nkwʉ́ kwʉ́, mə́i a ghʉ̌ kə́ pə́ pə́ wó. 26Ŋuu lə̌i mbyěr ndəu nzʉ̂ yaʼa, ə́ ncóghʼ ntə̂ʉ yé lə́ məŋ, a lâʼ nkwʉ̂ yé po, tə o pə̌i yo no?» 27A lâʼ ngô: «Ə̂ŋ Nde, m mbə̌i ńgó ô Nzaʼ-nkʉ, ə́ mbə́ Môu Sê yi pə́ cî nzʉ́ʼtə ńgó a tó cər nzʉ̂ lə̂.»
Yěso pə̌ ndǎa
28Máatə lâʼ yə́rə́, ə́ ngwo fúŋ fə̌r ye Mǎyaa, ə́ ntsəmtə́ lə́ zʉ́ ngô: «Cícye pə́ péi mə́ ndâʼ ńgó ô tó.» 29Mǎyaa zûʼ yə́rə́, ə́ ntə́u sê ə́ ngwo cə́r yé. 30Ə́ ghi pə́ mə́i Yěso kə́ tô yé tə nkə́u cər lâʼ, ə́ mbyér pə́ yʉʼ yi Máatə lə tó wó ə́ mbə̂utə́ yé lə̂. 31Pye Yudêi pi gháp yǎa ntó lə̂ nzâghʼ nci nyôghʼ Mǎyaa jwô ghíʼ a fǔ ndə̂ nkwǎr lə̂ təʉ, ə́ ntsə́ʉ nzəm zʉ́, ə́ nkwaŋ záp pə́ ńgó a lər lə̂ ngwó ńnyáŋ tû-lə́shi ə́ ndâa. 32Mǎyaa lə̂r tə nkə́u yʉʼ yi Yěso lə pə́ wó, ə́ nděi tə njwó yé, ə́ shíʼ ńkʉ́ʼtə́ mbi zʉ́ ə́ ndǎʼ ngô: «Ə́ Nde o kə pə́ ghíʼi mbə́ yaʼa, mə́i kâa fə̌r ghâa kə kwʉ̂ yé.» 33Yěso jwô ghíʼ a pə̌ ndǎa, pye Yudêi pi gháp pə pǎp tə́i nǎa ńtó kə̂ mə́ ndâa záp, ə́ kə̂u yé, mbəʉ ye cyêtə. 34A túŋu gháp ngô: «Pei kə lóʼo pfû yé ghó?» Gháp pwor lə́ zʉ́ ngô: «Ə́ Nde, tó ńjwó.» 35Yěso lâa. 36Pye Yudêi lâʼ təcər páp ngô: «Pei jwó mbə̂u yi a lə laghʼ ńkôŋ yé.» 37Pəcó pə̂ ndâʼ záp ngô: «Zʉ́ yi a lə ghʉ̌ fwoghʼ-mə́nyôghʼ jwô yʉʼ; káa a kə póu nkuʼ yé lə̂ ngʉ́ tə lə́u Lazâa kwʉ̂ po áa?»
Yěso ghʉ Lazâa zʉ̂ʉ lə̂ ləwʉ̂
38Ə no ləwʉ̂ zei kə̂ ncí nkə́u Yěso pə̂ shwi shwî, a lə̂r lə̂ tû-lə́shi, ə́ pə̂ cǒ nguʼ yi pə́ lə lǎghʼ tə́koʼ ləghǒ ńgúʼú ntsʉ wěi. 39Yěso lâʼ ngô: «Pei tyêtə́ ləghǒ yo!» Máatə fə̌r mpfû lâʼ ngô: «Ə́ Nde, a wo pə́ mpfu wo cʉ́ʼ pə́ ləm ləmə́ ńté ńgó a kə kwʉ́ ə́ pə́ mə́ leʼé ləkwo ghíʼ pə́ kə cóghʼ yé yaʼa.» 40Yěso pwôr lə́ zʉ́ ngô: «Lə́u n ntə̌i ndǎʼ ghô ńgó o lə̌i ncóghʼ ntə̂ʉ ghô lə́ məŋ, mə́i o wo jwó ləghûʼ Sê péh!» 41Pə́ fû ntsʉ wó ńtyétə́ ləghǒ, Yěso pə́ʼə tû yé, ə́ náŋ tʉ́, ə́ ndǎʼ ngô: «Tǎa n ŋə̌ nkhwo lə́ gho ghíʼ o zǔʼ sʉ̂ʉtə zâa. 42M mə̌ njî ńgó o kə̌ mə́ nzûʼ pə̂ sʉ̂ʉtə zâa; lə́ n ntsâr gháʼa ńté pə̂ pye pwo pi gháp pə́ mbəʉ məŋ lo, ńjí ńgó gháp pə́i ńgó gho lə̂ lə ntə́u ghâa.» 43Ə́ ndǎʼ yə́rə́, ə́ ndǎʼ lə́ təʉ ngô: «Lazâa, fú yʉʼ wó nkwǎr!» 44Ə mpfû-sê kwâr, məku mé gháp mbô mé pə̂ mi zə́mtə́ lə̂ zə̂u-ndí, ə́ mbə́ ghíʼ pə́ lə tsúŋtə́ yé ə́ mboŋə́ tʉ́ŋ, sʉ̂ yé kə̂ mbə̂ yé yi zəmtə́ lə́wó. Yěso lâʼ lə́ páp ngô: «Pei kéʼtə́ yé, ə́ nyér yé, â lə̂r.»
Pəkə̌m lâʼ táa mənyaŋ lə̂ njwí Yěso
(Mat 26.1-5; Mks 14.1-2; Lks 22.1-2)
45Pye Yudêi tə nzáa pi gháp lə tó lə̂ ńzâghʼ nci nyôghʼ Mǎyaa jwô zə̂u yi Yěso ghʉ̌, ə́ mbə́i no yé. 46Lə́ pəcó pye təcər páp wo mbyétə́ zə̂u yi Yěso ghʉ̌, ə́ ndǎʼ pəfalísia. 47Pətə́-ndə̂ pənuŋú-poʼ-Sê gháp pə pəfalísia zûʼ yə́rə́, ə́ fúŋ kəitə jwǐ, ə́ mə́ ntúŋu təcər páp ngô: «Paghʼə wo ghʉ gháʼá? Ŋuu wo pə̌ ngʉ mənkəʼə məno gháʼate. 48Paghʼə lə̌i nyér yé a lághʼ faʼ yé ńdə́r lə̂ mbi, mə́i ŋuu ntsəm wo pə́i no yé; pəlóma tó ə́ ngí tǒʼ yé, ə́ mvǒghʼ ndə̂ Sê Yelúsalêm, ə́ mvǒghʼ lâʼ zághʼə lə́wó.» 49Cǒ ŋuu pə̂ təcər páp, ləjôghʼ yé pə̂ Kayífa, a pə̂ tə́-ndə̂ pənuŋú-poʼ Sê lə́ zêi nguʼ, ə́ ndǎʼ lə́ páp ngô: «Káa pei pə́ nzûʼ wéi có zə̂u lə̂ no yi pei laʼ zěi lə̂. 50Káa pei jwó ńgó tâʼ ŋuu lə̌i nkwʉ́ ńté tû lâʼ, paghʼə zʉ̂ pəi, ə́ nděi ghíʼ mboʼ lâʼ tsəm naa nkwʉ́tə́ mo?» 51A lə pə́ tə ndâʼ yə́rə́, lə́ káa laʼ pə́ ndʉʉ zʉ́, a lə laʼ ńté ghíʼ zʉ́ lə́ lə pə́ tə́-ndə̂ pənuŋú-poʼ lə́ zêi nguʼ, ə Sê leitə lə́ zʉ́, ə́ ngʉ́ a cʉ̂ʼ mə́ ntsə́tə Nkəʉ ńgó Yěso wo kwʉ́ ńté tû Pəyúda, 52lə́u kwʉ̂ yé yə́rə́ ńté pə̂ ndáʼ pəyúda po, ə́ kwʉ́ lə̂ ndághʼ ńkəitə́ ghəpə́ Sê pi gháp lə sěi ńkə́u cər nzʉ̂, gháp cʉ̂ʼ tâʼ nou.
53Lə̂ fú leʼé wêi, pəkə̌m pəyúda tâghʼ ńgó gháp wo lǒu məsʉ̂ tə jwí Yěso. 54Ə̂ zə̂u yi ə́ lə ghʉ̌, Yěso fû mpfu wêi, káa pyér pə́ ŋəi yé sâa-sǎa təcər pye Yudêi. Ə́ fú wó ə́ ndə́r lə̂ có paghʼə lâʼ yi ə́ pə́ mbəʉ koŋə-məkwaʼá, ə́ cər có túsoŋ yi pə́ fûŋ ńgó Efərayîm, gháp pə ngaŋə-jyêʼ-no yé cʉ̂ʼ mə́ nyâŋ wó.
55Ə́ lə ghí pə́ yə́rə́, leʼé lətsei Pásʉ́ka pəyúda pə̂ mbáatə́; lələʉ pəyúda fû cər məlâʼ, ə́ nzáʼ nzʉ̂ mbyə̌ghʼ Yelúsalêm lə̂ sóghʼ məlǒʼ máp. 56Gháp kə̂u wó, ə́ mə́ ndôu Yěso; ə́ mbou mbə́ ndə̂ Sê Yelúsalêm mə́ ntúŋu təcər páp ngô: «Pei kwâŋ zéi ńgó hó? Mbə̂ có a tô yé yʉʼ lətsei wo po.» 57Ə́ lə ghí pə́ mə́i pətə́-ndə̂ pənuŋú-poʼ-Sê gháp pə pəfalísia laʼ mə́ ńgó ŋuu lə̌i mə́ njî yʉʼ yi Yěso pə̌ wó, a lâʼ, ńjí ńgó pə́ wo ngǒu yé.
Obecnie wybrane:
Jâŋ 11: NLA
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj